NDƐ NG’Ɔ KLƐ FLUWA’N SU’N

?Bian nin bla nna nga be fa fite nzra nun’n i nianlɛ’n ti kpa?

Andɛ’n, bian nin bla nna nga be fa fite nzra nun’n,a w’a tru kpokpaa. Kɛ aata difuɛ’m bé bó ninnge’m be ndolo’n, be yi i nglo. Sran’m be wun wlawlalɛ wafa’n nun o, flimu’m be nun o, jue’m be nun o, fluwa’m be nun o, televiziɔn nun o, ngowa kanlɛ ninnge’m be nun o, be yi i nglo. Ɔ fite ɛntɛnɛti su, ɔ nin ajulisu telefɔnu’m be nun. Ɔ maan sran’m be bumɛn i like tɛ kun. Be nga be klo i sɔ sa sukusuku’m be nianlɛ’n, be su sɔn kpa tra laa’n. Kɛ ɔ fɛ i blɔfuɛ klɔklɔ’m be su lele m’ɔ́ fá jú nanmue’m be nun bɔbɔ’n, be nian.—An nian kuku nga be flɛ i “Bian nin bla nna nga be fa fite nzra nun’n i su ndɛ.”

Kɛ aliɛ cɛ́n m’ɔ́ sán’n, nn bian nin bla nna nga be fa fite nzra nun’n, ɔ́ yó kain kpa trá laa’n. I sɔ ndɛ yɛ fluwa sifuɛ dan kun m’ɔ suan Gail Dines kannin ɔn. Ɔ seli kɛ bian nin bla nna nga be fa fite nzra nun le nɲɔn nun’n, i kain liɛ’n tra ngba. Like nga laa’n, sran’m be bu i like kain mɔ i ti be nianman’n, yɛ sran’m be klo i nianlɛ siɛn’n niɔn.

Nanwlɛ, bian nin bla nna nga be fa fite nzra nun’n, w’a tru dan. Kpɛkun sran’m be klo i nianlɛ dan. ?Ɔ liɛ’n, a bu i sɛ? ?A bu i kɛ ɔ ti be ɲin su yiyilɛ like sa ngbɛn naan ɔ yoman sran like fi? ?Annzɛ a bu i kɛ ɔ saci sran tɛ kpa? Zezi seli kɛ: “Waka kpa kwlaa su mma kpakpa, sanngɛ waka b’ɔ ti-man kpa’n kusu ɔ su-man mma kpakpa.” (Matie 7:17) ?Bian nin bla nna nga be fa fite nzra nun’n, ɔ yo sran’m be sɛ? É wá úsa kosan wie mun. Wafa nga é tɛ́ be su’n, bé tíke e ɲin.

?I nianlɛ’n, i tielɛ’n, i su fluwa kannganlɛ’n, ɔ yo sran sɛ?

NDƐ NGA FLUWA SIFUƐ’M BE KAN’N: Fluwa sifuɛ nin dɔɔtrɔ wie’m be waan sran ng’ɔ nian bian nin bla nna nga be fa fite nzra nun’n, ɔ ti kɛ sran ng’ɔ nɔn drɔgi’n sa. Kɛ ɔ yo naan ɔ wlɛ i ayeliɛ’n i ase’n, ɔ ti kekle kpa mɛn i.

Be flɛ bian kun kɛ Braian.b Bian nin bla nna nga be fa fite nzra nun’n i nianlɛ ɛntɛnɛti su’n, yɛ ɔ ti i junman ɔn. Ɔ seli kɛ: “N kwlá yacimɛn i nianlɛ. Kɛ n ko nian kusu’n, ɔ yo min kɛ like wie w’a fu min sa. Min wun usu min, min klun titi min, kpɛkun min ti yo min ya. N kplinnin min ɲin kpa kɛ ń yáci ninnge sɔ’m be nianlɛ. Sanngɛ lele m’ɔ́ dí afuɛ kpanngban’n, n nin a kwlá yacimɛn be nianlɛ’n.”

