?Satan ti sa tɛ m’ɔ o sran nun’n i nzɔliɛ? — ƐNTƐNƐTI SU FLUWA SIEWLƐ Watchtower

NDƐ NG’Ɔ KLƐ FLUWA’N SU’N | ?SATAN O LƐ SAKPA?

?Satan ti sa tɛ m’ɔ o sran nun’n i nzɔliɛ?

Sran wie’m be se kɛ Satan ti sa tɛ m’ɔ o sran nun’n i nzɔliɛ. Sanngɛ, Biblu’n kle kɛ Satan nin Zezi be kokoli yalɛ. Kpɛkun, ɔ nin Ɲanmiɛn Kpli bɔbɔ be kokoli yalɛ wie. Satan timan like kun i nzɔliɛ. Afin sɛ Satan ti like kun i nzɔliɛ’n, ɔ nin Zezi nin Ɲanmiɛn be kwlá kokoman yalɛ. Maan e kan be yalɛ kokolɛ sɔ’n i ndɛ kan e nian.

SATAN NIN ZEZI BE KOKOLI YALƐ

Kɛ Zezi boli Ɲanmiɛn junman’n i dilɛ bo’n, Satan sɛli i kpɛ nsan niannin. I klikli nun’n, ɔ seli Zezi kɛ ɔ fa yɛbuɛ kaci aliɛ naan be wun i wlɛ kɛ Ɲanmiɛn wawɛ’n wo i su. I sin’n, ɔ fali Zezi ɔli Ɲanmiɛn i sua’n su lɔ. Kpɛkun, ɔ seli Zezi kɛ ɔ tu kpɛn asiɛ wun lɔ naan sran kwlakwla si kɛ ɔ ti Ɲanmiɛn Wa sakpa. I kasiɛn su’n, ɔ seli Zezi kɛ ɔ koto i bo ɔ mɛnmɛn i naan ɔ́ fá mɛn’n i famiɛn diwlɛ’n kwlaa mɛ́n i kɛ ɔ sie be. I kwlaa sɔ’n nun’n, Zezi w’a yoman Satan klun sa’n. Sanngɛ, ɔ boli Ɲanmiɛn Ndɛ’n nga be klɛli’n su kleli Satan.—Matie 4:1-11; Lik 4:1-13.

?Wan yɛ ɔ nin Zezi be kokoli yalɛ’n niɔn? E kwlá seman kɛ sa tɛ wie yɛ ɔ o Zezi nun ɔn. Afin kɛ Ɲanmiɛn Ndɛ’n kán Zezi i ndɛ’n, ɔ se kɛ like nga be fa laka e’n, “be fɛ i kwlaa’n lɛkɛli i wie, sanngɛ w’a yo-man sa tɛ le.” (Ebre Mun 4:15) Ɔ se ekun kɛ: “[Zezi] w’a yo-man sa tɛ le, b’a ti-man gblɛ ndɛ fi i nuan nun le.” (1 Piɛr 2:22) Nanwlɛ, fɔ nunman Zezi nun, yɛ w’a buman akunndan tɛ fi le. Ɔ nantili klanman guɛli i ti nin i bo. Ɔ maan, sran jrɛiin kun yɛ ɔ nin Zezi be ijɔli ɔ.

Yalɛ mɔ Satan nin Zezi be kokoli’n, ɔ kle kɛ Satan ti sran kun sakpa. Afin, nian:

• Satan seli Zezi kɛ ɔ koto i bo mɛnmɛn i naan ɔ́ fá mɛn’n i famiɛn diwlɛ’n kwlaa mɛ́n i. (Matie 4:8, 9) Sɛ Satan timan sran jrɛiin kun’n, ɔ kwlá seman kɛ ɔ́ fá mɛn’n i famiɛn diwlɛ’n kwlaa mán Zezi. Zezi kusu’n, ɔ si kɛ mɛn’n wo Satan sa nun.

