?Sran cɛnlɛ ndɛ’n ti amun ɲrun sɛ?

“A trɛ ɔ sa’n nun. A man ninnge nga nguan o be nun’n be kwlaa be like ng’ɔ ju be’n.”—JUE MUN 145:16.

1-3. ?Ngue yɛ sran wie’m be fali be wla guali su ɔ? Amun fa sa wie mun fa yiyi nun.

KLISTƆFU le afuɛ ngwlan. Cɛn kun nglɛmun’n, ɔ nin i ɲrun kpɛnngbɛn’n be ɔli Manchester m’ɔ ti Angle lɔ klɔ kun’n, i wun koko lɔ jasin fɛ’n bolɛ. Be aosua siɛ’n nin be aosua niɛn’n, ɔ nin be wa nɲɔn’n be ɔli wie. Sa ng’ɔ juli’n, e fluwa Réveillez-vous ! kɛn i ndɛ’n. I waan: “Nnɔsua wia nun’n, be kwlaa be ɔli be ɲin su yiyilɛ Blackpool lɔ jenvie’n nuan. Loto nga be fuli nun’n ko yoli asidan. Asidan sɔ nun’n, sran 12 be kali lɛ be wuli. Be sran 6 be o sran 12 sɔ’m be nun wie. Polisi’m be kannin asidan sɔ’n i ndɛ kɛ ‘ɔ ti ɲrɛnnɛn dan.’”

² Kɔnguɛ ng’ɔ sinnin naan sa sɔ’n w’a yo’n, be awlobofuɛ’m be ɔli asɔnun’n i fluwa nun ndɛ suanlɛ aɲia’n bo. Cɛn sɔ’n nun’n, wie’n i ndɛ yɛ like suanlɛ kannin ɔn. Klistɔfu i si’n seli kɛ: “Klistɔfu ti bakan m’ɔ bu angunndan ɔn. Kɔnguɛ sɔ’n nun’n, ɔ kannin mɛn klanman’n ɔ nin i wla m’ɔ fa gua su’n, i ndɛ weiin. Kpɔkun kɛ é kókó yalɛ’n, Klistɔfu seli kɛ: ‘Like ng’ɔ ti kpa Zoova i Lalofuɛ’n i lika’n yɛle kɛ, sɛ ɔ wu’n, e si kɛ é wún i cɛn kun ekun.’ E kwlaa nga e tili i sɔ ndɛ liɛ’n, e siman kɛ ɔ́ wá ká e ti nun naan e wla su fiman su le.”a

³ Afuɛ 1940 nun’n lele naan asidan sɔ’n w’a yo’n, Australie lɔ Zoova i Lalofuɛ kun mɔ i dunman’n yɛle Franzi’n, ɔ sili kɛ bé wá fá mannzin kpɛ́ i ti’n. Afin ɔ seli kɛ ɔ yaciman Zoova sulɛ. Kɛ Franzi o Berlin lɔ bisua’n nun’n, ɔ klɛli i nin’n i fluwa. Ɔ seli kɛ: “Sɛ ɔ ti kɛ n yacili like kwlaa nga n sili i’n i lɛ yɛ n tali sonja’m be nda wie’n, nn min liɛ’n, wie’n cɛ yɛ ɔ nin min fata ɔ. Yɛle kɛ nn, n yoli sa tɛ kpa mɔ maan sɛ n wu’n, ɔ su fataman kɛ be cɛn min’n. [...] Min nin kpa, yɛ min niaan bian nin aniaan bla kwlaa, ń kán klé amun kɛ andɛ’n, b’a se min kɛ bé kún min. Sanngɛ nán amun wla bo amun wun. Ainman nglɛmun’n, bé kún min. Kɛ nga laa nun Zoova fa suannin Klistfuɛ kpa kwlaa be bo’n sa’n, ɔ suan min bo wie. [...] Sɛ amun jran kekle lele be guɛ i ti’n nin i bo’n, kɛ be nga be wuli’n bé wá cɛ́n, é wún e wun ekun.”b

 4. ?Klistɔfu nin Franzi be su ndɛ, ɔ yo amun sɛ? ?Yɛ ngue yɛ é wá fá e ɲin síe su ɔ?