Blɛ sunman nun’n, be nga be nian bian nin bla nna nga be fa fite nzra nun’n, be fia yɛ be nian ɔn. Kɛ ɔ ko yo naan sran’m b’a siman sɔ’n, be yo ninnge mun gblɛ nun, yɛ be lakalaka be wiengu. Ɔ maan, ɔ yo be kɛ be ndɛ loman be wiengu sa yɛ ɲannzuɛn kun be, be klun titi be, be akunndan’n sanngan kpɛkun be fa ya ndɛndɛ. Wie’m be liɛ’n, be kunndɛ kɛ bé kún be wun bɔbɔ. Kɛ yasua kun m’ɔ suan Sɛrzi fɛli sɔ. Bla nin bian nna nga be fa fite ɛntɛnɛti su’n, laa’n, ɔ fa wie wlɛ i telefɔnu nun. Be flɛ i kɛ ɔ yoli i sɔ aliɛ ba kwlaa nun. Ɔ seli kɛ: “Kɛ n nian’n, sran ndɛ loman min. Min klun jɔman, ɔ yo min kɛ n nunman sran’m be nun wie sa. Min akunndan’n bu min fɔ. Kpɛkun ɔ yo min kɛ n su kwlá yaciman like tɛ sɔ’n i nianlɛ le sa. M’an wunman min wun fɛ. Kusu kɛ ɔ yo naan n kunndɛ ukalɛ’n, srɛ kunnin min kpa.”

Kannzɛ e ɲin gua bian nin bla nna nga be fa fite nzra nun’n i foto annzɛ i flimu su kaan sa’n, annzɛ e tie i su ndɛ kaan sa bɔbɔ’n, ɔ kwla yo tɛ man e. I sɔ yɛ fluwa sifuɛ dan kun m’ɔ suan Judith Reisman ɔ kannin ɔn. Ɔ seli kɛ: ‘Bla nin bian nna nga be fa fite nzra nun’n i nianlɛ’n saci sran ti nun. Ɔ ka sran’n i akunndan’n nun sa lelee. Kannzɛ sran’n niɛnnin i kpe kan annzɛ ɔ niɛnnin i kpɛ kunngba annzɛ i ɲin tɔli su kaan sa’n, ɔ kɛ i ti nun. Kɛ ɔ yo naan i ɲin tu su’n, ɔ timan pɔpɔ.’ Talua kun mɔ be flɛ i Suzanin m’ɔ le afuɛ 19, ɔ yoli i sɔ wie. Kɛ ɔ́ dí ɛntɛnɛti su junman’n, i ɲin tɔli bian nin bla nna nga be fa fite nzra nun’n su. I waan: “Ninnge nga n wunnin be’n, n wla te kpɛn be su. Ɔ ju wie bɔbɔ’n, be sinsin min ɲin su. M bumɛn i kɛ n wla kwla fi be su le.”

I TƐ KPA M’Ɔ TI’N: Sran ng’ɔ nian bla nin bian nna nga be fa fite nzra nun’n, ɔ kaci like sɔ’n i kanga, ɔ saci tɛ kpa.—2 Piɛr 2:19.

?Ninnge sɔ’m be nianlɛ’n, ɔ kwla yo sran kun nin i awlofuɛ’m be sɛ?

NDƐ NGA FLUWA SIFUƐ’M BE KAN’N: Be klɛli i fluwa kun nun kɛ bian nin bla nna nga be fa fite nzra nun’n i nianlɛ ti’n, yasua kun nin i yi’n be afiɛn’n kwla saci. Yɛ siɛ nin niɛn mun nin be mma’m be afiɛn kwla saci wie.

Bla nin bian nna nga be fa fite nzra nun’n i nianlɛ’n, ɔ saci yasua nin i yi’n, ɔ nin be mma’m be afiɛn. Yɛle kɛ:

▪ Yasua nin i yi’n, be lafiman be wiengu su kun. Yɛ be kloman be wun kun.—Nyanndra Mun 2:12-17.

