Maan e nian e wun su titi naan y’a tɔman sa tɛ yolɛ’n nun

1-2. (1) ?Ndɛ benin yɛ Zezi kan kleli i sɔnnzɔnfuɛ mun-ɔn? (2) ?Ngue ti yɛ Zezi i sɔnnzɔnfuɛ mun be yacili i lɛ be wanndili-ɔ? (An nian desɛn’m be wie.)

CƐN kun kɔnguɛ’n, Zezi seli i sɔnnzɔnfuɛ’m be kɛ: “Amun awlɛn o su kpa kɛ amún yó, sanngɛ amun lemɛn i wun fanngan.” (Mat. 26:41b) Ndɛ sɔ mɔ Zezi kannin’n, ɔ kle kɛ ɔ wun i wlɛ kɛ fɔ o e nun, naan ɔ ju wie’n e kwla yo sa tɛ. Yɛ i ndɛ sɔ’n kle ekun kɛ ɔ fataman kɛ e lafi e wun su dan. Kɔnguɛ kunngba sɔ’n nun’n, Zezi i sɔnnzɔnfuɛ’m be seli i kɛ be su kpɔcimɛn i le. (Mat. 26:35) Akunndan kpa yɛ be buli-ɔ. Sanngɛ b’a wunmɛn i wlɛ kɛ sɛ lika’n jran be su’n, be su ɲanman wunmiɛn naan b’a yo sa kpa, sanngɛ sa tɛ’n yɛ bé yó-ɔ. I sɔ’n ti’n Zezi seli be kɛ: “Maan amun ɲin tran su, yɛ amun srɛ Ɲanmiɛn titi. I liɛ’n, amun su tɔman sa tɛ yolɛ’n nun.”—Mat. 26:41a.

² Sanngɛ Zezi i sɔnnzɔnfuɛ’m be ɲin w’a kwlá tranman su. Kɛ be bali Zezi i tralɛ’n, b’a faman ajalɛ kpa. Yɛle kɛ be yacili Zezi lɛ be wanndili. Kɛ mɔ be ɲin w’a tranman su’n ti’n, like nga be seli kɛ be su yomɛn i le’n yɛ be yoli-ɔ.—Mat. 26:56.

 3. (1) ?Ngue ti yɛ ɔ fataman kɛ e lafi e wun su dan-ɔn? (2) ?Ngue yɛ é wá kɛ́n i ndɛ like suanlɛ nga nun-ɔn?

³ Ɔ fataman kɛ e lafi e wun su dan. I yo, ɔ ti su kɛ y’a fua kpa kɛ e su yoman like wie m’ɔ jɔman Zoova klun-ɔn. Sanngɛ fɔ m’ɔ o e nun’n ti’n, e konvi kwla sɔ sa tɛ’n. (Rɔm. 5:12; 7:​21-23) Sa wie mɔ y’a sunnzunman’n ɔ kwla fu e nun, yɛ e konvi kwla sɔ sa tɛ yolɛ’n. Kɛ ɔ ko yo naan e nin Zoova nin i Wa’n y’a nanti klanman titi’n, kɛ nga Zezi fa kannin’n sa’n, ɔ ti cinnjin kɛ e ɲin tran su naan y’a yoman sa tɛ. I klikli nun’n, é wá kán ninnge wie m’ɔ fata kɛ e nian e wun su be lika kpa’n be ndɛ. I sin’n é wá kán like nga e kwla yo naan y’a nian e wun su naan y’a tɔman sa tɛ yolɛ’n nun’n i ndɛ. Kpɛkun i agualiɛ su’n é wá fá e ɲin é síe i like nga e kwla yo naan e ɲin w’a tran su titi’n i su.

?NINNGE BENIN MUN YƐ Ɔ FATA KƐ E NIAN E WUN SU BE LIKA-Ɔ?

