Mɛsi’n i balɛ m’ɔ́ wá bá’n, i ndɛ kanlɛ

ZUIFU’M be si ndɛ nga Ezai nin Ɲanmiɛn nuan ijɔfuɛ wie mun ekun be kɛnnin i Mɛsi’n su’n. Ɔ maan, be ɲin o i balɛ’n i sin kpa. Zezi blɛ su bɔbɔ’n, Zuifu kpanngban ‘be ɲin ta Klist [Mɛsi] sin, be wun blibli be.’ (Lik 3:15) Nán ngbɛn ti yɛ Ɲanmiɛn nuan ijɔfuɛ’m be kannin Mɛsi’n i mɛn dilɛ’n i su ndɛ kpanngban’n niɔn. Afin klɔ sran fi kwlá kanman sa sɔ’m be ndɛ, annzɛ ɔ kwlá yoman naan b’a kpɛn su Zezi i mɛn dilɛ nun.

Mɛsi’n i awuliɛ’n i su ndɛ. Ezai seli kɛ talua kun m’ɔ nin a siman bian’n, yɛ ɔ́ wú Mɛsi’n mɔ be flɛ i ekun kɛ Klist’n niɔn. Akoto Matie kannin Zezi i awuliɛ m’ɔ ti abonuan’n i ndɛ. I sin’n, ɔ klɛli i kɛ: ‘I kwlaa sɔ’n yoli sɔ naan ndɛ nga e Min Ɲanmiɛn’n maan i nuan ijɔfuɛ’n kannin’n w’a kpɛn su, ɔ seli kɛ: “An nian, talua m’ɔ nin a siman bian’n ɔ́ wá wúnnzɛ, ɔ́ wú ba yasua.”’ (Matie 1:22, 23; Ezai 7:14) Ezai kusu seli kɛ Klist yó Davidi i osu nunfuɛ. Afin, ɔ boli Yesea m’ɔ ti Davidi i si’n i dunman. Kɛ ɔ yoli sɔ kusu ɔ. Zezi yoli Davidi i osu nunfuɛ sakpa. (Matie 1:6, 16; Lik 3:23, 31, 32) I ti yɛ maan anzi Gabliɛli seli Zezi i nin Mali kɛ: ‘E Min Ɲanmiɛn’n ɔ́ fɛ́ i nannan Davidi bia’n mɛ́n i.’—Lik 1:32, 33; Ezai 11:1-5, 10; Rɔmfuɛ Mun 15:12.

Mɛsi’n i mɛn dilɛ’n i su ndɛ. Kɛ Zezi yoli kaklaka’n, ɔ kanngannin Ɲanmiɛn nuan ndɛ ng’ɔ o Ezai fluwa’n nun’n, Nazarɛti lɔ Ɲanmiɛn ndɛ suanlɛ nin i srɛlɛ sua’n nun. Ndɛ sɔ’n i wie yɛ: ‘E Min Ɲanmiɛn i wawɛ’n o min su, yɛle kɛ ɔ guali min su ngo kɛ m bo jasin fɛ’n kle yalɛfuɛ mun.’ Zezi fali ndɛ sɔ’n fa kɛnnin i bɔbɔ i ndɛ seli kɛ: ‘Ɲanmiɛn ndɛ nga be klɛli’n, i nun ndɛ nga an tili be yɛ’n, ndɛkɛn b’a kpɛn su.’ (Lik 4:17-21; Ezai 61:1, 2) Ezai seli ekun kɛ Zezi kɛ́n i wun ase, ɔ́ yó tukpacifuɛ’m be juejue klun ufue su nin wɛtɛɛ su. Matie klɛli kɛ: ‘Sran kpanngban kpa be suli i su. Ɔ yoli be kwlaa be juejue, yɛ ɔ wlali be su nun kpa kɛ nán maan be kan ndɛ sɔ’n naan ndɛ nga Ɲanmiɛn nuan ijɔfuɛ Ezai kannin’n w’a kpɛn su. Ɔ seli kɛ: “Ɔ [Mɛsi’n] su siman akplowa, ɔ su kpanman. Ndɛma nga w’a bli’n, ɔ su bumɛn i.”’—Matie 8:16, 17; 12:10-21; Ezai 42:1-4; 53:4, 5.