▪ Yasua annzɛ bla ng’ɔ niɛn i sɔ like’n, ɔ bu i ngunmin i wun akunndan. Ɔ bu i kɛ i yi’n annzɛ i wun’n yo sɔ wie. Bian nin bla nna nun’n, i klun jɔmɛn i yi’n annzɛ i wun’n, i wun kun.—Efɛzfuɛ Mun 5:28, 29.

▪ Sran ng’ɔ niɛn i sɔ like’n, ɔ bu bian annzɛ bla kunndɛlɛ akunndan sa trilili. Ɔ kunndɛ kɛ ɔ́ yó sa tɛtɛ ng’ɔ niannin’n wie.—2 Piɛr 2:14.

▪ Sran ng’ɔ niɛn i sɔ like’n, ɔ kunndɛ kɛ ɔ́ míɛn i yi annzɛ i wun’n kɛ ɔ nin i be yo ninnge tɛtɛ ng’ɔ wunnin be foto’n, annzɛ ɔ niannin be su flimu’n.—Efɛzfuɛ Mun 5:3, 4.

▪ Ɔ wlawla yasua annzɛ bla ng’ɔ niɛn i sɔ like’n kɛ ɔ bu sran m’ɔ timɛn i yi’n annzɛ i wun’n, i kunndɛlɛ akunndan.—Matie 5:28.

Biblu’n waan nán yasua’m be “kunndɛ bla [be] yi’m be bo” yɛ nán bla’m be kunndɛ bian be wun’m be bo. (Malasi 2:16) Sran ng’ɔ yo sɔ’n, ɔ nin i yi’n annzɛ i wun’n be kwla yra. Kɛ ɔ yo sɔ’n, ba’m be fɛ.

Ba nga be niɛn i sɔ like’n, be saci tɛ kpa. Braian nga e boli i ndɛ’n su icra’n seli kɛ: “Cɛn kun mɔ awlo lɔ é kán ngowa nga be flɛ i e fia e fia’n, n ko fiteli min baba i fluwa wie’m be su. Be kan bian nin bla nna ndɛ. Kɛ ɔ́ yó sɔ’n, n nin a ɲanman afuɛ blu. N wa kanngannin be nun wie. M’an wunman be kpa mɔ be ti’n. Sanngɛ m’an kwlá yaciman be nun kannganlɛ. N yoli sɔ lele n fa ɲinnin.” Gbanflɛn annzɛ talua nga be kanngan fluwa nga be yi bian annzɛ bla nna nglo’n, be ɲinman naan b’a si bla annzɛ bian. Asa ekun’n, be bo wlaka, be tɔ sran gblu. Be ɲin su ti jreinjrein.

I TƐ KPA M’Ɔ TI’N: Sran ng’ɔ nian bian nin bla nna nga be fa fite nzra nun’n, ɔ nin i wiengu’m be afiɛn saci. I sɔfuɛ’n, ɔ ɲan awlɛn ba ya, yɛ i wla guaman ase.—Nyanndra Mun 6:27.

?Wafa sɛ yɛ Ɲanmiɛn bu bian nin bla nna nga be fa fite nzra nun’n niɔn?

ƝANMIƐN NDƐ’N WAAN: “I sɔ’n ti’n, an wla amun [...] nzuɛn’n be ase: bla nin bian kunndɛlɛ, sa tɛtɛ yolɛ, be konvi b’ɔ sɔ nyannzuɛn sa mun’n, be nyin b’ɔ blo ninnge’m be su’n, be nyin b’ɔ yi-man like’n b’ɔ nin amuɛn sɔlɛ’n ti kun’n.”—Kolɔsfuɛ Mun 3:5.

É kpɛ́ i kpo é sé kɛ Ɲanmiɛn Zoovac kpɔ bian nin bla nna nga be fa fite nzra nun’n, i nianlɛ’n. Ɲanmiɛn kunndɛ kɛ yasua’n nin i yi’n, be di aklunjuɛ naan be wiengu ndɛ lo be naan be wu ba. I ti yɛ Ɲanmiɛn mannin atin kɛ yasua nin i yi be si sua.—Zak 1:17.