⁴ Be nga be wuli’n be cɛnlɛ ndɛ’n yoli Klistɔfu nin Franzi be cinnjin kpa. Afin, ɔ yoli be ɲrun nanwlɛ like. Nanwlɛ, sran nɲɔn sɔ’m be su ndɛ’n wluwlu e wun dan! I sɔ’n ti’n, kɛ ɔ ko yo naan y’a klo Zoova naan y’a lɛ i ase’n, naan e wla mɔ e fa guɛ i sran cɛnlɛ’n su’n w’a taka kpa’n ti’n, sa nga ti yɛ be nga be wuli’n bé cɛ́n’n, ɔ nin wafa ng’ɔ fata kɛ sa sɔ’n i wlɛ mɔ e wun i’n ɔ ɲan ta e bɔbɔ e su’n, amun e fa e ɲin sie be su e nian.

Be wunnin be nga bé cɛ́n mɔ bé trán asiɛ’n su wa’n aolia nun

5, 6. ?Ngue yɛ akoto Zan wunnin i aolia nun mɔ Sa Nglo Yilɛ 20:12, 13 kɛn i ndɛ ɔ?

⁵ Klist Zezi i Afuɛ akpi Sielɛ Blɛ’n nun’n, sa nga bé wá yó’n, akoto Zan wunnin be aolia nun. I kun yɛle kɛ, ɔ wunnin be nga bé cɛ́n mɔ bé trán asiɛ’n su wa’n. I waan: ‘N wunnin be nga be wuli’n, sɛ be le ɲrun o, sɛ be leman ɲrun o, be nga be wuli mɔ be o jenvie’n nun’n, ɔ yi be mannin. Be nga be o wie’n nin blɔlɔ’n [Hades, NW] be sa nun’n, be yi be mannin.’ (Sa Nglo Yilɛ 20:12, 13) Kannzɛ sran’m be ti sɛ be ti sɛ o, yɛle kɛ, sɛ be ‘le ɲrun’ annzɛ be ‘leman ɲrun’ o, be kwlaa nga be o Hades annzɛ Sheol nun’n, m’ɔ ti lika nga sran mɔ be su lafi wie’n nun’n be nun sunman be o’n i nzɔliɛ’n, bé fíte. Blɛ kunngba sɔ nun’n, be nga jenvie nun yɛ be wuli’n, bé cɛ́n wie. Abonuan sa sɔ’n m’ɔ́ kpɛ́n su’n, ɔ ti Zoova i klun sa’n i bue kun.

⁶ Kɛ Klist i Afuɛ akpi Sielɛ Blɛ’n wá bó i bo’n, ɔ́ wá trá Satan cí i kpɔkun ɔ́ wlɛ́ i bisua kunman dan kun nun. Blɛ sɔ nun’n, kɛ mɔ Satan su kwlaman like fi yo kun ti’n, be nga be cɛnnin mun o, annzɛ be nga be fin ɲrɛnnɛn dan’n nun be fiteli mun o, ɔ su lakaman be nun wie fi kun. (Sa Nglo Yilɛ 20:1-3) Afuɛ akpi Sielɛ Blɛ sɔ’n kwla yo ɔ ɲrun tɛnndɛn kpa. Sanngɛ Zoova liɛ’n, ɔ ti i ɲrun “cɛn ba kun.”—2 Piɛr 3:8.

 7. ?Klist i Afuɛ akpi Sielɛ Blɛ’n nun’n, ngue su yɛ bé jrán naan b’a di sran’m be jɔlɛ ɔ?