4-5. ?Ngue ti yɛ ɔ fata kɛ e nian e wun su naan y’a yoman sa nga e bu i kɛ be timan tɛ dan’n niɔn?

⁴ Sa tɛ wie’m be o lɛ’n be timan tɛ dan kɛ wie mun sa. Sanngɛ be kwla yo maan e nin Zoova e afiɛn su mantanman kpa. Asa’n be kwla fa e yi i sa tɛ dan wie yolɛ nun.

⁵ E kwlakwla e konvi kwla sɔ sa tɛ yolɛ’n. Sanngɛ ɔ le sran kun nin i like liɛ ng’ɔ kle i yalɛ-ɔ. Ɔ kwla yo sa tɛ dan wie mɔ e konvi sɔ i yolɛ-ɔ. Ɔ kwla yo ɲannzuɛn sa wie m’ɔ nin Klisifuɛ fataman’n, annzɛ kusu ɔ kwla yo mɛn nunfuɛ’m be akunndan wie mɔ be bu m’ɔ kle e yalɛ’n. I wie yɛle kɛ bla annzɛ bian kunndɛlɛ sukusuku’n ɔ kwla kle aniaan kun i yalɛ kpa. Ɔ maan ɔ su miɛn i ɲin kpa naan w’a jran kekle. Wie’m be kusu’n be konvi kwla sɔ be yasua lika annzɛ be bla lika i nun ngowa kanlɛ, annzɛ bian nin bla nna nga be fa fite nzra nun’n i nianlɛ. Wie’m be kusu’n be fa ya ndɛndɛ, annzɛ be tu be wun, annzɛ srongble’n ti’n ɔ fata kɛ be mian be ɲin kpa naan b’a kwla yo sa ng’ɔ ti kpa’n. Zaki seli kɛ: “Sran kun bɔbɔ i konvi’n yɛ ɔ lɛkɛ i-ɔ. I konvi sɔ’n kaci kɛ aya sa. Ɔ tɔ nun, kpɛkun ɔ trɛ i.”—Zak. 1:14.

 6. ?Ninnge benin’m be nun yɛ ɔ fata kɛ e di e wun nanwlɛ-ɔ?

⁶ ?Ninnge benin’m be nun yɛ kɛ ɔ bɔbɔ a niɛn i sa’n a kwla fɔn ndɛndɛ-ɔ? Sɛ e diman e bɔbɔ e wun nanwlɛ’n, annzɛ sɛ e se e wun kɛ e liɛ’n e su yoman sa tɛ’n, ɔ su yoman e wun sa ye. (1 Zan 1:8) I kpa bɔbɔ’n akoto Pɔlu seli kɛ ‘be nga Ɲanmiɛn wawɛ’n sie be’n’ bɔbɔ’n, sɛ b’a nianman be wun su’n be kwla tɔ sa tɛ yolɛ’n nun. (Gal. 6:1) I sɔ’n ti’n, maan e di e wun nanwlɛ, yɛ e sie ninnge nga be nun’n e kwla fɔn ndɛndɛ’n be nzɔliɛ.—2 Kor. 13:5.

 7. ?Ngue nun yɛ ɔ fata kɛ e nian e wun su kpa-ɔ? An fa sa kun yiyi nun.

⁷ ?Kɛ e ko sie ninnge nga be nun’n e kwla fɔn ndɛndɛ’n be nzɔliɛ’n, ngue yɛ ɔ fata kɛ e yo-ɔ? Maan e mian e ɲin kpa naan y’a jran ninnge sɔ’m be ɲrun kekle. Laa’n kɛ sonja’m be waan bé fá klɔ kun mɔ be sisili i wun’n, blɛ sunman’n i anuan’m be nun yɛ be sin-ɔn. I sɔ’n ti’n, klɔ’n i anuan mun yɛ klɔ’n su sonja’m be sasa be kpa-ɔ. I wafa kunngba’n, sɛ e sie i nzɔliɛ kɛ ninnge wie’m be nun’n e kwla fɔn ndɛndɛ’n, ɔ fata kɛ e nian e wun su kpa ninnge sɔ’m be lika.—1 Kor. 9:27.