Like nga ti yɛ Zoova kpɔ bian nin bla nna nga be fa fite nzra nun’n, i wie yɛlɛ kɛ:

▪ Bian nin bla nna nga be fa fite nzra nun’n, ɔ saci sran.—Efɛzfuɛ Mun 4:17-19.

▪ Ɲanmiɛn klo e, ɔ kunndɛman kɛ sa ɲan e.—Ezai 48:17, 18.

▪ Zoova kunndɛman kɛ be nga b’a ja bla nin bian’n, be aja’n saci naan be awlo’n bo.—Matie 19:4-6.

▪ Ɲanmiɛn kunndɛman kɛ e ɲin tran sa tɛtɛ’m be yolɛ’n su. Ɔ kunndɛ kɛ e bu e wiengu sran.—1 Tɛsalonikfuɛ Mun 4:3-6.

▪ Ɲanmiɛn kunndɛman kɛ e fa e yasua lika annzɛ e bla lika e yo sa sukusuku.—Ebre Mun 13:4.

▪ Sran ng’ɔ klo bian nin bla nna nga be fa fite nzra nun’n i nianlɛ’n, kɛ ɔ nin i yi annzɛ i wun bé sí sua’n, ɔ bu i ngunmin i wun akunndan. Satan klo i sɔ’n kpa.—Bo Bolɛ 6:2; Zid 6, 7.

I TƐ KPA M’Ɔ TI’N: Bian nin bla nna nga be fa fite nzra nun’n i nianlɛ’n, ɔ saci sran’n nin Ɲanmiɛn be afiɛn.—Rɔmfuɛ Mun 1:24.

Be nga be kunndɛ kɛ bé yáci i sɔ sa sukusuku’m be nianlɛ’n, Zoova si be aunnvuɛ. Biblu’n waan: “Anannganman klun ti ufue, ɔ si aunnvuɛ. Ɔ fa-man ya ndɛndɛ, i kpa liɛ’n, be flɛ-man. Afin ɔ si like ng’ɔ fa yili ye’n. Ɔ o i klun, ɔ si kɛ fa yɛ ɔ fa yili ye-ɔ.” (Jue Mun 103:8, 14) Be nga be ti wun ase kanfuɛ’n, ɔ se be kɛ be bla ‘naan ɔ si be aunnvuɛ, naan blɛ nga be sa mian’n, ɔ yo be ye, yɛ ɔ ti be wun nyanman nun.’—Ebre Mun 4:16; an nian kuku nga be flɛ i “Like nga sran kun yó naan w’a yaci bian nin bla nna nga be fa fite nzra nun’n i nianlɛ’n” nun.

Sran kpanngban be kplinnin su kɛ Ɲanmiɛn uka be. Yɛ ɔ ukali be kpa kusu. Biblu’n kan be nga be yacili ninnge tɛtɛ’m be yolɛ’n be ndɛ. Ɔ se kɛ: “E Nyanmiɛn a wunnzin amun, w’a fa amun a kaci i liɛ mlɔnmlɔn, yɛ w’a bu amun sran kpa e Min Jésus-Krist dunman nun nin i Wawɛ’n i fanngan nun.” (1 Korɛntfuɛ Mun 6:11) Ndɛ nga akoto Pɔlu kannin’n, ɔ ti be liɛ wie. Ɔ seli kɛ: “E bɔ e lɛ Nyanmiɛn ninnge kpakpa sɔ mun’n, e ti kɛ sɛ sa, ɔ maan be wun i wlɛ kɛ e kwlá yo-man like fi, sanngɛ Nyanmiɛn b’ɔ kwla like kwlaa yo’n yɛ ɔ yo sa-a.”—2 Korɛntfuɛ Mun 4:7.

Suzanin mɔ e kɛnnin i ndɛ’n, ɔ yacili bian nin bla nna nga be fa fite nzra nun’n i nianlɛ. Ɔ seli kɛ: “Zoova kunngba cɛ yɛ ɔ kwla uka sran kun naan w’a wla ayeliɛ sɔ’n i ase ɔ. Sran ng’ɔ srɛ i m’ɔ fɛ i atin’m be su’n, ɔ́ bú i sran kpa. Ɔ yiman sran ase le.”

