Zifu nga bé wá sá be sin be Babilɔnin’n bé yó ‘Ɲanmiɛn liɛ klonglo.’ (Mml. 7:6) Sanngɛ i sɔ’n kleman kɛ ɔ fataman kɛ be kaci be sa ninnge wie’m be nun naan Zoova i klun w’a jɔ be wun. Be wuli Zifu’m be sunman lika Babilɔnin lɔ. Yɛ atrɛkpa’n be yo ninnge mun kɛ Babilɔninfuɛ mun sa. Kɛ be nun wie’m be sali be sin m’ɔ dili afuɛ kpanngban kpa’n, Neemin m’ɔ ti nvle siefuɛ’n ɔ wunnin kɛ ba nga be wuli be Izraɛli lɔ’n be timan Zifu’m be aniɛn’n, i sɔ’n yoli i ya dan. (Mml. 6:​6, 7; Nee. 13:​23, 24) ?Ɔ maan sɛ ba sɔ’m be timan Ebre mɔ i nun yɛ be klɛli Ɲanmiɛn Ndɛ’n, ɔ́ yó sɛ naan b’a klo Zoova naan b’a su i? (Ɛsd. 10:​3, 44) I sɔ’n ti’n, ɔ fata kɛ Zifu sɔ’m be kaci be sa. Kɛ mɔ be o Izraɛli nvle’n nun ti’n, i sɔ yolɛ yó pɔpɔ mán bé-ɔ. Afin be su yo naan blɛblɛblɛ Zoova i sulɛ kpafuɛ’n ɔ taka kpa.—Nee. 8:​8, 9. w23.05 15 § 6-7

Kannzɛ e fua kpa annzɛ e mian e ɲin sɛ, sanngɛ sa wie’m be kwla tɔ e su. I wie yɛle kɛ ‘sa wie mɔ y’a sunnzunman’n” ɔ kwla ɲan e. Ɔ maan e su ɲanman blɛ naan y’a yia like nga e sunnzunnin kɛ é yó’n i nuan. (Aku. 9:11) Asa’n, sa kekle wie ti’n e sa sin kwla bubu e. Ɔ maan e su ɲanman wunmiɛn e yoman like nga e klo’n. (Ɲan. 24:10) Asa kusu’n, fɔ m’ɔ o e nun ti’n e kwla fa ajalɛ wie mɔ be ti’n e su kwlá yiaman like nga e sunnzunnin kɛ é yó’n i nuan-ɔn. (Rɔm. 7:23) Wie liɛ bɔbɔ’n, afɛ’n tin e su dan. (Mat. 26:43) ?Ɔ maan ngue yɛ ɔ kwla uka e naan y’a jran sa nga be tanndan e ɲrun’n, be ɲrun kekle-ɔ? Kannzɛ sa wie tanndan ɔ ɲrun’n, i sɔ’n kleman kɛ a kwlá yoman like nga a sunnzunnin’n. Biblu’n se kɛ sa kekle’m be kwla tɔ e su kpɛ sunman. Sanngɛ ɔ se e weiin kɛ e kwla jran be ɲrun kekle kpɛkun e yia like nga e sunnzunnin kɛ é yó’n i nuan. Ndɛ sɔ’n kle kɛ kannzɛ lika’n ti kekle e su sɛ’n, sanngɛ sɛ e mian e ɲin e yia like nga e waan é yó’n i nuan’n, é klé Zoova kɛ e klo kɛ i klun jɔ e wun. E si kɛ kɛ Zoova wun kɛ e mian e ɲin e yia like nga e sunnzunnin kɛ é yó’n i nuan’n, i sɔ’n yo i fɛ dan. w23.05 30 § 14-15

Atin bolɛ junman’n ɔ kwla uka gbanflɛn kun naan ɔ nin sran fanunfanun b’a kwla di junman likawlɛ. Asa’n ɔ kwla ukɛ i naan w’a si i sika’n i cɛcɛ yo. (Fip. 4:​11-13) Sɛ a kunndɛ kɛ á dí blɛ kwlaa nun Ɲanmiɛn junman’n, a kwla bo i bo nin cɛn kunngun atin bolɛ junman’n i dilɛ. i sɔ’n úka ɔ naan w’a kwla kaci titi atin bofuɛ. Atin bolɛ junman’n i dilɛ’n kwla uka wɔ naan w’a di junman uflɛ wie mun anuannzɛ’n nun. I wie yɛle kɛ a kwla kplan Ɲanmiɛn sulɛ sua mun wie, annzɛ a kwla di junman Betɛli lɔ. Ɔ fata kɛ gbanflɛn nga be o asɔnun’n nun’n be mian be ɲin be wɔ be ɲrun Ɲanmiɛn sulɛ’n nun naan be sie be asɔnun kpɛnngbɛn. Biblu’n se kɛ yasua nga be klo kɛ bé yó asɔnun sunianfuɛ’n, “junman kpa yɛ be kunndɛ kɛ bé dí-ɔ.” (1 Tim. 3:1) Ɔ fata kɛ aniaan yasua kun dun mmua yo asɔnunfuɛ’m be ukafuɛ. Asɔnunfuɛ’m be ukafuɛ’m be uka asɔnun kpɛnngbɛn mun naan b’a kwla di junman fanunfanun wie mun. Asɔnun kpɛnngbɛn mun nin asɔnunfuɛ’m be ukafuɛ’m be uka aniaan mun. Yɛ be bo jasin fɛ’n juejue su. w23.12 28 § 14-16