⁷ Kɛ nga Zan fa wunnin i aolia nun’n sa’n, Klist i Afuɛ akpi Sielɛ Blɛ’n yó jɔlɛ dilɛ blɛ. Akoto Zan seli kɛ: ‘N wunnin be nga be wuli’n, sɛ be le ɲrun o, sɛ be leman ɲrun o, be jinjin bia’n ɲrun lɛ. Be trɛli fluwa wie’m be nun. Yɛ be trɛli kun ekun nun, i yɛ ɔ ti nguan fluwa’n niɔn. Be niannin fluwa’m be nun, be wunnin sa nga be mɔ be wuli’n be yoli’n, i su yɛ be jran be dili be jɔlɛ’n niɔn. Yɛ be niannin be sa nga be yoli’n su yɛ be fa dili be jɔlɛ’n niɔn.’ (Sa Nglo Yilɛ 20:12, 13) Amun e sie i nzɔliɛ kɛ, nán sran’n i nzuɛn’n, annzɛ sa ng’ɔ yoli i laa naan w’a wu’n, i su yɛ bé jrán naan b’a di i jɔlɛ’n niɔn. (Rɔmfuɛ Mun 6:7) Sanngɛ, sa nga bé jrán su bé dí jɔlɛ’n, ɔ o “fluwa” kun mɔ bé wá trɛ́ nun’n, i nun. Yɛle kɛ, sa nga kɛ sran’n ko si fluwa’n i nun ndɛ’n m’ɔ yo be kasiɛn su’n, i su yɛ bé jrán naan sɛ ɔ fata kɛ be klɛ i dunman “nguan fluwa’n” nun’n, naan b’a klɛ ɔ.

‘Bé cɛ́n bé ɲán nguan,’ annzɛ kusu “bé cɛ́n, yɛ bé fá be kɔ́ jɔlɛ difuɛ’n i ja su”

 8. ?Sa nɲɔn mennin yɛ ɔ o be nga bé cɛ́n be’n be ɲrun ɔn?

⁸ Aolia nun like nga Zan wunnin i’n i klikli nun’n, Zezi kɛn i bɔbɔ i ndɛ kɛ ɔ ‘sie wie’n, yɛ blɔlɔ [Hades] lakle’n wo i sa nun.’ (Sa Nglo Yilɛ 1:18) Zoova maan i yɛ ɔ ‘man nguan’n’ niɔn, kpɔkun Zoova mɛnnin i tinmin kɛ ɔ di ‘be nga be wuli’n nin be nga be ɲin o su’n be ndɛ’n.’ (Sa Nga Be Yoli’n 3:15; 2 Timote 4:1) ?Wafa sɛ yɛ ɔ́ dí i sɔ junman liɛ’n niɔn? Saan ɔ́ tínnge be nga be lafili wie’n nun’n. Sran kpanngban nga Zezi boli jasin fɛ’n kleli be’n, ɔ seli be kɛ: ‘Nán maan ndɛ sɔ’n bo amun nuan, afin cɛn wie lele be kwlaa nga be o ndia nun’n, bé tí i nɛn, yɛ bé fín ndia’n nun fite.’ Kpɔkun ɔ kan guali su kɛ: ‘Be nga be yoli sa kpa’n, bé cɛ́n bé ɲán nguan, be nga be yoli sa tɛ’n, bé cɛ́n, yɛ bé fá be kɔ́ jɔlɛ difuɛ’n i ja su.’ (Zan 5:28-30) ?Sɛ ɔ ti sɔ’n niɔn, ngue yɛ ɔ minndɛ laa nun yasua nin bla mɔ be ti Ɲanmiɛn i sufuɛ kpa mun ɔn?

 9. (a) ?Kɛ bé wá cɛ́n sran nga be wuli mun’n, ngue yɛ be nun sunman bé wún i wlɛ ɔ? (b) ?Like klelɛ junman dan mennin yɛ ɔ́ jú su ɔ?

