BIBLU’N I SU KOSAN’M BE SU TƐLƐ

?Ngue yɛ sran kun nin i yi bé yó naan b’a tran fɛfɛfɛ ɔ?

Ɲanmiɛn Zoova yɛ ɔ mannin yasua nin bla be atin kɛ be ja ɔ. I sɔ’n ti’n, sɛ sran kun nin i yi be fa aja’n i su afɔtuɛ nga Ɲanmiɛn man’n, m’ɔ o Biblu’n nun’n su’n bé trán fɛfɛfɛ. Afin Biblu’n nun’n, Ɲanmiɛn kle e nzuɛn ng’ɔ ti kpa m’ɔ fata kɛ sran kun nin i yi be fa’n. Kpɛkun, nzuɛn ng’ɔ kwla saci aja’n, ɔ kle e wie naan e wla be ase. Asa ekun’n, ɔ kle e kɛ ndɛ nga sran ti ɔ ɔ yo sran’n, yɛ ɔ fata kɛ ɔ fite yasua nin i yi be nuan ɔn.—An kanngan Kolɔsfuɛ Mun 3:8-10, 12-14 nun.

Yasua nin i yi mɔ be o sa’n, ɔ fata kɛ be bu be wiengu sran, yɛ be ɲin yi be wiengu. Sɛ be yo like nga Ɲanmiɛn mannin be tinuntinun kɛ be yo’n, bé kwlá trán fɛfɛfɛ.—An kanngan Kolɔsfuɛ Mun 3:18, 19 nun.

?Sɛ sran kun nin i yi bé trán fɛfɛ bé cɛ́’n, ɔ fin ngue?

Sɛ sran kun nin i yi be klo be wun’n, be kwla tran fɛfɛ be cɛ. Ɲanmiɛn yɛ ɔ ti sran klofuɛ’n niɔn. Ɔ nin i Wa Zezi be kle e sran klolɛ’n i kpafuɛ’n, i ajalɛ. Yɛle kɛ sran ng’ɔ klo sran’n, ɔ fɛ i wun man.—An kanngan 1 Zan 4:7, 8, 19 nun.

Sɛ yasua kun nin i yi be wun i wlɛ kɛ Ɲanmiɛn yɛ ɔ mannin yasua nin bla be atin kɛ be ja’n, bé trán bé cɛ́. Afin Ɲanmiɛn w’a boman yasua nin bla kɛ be ja naan be tran le nɲɔn kun. Ɔ yoli sɔ naan be tran awlo kun fɛfɛ tititi. Wafa nga Ɲanmiɛn yili yasua nin bla’n ti’n, be kwla tran be cɛ, be uka be wiengu kɛ be sa bɛ nin fama sa. Asa ekun’n, Ɲanmiɛn yili be kɛ i bɔbɔ Ɲanmiɛn sa. Yɛle kɛ yasua nin i yi’n be kwla nian Ɲanmiɛn i sran klolɛ wafa’n su.—An kanngan Bo Bolɛ 1:27 nin 2:18, 24 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 14 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.jw.org

[Foto, bue 32]

?Yalɛ wafa onin yɛ yasua kun nin i yi bé kókó naan b’a tran fɛfɛ ɔ?