BIBLU’N I SU KOSAN’M BE SU TƐLƐ

?Ɲanmiɛn kwla yaci e sa tɛ mun cɛ e?

Biblu’n waan klɔ sran’m be kwlaa be ti sa tɛ yofuɛ. E nin sa tɛ yolɛ’n fin Adam m’ɔ ti klɔ sran klikli’n. I sɔ’n ti’n, ɔ ju wie’n, e yo sa tɛtɛ kpɛkun i sin’n ɔ yo e nsisɔ. Zezi Klist m’ɔ ti Ɲanmiɛn i Wa’n ɔ wuli naan y’a ɲan e ti sa tɛ’n i sa nun. E ti kpɔlɛ tɛ m’ɔ yili’n maan Ɲanmiɛn kwla yaci e wun sa mun cɛ e klun ufue su.​—An kanngan Rɔmfuɛ Mun 3:23, 24 nun.

Sran wie’m be yoli sa tɛ dan kpa yɛ be usa be wun sɛ Ɲanmiɛn kwla yaci cɛ be o. Sanngɛ Ɲanmiɛn sa, Ɲanmiɛn Ndɛ’n se kɛ: ‘Jésus i mmoja’n maan e wun sa tɛ kwlaa wíe.’ (1 Zan 1:7) Sɛ sa tɛ nga e yoli’n ɔ yo e nsisɔ sakpa’n, maan ɔ yo sa tɛ dan kpa bɔbɔ’n, Zoova i klunklo su ɔ́ yáci cɛ́ e.​—An kanngan Ezai 1:18 nun.

?Ngue yɛ é yó naan Ɲanmiɛn w’a yaci e wun sa’n w’a cɛ e ɔ?

Sɛ e klo kɛ Ɲanmiɛn Zoova yaci e sa tɛ mun cɛ e’n, ɔ fata kɛ e suan i su like, naan e wun i klun sa’n i wlɛ, yɛ e si ninnge nga i waan e yo be’n. (Zan 17:3) Be nga sa tɛ nga be yoli’n ɔ yo be nsisɔ sakpa mɔ be mian be ɲin be kaci be nzuɛn’n, Zoova yaci be wun sa’n cɛ be mlɔnmlɔnmlɔn.​—An kanngan Sa Nga Be Yoli’n 3:19 nun.

Ɲanmiɛn i like yolɛ yoman ya. Ɔ si kɛ fɔ o e nun. Yɛ ɔ si aunnvuɛ kpɛkun i klun ti ufue. Ɔ fata kɛ i sɔ liɛ’n wla e fanngan naan like nga e kwla yo naan i klun w’a jɔ e wun’n, e suɛn i kpa ekun. ?Nɛ́n i ɔ?​—An kanngan Jue Mun 103:13, 14 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 5 nun. Zoova i Lalofuɛ mun yɛ be yili ɔ.

[Foto, bue 32]

Ɲanmiɛn i like yolɛ yoman ya.