?WAFA SƐ YƐ E KWLA NIAN E WUN SU-Ɔ?

8-9. ?Ngue yɛ sɛ ɔ ti kɛ gbanflɛn nga be kɛn i ndɛ Ɲanndra Mun ndɛ tre 7 nun’n ɔ yoli’n, nn w’a yoman sa tɛ-ɔ? (Ɲanndra Mun 7:​8, 9, 13, 14, 21)

⁸ ?É yó sɛ naan y’a nian e wun su? Maan e fa e ɲin e sie i gbanflɛn nga be kɛn i ndɛ Ɲanndra Mun ndɛ tre 7 nun’n i su. Ɔ nin bla kun m’ɔ ti bian kunndɛfuɛ’n be lali. Ndɛ mma 22 se kɛ gbanflɛn’n suli bla’n su “be ja nun lɛ.” Sanngɛ ndɛ mma 8 lele m’ɔ́ fá jú 21 kle kɛ ɔ dun mmua fali ajalɛ tɛtɛ wie mun. Ajalɛ sɔ’m be ti’n, ɔ wa yoli sa tɛ dan.

⁹ ?Ajalɛ tɛtɛ benin yɛ ɔ dun mmua fali be-ɔ? I klikli’n yɛle kɛ ɔ sinnin cɔnjɔ nga be bli naan b’a to akpɔ ng’ɔ o kan bla sɔ m’ɔ ti bian kunndɛfuɛ’n tran lɛ’n su. I sin’n ɔ fali bla’n i awlo atin’n. (An kanngan Ɲanndra Mun 7:​8, 9 nun.) Asa’n kɛ ɔ wunnin bla’n, w’a bliman w’a ko sinman lika uflɛ. Ɔ yacili bla’n lɛ ɔ fɛli i nuan’n boli i fuka’n su. Asa’n kɛ bla’n kán bo kun yolɛ tɛ m’ɔ yili be’n i ndɛ’n ɔ o lɛ yɛ ɔ tie-ɔ. Atrɛkpa’n bla’n kannin sɔ naan gbanflɛn’n w’a bumɛn i kɛ ɔ ti sran tɛ. (An kanngan Ɲanndra Mun 7:​13, 14, 21 nun.) Sɛ ɔ ti kɛ w’a faman ajalɛ tɛtɛ sɔ mun’n nn i konvi w’a sɔman sa tɛ yolɛ’n naan se kɛ ɔ́ tɔ́ nun.

10. ?Wafa sɛ yɛ sa ng’ɔ juli gbanflɛn’n su’n, ɔ kwla ju sran kun su andɛ-ɔ?

¹⁰ Sa sɔ mɔ Salomɔn kɛnnin i ndɛ’n ɔ kwla ju Zoova i sufuɛ kwlaa su. Yɛle kɛ aniaan kun kwla yo sa tɛ dan wie. Kpɛkun ɔ kwla yo i kɛ sa’m be fuli i nun sa, annzɛ kusu ɔ kwla se kɛ ‘sa yɛ ɔ ɲɛnnin i-ɔ.’ Sanngɛ sɛ ɔ tran bu sa ng’ɔ juli’n i akunndan kpa’n, atrɛkpa’n ɔ́ wún i wlɛ kɛ ɔ dun mmua fali ajalɛ tɛtɛ wie mun naan i sɔ’n ti yɛ ɔ yoli sa tɛ sɔ’n niɔn. Yɛle kɛ atrɛkpa’n ɔ nin sran wie mɔ be kloman Zoova’n be sannin nun. Annzɛ kusu’n ninnge ng’ɔ fa be yiyi i ɲin su’n annzɛ ninnge ng’ɔ nian be ɛntɛnɛti su’n, annzɛ lika ng’ɔ kɔ’n be nin Klisifuɛ fataman. Asa ekun’n atrɛkpa’n ɔ yacili Ɲanmiɛn srɛlɛ, annzɛ Biblu’n nun kannganlɛ, annzɛ aɲia’m be bo tranlɛ, annzɛ jasin fɛ’n i bolɛ. Ɔ maan kɛ gbanflɛn nga Ɲanndra Mun fluwa’n kɛn i ndɛ’n i liɛ’n sa’n, be kwlá seman kɛ sa tɛ sɔ m’ɔ yoli’n ɔ fuli i nun.

