NDƐ NG’Ɔ O FLUWA’N SU’N: ?Ɔ FATA KƐ MƐN’N I AWIELIƐ’N I JULƐ’N KUN AMUN SRƐ?

Mɛn i awieliɛ’n: Ɔ kun wie’m be srɛ, wie’m be ɲin o i sin, yɛ w’a flan wie mun

?KƐ AMUN amun bu afuɛ 2012 Desamblu anglo’n i le 21 i akunndan’n, wafa sɛ yɛ amun wun yo amun ɔn? Sran kpanngban be kannin kɛ cɛn sɔ’n nun’n ninnge’m bé káci kpa asiɛ’n wunmuan’n su. Ninnge nga amun wla o su kɛ bé jú’n ti’n atrɛkpa’n, kɛ amun bu cɛn sɔ’n i akunndan’n, amun wla gua ase annzɛ amun wla bo. Annzɛ kusu amun ndɛ nunman cɛn sɔ’n nun kun. ?Mɛn’n i awieliɛ’n mɔ sran’m be waan ɔ́ jú m’ɔ juman’n, nɛ́n i kun yɛle ngalɛ’n?

?Yɛ “mɛn’n i awieliɛ’n” nga Biblu’n kɛn i ndɛ’n nin? (Matie 24:3) Ndɛ sɔ’n ti’n, srɛ kun sran wie mun afin be bu i kɛ asiɛ’n wá yrá. Ɔ ka wie’m be ngunmin kusu’n, w’a ju naan b’a wun wafa nga sa sɔ’n wá yó’n. Wie’m be liɛ kusu’n, mɛn’n i awieliɛ’n i ndɛ w’a flan be afin be sɔ i minndɛlɛ w’a cɛ. ?Sanngɛ ndɛ kpa kun sa ti li yɛ sran’m be wun yo be sɔ ɔ?

Atrɛkpa’n, mɛn’n i awieliɛ’n i su ndɛ nga Biblu’n kan’n, ɔ́ bó amun nuan. Biblu’n kle sa nga ti yɛ ɔ fata kɛ e ɲin tran mɛn’n i awieliɛ cɛn’n i sin’n. Sanngɛ nɛ́n i ngba ɔ. Ɔ kle kɛ sran wie’m bé wá bú i kɛ i julɛ’n w’a cɛ ɔ maan be sa sin búbú be. Biblu’n tɛ mɛn’n i awieliɛ’n i su kosan wie mɔ sran’m be ta be usa’n be su. Amun nian.

?Asiɛ’n yrá sekeseke?

BIBLU’N TƐ SU KƐ: “[Ɲanmiɛn] wlali asiɛ’n i bo ase kekleke kpa! Kɛ ɔ o lɛ’n yɛ ɔ wo-ɔ.”​—JUE MUN 104:5.

Be su faman sin annzɛ like wie nunnunman asiɛ’n le. Biblu’n waan sran’m bé trán asiɛ’n su anannganman. Jue Mun 115:16 se kɛ Ɲanmiɛn “fali asiɛ’n kusu mannin sran mun.”​—Ezai 45:18.

Kɛ Ɲanmiɛn yili asiɛ’n ɔ seli kɛ “ɔ yoli kpa dan.” Ɔ te bu i sɔ. (Bo Bolɛ 1:31) Ɔ kɛnmɛn i sacilɛ ndɛ kaan sa. I li bɔbɔ’n, i waan ɔ́ “núnnún be nga be saci asiɛ’n.” Yɛ ɔ́ sásá asiɛ’n naan b’a sacimɛn i mlɔnmlɔn.​—Sa Nglo Yilɛ 11:18.

Ɔ maan amun kwla usa kɛ: ‘?Yɛ ndɛ nga 2 Piɛr 3:7 kan’n nin?’ Ɔ se kɛ: “Maan be sie nyanmiɛn su lɔ’n nin asiɛ nga be o lɛ ndɛ’n, be lɛ maan sin di be.” ?Ndɛ sɔ’n kleman kɛ asiɛ’n yrá sekeseke? Ɔ ju wie’n, “nyanmiɛn su lɔ’n,” nin “asiɛ’n,” yɛ “sin” nga Biblu’n kan be ndɛ’n, be ti nzɔliɛ like. I wie yɛle kɛ kɛ Zeremi 22:29 se kɛ: “Asiɛ, asiɛ, asiɛ, sie ɔ su tie Anannganman i nuan su ndɛ’n,” klɔ sran’m be ndɛ yɛ ɔ kan ɔn.

