Zezi yoli abonuan sa wie mun, sanngɛ b’a sɔmɛn i nun Nazarɛti lɔ

Kɛ Zezi fin Dekapɔlu mɛn’n nun lɔ bali’n, ɔ yoli bla kun mɔ mmoja tu i’n, i juejue. I sin’n, ɔ cɛnnin Zairisi i wa bla’n. Nanwlɛ, cɛn kunngba sɔ’n nun’n, ɔ dili junman dan. Sanngɛ nɛ́n i ngba-ɔ. Kɛ ɔ jasoli Zairisi i awlo lɔ’n m’ɔ́ kɔ́’n, bian nɲɔn be suli i su. Be ti aɲinsifuɛ. Be kpan seli kɛ: “Davidi Wa, si e aunnvuɛ.”​—Matie 9:27.

Kɛ bian sɔ’m be flɛli Zezi kɛ ‘Davidi Wa’n,’ i sɔ’n kle kɛ be lafi su kɛ Zezi yɛ ɔ́ trán Famiɛn Davidi i bia’n su-ɔ, naan i yɛ ɔ ti Mesi’n niɔn. Sanngɛ Zezi yoli kɛ w’a timan ndɛ nga be kannin’n sa. Atrɛkpa ɔ yoli sɔ naan ɔ́ nían sɛ bé jrán ndɛ nga be kannin’n su kpa-o. I sɔ kusu yɛ be yoli-ɔ. Afin kɛ Zezi wluli sua kun nun’n, bian nɲɔn’m be wluli i sin lɔ wie. Yɛ ɔ usali be kɛ: “?Amun lafi su kɛ n kwla yo i sɔ like liɛ’n?” Be tɛli i su kɛ: “Ɛɛn, e Min, a kwla yo.” Kɛ be kannin sɔ’n, Zezi fɛli i sa fuali be ɲinma’m be su. Yɛ ɔ seli kɛ: “Maan ɔ yo kɛ amun fa lafi su’n sa.”​—Matie 9:28, 29.

Be ja nun lɛ’n, be wunnin ase! Kɛ nga Zezi fa yo i titi’n sa’n, ɔ seli be kɛ nán maan be kan abonuan sa sɔ’n be fa tru. Sanngɛ aklunjuɛ m’ɔ kunnin be kpo’n ti’n, b’a kwlá traman be awlɛn. Be kan truli lika kwlakwla.

Kɛ aɲinsifuɛ nɲɔn’m be ɔli’n, sran’m be fali bian kun mɔ mmusu kun wo i nun’n be blɛli Zezi. Ɔ fuannin mmusu’n naan be ja nun lɛ’n, bian’n w’a bo ijɔlɛ bo. Sa sɔ’n boli be nga be o lɛ’n be nuan naan b’a se kɛ: “E nin-a wunman sa kɛ nga sa Izraɛli mɛn’n nun le.” Farizifuɛ’m be wunnin sa sɔ’n nun. Ɔ maan be kwlá seman kɛ ɔ ti ato. Sanngɛ be seli kɛ sa sɔ’n finman Ɲanmiɛn. Be waan: “Mmusu’m be su kpɛn’n i fanngan nun yɛ ɔ fuan mmusu mun-ɔn.”​—Matie 9:33, 34.

I sin’n, Zezi sɛli i sin Nazarɛti, i klɔ’n su lɔ. Ɔ nin i sɔnnzɔnfuɛ mun yɛ be ɔli-ɔ. Ɔ kleli like be Ɲanmiɛn sulɛ sua’n nun lɔ i afuɛ kun yɛ. I klikli nun’n, i ndɛ’n yoli be fɛ kpa. Sanngɛ i sin’n, i ndɛ’n wa loli be ngasi. I sɔ’n ti’n, be waan bé kún i. Sanngɛ siɛn’n, ɔ kunndɛ kɛ ɔ́ úka be ekun.

Ɔ maan Wunmiɛn-lolɛ-cɛn’n nun’n, ɔ ɔli kɛ ɔ́ kó klé like be Ɲanmiɛn sulɛ sua’n nun lɔ ekun. Wafa ng’ɔ ijɔli’n boli sran kpanngban be nuan. Ɔ maan be usali kɛ: “Ninfan yɛ bian nga nin ngwlɛlɛ nga nin abonuan sa yolɛ nga’m be fin-ɔn?” Be seli ekun kɛ: “?Nán waka sɛfuɛ’n i wa’n niɔn? ?Nɛ́n i nin yɛ be flɛ i Mari’n niɔn? ?Yɛ nɛ́n i niaan bian mun yɛle Zaki nin Zozɛfu nin Simɔn nin Zida? ?Yɛ i niaan bla’m be kwlaa be nin e tranman wa? ?Yɛ nn ɔ nin i kwlaa ngalɛ’n fin nin?”​—Matie 13:54-56.

Sran’m be bumɛn i kɛ Zezi ti sran cinnjin sɔ liɛ. Be bu i be klɔfuɛ ngbɛn. I sɔ’n ti’n, be seli be klun lɔ kɛ: ‘Ɔ ɲinnin e ɲrun wa. ?Ɔ yo sɛ yɛ ɔ kwla yo Mesi-ɔ?’ I sɔ’n ti’n, kannzɛ Zezi si ngwlɛlɛ dan naan ɔ yoli abonuan sa mun’n, b’a sɔmɛn i nun klanman. I awlofuɛ’m be bɔbɔ b’a sɔmɛn i nun klanman wie. I sɔ’n ti’n, Zezi seli kɛ: “Be bu Ɲanmiɛn nuan ijɔfuɛ’n i sran lika kwlaa. Saan i bɔbɔ i klɔ’n su ɔ nin i bɔbɔ i awlo’n nun yɛ be bumɛn i sran-ɔn.”​—Matie 13:57.

Nanwlɛ, i su mɔ be lafiman’n, ɔ boli i nuan. Ɔ maan w’a yoman abonuan sa fi lɛ, “saan tukpacifuɛ wie mun yɛ ɔ fɛli i sa fuafuali be su yoli be juejue-ɔ.”​—Marki 6:5, 6.