Fluwa nga Pɔlu klɛli Galasifuɛ mun’n

4 N se kɛ yoo: Sɛ aja difuɛ kun te yo bakan’n, kannzɛ ɔ sie ninnge kwlaa’n ɔ nin kanga’n be ti kun. 2 Blɛ sɔ’n nun’n, sran wie’m be niɛn i su, yɛ wie’m be niɛn i ninnge’m be su lele fa ju cɛn nga i si kleli’n. 3 E kusu i nun mɔ e te yo bakan’n, e yoli mɛn’n i akunndan nin i ayeliɛ’n be kanga.+ 4 Yɛ kɛ i blɛ’n juli sɛsɛsɛ’n, Ɲanmiɛn sunmɛnnin i Wa’n. Bla kun yɛ ɔ wuli i-ɔ.+ Ba sɔ’n dili mmla’n su+ 5 naan ɔ́ tó be nga be di mmla’n su’n,+ kɛ ɔ ko yo naan w’a de be naan b’a kaci Ɲanmiɛn i mma mun ti.+

6 Ɔ maan kɛ mɔ siɛn’n amun ti Ɲanmiɛn i mma mun’n ti’n, Ɲanmiɛn sunmɛnnin i Wa’n i wawɛ’n+ kɛ ɔ wa tran e awlɛn’n nun.+ I wawɛ sɔ’n kpan se kɛ: “Aba,* Siɛ!”+ 7 I sɔ’n ti’n, amun timan kanga kun, sanngɛ amun ti Ɲanmiɛn i mma mun. Yɛ sɛ amun ti Ɲanmiɛn i mma mun’n, nn amun ti i aja difuɛ wie.+

8 Sanngɛ i nun nga amun siman Ɲanmiɛn’n, amun ti ninnge nga be timan ɲanmiɛn sakpa’n be kanga. 9 Siɛn’n, amun a si Ɲanmiɛn, yɛ Ɲanmiɛn w’a si amun. ?Yɛ ɔ yo sɛ ti yɛ amun su sa amun sin ko yo ninnge ngbɛnngbɛn+ mɔ be kwlá yoman like fi ye’n ekun-ɔn? ?Ɔ yo sɛ ti yɛ amun kunndɛ kɛ amún yó be kanga ekun-ɔn?+ 10 I wie yɛle kɛ cɛn wie mun, nin anglo wie mun,+ nin blɛ wie mun, ɔ nin afuɛ wie mun be ti amun cinnjin kpa. Yɛ amun di be ti cɛn. 11 N kunndɛman kɛ ukalɛ mɔ n miannin min ɲin n ukali amun’n, ɔ yo ngbɛn.

12 Aniaan mun, amun yaci, amun yo kɛ min sa. Afin laa’n, n kusu n ti kɛ amun sa.+ Amun a yoman min tɛ. 13 Amun si kɛ kpɛ klikli nga ń bó jasin fɛ’n ń klé amun’n, tukpacɛ m’ɔ tɔli min su’n ti yɛ n kwla yoli sɔ-ɔ. 14 Min tukpacɛ sɔ’n ti’n, amun fɛli. Ɔ nin i sɔ ngba’n, amun a yoman min finfin, yɛ min wun w’a yoman amun tɛ.* Sanngɛ amun sɔli min nun kɛ Ɲanmiɛn i anzi wie sa. Amun sɔli min nun kɛ Klisi Zezi sa. 15 ?Aklunjɔɛ nga amun di i laa’n wo nin? Afin n lafi su kpa kɛ blɛ sɔ’n nun’n, sɛ ɔ ti kɛ amun kwla tutu amun ɲinma mun be man min’n, nn amun tutuli.+ 16 ?Ndɛ nanwlɛ mɔ n kan kle amun’n ti’n, m’an kaci amun kpɔfuɛ? 17 Sran wie’m be kunndɛ kɛ amun su be su, sanngɛ nán amun kpa yolɛ ti yɛ be yo sɔ-ɔ. Be waan bé yó sɔ naan amun nin min bu naan amun nin be mantan kpa. 18 Sɛ sran wie kunndɛ kpa kɛ amun su i su’n naan amun kpa yolɛ ti yɛ ɔ yo sɔ’n, ɔ ti kpa. Sanngɛ nán maan ɔ yo sɔ blɛ mɔ n wo amun wun lɛ’n i ngunmin nun. 19 Min mma kanngan mun,+ amun ti’n n su fɛ ekun kɛ bla wie m’ɔ su wu ba’n sa. Ń fɛ́ sɔ lele naan amun kaci kɛ Klisi sa. 20 Sɛ ɔ ti kɛ e nin amun e kwla tran dɔ nga su naan n kan ndɛ’n i wafa uflɛ ekun n kle amun’n, ɔ́ yó min fɛ. Afin n wunman kɛ n yo amun-ɔn.