Ndɛ mma nga be mantan 2 Piɛr 3:7 be kle kɛ nyanmiɛn su lɔ’n, nin asiɛ’n, yɛ sin nga be kan be ndɛ’n, be kusu be ti ninnge wie’m be nzɔliɛ. Ndɛ mma 5 nin 6 be fa sa ng’ɔ́ wá jú’n sunnzunnin nzue dan ng’ɔ tɔli Nowe blɛ su’n. Blɛ sɔ’n nun’n, asiɛ bɔbɔ ba’n kali lɛ. “Asiɛ’n” nga be nunnunnin i’n yɛle be nga be yo sa kekleekle blɛ sɔ’n nun’n. Yɛ “nyanmiɛn su lɔ’n” nga be nunnunnin i’n, yɛle sran nga blɛ sɔ’n nun’n, be sie asiɛ’n sufuɛ mun’n. (Bo Bolɛ 6:11,12) I wafa kunngba’n, sran tɛtɛ mun nin mɛn’n nun awa nga be sie be mun mɔ b’a saci’n, be yɛ 2 Piɛr 3:7 kan be nunnunlɛ i ndɛ kɛ sin m’ɔ su di like wie sa’n niɔn.

?Kɛ mɛn’n i awieliɛ cɛn’n ko ju’n, lika’n yó sɛ?

BIBLU’N TƐ SU KƐ: “Mɛn’n nin i nun ninnge kwlaa bɔ sran nyin blo su’n, bé wíe, sanngɛ sran ng’ɔ yo Nyanmiɛn klun sa’n, ɔ́ ká lɛ tititi.”​—1 ZAN 2:17.

“Mɛn’n” nga be kɛn i ndɛ kɛ ɔ́ wíe’n, nán asiɛ’n bɔbɔ ba’n niɔn. Be nga be yoman Ɲanmiɛn klun sa mun ɔn. Sɛ sran kun i lika wie su saci’n, dɔɔtrɔ’m be kwla kpɛ be yi naan w’a wuman. I kunngba’n, be nga be yo sa tɛ’n, Ɲanmiɛn wá “kán be bo.” I liɛ’n, sran kpa’m bé kwlá dí alaje asiɛ’n su. (Jue Mun 37:9) I lɛ nun’n, “mɛn’n i awieliɛ’n” ti like kpa.

Ndɛ mma nga be kacili i kɛ “mɛn’n i awieliɛ’n,” wafa nga Biblu wie’m be kacili i’n, ɔ kle kɛ mɛn’n i awieliɛ’n ti like kpa kɛ nga e fa kannin’n sa. Be flɛli mɛn’n i awieliɛ’n kɛ “ninnge’m be siesielɛ wafawafa’m be awieliɛ.” (Matie 24:3, NW) Ɔ maan kɛ mɛn’n ko wie’n, sran wie’m bé ká lɛ. Asiɛ’n ká lɛ wie. I sɔ’n ti’n, ɔ nin i fata kɛ be bo blɛ uflɛ bo yɛ be siesie ninnge’m be wafa uflɛ. I sɔ kusu yɛ Biblu’n kan ɔn. Afin ɔ kan “blɛ ng’ɔ́ bá lɔ’n,” i ndɛ.​—Lik 18:30.

Zezi flɛli blɛ ng’ɔ́ bá e ɲrun lɔ’n kɛ blɛ mɔ “bé wá yí ninnge’m be kwlaa be uflɛ’n.” Blɛ sɔ’n nun’n, ɔ́ wá yó maan klɔ sran’m bé káci kɛ i klikli nun nga Ɲanmiɛn yili’n be’n sa. (Matie 19:28, NIV) Sa nga bé wá mán e aklunjuɛ’n be nun wie mun yɛ:

◼ Asiɛ’n káci mɛn klanman. I sufuɛ’m be kwlaa bé trán fɔuun yɛ ninnge kpakpa kwlaa sín yía be.​—Ezai 35:1; Mise 4:4.

