Fluwa klikli nga Pɔlu klɛli Timote’n

3 Ndɛ ng’ɔ o yɛ’n ti nanwlɛ: Sɛ sran kun kunndɛ kɛ ɔ́ dí asɔnun sunianfuɛ junman’n,+ nn junman kpa yɛ ɔ kunndɛ kɛ ɔ́ dí-ɔ. 2 I sɔ’n ti’n, maan asɔnun sunianfuɛ’n ɔ yo sran mɔ be kwlá sacimɛn i wun kaan sa’n. Maan ɔ yo sran mɔ i yi’n ti kunngba’n, maan ɔ yo ninnge mun be nuan su sɛsɛ sa’n kwlaa nun, maan ɔ yo ngwlɛlɛfuɛ,+ nán maan ɔ yo ninnge mun sukusuku, maan ɔ yo sran m’ɔ sɔ sran nun klanman’n,+ yɛ maan ɔ si like kle,+ 3 nán maan ɔ yo nzanbɔɛfuɛ,+ nán maan ɔ yo i wiengu’m be kpokokpoko,* nán maan i like yolɛ yo ya,+ nán maan ɔ yo ndɛnngan klofuɛ,+ yɛ nán maan ɔ yo sika klofuɛ,+ 4 maan ɔ si i bɔbɔ i awlobo’n i su nian kpa, maan ɔ fa ngwlɛlɛ sie i mma mun.+ 5 (?Afin sɛ sran kun simɛn i bɔbɔ i awlobo’n su nian’n, ɔ́ yó sɛ naan w’a kwla nian Ɲanmiɛn i asɔnun’n i lika?) 6 Asa ekun’n, nán maan ɔ yo sran mɔ blɛ li yɛ w’a kaci Klisifuɛ-ɔ.+ Afin ɔ cɛman naan w’a tu i wun naan fɔ nga be buli Suɛn Tɔnfuɛ’n, b’a bu i wie. 7 Asa ekun’n, maan gua su lɔfuɛ’m be bo i dunman kpa.+ I liɛ’n, ɔ su wunman ɲannzuɛn, yɛ ɔ su tɔman Suɛn Tɔnfuɛ’n i aya’n nun.

8 Maan asɔnunfuɛ’m be ukafuɛ’m be kusu be yo sran mɔ be nin aɲinyiɛ fata’n, nán maan be nuan nun yo nɲɔnnɲɔn, nán maan be nɔn nzan* ngboko, nán maan be yo sran mɔ be ɲin ti kpli mɔ be klo lufle’n.+ 9 E Min’n i su lafilɛ ndɛ m’ɔ ti fiawa’n, maan be tra nun kpa. Yɛ maan be akunndan’n yo sanwun.+

10 Maan be dun mmua sa be nian, sɛ be nin junman sɔ’n i dilɛ fata-o. I sin’n, sɛ b’a wunman sa tɛ fi be wun’n,+ maan be di asɔnunfuɛ’m be ukafuɛ junman’n.

11 Maan bla’m be kusu be yo sran mɔ be nin aɲinyiɛ fata’n, nán maan be yo sran wun sacifuɛ,+ maan be yo ninnge mun i nuan su sɛsɛ sa’n kwlaa nun, maan be kle kɛ be lafi Ɲanmiɛn su sa’n kwlaa nun.+

12 Maan asɔnunfuɛ’m be ukafuɛ’n ɔ yo sran mɔ i yi’n ti kunngba, m’ɔ si i mma mun nin i awlobo’n be su nian kpa’n. 13 Afin be nga be di junman kpa’n, be le ɲrun. Yɛ be kan Klisi Zezi mɔ e lafi i su’n i ndɛ weinwein.

14 Kannzɛ n sunnzun kɛ ń kɔ́ ɔ wun lɔ koko nga nun’n, sanngɛ ń klɛ́ ndɛ sɔ mun ń blɛ́ wɔ. 15 I liɛ’n, sɛ a wun kɛ n su cɛ’n, á sí like ng’ɔ fata kɛ a yo i Ɲanmiɛn i awlo’n nun’n.+ Awlo sɔ’n yɛle Ɲanmiɛn m’ɔ lafiman’n i asɔnun’n. Sɛ ndɛ nanwlɛ’n ti sua’n, nn é sé kɛ asɔnun’n ti i ja mlomlo, yɛ ɔ suɛn i bo. 16 Nanwlɛ, nantilɛ mɔ be nin Ɲanmiɛn be nanti klanman’n i su ndɛ m’ɔ ti fiawa’n, ɔ ti cinnjin dan. Ndɛ sɔ’n yɛle kɛ: ‘Ɔ kacili klɔ sran,+ yɛ Ɲanmiɛn maan ɔ kacili aolia nun sran+ ekun fa kleli kɛ ɔ bu i sran kpa, ɔ yili i wun nglo kleli anzi mun,+ be kɛnnin i ndɛ nvlenvle’m be nun,+ yɛ mɛn’n nunfuɛ’m be lafili i su,+ be sɔli i nun ɲanmiɛn su lɔ, yɛ ɔ ɲannin ɲrun.’