Mɛsi’n i ɲrɛnnɛn wunlɛ’n i su ndɛ. Ɲanmiɛn nuan ijɔfuɛ Ezai seli kɛ Izraɛlifuɛ’m be dan lika be su sɔman Mɛsi’n i nun. Ɔ maan, ɔ́ yó kɛ ‘yɛbuɛ m’ɔ kpla sran’m be ja’n’ sa. (1 Piɛr 2:6-8; Ezai 8:14, 15) I sɔ’n ti’n, kannzɛ bɔbɔ Zezi yoli abonuan sa kpanngban’n, sanngɛ sran mun ‘b’a lafimɛn i su. Kɛ ɔ yo naan ndɛ nga Ɲanmiɛn nuan ijɔfuɛ Ezai kannin’n w’a kpɛn su ti ɔ. Ɔ seli kɛ: “?Nannan [Zoova], ndɛ nga a klɛli be’n, wan yɛ ɔ fali su ɔ?”’ (Zan 12:37, 38; Ezai 53:1) Asa ekun’n, Zuifu’m be buli i kɛ sɛ Mɛsi ba’n, ɔ́ yó maan bé ɲán be ti Rɔmufuɛ’m be sa nun naan ɔ́ táka Davidi i famiɛn dilɛ’n ekun asiɛ’n su wa. I sɔ ato ndɛ’n truli kpa. Ɔ maan, kɛ mɔ Zezi wunnin ɲrɛnnɛn kpɛkun ɔ wuli’n ti’n, Zuifu’m be sunman lika b’a kplinman su kɛ i yɛ ɔ ti Mɛsi’n niɔn. Sanngɛ kusu nn Ezai kannin kɛ kwlaa naan Mɛsi’n w’a kaci famiɛn’n, ɔ́ wún ɲrɛnnɛn.

Ezai fluwa nun’n, Mɛsi’n kɛnnin i bɔbɔ i wun ndɛ. Ɔ seli kɛ: ‘N tikeli min sin’n su m mannin be nga be boli min’n, kɛ bé kpɛ́ min nzowa’n, kɛ bé tí be nuan nzue tá min wun’n, m’an kataman min ɲrun’n.’ Sa ng’ɔ juli Zezi i yalɛ klelɛ nun’n, Matie kɛnnin i ndɛ. Ɔ klɛli kɛ: ‘Kɛ ɔ yoli sɔ’n, yɛ be guɛli i ɲrun ngɔsrɛ ɔ, yɛ be boli i acɔliɛ ɔ. Wie’m be kpacili i ɲrun.’ (Ezai 50:6; Matie 26:67, 68) Ezai klɛli kɛ: “Kɛ bé klé i yalɛ’n, ɔ kɛnnin i wun ase, [...] w’a ukemɛn i nuan.” I sɔ’n ti’n, kɛ Zuifu’m bé tɔ́n Zezi suɛn mɔ Pilati usali i su kosan’n, ‘w’a tɛman ndɛ sɔ’n kun sa su, i sɔ’n yɛ ɔ boli be kpɛnngbɛn’n i nuan dan’n niɔn.’—Ezai 53:7; Matie 27:12-14; Sa Nga Be Yoli’n 8:28, 32-35.