◼ É dí junman kpa yɛ e klun jɔ́ su.​—Ezai 65:21-23.

◼ Tukpacɛ kwlaa wíe.​—Ezai 33:24.

◼ Sran oke’m bé sá be sin bé káci gbanflɛn nin talua.​—Zɔb 33:25.

◼ Be nga be wuli’m bé sá be sin nguan nun.​—Zan 5:28, 29.

Sɛ e yo “Nyanmiɛn klun sa’n,” yɛle kɛ sɛ e yo like nga Ɲanmiɛn kunndɛ kɛ e yo’n, ɔ nunman nun kɛ mɛn’n i awieliɛ’n i julɛ’n kun e srɛ. I li bɔbɔ e ɲin kwla trɛn i sin.

?Mɛn’n i awieliɛ w’a mantan koko sakpa?

BIBLU’N TƐ SU KƐ: “Kɛ amún wún kɛ sa sɔ’m be su yo’n, an si kɛ Nyanmiɛn sielɛ blɛ’n w’a mantan.”​—LIK 21:31.

Fluwa nga be flɛ i Cɛn kasiɛn’n w’a ju ekun (be yili i Angle nun) i nun’n, like klefuɛ dan kun m’ɔ suan Richard Kyle klɛli i kɛ: “Kɛ lika’n ka lɛ kaci kpɛ kunngba’n, annzɛ kɛ sran’m be afiɛn sanngan kpa’n, kpɛkun be su kan mɛn’n i awieliɛ’n i ndɛ.” I li kɛ be siman like nga ti yɛ sa sɔ’m be juli’n, yɛ be yo sɔ kpa’n niɔn.

Sanngɛ Ɲanmiɛn nuan ijɔfuɛ nga be kannin mɛn’n i awieliɛ’n i ndɛ’n, nán be blɛ su sa sukusuku nga be o lɛ’n be bo tulɛ ti yɛ be kɛnnin i ndɛ ɔ. Ɲanmiɛn yɛ ɔ fali ndɛ’n wlali be nuan naan be kan sa nga bé wá klé kɛ mɛn’n su wa wie’n be ndɛ ɔ. Maan e kan sa sɔ’m be nun wie’m be ndɛ. Amun bɔbɔ be nian sɛ be su kpɛn su andɛ o.

◼ Alɛ, awe, asiɛ m’ɔ keje’n, yɛ tukpacɛ nga be sa ndɛndɛ mɔ be kun be sran mun’n.​—Matie 24:7; Lik 21:11.

◼ Sran sunman mɔ be ɲin yiman mmla’n.​—Matie 24:12.

◼ Sran mɔ be saci asiɛ’n.​—Sa Nglo Yilɛ 11:18.

◼ Sran mɔ be bu be bɔbɔ be wun akunndan, be ti sika klofuɛ, be klo fɛ dilɛ sanngɛ be kloman Ɲanmiɛn’n.​—2 Timote 3:2, 4.

◼ Anuannzɛ m’ɔ nunman awloawlo’m be nun kun’n.​—2 Timote 3:2, 3.

◼ Ninnge nga be kle weiin kpa kɛ mɛn’n i awieliɛ’n w’a wie ju’n mɔ be timan sran’m be cinnjin’n.​—Matie 24:37-39.

◼ Ɲanmiɛn Sielɛ’n i jasin fɛ’n mɔ be su bo i mɛn wunmuan’n nun’n.​—Matie 24:14.

Kɛ nga Zezi fa kannin’n sa’n, ‘kɛ e wun ninnge sɔ’m be kwlaa’n,’ maan e si kɛ mɛn’n i awieliɛ cɛn’n w’a mantan. (Matie 24:33) Zoova i Lalofuɛ’m be lafi su kpa kɛ ndɛ sɔ’m be su kpɛn su. I ti’n, be kan be Ɲanmiɛn sulafilɛ’n i ndɛ kle sran mun nvlenvle 236 nun.