11. ?Kɛ ɔ ko yo naan y’a yoman sa tɛ’n, ngue yɛ ɔ fata kɛ e nian e wun su naan y’a yoman-ɔn?

¹¹ ?Afɔtuɛ benin yɛ ndɛ sɔ’n man e-ɔ? Yɛle kɛ nán sa tɛ bɔbɔ ba’n i ngunmin yɛ ɔ fata kɛ e nian e wun su naan y’a yoman-ɔn. Sanngɛ ɔ fata kɛ e nian e wun su naan y’a faman ajalɛ wie m’ɔ kwla fa e yi i sa tɛ yolɛ’n nun’n. Kɛ Salomɔn wieli gbanflɛn’n ɔ nin bla m’ɔ ti bian kunndɛfuɛ’n be ndɛ kan’n, i sɔ’n su yɛ ɔ fali e ɲin sieli-ɔ. Kɛ ɔ́ kán bla sɔ’n i ndɛ’n ɔ seli kɛ: “Nán fɛ i atin liɛ’m be su.” (Ɲan. 7:25) Ɔ kan guali su kɛ: “Kɛ i wun mmua. Nán mɛntɛn i sua’n i anuan’n i koko.” (Ɲan. 5:​3, 8) Nanwlɛ, sɛ e kunndɛman kɛ é yó sa tɛ’n, ɔ fata kɛ e nian e wun su ninnge nga be kwla fa e yi i sa tɛ yolɛ’n nun’n be lika.a Ɔ maan kannzɛ Biblu’n buman like kun i fɔ trele’n, sanngɛ sɛ e bɔbɔ e wun kɛ like sɔ’n i yolɛ’n, ɔ kwla yo maan e konvi sɔ sa tɛ’n, annzɛ ɔ kwla fa e yi i sa tɛ’n nun’n, ɔ flunman kɛ nán e yo.—Mat. 5:​29, 30.

12. (1) ?Ajalɛ benin yɛ Zɔbu fali-ɔ? (2) ?Yɛ wafa sɛ yɛ i sɔ’n ukɛli i naan i konvi w’a sɔman sa tɛ yolɛ’n niɔn? (Zɔbu 31:1)

¹² Kɛ ɔ ko yo naan y’a faman ajalɛ wie m’ɔ kwla fa e yi i sa tɛ yolɛ’n nun’n, ɔ fata kɛ e fua kpa. I sɔ yɛ Zɔbu yoli-ɔ. Ɔ nin i “ɲinma’n be trali aenguɛ.” Ɔ fuali kɛ ɔ su kpɛman bla wie kannglɛ. (An kanngan Zɔbu 31:1 nun.) Kɛ ɔ ko yo naan w’a kunndɛman bla i yi bo’n i ti yɛ ɔ fɛli i sɔ ajalɛ’n niɔn. E kusu e kwla fa ajalɛ kɛ é kpálo like kwlaa ng’ɔ kwla yo maan e konvi sɔ sa tɛ’n.

13. ?Ngue ti yɛ ɔ fata kɛ e nian akunndan nga e bu’n su-ɔ? (An nian foto mun wie.)