⁹ Kɛ bé wá cɛ́n laa nun Ɲanmiɛn i sufuɛ kpa sɔ mun’n, bé wún kɛ sa nga Ɲanmiɛn seli kɛ ɔ́ yó mɔ be fali be wla guali su’n w’a kpɛn su siɛn’n. Nanwlɛ, bla’n i Osu’n i su nda klikli kpa nga Ɲanmiɛn tali m’ɔ o Bo Bolɛ 3:15 nun’n, i silɛ’n yó be cinnjin kpa! Kɛ bé wá sí kɛ Mɛsi sɔ’n mɔ be kɛnnin i ndɛ kɛ ɔ́ bá’n yɛle Zezi, naan kɛ ɔ bali’n ɔ suli Ɲanmiɛn kpa lele ɔ fa wuli’n, naan ɔ fɛli i nguan’n kpɔli sran’m be ti’n, nanwlɛ, ɔ́ yó be fɛ kpa! (Matie 20:28) Sran sɔ mɔ bé cɛ́n be’n, be ukalɛ mɔ bé úka be naan be wun i wlɛ kɛ e ti kpɔlɛ tɛ’n yi Zoova i aklunye’n, ɔ nin i aenvuɛ silɛ’n be nglo’n, ɔ́ yó be nga bé wá sɔ́ be nun’n be fɛ kpa. Nanwlɛ, kɛ be nga be cɛnnin be’n bé wá wún Zoova i klun sa nga Ɲanmiɛn Sielɛ Blɛ’n su yo i asiɛ’n su’n, saan be awlɛn’n sú be bo kɛ be manman Zoova naan be yi i ayɛ. Wafa nga be ko kle kɛ bé sú be Si m’ɔ o nglo lɔ’n m’ɔ ti sran klofuɛ’n, ɔ nin i Wa’n be mlɔnmlɔn’n, bé ɲɛ́n i wun atin weiin. Sran kpanngban kpa nga bé cɛ́n be’n ɔ fata kɛ be kle be like naan be kusu be kplin tɛ mɔ Ɲanmiɛn yili fa kpɔli sran’m be ti’n, i su wie. Like klelɛ junman dan sɔ’n, be kwlaa nga be ɲin o su’n bé dí i aklunjuɛ su.

10, 11. (a) ?Afuɛ akpi blɛ nun’n, ngue yɛ asiɛ’n su sran kwlaa bé ɲɛ́n i yolɛ’n i wun atin ɔn? (b) ?Ta mennin yɛ ɔ fata kɛ i sɔ’n ɲɛn i e su ɔ?

¹⁰ Kɛ bé wá cɛ́n Abraamu m’ɔ́ wún kɛ “klɔ” nga ɔ minndɛli i’n, i nun yɛ ɔ o’n, ɔ́ yó i fɛ dan. (Ebre Mun 11:10) Zɔbu kusu’n, kɛ ɔ́ wá sí kɛ i kekle jranlɛ ɲrɛnnɛn nun’n ɔ wlali Zoova i sufuɛ uflɛ’m be fanngan maan kɛ sa’m be tɔli be su’n be nantili sein b’a fɔman’n, nanwlɛ, i sɔ’n yó i fɛ wie kpa! ?Yɛ Daniɛli li? Wafa nga sa nga bé wá jú mɔ Ɲanmiɛn maan ɔ kannin be ndɛ’n be kpɛnnin su’n, ɔ́ kúnndɛ wún be ndɛndɛ!

¹¹ Ɔ maan, be nga bé trán mɛn klanman’n nun’n, maan ɔ yo be nga be cɛnnin be mun o, annzɛ be nga be fin ɲrɛnnɛn dan’n nun be fiteli mun o, be kwlaa bé súan like nga Zoova waan ɔ́ yó i asiɛ’n su mán sran mun’n, i su like kpa. Kɛ mɔ é ɲán anannganman nguan mɔ é mánmán Zoova titi cɛn kwlaa ti’n, Afuɛ akpi blɛ sɔ’n nun like suanlɛ’n yó fɛ kpa. Sanngɛ, kɛ e ko suan like ng’ɔ o fluwa nun’n, like nga e tinuntinun é wá yó’n yɛ ɔ ti cinnjin kpa’n niɔn. ?É fá like nga é wá súan’n su? ?Like cinnjin sɔ mɔ é wá súan’n, é trán é bú su angunndan, kpɔkun é fá su naan ɔ wla e fanngan naan i liɛ’n, kasiɛn su kɛ Satan wá sá e nían’n, y’a kwla jran kekle?