?Kɛ mɔ mɛn i awieliɛ’n w’a juman blɛ nga wie’m be kleli’n nun’n ti’n, ɔ su juman kun?

BIBLU’N TƐ SU KƐ: “Kɛ sran’m be se kɛ: ‘Y’a nyan e ti, y’a di alaje’n,’ kpɛkuun nyrɛnnɛn dan kpa tɔ́ be su kɛ wunnzɛfuɛ i ba wulɛ aklunya’n tɔ i su’n sa, ɔ su to fuan-man be le.”​—1 TƐSALONIKFUƐ MUN 5:3.

Biblu’n fa mɛn’n i awieliɛ cɛn’n sunnzun wunnzɛfuɛ’n i ba wulɛ aklunya’n. Aklunya sɔ’n, ɔ to fuɛnmɛn i. Asa’n, ɔ tɔ i su kpɛ kunngba. Blɛ ng’ɔ mantan mɛn’n i awieliɛ’n cɛn’n kusu ti kɛ blɛ nga bla kun ti wunnzɛfuɛ’n sa. Afin bla wunnzɛfuɛ’n si kɛ kɛ ba’n i wulɛ cɛn’n wá mántan’n ninnge wie’m bé wá klé sɔ. Dɔɔtrɔfuɛ’n kwla kle i blɛ ng’ɔ́ wú ba’n. Kannzɛ bɔbɔ blɛ sɔ’n sɛn i wun’n, bla sɔ’n lafi su titi kɛ i ba wulɛ’n nunman mmua kun. I wafa kunngba’n, kannzɛ mɛn’n i awieliɛ’n cɛn’n w’a juman blɛ nga sran’m be kleli’n nun’n, sanngɛ i sɔ’n kaciman ninnge nga be kle kɛ ‘mɛn’n w’a wɔ i bue nuan’n.’​—2 Timote 3:1.

Amun kwla usa kɛ: ‘?Sɛ nzɔliɛ nga be kle kɛ mɛn’n i awieliɛ’n cɛn’n w’a mantan’n be ɲin fite weiin’n, ngue ti yɛ sran sunman be wunman be ɔ?’ Biblu’n kle kɛ sran kaka be su faman be ɲin siemɛn i ninnge nga be kle kɛ mɛn’n i awieliɛ’n w’a mantan’n be su. Sanngɛ bé srí be nga be lafi i sɔ’n su sé kɛ: “Kɛ ɔ fin lalaa’n bɔ e nannan’m be wuli’n, like nga Nyanmiɛn yili be’n, be kwlaa be tɛ o be osu’n nun.” (2 Piɛr 3:3, 4) I sɔ’n kle e kɛ nzɔliɛ nga ɔ kle kɛ mɛn’n w’a ju i bue nuan’n timan fiawa. Sanngɛ sran kaka be yo kɛ be wunmɛn i sa.​—Matie 24:38, 39.

Ninnge kaka kle kɛ mɛn’n i awieliɛ cɛn’n w’a mantan. Nán be ngba yɛ e kannin be ndɛ ndɛ nga nun ɔn.a ?Amun kunndɛ kɛ amún sí be nun wie mun ekun? Sɛ ɔ ti sɔ’n, é wlá amun fanngan kɛ amun wun Zoova i Lalofuɛ’m be wun naan be kle amun Biblu’n nun like. Amun su tuɛmɛn i ti kalɛ. Be kwla kle amun like amun awlo lɔ annzɛ lika nga amun klo’n, annzɛ telefɔnu nun. Like kunngba cɛ nga amun fá mán’n, yɛle amun blɛ’n. I su nvasuɛ nga amun ɲɛ́n i kusu’n, ɔ leman wunsu.

[Ja ngua lɛ ndɛ’n]

[Kuku, bue 6]

?ZOOVA I LALOFUƐ’M BE KLELI MƐN’N I AWIELIƐ CƐN KPƐKUN W’A YOMAN SU?