21 Min waan yoo: ?Amun mɔ amun kunndɛ kɛ amún nánti mmla’n su’n, amun a timan ndɛ nga Mmla’n kan’n? 22 I wie yɛle kɛ be klɛli i kɛ Abraamun wuli ba yasua nɲɔn. Ɔ nin afanniɛn talua’n be wuli kun,+ yɛ ɔ nin diewa bla’n be wuli kun.+ 23 Afanniɛn talua’n wuli i wa liɛ’n kɛ be fa wu ba kwlaa sa.+ Sanngɛ diewa bla’n i liɛ’n, nda mɔ Ɲanmiɛn tɛli i’n ti yɛ ɔ kwla wuli ba-ɔ.+ 24 Sa sɔ’m be le bo. Afin bla nɲɔn sɔ’m be ti aenguɛ nɲɔn be nzɔliɛ. Be trali aenguɛ sɔ’m be nun kun Sinai Oka’n+ su lɔ. Agaa yɛ ɔ ti aenguɛ sɔ’n i nzɔliɛ-ɔ. Ba nga be wuli be aenguɛ sɔ’n ti’n, be ti kanga. 25 Ɔ maan Agaa ti Arabi lɔ Sinai Oka’n+ i nzɔliɛ, yɛ ɔ ti Zerizalɛmun klɔ m’ɔ o lɛ andɛ’n i nzɔliɛ, afin Zerizalɛmun klɔ’n nin i mma’m be ti kanga. 26 Sanngɛ Zerizalɛmun m’ɔ o ɲanmiɛn su lɔ’n i liɛ’n, ɔ timan kanga, yɛ ɔ ti e nin.

27 Afin be klɛli i Ɲanmiɛn Ndɛ’n nun kɛ: “Mmo bla, wɔ mɔ ɔ klun ti kpan’n, wɔ mɔ w’a wuman ba’n, maan ɔ klun jɔ. Wɔ mɔ ba wulɛ aklunya nin-a tɔman ɔ su le’n, bo sro, aklunjɔɛ mɔ a di’n ti. Afin bla nga be yacili i’n, i mma’m be sɔnnin kpanngban kpa tra bla nga bian’n ti i liɛ’n.”+ 28 Aniaan mun, amun kusu amun ti kɛ Izaaki sa. Ba nga Ɲanmiɛn tali nda mɔ be wuli be’n, be yɛle amun.+ 29 Ba nga be wuli i kɛ be fa wu ba kwlaa sa’n, ɔ kleli kun nga Ɲanmiɛn wawɛ’n yoli maan be wuli i’n, i ɲrɛnnɛn.+ Kɛ dɔ nga su ɔ ti sɔ-ɔ.+ 30 ?Sanngɛ Ɲanmiɛn ndɛ’n se sɛ? Ɔ se kɛ: “Kan afanniɛn talua’n nin i wa’n be bo. Afin ɔ fataman mlɔnmlɔn kɛ afanniɛn talua’n i wa’n i dunman tɛ aja like nga diewa bla’n i wa’n wá ɲɛ́n’n nun.”+ 31 Ɔ maan aniaan mun, nán afanniɛn talua’n i mma mun yɛle e, sanngɛ e ti diewa bla’n i mma mun.