12. ?Ngue ti yɛ sran’m bé kwlá tú be klun bé dí like klelɛ junman’n, ɔ nin asiɛ’n su junman’n mɔ bé dí naan asiɛ’n w’a kaci mɛn klanman’n niɔn?

¹² Sanngɛ, tɛ mɔ Klist yili fa kpɔli sran’m be ti’n, nán maan e wla fi i su mmlusuɛ klanman kpa’n su. Be nga bé cɛ́n be’n, be lika fi su yoman be ya kun. (Ezai 33:24) Sran kwlaa nga bé trán mɛn klanman’n nun’n, bé yó juejue yɛ fɔ’n su tranman be nun. Ɔ maan bé tú be klun bé klé sran kpanngban kpa nga be cɛnnin be’n be like. Asiɛ’n i sufuɛ sɔ’m bé dí asiɛ’n i su junman dan kpa kun ekun. Yɛle kɛ, bé yó maan asiɛ wunmuan káci mɛn klanman kun m’ɔ yi Zoova i ayɛ ɔ.

13, 14. ?Ngue ti yɛ sa nianlɛ kasiɛn nun’n bé yí Satan bisua nun fíte ɔ? ?Yɛ ngue yɛ e tinuntinun ɔ kwla ɲan e ɔ?

¹³ Sa nianlɛ kasiɛn nun’n, kɛ bé wá yí Satan bisua’n nun fíte’n, ɔ́ wá kúnndɛ láka sran mun ekun. Kɛ nga Sa Nglo Yilɛ 20:7-9 fa kan’n sa’n, ‘nvlenvlefuɛ kwlaa nga Satan lakali be’ mɔ be o i sa nun’n, bé dí be jɔlɛ kɛ bé núnnún be. Ɔ maan, ‘sin fín ɲanmiɛn su lɔ tɔ́ be nun, yɛ ɔ́ yrá be sekesekeseke.’ Sɛ be nga be cɛnnin be Afuɛ akpi blɛ’n nun’n be nun wie tran i sɔfuɛ’m be nun’n, be liɛ’n, ɔ ti kɛ be cɛnnin be naan be dili be jɔlɛ kɛ be nunnun be. Sanngɛ be nga be cɛnnin be mɔ be nantili sein mɔ b’a fɔnman’n, bé ɲán anannganman nguan mɔ Ɲanmiɛn fá cɛ́ e’n. Nanwlɛ, be cɛnlɛ liɛ’n i bo’n yɛle kɛ, ‘bé cɛ́n bé ɲán nguan.’—Zan 5:29.

¹⁴ ?Wafa sɛ yɛ sran cɛnlɛ mɔ e fa e wla gua su’n, ɔ kwla fɔnvɔ e dɔ nga su ɔ? ?Sanngɛ sa ng’ɔ ti cinnjin kpa’n yɛle kɛ, ngue yɛ ɔ fata kɛ e yo naan y’a si jreiin kɛ é ɲán e ɲrun lɔ like sɔ’n wie ɔ?

Afɔtuɛ nga sran cɛnlɛ ndɛ’n man e’n

15. ?Wafa sɛ yɛ sran cɛnlɛ mɔ e fa e wla gua su’n ɔ kwla uka e ikisa ɔ?

