Fluwa nɲɔn su nga Pɔlu klɛli Korɛntifuɛ mun’n

1 Min Pɔlu mɔ Ɲanmiɛn maan n ti Klisi Zezi i akoto’n, min nin e niaan bian Timote+ é fá fluwa nga é kó mán Ɲanmiɛn i asɔnun ng’ɔ o Korɛnti lɔ’n, ɔ nin Ɲanmiɛn i sran nga be o Akai wunmuan’n nun’n be kwlaa.+

2 Maan e Si Ɲanmiɛn nin e Min Zezi Klisi be yo amun ye, yɛ maan be yo naan amun di fɔundi.

3 Maan manmanlɛ’n yo e Min Zezi Klisi i Si Ɲanmiɛn+ liɛ. Ɔ ti Siɛ m’ɔ si sran aunnvɔɛ dan,+ yɛ ɔ ti Ɲanmiɛn m’ɔ fɔnvɔ sran sa kwlaa nun.+ 4 Ɔ fɔnvɔ e* sa kwlaa nga be tɔ e su’n be nun.+ Ɔ maan fɔnvɔlɛ nga Ɲanmiɛn fa fɔnvɔ e’n,+ e kusu e kwla fa fɔnvɔ sran uflɛ+ sa kwlaa nun. 5 Afin kɛ nga Klisi ti’n e wun e ɲrun dan’n,+ i wafa kunngba’n, Klisi ti’n e ɲan fɔnvɔlɛ dan. 6 Sɛ sa kekle tɔ e su’n, amun fɔnvɔlɛ nin amun delɛ ti-ɔ. Yɛ sɛ be fɔnvɔ e’n, amun kusu amun fɔnvɔlɛ ti-ɔ. Afin fɔnvɔlɛ sɔ’n úka amun naan sɛ sa kekle kunngba ng’ɔ o e su’n tɔ amun su wie’n, amun kusu amun a kwla jran kekle. 7 E lafi amun su kpa. E si kɛ amun wun ɲrɛnnɛn kɛ e sa. I wafa kunngba’n, amún wá ɲán fɔnvɔlɛ kusu kɛ e sa wie.+

8 Afin aniaan mun, e kunndɛ kɛ amun si kɛ ɲrɛnnɛn tɔli e su Azi mɛn’n nun lɔ.+ Sa ng’ɔ tɔli e su lɔ’n, w’a yoman blɛblɛ, ɔ trali e wunmiɛn’n su. Ɔ maan blɛ sɔ’n nun’n, e siman sɛ é wú-o annzɛ e su wuman-o.+ 9 Nanwlɛ, ɔ ti kɛ b’a bu e fɔ kɛ be kun e sa. Sa sɔ’n juli naan y’a lafiman e bɔbɔ e wun su. Ɔ juli naan e lafi Ɲanmiɛn+ m’ɔ cɛn be nga be wuli’n i su. 10 Sa sɔ mɔ i ti’n, ɔ ka kan naan y’a wu’n, i nun’n ɔ deli e. Ɔ́ dé e ekun, yɛ e wla o su kɛ ɔ́ dé e titi.+ 11 Amun kusu amun kwla uka e wie. Yɛle kɛ amun srɛ Ɲanmiɛn kpa man e.+ Afin sɛ sran kpanngban be srɛ Ɲanmiɛn man e’n, ɔ́ tíe yɛ ɔ́ úka e. Yɛ i sɔ’n ti’n, sran kpanngban kpa bé lɛ́ i ase.+