Mɛsi’n i wie’n i su ndɛ. Zezi i wie’n, ɔ nin sa nga be juli i sin bɔbɔ’n, Ezai boli be su kpɛkun be kpɛnnin su. Ezai seli kɛ: ‘Be sieli i nin sran kunfuɛ’m be likawlɛ, ɔ nin aɲanbeunfuɛ’m be ndia’n yoli kun.’ (Ezai 53:9) Kɛ e niɛn i sa’n, e kwla bu i kɛ ndɛ nɲɔn sɔ’m be sansan be wun. ?Ɔ maan wafa sɛ yɛ be kpɛnnin su ɔ? Kɛ bé kún Zezi’n, be boboli i kodiawiefuɛ nɲɔn be afiɛn. (Matie 27:38) I sin’n, Zozɛfu m’ɔ fin Arimate’n, ɔ fali Zezi i saka’n sieli i bɔbɔ i ndia mɔ be kpɛli i yɛbuɛ buɛ nun ɔ nin a cɛman’n i nun. (Matie 27:57-60) I sɔ’n ti’n, Zezi i wie’n yoli maan ndɛ cinnjin kun mɔ Ɲanmiɛn nuan ijɔfuɛ Ezai kannin’n, i nuan yiali. Afin kɛ ɔ́ kán Mɛsi’n i ndɛ’n, ɔ seli kɛ: ‘N sran kpa sɔ’n, ɔ́ wá yó maan be nun kpanngban bé yó kpa, yɛ ɔ́ fá be wun sa’n.’ Zezi fɛli i wun kpɔli sran nanwlɛfuɛ’m be kwlaa be ti. Ɔ maan, be kwla ɲan be ti sa tɛ’n sa nun.—Ezai 53:8, 11; Rɔmfuɛ Mun 4:25.

Ɲanmiɛn nuan ndɛ’n i nuan yia titi

Kɛ Zezi nin i akoto’m bé kán Mɛsi’n i ndɛ’n, be boli Ezai fluwa’n su kpɛ sunman trali Biblu’n nun fluwa onga mun. Sanngɛ, nán Ezai fluwa’n kunngba yɛ ɔ kannin be ɲrun lɔ sa ndɛ ɔ. Biblu’n i bue nga i bo bolɛ nun be klɛli i Ebre nun’n, ɔ kannin ndɛ kpanngban mɔ be kpɛnnin su Zezi nin i Sielɛ’n be lika ɔ. Ɔ kannin ninnge kpakpa nga e ɲrun lɔ’n, Sielɛ sɔ’n wá yó be’n, be ndɛ wie.b (Sa Nga Be Yoli’n 28:23; Sa Nglo Yilɛ 19:10) ?Ngue yɛ ɔ kle kɛ ndɛ sɔ’m bé kpɛ́n su sakpa ɔ? Zezi seli Zuifu mun kɛ: ‘Nán an bu i kɛ m bali Moizi mmla’n nin Ɲanmiɛn nuan ijɔfuɛ’m be ndɛ’n [mɔ yɛle Biblu’n i bue nga i klikli nun’n, be klɛli i Ebre nun’n] be su nunnunlɛ, be nun yiyilɛ yɛ m bali ɔ. Afin nanwlɛ, ń kán klé amun kɛ be su nunnunman mmla’n i nun fluwa mma kaan kun annzɛ i nun ndɛ kaan kun lele saan kɛ nglo’n nin asiɛ’n be nunman lɛ kun’n. Saan i kwlaa sɔ’n ɔ́ kpɛ́n su.’—Matie 5:17, 18.

Zezi boli Biblu’n nun ndɛ wie’m be su. Ndɛ sɔ’m be wie be kpɛnnin su i blɛ liɛ’n nun yɛ wie’m be kusu bé kpɛ́n su e ɲrun lɔ. (Daniɛl 9:27; Matie 15:7-9; 24:15) Asa ekun’n, Zezi nin i sɔnnzɔnfuɛ’m be boli sa wie mɔ, kɛ be wuli’n yɛ be kpɛnnin su’n, be su. Sa sɔ’m be nun kpanngban be kpɛn su e blɛ liɛ’n nun. Fluwa’n i nun ndɛ nga bé bá lɛ’n bé wá kán sa sɔ mun nin Biblu’n nun ndɛ wie mun ekun mɔ bé kpɛ́n su e ɲrun lɔ’n, be ndɛ.

[Ja ngua lɛ ndɛ mun]

[Foto, bue 4]

‘Talua m’ɔ nin a siman bian’n ɔ́ wú ba yasua.’

[Foto, bue 5]

‘Kɛ bé kpɛ́ min nzowa’n, kɛ bé tí be nuan nzue tá min wun’n, m’an kataman min ɲrun’n.’