¹⁵ Atrɛkpa’n, koko nga nun amun awlɛn su sran wie sacili yɛ i sɔ’n ti’n, ninnge uflɛ m’ɔ fata kɛ amun yo be’n i su afɛ’n wo amun su. Sran cɛnlɛ mɔ amun fa amun wla gua su’n, ɔ uka amun maan amun wla gua ase kpɔkun ɔ wla amun fanngan tra be nga be siman i sɔ liɛ’n i su nanwlɛ ndɛ’n. Akoto Pɔlu seli Tɛsalonikfuɛ mun kɛ: ‘E klo kɛ an si sa ng’ɔ ju be nga be wuli’n be su’n, naan amun wla a boman kɛ be nga be leman like mɔ be fa be wla gua su’n be liɛ’n sa.’ (1 Tɛsalonikfuɛ Mun 4:13) ?Ɔ yo amun kɛ amun o mɛn klanman’n nun lɔ naan sran cɛnlɛ’n su yo amun ɲrun? Sɛ ɔ yo amun sɔ’n, maan amun awlɛn su sran mɔ amún wá wún i ekun’n i su angunndan bulɛ’n, ɔ fɔnvɔ amun ikisa.

16. ?Sɛ e wu naan be cɛn e’n, ɔ́ yó e sɛ?

¹⁶ Atrɛkpa kɛ é sé yɛ’n, ɲin kekle mɔ Adam yoli’n ti’n, amun wun amun kplo’n nun afɛ, yɛle kɛ tukpaciɛ wie sa. Sran cɛnlɛ mɔ mɛn klanman’n nun lɔ kannzɛ bɔbɔ amun wuli o, amún wá cɛ́n’n, kpɔkun amún yó juejue’n, mɔ amún ɲán wunmiɛn’n, nán maan afɛ sɔ’n ti’n, amun sa sin bubu amun naan amun ɲin kpa su. Kɛ amun wá cɛ́n mɔ amún wún sran nga bé trá amun je aklunjuɛ nun’n, saan Ɲanmiɛn m’ɔ yili i aklunye’n i nglo’n, amún lɛ́ i ase.

17, 18. ?Afɔtuɛ kpa nɲɔn mennin yɛ ɔ fata kɛ e fa sie e klun ɔn?

¹⁷ Ka naan i sɔ liɛ’n w’a ju’n, amun e fa e ɲin sie afɔtuɛ kpa nɲɔn m’ɔ fata kɛ sran cɛnlɛ ndɛ’n man e’n be su. I klikli’n yɛle kɛ, maan ikisa e fa e wla’n kwlaa gua Zoova su naan e su i kpa. Kɛ e Min Klist Zezi sa’n, maan e wun klɛnlɛ’n kle kɛ e klo Zoova ɔ nin e wiengu mun. Sɛ e ɲrun tanndanlɛ’n, annzɛ yalɛ klelɛ’n ti e wunman e wun fɛ’n, sanngɛ maan e ta nda kɛ kannzɛ bé yó e sɛ o, e su yaciman Ɲanmiɛn su lafilɛ le. Kannzɛ bɔbɔ ɔ fata kɛ e kpɔfuɛ be kun e’n, sanngɛ sran cɛnlɛ mɔ e fa e wla gua su’n ɔ fɔnvɔ e, kpɔkun ɔ wla e fanngan maan e yaciman Zoova i sulɛ, ɔ nin i Sielɛ Blɛ’n i bo suanlɛ. Nanwlɛ, Ɲanmiɛn Sielɛ Blɛ jasin fɛ’n bolɛ’n, ɔ nin sran’m be like klelɛ mɔ maan be kaci Zezi i sɔnnzɔnfuɛ’n i junman’n mɔ e di be juejue su’n ti’n, e su minndɛ mmlusuɛ nga Zoova sieli be kɛ titi ɔ́ fá mán sran kpa mun’n.

