NDƐ NG’Ɔ KLƐ FLUWA’N SU’N | A KWLA FA Ɔ WUN MANTAN ƝANMIƐN

?A nin Ɲanmiɛn be koko yalɛ?

Janvuɛ kpa’m be koko yalɛ. Wie liɛ’n, be flɛ be wiengu telefɔnu nun. Annzɛ be klɛ be wiengu fluwa. Annzɛ kusu be koko yalɛ ɛntɛnɛti su. Siɛn’n bɔbɔ’n, wie’m be wun be wiengu’n ɛntɛnɛti su, yɛ be nin i be koko yalɛ’n niɔn. Nanwlɛ, janvuɛ kpa’m be koko yalɛ be kan be klun ndɛ kle be wiengu. Sɛ e waan e nin Ɲanmiɛn é trá janvuɛ’n, i sɔ’n wie yɛ ɔ fata kɛ e nin i e yo ɔ. ?Sanngɛ, wafa sɛ yɛ e nin Ɲanmiɛn e kwla koko yalɛ ɔ?

Kɛ e srɛ Ɲanmiɛn’n, yɛ e koko yalɛ e kle i ɔ. Sanngɛ, Ɲanmiɛn timan kɛ e wiengu tukpɛ sa. Kɛ é kókó yalɛ é klé i’n, maan e wun i wlɛ kɛ e su kan ndɛ é klé e Yifuɛ’n. I yɛ ɔ sie nglo nin asiɛ’n niɔn. I sɔ’n ti’n, ɔ fata kɛ e kan ndɛ’n e kle i aɲinyiɛ su. Sanngɛ, kɛ ɔ ko yo naan Ɲanmiɛn w’a sie i su e yalɛ kokolɛ i bo’n, ɔ fata kɛ ɔ yo i liɛ’n su. I wie yɛle kɛ:

Ɲanmiɛn Zoova kunngba cɛ yɛ ɔ fata kɛ e srɛ i ɔ. Ɔ fataman kɛ e koto like wie bo naan e koko yalɛ e kle i. (Ezipt Lɔ Tulɛ 20:4, 5) Biblu’n se wein kɛ: “Sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase.” (Filipfuɛ Mun 4:6) Asa ekun’n, Ɲanmiɛn i Wa Zezi dunman nun yɛ ɔ fata kɛ e srɛ ɔ. Zezi bɔbɔ seli kɛ: “Sran nga w’a sin-man min nun’n, ɔ ju-man e Si wun lɔ.” (Zan 14:6) I kasiɛn su’n, ɔ fata kɛ like nga e srɛ Ɲanmiɛn’n, ɔ yo i klun su. Biblu’n se kɛ: “E si kɛ like kwlaa nga e srɛ i’n, b’ɔ ti i klun su’n, ɔ́ mán ye.”a​—1 Zan 5:14.

Sɛ sran nɲɔn be ti janvuɛ naan be nun kun yɛ cɛn kwlaa ɔ kɛn i klun ndɛ’n, janvuɛ tralɛ sɔ’n su yoman ye. Sanngɛ, ɔ fata kɛ be sie be su be wiengu nuan bo. I sɔ kunngba’n, ɔ fata kɛ e tie ndɛ nga Ɲanmiɛn kan kle e’n. ?Ngue yɛ é yó naan y’a tie ndɛ nga Ɲanmiɛn kan’n niɔn?

Ɲanmiɛn Ndɛ nga be klɛli’n, yɛle Biblu’n. I nun yɛ Ɲanmiɛn kɛn i klun ndɛ kle e ɔ. (2 Timote 3:16, 17) Maan e fa sunnzun ase kun e nian. Wienun ɔn, e janvuɛ w’a klɛ e lɛtri. Kɛ é kánngan nun’n, ɔ ti kɛ e janvuɛ’n su kan ndɛ kle e sa. I kunngba’n, kɛ é kánngan Biblu’n nun’n, ɔ ti kɛ Zoova su kan ndɛ kle e sa. Zina mɔ ndɛ akpasua klikli’n nun e kɛnnin i ndɛ’n, ɔ seli kɛ: “Kɛ ɔ ko yo naan Ɲanmiɛn w’a fa min w’a yo i janvuɛ’n ti’n, n kanngan Biblu’n nun. Afin, Biblu’n ti kɛ fluwa yɛ Ɲanmiɛn klɛli e sa. Kɛ n kanngan nun cɛn kwlakwla’n, n wun kɛ e nin Ɲanmiɛn e afiɛn mantan.” ?Yɛ wɔ li, a kanngan Biblu’n nun cɛn kwlakwla? Sɛ a yo sɔ’n, a nin Zoova amun afiɛn mántan.

[Ja ngua lɛ ndɛ’n]