¹³ Maan e nian e wun su naan y’a buman akunndan tɛ. (Tul. 20:17) Sran wie’m be waan sɛ e konvi sɔ sa tɛ wie yɛ e bu i akunndan tikatika’n naan sanngɛ y’a yoman sa sɔ’n, i sɔ’n timan like tɛ. Afin i akunndan ngbɛn yɛ e buli-ɔ. Sanngɛ i sɔ’n timan su. Sɛ sran kun i akunndan tran sa tɛ wie i yolɛ’n su’n, i konvi kwla sɔ sa tɛ sɔ’n i yolɛ dan. Ɔ ti kɛ sran sɔ’n i bɔbɔ su klɔklɔ i konvi’n sa. Ɔ maan kɛ ɔ ko yo naan ɔ jran kekle’n, ɔ su yoman pɔpɔ. Ɔ ju wie’n sa tɛ wie kwla ba e ti’n nun. Kɛ ɔ ko yo sɔ’n like ng’ɔ fata kɛ e yo’n, yɛle kɛ e ka lɛ e kpalo akunndan sɔ’n. Kpɛkun e fa e ɲin e sie i ninnge kpakpa wie’m be su. Sɛ e yo sɔ’n, sa tɛ wie su traman ndin e awlɛn’n nun lɔ. Ɔ maan e su yoman sa tɛ dan wie.—Fip. 4:8; Kol. 3:2; Zak. 1:​13-15.

14. ?Ngue ekun yɛ ɔ kwla uka e naan y’a tɔman sa tɛ yolɛ’n nun-ɔn?

¹⁴ ?Ngue ekun yɛ é yó naan y’a tɔman sa tɛ wie yolɛ’n nun-ɔn? Ɔ fata kɛ e lafi su kpa kɛ, kɛ e nian Zoova i mmla’m be su e nanti’n e ɲan su ye titi. Ɔ ju wie’n, ɔ fata kɛ e mian e ɲin kpa naan akunndan nga e bu’n, ɔ nin ninnge nga e klo kɛ é yó be’n be nin Ɲanmiɛn i klun sa’n b’a wɔ likawlɛ. Sanngɛ sɛ e yo sɔ’n é dí aklunjɔɛ.

15. ?Sɛ e akunndan o ninnge nga be ti kpa’m be su’n, wafa sɛ yɛ i sɔ’n kwla uka e-ɔ?

¹⁵ Ɔ fata kɛ e mian e ɲin naan e akunndan’n tran ninnge nga be ti kpa’n be su. I lɛ nun’n, maan e mian e ɲin naan ‘e kpɔ sa tɛ’n yɛ e klo sa kpa’n.’ I liɛ’n, é fúa kpa kɛ é yó sa ng’ɔ ti kpa’n. Yɛ e su yoman ninnge nga be kwla fa e yi i sa tɛ wie i yolɛ nun’n. (Amɔ. 5:15) Ɔ ju wie’n sa wie mɔ y’a buman be akunndan laa’n mɔ be kwla fa e yi i sa tɛ wie yolɛ nun’n be kwla fu e nun. Sanngɛ sɛ e akunndan o ninnge nga be ti kpa’n be su’n, i sɔ’n úka e naan y’a jran kekle.

16. ?Sɛ e yo ninnge nga e kwla yo be naan y’a klo Zoova kpa’n, i su ye benin yɛ é ɲɛ́n i-ɔ? (An nian foto mun wie.)