¹⁸ Kɛ fɔ’n m’ɔ o e nun’n ɔ tanndan e ɲrun’n, wafa nga e yo’n ɔ nin afɔtuɛ’n i nɲɔn su’n be kɔ likawlɛ. Sran cɛnlɛ’n i su ndɛ nga e si i’n, ɔ nin Zoova i aklunye’n m’ɔ ti e ɲrun like dan’n, be wla e fanngan maan e ta nda kɛ e su yacimɛn i su lafilɛ le. Akoto Zan seli kɛ: ‘Nán an klo mɛn dilɛ’n, nán an klo ninnge nga be o mɛn’n nun’n. Sran ng’ɔ klo mɛn dilɛ’n, nn ɔ kloman e Si’n. Like nga be yo be mɛn’n nun’n i kwlaa’n: be ɲin m’ɔ blo ninnge’m be su’n, nin angunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi finman e Si’n, sanngɛ be ti mɛn’n nun nzuɛn. Mɛn’n nin i nun ninnge kwlaa mɔ sran ɲin blo su’n, bé wíe, sanngɛ sran ng’ɔ yo Ɲanmiɛn klun sa’n, ɔ́ ká lɛ tititi.’ (1 Zan 2:15-17) Mɛn’n nun ninnge kɛ aɲanbeun ninnge mun sa’n, be timan like fi ‘nguan kpa’n,’ i ɲrun. (1 Timote 6:17-19) Sɛ e kɔnvi sɔ sa sukusuku yolɛ’n, é jrán kekle. Afin e si kɛ sɛ e yo sa tɛ sɔ’n naan e dun mmua e wu naan Amargedɔn w’a ba’n, Zoova kwla fa e wla be nga be su cɛnman be’n be nun wie.

19. ?Cenjele like mennin yɛ ɔ fataman kɛ e fa tratra e sa bɛ’n nun ɔn?

¹⁹ I kwlaa yoli o, e cenjele like kɛ Zoova i klun mɔ andɛ nin ainman ɔ jɔ e wun sa’n, nán maan e fa tratra e sa bɛ’n nun le. (Nyanndra Mun 27:11) Wafa nga e su Ɲanmiɛn nanwlɛ’n nun ka naan y’a wu’n, annzɛ kusu wafa nga e nanti sein mɔ e fɔnman ka naan mɛn tɛ kain nga w’a sin’n, ɔ kle Zoova kɛ e jran i m’ɔ sie nglo nin asiɛ’n i sin. Nanwlɛ, maan e yo be nga be fin ɲrɛnnɛn dan’n nun fiteli’n be nunfuɛ o, annzɛ be nga be cɛnnin be’n be nunfuɛ wie o, asiɛ’n m’ɔ́ wá káci mɛn klanman’n i nun aklunjuɛ nga é wá dí’n ti dan!

É ɲán like ng’ɔ ju e’n

20, 21. ?Kannzɛ bɔbɔ e ɲanman sran cɛnlɛ’n i su kosan ngba be su tɛlɛ’n, sanngɛ ngue yɛ ɔ kwla uka e naan y’a su Zoova titi ɔ? Amun yiyi nun.

²⁰ Sran cɛnlɛ ndɛ’n i su like nga y’a suɛn i yɛ’n, nán e kosan’m be ngba yɛ ɔ tɛli be su ɔ. Kosan kpanngban kpa wie mun ekun be te o lɛ. I wie yɛle kɛ: ?Be nga be o aja’n nun mɔ be wuli’n, Zoova yó be liɛ’n sɛ? (Lik 20:34, 35) ?Lika nga sran’n wuli lɛ’n, lɛ yɛ bé cɛ́n i ɔ? ?Be nga bé cɛ́n be’n be nin be awlobofuɛ’m bé trán? E wla fiman ndɛ nga Zeremi kannin’n su. I waan: ‘Sran nga m’ɔ fɛ i wla gua Anannganman su’n, sran ng’ɔ mɛntɛn i’n, nanwlɛ, ɔ yo i kpa. Sɛ sran kun tran minndɛ Anannganman kɛ ɔ wa de i’n, i sɔ yolɛ’n i kpa liɛ ng’ɔ ti’n, nán sa yolɛ ɔ.’ (Ngwlɛ Yilɛ 3:25, 26) Sɛ blɛ nga Zoova kleli’n ɔ ju’n, é wún kosan kwlaa nga e fa usa e wun’n be su tɛlɛ’n weiin. ?Ngue ti yɛ e kwla lafi su sɔ ɔ?