• Zezi w’a yoman like nga Satan seli i kɛ ɔ yo’n i wie fi. Ɔ maan, Satan “nin i be tili nun lele saan blɛ uflɛ ekun.” (Lik 4:13) Nanwlɛ, Satan timan like kun i nzɔliɛ. Ɔ ti sran jrɛiin kun.

• Ɲanmiɛn Ndɛ’n se kɛ ‘anzi’m be bali Zezi i sulɛ.’ (Matie 4:11) Anzi’m be ti aolia nun sran. Yɛ be ukali Zezi. I sɔ’n kle weiin kɛ Satan ti aolia nun sran wie. Ɔ timan like uflɛ.

SATAN NIN ƝANMIƐN BE KOKOLI YALƐ

Zɔbu blɛ su’n, Satan nin Ɲanmiɛn be kokoli yalɛ. Zɔbu ti sran kpa. Ɔ maan, Ɲanmiɛn yi i ayɛ titi. Kɛ Satan wunnin i sɔ’n, ɔ seli Ɲanmiɛn kɛ nán ngbɛn ti yɛ Zɔbu su i ɔ. Ɔ seli kɛ Ɲanmiɛn man Zɔbu i ninnge kpanngban naan Zɔbu su i. I lɛ’n nun’n, Satan su se kɛ ɔ si Zɔbu kpa tra Ɲanmiɛn. Kɛ ɔ yoli sɔ’n, Ɲanmiɛn fali Zɔbu nin i mma mun, ɔ nin i sa nun ninnge mun wlali Satan sa nun naan ɔ saci be nian. Sanngɛ, Zɔbu kleli kɛ Satan ti atofuɛ. Afin, ɔ jrannin kekle sa’n kwlaa nun. Zɔbu i ayeliɛ sɔ’n ti’n, Ɲanmiɛn yrɛli i su.—Zɔb 1:6-12; 2:1-7.

Ɲanmiɛn nin sran jrɛiin kun yɛ be kokoli yalɛ ɔ. Sran sɔ’n yɛle Satan. Nán sa tɛ yɛ ɔ o Ɲanmiɛn nun ɔn. Ɲanmiɛn Ndɛ’n waan: “Nyanmiɛn’n i atin’n ti kpa ngboko.” (2 Samiɛl 22:31) Ɔ se ekun kɛ: “[Ɲanmiɛn] i nzuɛn’n nin klɔ sran liɛ’n ti’a kun, ɔ ti’a kun, ɔ ti’a kun.” (Sa Nglo Yilɛ 4:8) Kɛ anzi’m be se kɛ Ɲanmiɛn i nzuɛn nin klɔ sran liɛ’n timan kun’n, i sɔ’n kle kɛ Ɲanmiɛn ti i liɛ ngunmin. Sa tɛ’n nin fɔ’n be nunmɛn i nun kaan sa. Yɛ fiɛn kaan sa nunmɛn i wun.

Sanngɛ, sran wie’m be kwla se kɛ Zɔbu bɔbɔ’n, ɔ timan sran jrɛiin. Naan yalɛ ng’ɔ nin Ɲanmiɛn be kokoli’n, ɔ ti ngua dilɛ. Sanngɛ, Ɲanmiɛn Ndɛ’n kle kɛ Zɔbu ti sran jrɛiin kun sakpa. Afin Zak 5:7-11 nun’n, Zaki kan Zɔbu i ndɛ. Ɔ fa Klistfuɛ’m be ɲin sie i Zɔbu i awlɛn m’ɔ trali’n, ɔ nin i agualiɛ nga Ɲanmiɛn maan ɔ guɛli i’n su. Zaki yoli sɔ naan Klistfuɛ’m be nian Zɔbu i ayeliɛ’n su. Sɛ Satan w’a kleman Zɔbu i yalɛ’n, yɛ sɛ Zɔbu timan sran jrɛiin kun sakpa’n, Zaki kwlá seman kɛ be niɛn i awlɛn m’ɔ trali’n su. Asa ekun’n, Ezekiɛl 14:14, 20 nun’n, Ɲanmiɛn nuan ijɔfuɛ Ezekiɛli kannin Nowe, nin Daniɛli, ɔ nin Zɔbu be ndɛ kɛ be yoli sa kpa. Nowe, nin Daniɛli, ɔ nin Zɔbu be ti sran jrɛiin. Yɛ be lafili Ɲanmiɛn su kpa. Ɔ maan, sran kun jrɛiin yɛ ɔ kleli Zɔbu i yalɛ ɔ. Nán akunndan nun like ɔ.

