Atin bolɛ junman’n ɔ kwla uka gbanflɛn kun naan ɔ nin sran fanunfanun b’a kwla di junman likawlɛ. Asa’n ɔ kwla ukɛ i naan w’a si i sika’n i cɛcɛ yo. (Fip. 4:​11-13) Sɛ a kunndɛ kɛ á dí blɛ kwlaa nun Ɲanmiɛn junman’n, a kwla bo i bo nin cɛn kunngun atin bolɛ junman’n i dilɛ. i sɔ’n úka ɔ naan w’a kwla kaci titi atin bofuɛ. Atin bolɛ junman’n i dilɛ’n kwla uka wɔ naan w’a di junman uflɛ wie mun anuannzɛ’n nun. I wie yɛle kɛ a kwla kplan Ɲanmiɛn sulɛ sua mun wie, annzɛ a kwla di junman Betɛli lɔ. Ɔ fata kɛ gbanflɛn nga be o asɔnun’n nun’n be mian be ɲin be wɔ be ɲrun Ɲanmiɛn sulɛ’n nun naan be sie be asɔnun kpɛnngbɛn. Biblu’n se kɛ yasua nga be klo kɛ bé yó asɔnun sunianfuɛ’n, “junman kpa yɛ be kunndɛ kɛ bé dí-ɔ.” (1 Tim. 3:1) Ɔ fata kɛ aniaan yasua kun dun mmua yo asɔnunfuɛ’m be ukafuɛ. Asɔnunfuɛ’m be ukafuɛ’m be uka asɔnun kpɛnngbɛn mun naan b’a kwla di junman fanunfanun wie mun. Asɔnun kpɛnngbɛn mun nin asɔnunfuɛ’m be ukafuɛ’m be uka aniaan mun. Yɛ be bo jasin fɛ’n juejue su. w23.12 28 § 14-16

Kɛ Famiɛn Zoziasi ɲannin afuɛ 16 yɛ ɔ boli Ɲanmiɛn i kunndɛlɛ bo-ɔ. Ɔ kunndɛli kpa kɛ ɔ́ sí Zoova naan ɔ́ yó i klun sa’n. Sanngɛ famiɛn dilɛ’n w’a yoman pɔpɔ w’a mɛnmɛn i kaan sa. Afin i blɛ su’n, sran’m be sunman lika be sɔ amuin. Ɔ maan, ɔ fata kɛ ɔ yo yakpafuɛ naan w’a se be kɛ be yaci i sɔ yolɛ. I sɔ yɛ ɔ seli be kɛ be yo-ɔ. Ka naan w’a ɲan afuɛ 20 bɔbɔ’n, ɔ yoli maan sran’m be yacili amuin sɔlɛ nvle’n nun. (2 Ɲol. 34:​1, 2) Kannzɛ a ti bakan’n, sanngɛ a kwla nanti Zoziasi i ajalɛ’n su. Yɛle kɛ a kwla suan Zoova nin i nzuɛn’m be su like naan w’a si Zoova kpa. Sɛ a yo sɔ’n, á kúnndɛ kɛ á fá ɔ wun mɛ́n i naan be yo ɔ batɛmun. ?Sɛ a yo sɔ’n kusu’n, wafa sɛ yɛ i sɔ’n ɲán ta ɔ su-ɔ? Be flɛ aniaan gbanflɛn kun kɛ Liki. Kɛ ɔ ɲannin afuɛ 14 yɛ be yoli i batɛmun-ɔn. Ɔ seli kɛ: “Siɛn’n, n kwla fa Zoova i sulɛ’n n sie i like kwlaa ɲrun yɛ n kwla yo maan i klun jɔ.” (Mar. 12:30) Nanwlɛ, sɛ a yo like kunngba’n, á ɲán su ye. w23.09 11 § 12-13

Kɛ akoto Pɔlu klɛ́ Tesalonikifuɛ’m be fluwa’n, nn be takali lɔ asɔnun’n ɔ nin-a diman afuɛ kun. Ɔ maan atrɛkpa’n, asɔnun kpɛnngbɛn’m be sa nin-a tɔman junman’n nun kpa yɛ be fɔn sa wie’m be nun. Ɔ nin i sɔ’n ngba’n, ɔ fata kɛ aniaan’m be ɲin yi be. Kɛ ɲrɛnnɛn dan’n wá bó i bo’n, e asɔnun’n nun asɔnun kpɛnngbɛn mun yɛ bé wá klé e like ng’ɔ fata kɛ e yo’n niɔn. Ɔ maan é wá mían be wun kpa blɛ sɔ’n nun. Atrɛkpa’n aniaan nga be o anuannzɛ’n i bo bia’n su lɔ’n nin Betɛli’n be su kwlá kleman e like ng’ɔ fata kɛ e yo’n kun. I sɔ’n ti’n, dɔ nga su’n ɔ ti cinnjin kɛ e klo e asɔnun kpɛnngbɛn mun yɛ e ɲin yi be. Kannzɛ sa nga be ju’n be ti sɛ ti sɛ’n, maan e bu akunndan kpa titi, nán e fa e ɲin e sie i fɔ ng’ɔ o be nun’n be su. Sanngɛ maan e fa e ɲin e sie wafa nga Zoova fanngan nun’n Klisi sin Ɲanmiɛn sufuɛ kpa sɔ’m be lika kle e atin’n i su. Kɛ sonja kun wla kpongbo kle’n, i sɔ’n sɛsɛ i ti lika’n. I wafa kunngba’n, e ti mɔ e wla o su kɛ é ɲɛ́n i’n ɔ sasa e akunndan’n. E wun i wlɛ kɛ ninnge nga e kwla ɲan be mɛn nga nun’n be timan like fi. (Fip. 3:8) Like nga e wla o su’n yo maan e wla gua ase. w23.06 11-12 § 11-12