MƐN’N W’A YO KEKLE

1 | Nian ɔ wun lika

?NGUE TI YƐ I SƆ’N TI CINNJIN-ƆN?

Kɛ sa tɔ sran’m be su’n, ɔ ju wie’n be tɔ su tukpacɛ.

Kɛ sa tɔ sran kun su’n, i akunndan’n kwla sanngan yɛ ɔ kwla koko. Ngokɔɛ’n kusu kwla man sran tukpacɛ.
Kɛ sanvuɛsa tɔ lika kun’n, dɔɔtrɔ’m be kwlá diman junman kpa kun yɛ sran’m be kwlá yoman be wun ayre.
Kɛ sanvuɛsa tɔ lika kun’n, sran’m be kwlá ɲanman sika be toman aliɛ naan se kɛ bé ɲán wie yó be wun ayre.

Like ng’ɔ fata kɛ a wun i wlɛ’n

Sɛ tukpacɛ kekle o sran kun su annzɛ i akunndan’n w’a sanngan’n, ɔ kwla fa ajalɛ tɛ, yɛ i ɲin kwla kpa ninnge wie’m be su. Ɔ maan i tukpacɛ’n kwla yo kekle kpa tra laa’n.
Sɛ a tɔ tukpacɛ naan a yoman ɔ wun ayre’n, ɔ tukpacɛ’n yó kekle kpa trá laa’n. A kwla wu bɔbɔ.
Sɛ a ti juejue’n, blɛ kekle nun’n á kwlá fá ajalɛ kpa.
Kannzɛ ɔ sa nun yoman fɛ’n, sanngɛ a kwla yo ninnge kanngan wie mun naan w’a yo juejue titi.

Like nga a kwla yo’n

Sran ng’ɔ ti ngwlɛlɛfuɛ’n, ɔ bu sa nga be kwla tɔ i su’n be akunndan kpɛkun ɔ fa ajalɛ wie mun naan b’a to b’a fuɛn i. I kunngba’n yɛle e wun lika nianlɛ liɛ’n. Sɛ e yo e bɔbɔ nin e awlo’n nun sanwun’n, tukpacɛ wie’m bé tó fúan e. Yɛ sɛ e tɔ tukpacɛ bɔbɔ’n, ɔ su yoman kekle sɔ liɛ. Sɛ e sasa e wun naan y’a tɔman tukpacɛ’n, ɔ ti kpa tra kɛ e tɔ tukpacɛ naan e ko saci e sika e wun ayre yolɛ nun’n.

Be flɛ bian kun kɛ Andreasi.a Ɔ seli kɛ: “E nin min yi e yo e bɔbɔ nin e awlo’n nun sanwun. I sɔ mɔ e yo’n ti’n, e saciman e sika e wun ayre yolɛ nun.”

a Fluwa nga nun’n, e kacili sran wie’m be dunman’n.

LIKE NGA A KWLA YO’N—Afɔtuɛ wie mun

Blɛ kekle nun’n, yo ninnge nga mun naan w’a sasa ɔ wun.

YO Ɔ WUN YƐINYƐIN

Yo ɔ wun yɛinyɛin

Biblu’n se kɛ: “Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia.” (Ɲanndra Mun 22:3) Ɔ maan bu ninnge nga be kwla man ɔ tukpacɛ’n be akunndan naan wanndi be.

Fa nzue nin sanmlan wunnzin ɔ sa nun tikatika. I li sɛ a kɔ atin nun annzɛ a su wa di like’n.
Yo ɔ awlo nun sanwunsanwun. I li awlo nun ninnge nga amun ta be kan’n.
Sɛ tukpacɛ m’ɔ sa ndɛndɛ yo sran kun’n, sɛ a ɲɛn i wun alaje’n nán fa ɔ wun mɛntɛn i.

DI ALIƐ KPA

Di aliɛ kpa

Biblu’n se kɛ: “Sran fi kpɔmɛn i bɔbɔ i wun. Sanngɛ ɔ tɛ i wun, kpɛkun ɔ niɛn i wunnɛn’n i lika kpa.” (Efɛzifuɛ Mun 5:29) Wafa nga e kwla kle kɛ e klo e wun’n, i kun yɛle kɛ e kpa ninnge nga e di be’n be nun.

Nɔn nzue kaka.
Di waka mma nin tro mma fanunfanun.
Nán di ngo nin njin nin sukwla dan.
Nán nɔn siklɛti annzɛ drɔgi yɛ nán nɔn nzan dan.

Be flɛ bian kun kɛ Kaalɔsu. Ɔ seli kɛ: “Kɛ ɔ ko yo naan e nin min yi y’a tɔman tukpacɛ tikatika’n, e di aliɛ kpa. Ɔ flunman kɛ e fa e sika’n e to aliɛ kpa e di tra kɛ e fa wlɛ i ayre tolɛ’n nun.”

KPINNGBIN Ɔ WUN YƐ LAFI KPA

Kpinngbin ɔ wun

Biblu’n se kɛ: “Wunmiɛn lolɛ kan’n, ɔ ti kpa tra junman kekle dilɛ’n.” (Akunndanfuɛ’n 4:6) Kɛ a di junman’n, ɔ fata kɛ a lo wunmiɛn wie.

Kpinngbin ɔ wun kan. A kwla bo i bo nin nantilɛ kanngan. Kannzɛ bɔbɔ a ti oke annzɛ a ti bubuwafuɛ annzɛ tukpacɛ kekle wie o ɔ wun’n, sanngɛ kpinngbin ɔ wun kan. Sɛ a yo sɔ’n, ɔ wun fá ɔ feke kan.
Lafi kpa

Lafi kpa. Sɛ a lafiman kpa’n, ɔ akunndan’n sánngan yɛ a su kwlá faman ɔ ɲin sieman like su. Kpɛkun kɛ ɔ́ kɔ́ i ɲrun’n, a kwla tɔ su tukpacɛ kekle kpa bɔbɔ.
Sie lalɛ nin jasolɛ dɔ, yɛ mian ɔ ɲin di su. Cɛn kwlakwla’n, ko la dɔ kunngba’n su yɛ jaso dɔ kunngba’n su.
Sɛ w’a la’n, nán nian televiziɔn yɛ nán fa ajulisu mannzin di junman.
Kwlaa naan w’a ko la’n, nán di aliɛ dan, nán nɔn kafe yɛ nán nɔn nzan dan.

Be flɛ bian kun kɛ Zistɛn. Ɔ seli kɛ: “Kɛ n lafiman kpa’n, min wun kpajaman min. Kpɛkun min ti’n kpuke min yɛ min wunnɛn’n ngba yo min ya. Sanngɛ kɛ lafilɛ’n ti min kpa’n, min wun fa min feke yɛ n tɔman tukpacɛ sa.”