¹⁶ ?É yó sɛ naan y’a bu ninnge nga be ti kpa’n be akunndan? Ɔ fata kɛ e tu e klun e yo ninnge nga e kwla yo be naan y’a klo Zoova kpa’n. Kɛ e kɔ aɲia’m be bo’n yɛ kɛ e bo jasin fɛ’n, i sɔ’n yo maan e kunndɛ kpa kɛ Zoova i klun jɔ e wun. Yɛ e akunndan su kɔman sa tɛ yolɛ’n su. (Mat. 28:​19, 20; Ebr. 10:​24, 25) Kɛ e kanngan Ɲanmiɛn ndɛ’n nun, mɔ e suan nun like yɛ e bu su akunndan’n, i sɔ’n yo maan e klo sa ng’ɔ ti kpa’n yɛ e kpɔ sa ng’ɔ ti tɛ’n tra laa’n. (Zoz. 1:8; Jue. 1:​2, 3; 119:​97, 101) Nán maan e wla fi ndɛ nga Zezi kan kleli i sɔnnzɔnfuɛ mun’n su. Ɔ seli kɛ: “Amun srɛ Ɲanmiɛn titi. I liɛ’n, amun su tɔman sa tɛ yolɛ’n nun.” (Mat. 26:41) Kɛ e srɛ e Si Ɲanmiɛn’n, e mɛn i atin kɛ ɔ uka e. Kpɛkun e fua kpa kɛ é yó sa ng’ɔ jɔ i klun’n.—Zak. 4:8.

MAAN E NIAN E WUN SU TITI

17. ?Ngue yɛ ɔ kleli Piɛli i yalɛ-ɔ?

¹⁷ E nzuɛn tɛ wie’m be o lɛ’n, sɛ e mian e ɲin’n e kwla wla be ase mlɔnmlɔn. Sanngɛ wie’m be o lɛ’n, kɛ ɔ ko yo naan y’a wla be ase mlɔnmlɔn’n ɔ kwla yo kekle. I wie yɛle akoto Piɛli liɛ’n. Srongble’n ti’n ɔ seli kpɛ nsan kɛ ɔ siman Zezi. (Mat. 26:​69-75) Sanngɛ i sin’n ɔ kwla ijɔli yakpa su Zifu’m be Jɔlɛ Difuɛ Dandan’m be ɲrun. (Yol. 5:​27-29) I lɛ nun’n, e kwla bu i kɛ ɔ timan srongble kun. Sanngɛ kɛ afuɛ wie’m be sinnin’n, “be nga be wlali be klɛn’n be wun srɛ ti’n,” ɔ nin Klisifuɛ nga be timan Zifu’n b’a diman like kun. (Gal. 2:​11, 12) Sɛ é kwlá sé’n, like ng’ɔ kleli i yalɛ’n sɛli i sin ekun. Atrɛkpa’n w’a kwlá wlaman nzuɛn sɔ’n i ase mlɔnmlɔn.

18. ?Kannzɛ e kwla bu i kɛ e wlali nzuɛn tɛ wie ase’n, sanngɛ sa benin yɛ ɔ kwla ju-ɔ?

¹⁸ I sɔ’n sa’n kwla ju e su wie. Yɛle kɛ nzuɛn wie mɔ e bu i kɛ e wlɛli i ase’n ɔ kwla sɛ i sin ekun. I wie yɛle aniaan bian kun liɛ’n. Ɔ seli kɛ: “N yacili bian nin bla nna nga be fa fite nzra nun’n i nianlɛ afuɛ blu. Ɔ maan n seli min wun kɛ m’an fite nun mlɔnmlɔn. Kannzu min nzuɛn tɛ sɔ’n, ɔ ti kɛ nnɛn wlɛfuɛ wie mɔ w’a bu w’a sa’n sa. Ɔ su minndɛ blɛ ng’ɔ nin i fata’n naan w’a yo min like yaya.” Sanngɛ aniaan sɔ’n w’a yacimɛn i ɲin mianlɛ. Ɔ wunnin i wlɛ kɛ ɔ fata kɛ ɔ nin i nzuɛn tɛ sɔ’n be kun cɛn kwlakwla naan atrɛkpa’n ɔ́ yó sɔ lele saan mɛn uflɛ’n nun lɔ yɛ ɔ́ ɲɛ́n i ti-ɔ. I yi nin asɔnun kpɛnngbɛn mun be ukɛli i. Ɔ maan ɔ miɛnnin i ɲin kpa naan w’a nianman bian nin bla nna nga be fa fite nzra nun’n.

