Ezai

64 Sɛ ɔ ti kɛ a kpacili ɲanmiɛn’n nun yɛ a jrali’n,

naan oka’m be keje ɔ dunman nun’n,

 2 kɛ nga sin’n fa yra yie kanngan mun

mɔ nzue’n fa tu’n sa’n,

nn ɔ kpɔfuɛ’m bé sí ɔ dunman’n,

yɛ nn nvlenvle’m bé úsu ɔ ɲrun.

 3 Blɛ mɔ a yoli abonuan sa nga y’a sunnzunman kɛ á yó be’n,+

a jrali, yɛ oka’m be kejeli ɔ ɲrun.+

 4 Kɛ ɔ fɛ i laa lele’n, sran fi nin-a timan Ɲanmiɛn uflɛ i su ndɛ, annzɛ be nin-a kanman Ɲanmiɛn uflɛ i ndɛ le,

yɛ sran fi nin-a wunman Ɲanmiɛn uflɛ saan wɔ

mɔ a yo be nga be ɲin ta ɔ ɲrun* titi’n be ye’n.+

 5 A nin be nga be yo sa ng’ɔ ti kpa aklunjɔɛ su’n be yiali,+

sran sɔ’m be wla kpɛn ɔ su, yɛ be nanti ɔ atin’m be su.

Nian! A fali ya, afin e yoli sa tɛ titi,+

e yoli sɔ cɛli kpa.

?Ɔ maan e nin delɛ fata?

 6 E kwlaa y’a kaci kɛ sran m’ɔ o fiɛn nun’n sa,

yɛ sa kpakpa nga e yo be’n be kwlaa be ti kɛ tannin mɔ mannza w’a gua

nun’n sa.+

E kwlaa é wá glɔ́ kɛ nɲa sa,

yɛ e fɔnlɛ mun bé fá e kɔ́ kɛ aunmuan sa.

 7 Sran fi boman ɔ dunman’n,

sran fi kplinmɛn i ɲin naan w’a tra wɔ kekle,

afin a fali ɔ ɲrun’n fiali e wun,+

yɛ a yo maan e yo koklo* e fɔnlɛ’m be ti.*

 8 Sanngɛ siɛn’n, Zoova,

a ti e Si.+

E ti kɛ ufa sa, yɛ a ti e Wufuɛ.*+

E kwlaa e ti ɔ sa nuan like.

 9 Ee, Zoova, nán fa ya dan,+

nán ɔ wla kpɛn e fɔnlɛ’m be su sa trilili.

Yaci, nian e, afin e kwlaa e ti ɔ nvle’n nunfuɛ.

10 Klɔ mɔ be ti ɔ liɛ klonglo’n b’a kaci aawlɛ flɛnnɛn.

Siɔn w’a kaci aawlɛ flɛnnɛn,

Zerizalɛmun w’a tɔ srolo.+

11 E sua* m’ɔ ti sanwun’n, m’ɔ le ɲrun’n,*

mɔ e nannan’m be manmannin wɔ i nun’n,

b’a wɔ nun,+

yɛ ninnge nga e klo be’n be kwlaa b’a saci.

12 ?Ɔ maan Zoova, á trán lɛ sa ngbɛn?

?Á trán lɛ diin, yɛ á yáci e lɛ naan e ka ɲrɛnnɛn tɛ kɛ nga sa nun?+