[Ja ngua lɛ ndɛ mun]

[Foto, bue, 3]

[Foto, bue 4, 5]

[Kuku bue 5]

BIAN NIN BLA NNA NGA BE FA FITE NZRA NUN’N I SU NDƐ

SEGƆNDU KWLAA NUN’N: Sran kɔe 30.000 be nian bla nin bian nna ɛntɛnɛti su.

MINITI KWLAA NUN’N: Sran’m be fa bla nin bian nna foto annzɛ i like uflɛ 1.700.000 tra su man sran mun ɛntɛnɛti su.

DƆ KWLAA SU’N: Be yi bla nin bian nna ng’ɔ ti kaiin kpa’n i flimu kɔe NƝƆN Amlɛnkɛn’m be lɔ.

CƐN KWLAA’N: Amlɛnkɛn’m be lɔ ngunmin’n, bla nin bian nna i su flimu nga sran’m be lue nian’n, ɔ tra MILIƆN NƝƆN.

ANGLO KWLAA NUN’N: Amlɛnkɛn’m be lɔ’n, sɛ be fa gbanflɛn 10, e kwla se kɛ be nun 9 nian bian nin bla nna nga be fa fite nzra nun’n. Yɛ sɛ be fa talua 10, e kwla se kɛ be nun 3 niɛn i sɔ like’n.

AFUƐ KWLAA NUN’N: Be nga be yi bian nin bla nna’n i flimu nin be nga be yo be atɛ’n, sika nga be ɲɛn i nun’n, ɔ ju i liɛ MILIAR 50.000.

[Foto, bue 6, 7]

Like nga sran kun yó naan w’a yaci bian nin bla nna nga be fa fite nzra nun’n i nianlɛ’n

Sran wie o lɛ’n, ɔ miɛn i ɲin kɛ ɔ́ yáci bian nin bla nna nga be fa fite nzra nun’n i nianlɛ, annzɛ i su ndɛ tielɛ annzɛ i su fluwa kannganlɛ. ?A si i sɔ sran? Sran wie’m be kwla wlɛli i sɔ ayeliɛ’n i ase. ?Ngue yɛ be yoli naan b’a kwla wlɛ i ase ɔ?

1. Be srɛli Ɲanmiɛn.

Be flɛ yasua kun kɛ Flanzi. Ɔ seli kɛ: “Like cinnjin kpa nga sran kun yó naan w’a yaci bian nin bla nna nga be fa fite nzra nun’n i nianlɛ’n, yɛle Zoova srɛlɛ’n.”

Sran nga Zoova fɛ i wawɛ’n mɛn i’n, Zoova ‘klun sa yolɛ’n yó i fɛ yɛ ɔ́ kwlá yó.’ (Filipfuɛ Mun 2:13) Ɔ maan, ɔ ‘wla i konvi’n i ase, yɛ i nyin blo-man ninnge’m be su kun.’—Galasifuɛ Mun 5:16, 24.

2. Be wunnin sran wun kɛ ɔ uka be.

Be flɛ yasua kun Yosi. Ɔ seli kɛ: “Bla nin bian nna nga be fa fite nzra nun i nianlɛ’n, ɔ ti ɲannzuɛn like. Ɔ maan sran ng’ɔ yo i sɔ like’n, ɔ kwlá tumɛn i klun kleman sran naan b’a ukɛ i. Ɔ bu i klun lɔ kɛ i kunngba kwla miɛn i ɲin fite nun. Sanngɛ, ɔ su lɛkɛ i wun. Sɛ b’a ukɛmɛn i’n, ɔ su yoman ye mɛnmɛn. N wunnin i sɔ liɛ’n i wlɛ. Ɔ maan, n yoli min wun aenvuɛ n tuli min klun n kleli min yi. Asa ekun’n, n wunnin min janvuɛ kpa kun wun kɛ ɔ uka min. Nanwlɛ, w’a yoman min sa nun pɔpɔ. Sanngɛ, be ukali min kpa.”