12 Like nga e fa di e nuan’n yɛle e akunndan m’ɔ buman e fɔ’n. Afin i nun nga e o mɛn’n nunfuɛ’m be afiɛn’n, i li i nun nga e nin amun e trannin’n, Ɲanmiɛn maan y’a yoman sa tɛ, yɛ e yoli nanwlɛfuɛ. Asa ekun’n, y’a faman klɔ sran ngwlɛlɛ’n y’a nantiman,+ sanngɛ Ɲanmiɛn i aklunye dan’n su yɛ e nian e nantili-ɔ. 13 E klɛman like uflɛ su ndɛ, saan nga amun kwla kanngan nun* mɔ amun kwla wun i wlɛ’n, i su ndɛ ngunmin cɛ yɛ é klɛ́ kó mán amun-ɔn. Yɛ n lafi su kɛ amún wún ninnge sɔ’m be wlɛ kpa titi,* 14 kɛ nga amun nun wie mun amun wunnin i wlɛ mɔ amun fa e di amun nuan’n sa. I wafa kunngba’n, e Min Zezi i cɛn’n nun’n, e kusu é wá fá amun é dí e nuan wie.

15 Sa sɔ mɔ n lafi su’n i ti yɛ i klikli nun’n, n sunnzunnin kɛ ń kó nían amun osu’n niɔn. I liɛ’n, amun kwla di aklunjɔɛ ekun.* 16 Afin n sunnzunnin kɛ ń kó nían amun osu naan m’an ɔ Maseduanin, yɛ n sunnzunnin kɛ kɛ ń sá min sin’n, ń sín amun wun lɔ ekun. Kpɛkun kɛ ń kɔ́ Zide’n, amún kó gúa min atin kan.+ 17 Like sɔ mɔ n sunnzunnin kɛ ń yó’n, m’an kaman i akunndan bulɛ’n su sa ngbɛn. ?Nɛ́n i-ɔ? ?Annzɛ kusu klɔ sran mɔ n ti’n ti’n, ń sé kɛ “ɛɛn-ɛn” naan i sin’n m’an se kɛ “cɛcɛ”? 18 Kɛ nga be kwla lafi Ɲanmiɛn su sa’n, i wafa kunngba’n be kwla lafi ndɛ nga e kan’n su. Ɔ maan e su seman kɛ “ɛɛn-ɛn” naan i sin’n y’a se kɛ “cɛcɛ.” 19 Afin Ɲanmiɛn i Wa Zezi Klisi mɔ e nin Silvɛn* nin Timote+ e kɛnnin i ndɛ e kleli amun’n, ɔ seman kɛ “ɛɛn-ɛn” naan i sin’n w’a se kɛ “cɛcɛ.” Sanngɛ i liɛ’n, kɛ ɔ se kɛ “ɛɛn-ɛn’n,” ɔ ti “ɛɛn-ɛn.” 20 Afin kannzɛ nda nga Ɲanmiɛn ta be’n be sɔn sɛ’n, sanngɛ Zezi i dunman nun’n, be kpɛn su.*+ I dunman nun ti yɛ e se Ɲanmiɛn kɛ “Maan ɔ yo sɔ’n” niɔn.+ Yɛ i sɔ mɔ e yo’n, ɔ manman Ɲanmiɛn. 21 Sanngɛ sran ng’ɔ kle weiin kɛ e nin amun e ti Klisi i liɛ’n, yɛle Ɲanmiɛn. Yɛ i yɛ ɔ kpali e-ɔ.*+ 22 Ɔ fɛli i nzɔliɛ’n sieli e su,+ yɛ ɔ fɛli i wawɛ’n wlali e nun* fa kleli kɛ é ɲán like kpa ng’ɔ́ bá e ɲrun lɔ’n sakpa.+

23 Ɲanmiɛn bɔbɔ ti min lalofuɛ, n kunndɛman kɛ sa ɲan amun i ti yɛ n nin-a ɔman amun wun lɔ’n niɔn. 24 Nán kɛ e waan é tín amun su naan é klé amun wafa nga amun ko lafi Ɲanmiɛn su’n ti-ɔ.+ Sanngɛ kɛ ɔ ko yo naan amun klun w’a jɔ’n, i ti yɛ e nin amun e di junman’n niɔn. Afin sɛ amun jran kekle’n, amun bɔbɔ amun Ɲanmiɛn sulafilɛ’n ti-ɔ.