19. ?Sɛ nzuɛn tɛ wie te kle e yalɛ’n é yó sɛ naan y’a jran kekle?

¹⁹ ?Sɛ nzuɛn tɛ wie te kle e yalɛ’n é yó sɛ naan y’a jran kekle? I lɛ nun’n, ɔ fata kɛ e fa afɔtuɛ yɛ mɔ Zezi mannin’n su. Ɔ seli kɛ: “Maan amun ɲin tran su.” Blɛ nga ɔ yo e kɛ e nin Ɲanmiɛn e afiɛn mantan kpa bɔbɔ’n ɔ fata kɛ e nian e wun su titi naan y’a yoman like wie m’ɔ kwla fa e yi i sa tɛ yolɛ’n nun-ɔn. (1 Kor. 10:12) Ninnge nga e tinuntinun e yo be mɔ be uka e naan y’a kwla jran nzuɛn nga be kle e yalɛ’n be ɲrun kekle’n, maan e yo be titi. Ɲanndra Mun 28:14 se kɛ: “Sran ng’ɔ niɛn i wun su titi’n, i liɛ su ti ye.”—2 Piɛ. 3:14

?KƐ E NIAN E WUN SU’N I SU YE BENIN YƐ E ƝƐN I-Ɔ?

20-21. (1) ?Sɛ e e mian e ɲin naan y’a tɔman sa tɛ yolɛ’n nun’n, i su ye benin yɛ é ɲɛ́n i-ɔ? (2) ?Sɛ e yo e liɛ nga e kwlɛ i yo’n, ngue yɛ Zoova yó mán e-ɔ? (2 Korɛntifuɛ Mun 4:7)

²⁰ E kwla lafi su kpa kɛ, sɛ e nian e wun su naan y’a tɔman sa tɛ wie yolɛ’n nun’n, é ɲán su ye dan. Kannzɛ sa tɛ yolɛ’n ɔ kwla yo maan e “di mɛn le nɲɔn kun’n,” sanngɛ Zoova i mmla’m be su nantilɛ’n yɛ maan e kwla di aklunjɔɛ i kpafuɛ’n niɔn. (Ebr. 11:25; Jue. 19:8) Ɔ ti sɔ afin Zoova yili e kɛ e nanti i mmla’m be su. (Bob. 1:27) Sɛ e yo sɔ’n e akunndan su buman e fɔ, yɛ e kwla lafi su kɛ cɛn wie lele’n é ɲán nguan m’ɔ leman awieliɛ’n.—1 Tim. 6:12; 2 Tim. 1:3; Zid. 20, 21.

²¹ Ɔ ti su kɛ kannzɛ bɔbɔ e kunndɛ kɛ ‘é yó sa kpa’n, sanngɛ e lemɛn i wun fanngan.’ Sanngɛ i sɔ’n kleman kɛ e lemɛn i yowlɛ. Zoova kunndɛ kpa kɛ ɔ́ mán e wunmiɛn. (An kanngan 2 Korɛntifuɛ Mun 4:7 nun.) Sanngɛ wunmiɛn ng’ɔ tra klɔ sran liɛ’n yɛ Ɲanmiɛn man-ɔn. I sɔ’n kle kɛ cɛn kwlakwla’n ɔ fata kɛ e yo e liɛ nga e kwla yo’n naan y’a tɔman sa tɛ yolɛ’n nun. I liɛ’n kɛ e srɛ Zoova kɛ ɔ man e wunmiɛn m’ɔ tra klɔ sran liɛ’n ɔ́ tɛ́ e su. (1 Kor. 10:13) Nanwlɛ, e kwla lafi su kpa kɛ Zoova fanngan nun’n, e kwla mian e ɲin naan y’a tɔman sa tɛ yolɛ’n nun!