Sran ng’ɔ nian bla nin bian nna nga be fa fite nzra nun’n, sɛ ɔ timan yakpafuɛ’n, ɔ kwlá dimɛn i nanwlɛ naan b’a ukɛ i. Sɛ w’a dimɛn i nanwlɛ kusu’n, ɔ kwlá yacimɛn i yolɛ naan ɔ nin i sran kpa’m be afiɛn w’a sɛ ekun. Suzani mɔ e dun mmua kɛnnin i ndɛ’n seli kɛ: “Blɛ mɔ ń tú min klun ń dí like nga n yo’n i nanwlɛ’n, w’a yoman min sa nun pɔpɔ. Sanngɛ kɛ n yoli sɔ’n, min wla guali ase, min wun jɔli min fɔun.”—Zak 5:16.

3. Be wunnin like nga ti yɛ be niɛn i sɔ like’n i wlɛ, kpɛkun be sasali be wun.

Ninnge nga ti yɛ sran’m be konvi sɔ bla nin bian nna nga be fa fite nzra nun’n i nianlɛ’n, ɔ ti fanunfanun. Sran wie’m be liɛ’n, kɛ be kɔ ɛntɛnɛti su’n yɛ be konvi sɔ i nianlɛ ɔ. Wie liɛ ekun’n, kɛ be nian televiziɔn kɔnguɛ’n yɛ be konvi sɔ i ɔ. Wie kusu’n, kɛ be kanngan fluwa wie’m be nun’n, annzɛ be kɔ be ɲin su yiyilɛ jenvie nuan lɔ’n, yɛ be konvi sɔ sa tɛ sɔ’n niɔn. Wie’m be liɛ bɔbɔ’n, kɛ be fa ya annzɛ awe kun be’n, annzɛ kɛ sran fi nunman be wun lɛ’n, annzɛ kɛ b’a di junman b’a fɛ’n yɛ be akunndan kɔ bla nin bian nna nga be fa fite nzra nun’n, i nianlɛ’n su ɔ. Yasua kun mɔ be flɛ i Zivɛni’n seli kɛ: “Ɔ fata kɛ sran kun bɔbɔ wun like ng’ɔ kwla fɛ i yi sa tɛ nun’n i wlɛ naan ɔ kpalo i.” I sɔ yɛ Zezi kannin kɛ e yo ɔ. Ɔ seli kɛ: “Sɛ ɔ nyinma fama’n maan a yo sa tɛ’n, tu yi i blo mmua.”—Matie 5:29.

Yasua kun mɔ be flɛ i Flanzi’n seli kɛ: “Sɛ n nian bla wie naan i kunndɛlɛ akunndan ba min ti nun’n, n ka lɛ n srɛ Zoova kpɛkun n to min ɲin blo.” Ɲanmiɛn sufuɛ nanwlɛfuɛ Zɔbu seli kɛ: “N tali nda kɛ n fa-man min nyinma n kpɛ-man talua wie kannglɛ.”—Zɔb 31:1.

4. Be fali be wun mantannin Ɲanmiɛn kpa.

Flanzi kunngba’n seli ekun kɛ: “Maan sran’n i akunndan’n tran like kwlaa ng’ɔ ti kpa’n su. Kpɛkun, ɔ fa Ɲanmiɛn junman’n i dilɛ cici i ti.”

Biblu’n se kɛ: “Maan amun akunndan’n tran like kwlaa ng’ɔ ti kpa’n, nin sa kwlaa bɔ sran yo-ɔ ɔ ti kpa’n be su, yɛlɛ: ndɛ nanwlɛ’n, nin like nga be bu i like kpa’n, nin like ng’ɔ ti i nuan su’n, nin sa ng’ɔ ti-man tɛ mlɔnmlɔn’n, nin like ng’ɔ ti klanman’n, yɛ ndɛ nga be ti-ɔ ɔ jɔ be klun’n. [...] Yɛ Nyanmiɛn b’ɔ maan e wun jɔ ye’n, ɔ nin amún trán.”—Filipfuɛ Mun 4:8, 9.

[Foto]

1

[Foto]

2

[Foto]

3

[Foto]

4