Zoova i Lalofuɛ’m be buli i kɛ blɛ kun nun’n, mɛn’n i awieliɛ’n jú kpɛkun w’a yoman su. Kɛ nga Zezi i sɔnnzɔnfuɛ klikli’m be fa yoli’n sa’n, wie liɛ’n, blɛ nga e bu i kɛ Biblu’n nun ndɛ wie’m bé kpɛ́n su’n, ɔ nin Ɲanmiɛn i dɔ liɛ’n be sansan be wun. (Lik 19:11; Sa Nga Be Yoli’n 1:6; 2 Tɛsalonikfuɛ Mun 2:1, 2) Ndɛ nga aniaan bian Alexander Macmillan kannin’n, ɔ ti e liɛ’n su. Ɔ seli kɛ: “N wunnin i kɛ, kɛ e fɔn’n ɔ nin i fata kɛ e di e wun nanwlɛ kɛ e fɔnnin, naan e kunndɛ Ɲanmiɛn Ndɛ’n i wlɛ wunlɛ kpa ekun.”

?Yɛ nn ngue ti yɛ e te kan e te kle sran mun kɛ mɛn’n i awieliɛ’n w’a mantan koko ɔ? Yɛle kɛ Zezi seli i sɔnnzɔnfuɛ’m be kɛ: “An fa sie amun klun kpa, an tran minndɛ.” I ndɛ sɔ’n ti e cinnjin kpa. Afin sɛ y’a yoman sɔ naan Zezi tó e ɔ, e su ‘lafi’n’, ɔ su yomɛn i fɛ. (Mark 13:33, 36) ?Ngue ti ɔ?

Maan e fa ndɛ yɛ’n e yiyi nun. Sɛ sran kun o like wie ti su nglonglo, ɔ su sasa lika kun naan sin w’a diman lika sɔ’n, sɛ ɔ wun like wie kɛ sin wɛnsrɛn sa mmuammua lɔ’n, ɔ́ bó su klé sran mun. I sin’n ɔ kwla wun kɛ kannzu nán sin wɛnsrɛn ɔn. Sanngɛ i ɲin m’ɔ tran su sɔ’n ti’n, cɛn uflɛ’n ɔ kwla de sran mun.

I wafa kunngba’n, e buli i kɛ mɛn nga i awieliɛ’n jú blɛ wie nun, sanngɛ nn nɛ́n i su ɔ. Kannzɛ ɔ ti sɔ’n, like ng’ɔ ti e cinnjin’n yɛle kɛ e klo kɛ e ɲin yí Zezi naan kusu é úka sran mun naan be ɲan nguan. Nán e wun ndɛ mɔ sran’m bé kán’n yɛ ɔ ti e cinnjin ɔn. Zezi ‘kaleli ye cinnjin kpa kɛ e kan [Ɲanmiɛn Ndɛ’n e] kle sran’ mun. I ti’n, e se be kɛ mɛn’n i awieliɛ’n w’a mantan.​—Sa Nga Be Yoli’n 10:42.

E si kɛ like ng’ɔ fata kɛ ɔ yo e cinnjin kpa’n, nɛ́n i yɛle blɛ nga mɛn nga wíe’n. Sanngɛ ɔ fata kɛ e si kɛ saan mɛn’n i awieliɛ’n jú cɛn kun, naan ɔ fata kɛ e ninnge’m be yolɛ’n nun’n e bu i sɔ liɛ’n i akunndan. Ndɛ yɛ m’ɔ o Abakik 2:3 nun’n, ɔ ti e cinnjin kpa. Ɔ seli kɛ: “Kannzɛ [mɛn’n i awieliɛ’n] cɛ́ lele-ɔ ɔ́ cɛ́ ngbɛn, saan i blɛ sɔ’n jú le. Maan i li cɛ [amun bɔbɔ amun ɲrun] bɔ lele, sanngɛ fa wɔ wla gua su. I kwlaa b’ɔ yoli o, saan i sɔ sa liɛ’n ɔ́ tɔ́, ɔ su sɛn-mɛn i wun.”

[Foto, bue 3]

[Foto, bue 6]