²¹ Ndɛ nga kɛ jue tofuɛ tó i jue’n ɔ kannin kleli Zoova’n, amun e bu su angunndan e nian. I waan: “A trɛ ɔ sa’n nun. A man ninnge nga nguan o be nun’n be kwlaa be like ng’ɔ ju be’n.” (Jue Mun 145:16) Kɛ é yó kpɛnngbɛn’n, like nga e ɲin o su’n ɔ kaci. Like nga e bakan nun e fali e wla guali su’n, nɛ́n i yɛ wie liɛ’n, andɛ e fa e wla gua su ɔ. Wafa nga siɛn’n e fa wun mɛn’n, ɔ fin sa nga be juli e su’n, yɛ i kpa bɔbɔ’n ɔ fin like nga e fa e wla gua su’n. Sanngɛ, like kwlaa nga e ɲin o su kɛ mɛn klanman’n nun lɔ é ɲɛ́n i’n, Zoova yíɛ i nuan mán e.

22. ?Ngue ti yɛ Zoova nin manmanlɛ fata ɔ?

²² Like nga kɛ é sé yɛ’n ɔ ti e kwlaa e cinnjin’n yɛle kɛ maan e nanti sein titi. ‘Sa ng’ɔ ti cinnjin’n, yɛle kɛ sran ng’ɔ nian ninnge su’n ɔ yo sran kpa.’ (1 Korɛntfuɛ Mun 4:2) Ɲanmiɛn Sielɛ Blɛ’n jasin fɛ’n m’ɔ ti like ɲɛnmɛn’n, e ti i su nianfuɛ. Wafa nga e tu e klun e bo jasin fɛ’n sɔ’n e kle sran kwlaa nga e to be’n, ɔ uka e maan e ka nguan atin’n su. Maan titi e si kɛ, ‘kɛ blɛ’n fa ti mɔ sa’m be fa ju’n,’ e kwlaa e wun i su like’n. (Akunndanfuɛ’n 9:11) Kɛ ɔ ko yo naan mɛn tɛ nga i ngokɔɛ fi w’a tinman amun su’n, maan titi amun wla tran sran cɛnlɛ’n m’ɔ ti like ɲɛnmɛn’n i su. Maan amun si weiin kpa kɛ, sɛ amun wu ka naan Klist i Afuɛ akpi Sielɛ Blɛ’n w’a bo i bo’n, amun kwla lafi su kɛ amún ɲán nguan ekun. Sɛ blɛ nga Zoova kleli’n ju’n, ndɛ nga Zɔbu kannin’n yó e liɛ wie. Ɔ seli kɛ: ‘Sɛ a flɛ min’n ń sró.’ Zoova mɔ blɛ ng’ɔ kleli kɛ sɛ ɔ ju’n ɔ́ cɛ́n sran kwlaa nga i wla kpɛn be su’n, maan e kwlaa e mɛnmɛn i!—Zɔb 14:15.

[Ja ngua lɛ ndɛ mun]

?Amun wla kwla kpɛn su?

• ?Afuɛ akpi blɛ’n nun’n, ngue yɛ bé jrán su bé fá dí sran’m be jɔlɛ ɔ?

• ?Ngue ti yɛ sran wie’m “bé cɛ́n bé ɲán nguan” mɔ wie’m “bé cɛ́n, yɛ bé fá bé kɔ́ jɔlɛ difuɛ’n i ja su” ɔ?

• ?Wafa sɛ yɛ sran cɛnlɛ ndɛ’n fɔnvɔ e ɔ?

• ?Kannzɛ bɔbɔ e ɲanman sran cɛnlɛ’n i su kosan ngba be su tɛlɛ’n, sanngɛ wafa sɛ yɛ Jue Mun 145:16 ɔ uka e ɔ?