Fluwa klikli nga Pɔlu klɛli Tesalonikifuɛ mun’n

5 Aniaan mun, ɔ nunman nun kɛ e klɛ amun blɛ nga sa sɔ’m bé jú’n i su fluwa. 2 Afin amun bɔbɔ amun si kpa kɛ Zoova* i cɛn’n+ ɔ́ bá kɛ nga awiefuɛ fa ba kɔnguɛ’n sa cɛ.+ 3 Blɛ kun wá jú’n, sran’m bé sé kɛ, “E su di fɔundi, srɛ kunman e kun!” Kɛ bé sé sɔ cɛ’n, bé ká lɛ bé núnnún be kpɛ kunngba,+ kɛ nga ba wulɛ aklunya tɔ wunnzɛfuɛ su’n sa. Be nun wie fi su fiteman nun. 4 Sanngɛ aniaan mun, amun liɛ’n amun nunman aosin nun naan se kɛ cɛn sɔ’n ɔ́ fú amun nun kɛ aliɛ njɛnniɛn’n ɔ fu awiefuɛ nun’n sa. 5 Afin amun kwlaa amun ti lika m’ɔ kpaja’n i nun ba,+ yɛ amun ti wia klengle’n i nun ba. E nantiman lika m’ɔ lu’n nun, yɛ e nantiman aosin’n nun.+

6 I sɔ’n ti’n, nán e lafi kɛ be onga’m be sa,+ sanngɛ maan e ɲin tran su,+ yɛ e bu akunndan kpa titi.+ 7 Afin be nga be lafi’n, kɔnguɛ yɛ be lafi-ɔ. Yɛ be nga be nɔn nzan be bo’n, kɔnguɛ yɛ be nɔn nzan be bo-ɔ.+ 8 Sanngɛ e mɔ e o wia klengle’n nun’n, maan e bu akunndan kpa titi. I sɔ’n ti’n, maan e fa Ɲanmiɛn sulafilɛ’n, ɔ nin klolɛ’n e wla e wun kɛ like kokloko mɔ be fa sasa be wue’n sa. Yɛ maan e ti mɔ e wla o su kɛ é ɲɛ́n i’n, ɔ yo kɛ kpongbo kle sa naan e fa wla e ti.+ 9 Afin Ɲanmiɛn w’a flɛman e kɛ ɔ́ fá e wun ya, sanngɛ ɔ flɛli e kɛ ɔ́ dé e,+ e Min Zezi Klisi i dunman nun. 10 E ti yɛ ɔ wuli-ɔ.+ Ɔ maan sɛ e ɲin tran su-o, annzɛ e lafi-o,* e nin i é trán nguan nun.+ 11 I sɔ’n ti’n, maan amun fɔnvɔ amun wiengu titi, yɛ an wla amun wiengu fanngan titi+ kɛ nga amun fa yo’n sa.

12 Aniaan mun, é srɛ́ amun kɛ amun ɲin yi be nga be di junman kekle amun afiɛn, mɔ e Min’n i sulɛ nun’n be dun mmua amun ɲrun’n, mɔ be man amun afɔtuɛ’n. 13 Junman mɔ be di’n ti’n, an bu be sran kpa liɛ su, yɛ an klo be kpa.+ Maan amun nin amun wiengu’m be di anuansɛ.+ 14 Asa kusu’n aniaan mun, é sé amun kɛ amun tu be nga be yo sa sukusuku’n be fɔ kpa,+ amun fɔnvɔ be nga be akunndan’n w’a sanngan’n,* amun suan be nga be leman wunmiɛn’n be bo, yɛ amun tra amun awlɛn sran’m be kwlaa be wun.+ 15 Amun nian amun wun kpa, sɛ sran yo amun tɛ’n, nán amun yo i wie.+ Sanngɛ amun yo like ng’ɔ ti kpa’n man amun wiengu titi, yɛ amun yo i sɔ man sran onga’m be kwlaa titi.+

16 Maan amun klun jɔ cɛn kwlaa.+ 17 An srɛ Ɲanmiɛn titi.+ 18 Sa’n kwlaa nun’n, an la Ɲanmiɛn ase.+ Like nga Ɲanmiɛn kunndɛ kɛ amun mɔ amun ti Klisi Zezi i sɔnnzɔnfuɛ’n amun yo’n, yɛ ɔ o lɛ-ɔ. 19 Ɲanmiɛn wawɛ’n m’ɔ ti kɛ sin sa’n, nán amun nuɛn i.+ 20 Nán amun bu Ɲanmiɛn nuan ijɔfuɛ’m be ndɛ’n i finfin ndɛ.+ 21 An bu sa kwlaa sin nian.+ An yo sa ng’ɔ ti kpa’n titi. 22 Nán amun yo sa tɛtɛ’n i wafa wie fi.+

23 Maan Ɲanmiɛn m’ɔ man fɔundi’n, ɔ fa amun yo i liɛ mlɔnmlɔn. Aniaan mun, maan amun akunndan’n, nin amun awlɛn’n, ɔ nin amun wunnɛn’n be ka sanwun titi, nán maan fiɛn kaan sa tran amun wun blɛ mɔ e Min Zezi Klisi o lɛ’n* i nun.+ 24 Sran ng’ɔ flɛli amun’n, ɔ ti nanwlɛfuɛ, i sɔ’n ti’n ɔ́ yó like sɔ’n sakpa.

25 Aniaan mun, an srɛ Ɲanmiɛn man e titi.+

26 Amun yo aniaan’m be kwlaa be like aklunjɔɛ su.

27 E Min’n i dunman nun’n, é srɛ́ amun kɛ amun kanngan fluwa nga nun kle aniaan’m be kwlaa.+

28 Maan e Min Zezi Klisi yo amun ye.