Ɲanmiɛn Ndɛ’n kle weiin kɛ Satan ti aolia nun sran, naan ɔ o lɛ sakpa. I sɔ’n ti, a kwla usa ɔ wun kɛ: ‘?Satan kwla kle min bɔbɔ nin min osufuɛ mun e yalɛ wie?’

?NGUE YƐ SATAN YO I BLƐ NGA NUN ƆN?

Maan e se kɛ klunwifuɛ wie’m b’a ju amun akpasua’n su. Ɔ maan sa tɛ yolɛ’n wá trú, yɛ lika’n yó kekle. I sɔ kunngba’n, Satan nin mmusu’m be o asiɛ’n su. Mmusu mun yɛle anzi mɔ be yoli ɲin kekle Ɲanmiɛn su’n. ?Ngue yɛ Satan nin mmusu’m be yo ɔ? Bu sa nga be ju mɛn’n nun’n, ɔ nin ɔ nvle liɛ’n nun’n be akunndan nian. Á wún like nga Satan nin mmusu’m be yo’n.

• Sran’m be fa ajalɛ wie mun naan nzaje sa nin klunwi yolɛ’n, be wie mɛn’n nun. Sanngɛ, kɛ aliɛ’n cɛ́n m’ɔ́ sán’n, nn i sɔ sa’m bé yó dan tra laa’n. ?Nɛ́n i ɔ?

• Andɛ’n, be ɲin su yiyilɛ sunman nun’n, be yi bae dilɛ’n i nglo. Wie liɛ’n, siɛ nin niɛn’m be kunndɛman kɛ be mma’m be nian. Sanngɛ, be mma’m be fa be ɲin sie ninnge sɔ’m be su. ?Nɛ́n i ɔ?

• Sran’m be mian be ɲin be sasa asiɛ’n, ɔ nin i su ninnge mun. Sanngɛ, kɛ aliɛ’n cɛ́n m’ɔ́ sán’n, nn asiɛ’n sáci tɛ kpa. ?Nɛ́n i ɔ?

• ?Sɛ be se wɔ kɛ sran kun yɛ ɔ wlawla sran mun yɛ be yo sa tɛ’n, naan sran kunngba sɔ’n ti yɛ sa tɛ’n w’a tru’n, ɔ́ bó wɔ nuan?

Nian ndɛ nga Biblu’n kan’n. I waan: “Be kannin dragɔn sroesroe dan sɔ’n nin i anz’m be bo guali be asiɛ’n su wa. I yɛ be flɛ i wuo lalaa, nin mmusu’m be si, nin Satan nin-ɔn, i yɛ ɔ laka mɛn wunmuan nunfuɛ’m be kwlaa nin-ɔn. I sɔ’n ti, [...] asiɛ’n nin jenvie’n, amun yako! Afin mmusu’m be si Satan’n w’a ba amun wun wa ya su yɛlɛ kɛ ɔ si kɛ i cɛn’n w’a sɔn-man kun.” (Sa Nglo Yilɛ 12:9, 12) Sran sunman b’a wun i wlɛ kɛ Satan ti aolia nun sran klunwifuɛ dan, naan i yɛ ɔ laka mɛn wunmuan nunfuɛ’m be kwlaa ɔ.

?Atrɛkpa’n, a usa ɔ wun kɛ ngue yɛ á yó naan Satan w’a yoman wɔ tɛ wie ɔ? Sɛ a usa ɔ wun sɔ’n, i su ɔ. Ndɛ akpasua ng’ɔ́ bá lɛ’n, ɔ́ wá tɛ́ su man wɔ.