?Ngue ti yɛ e fa e wun e man Zoova ɔ?

‘Nyanmiɛn bɔ n ti i liɛ’n, i anz kun bali min wun ndɛ kɔnguɛ.’—YOL. 27:23.

 1. ?Be nga be kunndɛ kɛ bé yó be batɛmu’n, ngue ajalɛ yɛ b’a dun mmua b’a fa ɔ? ?Yɛ i sɔ’n su kosan benin yɛ e kwla usa ɔ?

“?ZEZI i tɛ m’ɔ yili’n ti’n, amun kacili amun nzuɛn’n, yɛ amun fali amun wun mannin Zoova kɛ amún yó i klun sa’n?” Kosan nɲɔn nga batɛmu yolɛ i su ijɔlɛ’n nun be fa usa be nga be kunndɛ kɛ bé yó be batɛmu mɔ be tɛ su’n, be nun kun yɛ ɔ o lɛ. ?Ngue ti yɛ ɔ fata kɛ Klistfuɛ’m be fa be wun be man Zoova ɔ? ?Kɛ e fa e wun e man Zoova’n, ngue yɛ e ɲɛn i nun ɔn? ?Ngue ti yɛ sɛ sran kun w’a fɛmɛn i wun w’a manman Zoova’n, ɔ́ kwlá sumɛn i kɛ nga ɔ nin i fata’n sa ɔ? Sɛ e kunndɛ kɛ é wún kosan sɔ’m be su tɛlɛ’n, ɔ fata kɛ e dun mmua e wun be wun Ɲanmiɛn i fa manlɛ’n i bo’n ka.

 2. ?Kɛ be se kɛ sran kun fɛ i wun man Zoova’n i bo’n yɛle benin?

² ?Kɛ be se kɛ sran kun fɛ i wun man Ɲanmiɛn’n i bo’n yɛle benin? Wafa nga akoto Pɔlu kannin wafa nga ɔ nin Ɲanmiɛn be afiɛn’n ti’n i ndɛ’n, maan e sie i nzɔliɛ. Sran kpanngban mɔ be sa wa miannin kpa mmeli kun nun’n be ɲrun lɛ’n, ɔ flɛli Zoova kɛ: ‘Nyanmiɛn bɔ n ti i liɛ’n.’ (An kanngan Sa Nga Be Yoli’n 27:22-24 nun.) Klistfuɛ kpa’m be kwlaa be ti Zoova liɛ. Sanngɛ “Klunwifuɛ’n sie” mɛn wunmuan’n. (1 Zan 5:19) Kɛ Klistfuɛ’m be fa be wun be man Zoova srɛlɛ nun’n, nn b’a kaci i liɛ. Sran kun bɔbɔ yɛ ɔ fɛ i wun man Ɲanmiɛn sɔ ɔ. Kɛ ɔ ko yo sɔ’n kpɛkun b’a yo i batɛmu.

 3. ?Zezi i batɛmu’n ti ngue nzɔliɛ? ?Yɛ wafa sɛ yɛ i sɔnnzɔnfuɛ’m be kwla niɛn i ajalɛ’n su ɔ?

³ Zezi bɔbɔ fali ajalɛ kɛ ɔ́ yó Ɲanmiɛn i klun sa. I sɔ’n ti ajalɛ m’ɔ kleli e ɔ. Be wuli Zezi i Izraɛli nvle m’ɔ ti Ɲanmiɛn liɛ’n i nun. Ɔ maan Zezi bɔbɔ ti Ɲanmiɛn liɛ. Sanngɛ i batɛmu yolɛ’n nun’n, ɔ yoli like kun mɔ i dan tra like nga Mmla’n kleli kɛ be yo’n. Ɲanmiɛn Ndɛ’n waan ɔ seli kɛ: “Nyanmiɛn, min yɛ, n su ba ɔ klun sa yolɛ.” (Ebr. 10:7; Lik 3:21) Ɔ maan Zezi i batɛmu’n ti i wun ng’ɔ fa kleli Ɲanmiɛn kɛ ɔ́ yó i Si i klun sa’n i nzɔliɛ. Kɛ i sɔnnzɔnfuɛ’m bé yó be batɛmu’n be niɛn i ajalɛ’n su. Sanngɛ be liɛ’n, be yo nzue nun batɛmu’n sran kwlaa be ɲrun fa kle kɛ be bɔbɔ b’a fa be wun b’a man Ɲanmiɛn srɛlɛ’n nun.

Wafa nga e wun Ɲanmiɛnfa manlɛ’n yo e ye’n

 4. ?Sran’m be wiengu nda talɛ’n i su like benin yɛ Davidi nin Zonatan be janvuɛ tralɛ’n kle e ɔ?

⁴ Klistfuɛ’m be wun Ɲanmiɛn fa manlɛ’n, ɔ timan aɔwi ndɛ. Ɔ timan nda talɛ sa ngbɛn. ?Sanngɛ kɛ e fa e wun e man Ɲanmiɛn kpa’n niɔn, ngue yɛ e ɲɛn i nun ɔn? Kɛ sran’m be ta be afiɛn nda’n, i su ye nga be ɲɛn i’n, maan e fɛ i su sunnzun ase e nian. I kun yɛle janvuɛ tralɛ’n. Sɛ sran kun waan ɔ́ ɲán janvuɛ tralɛ’n i su ye’n, ɔ fata kɛ i bɔbɔ sua janvuɛ tralɛ’n i su trɔ’n. I wie yɛle kɛ ɔ ti kɛ nda sa yɛ w’a ta ɔ. Ɔ maan sɛ sa wie o i janvuɛ’n i su’n, saan ɔ́ níɛn i lika. Janvuɛ tralɛ ng’ɔ yo ɲɛnmɛn mɔ be kannin be ndɛ Biblu’n nun’n, be nun kun yɛle Davidi nin Zonatan be liɛ’n. I kpa’n, be tali be wiengu nda kɛ bé trá janvuɛ. (An kanngan 1 Samiɛl 17:57; 18:1, 3 nun.) Kannzɛ bɔbɔ be wunmɛn i sɔ janvuɛ tralɛ liɛ’n i finfin’n, sanngɛ janvuɛ tralɛ nga i nun’n, sran’m be ta be wiengu nda’n, be nun sunman lika be yo tankaan kpa.—Nya. 17:17; 18:24.

 5. ?Sɛ kanga kun i min’n ti kpa naan i waan ɔ́ káci i liɛ tititi’n, wafa sɛ yɛ ɔ kwla ɲan su ye ɔ?

⁵ Mmla nga Ɲanmiɛn fa mannin Izraɛli’n, ɔ kan wafa nga kɛ sran’m be ta nda’n be ɲan su ye’n i ndɛ. Sɛ kanga kun waan ɔ́ ká i min mɔ i klun ti kpa’n i liɛ titi naan ɔ́ trán fɔundi nun’n, ɔ nin i min’n be kwla tra aenguɛ. Mmla’n waan: “Sɛ kusu ɔ se kɛ ɔ klo i min’n nin i yi’n nin i mma mun’n, naan ɔ kloman kɛ ɔ́ kɔ́ naan ɔ́ ɲɛ́n i ti’n, i min’n fa Nyanmiɛn yo i lalofuɛ, ɔ fa sran’n mantan anuan’n annzɛ anuan’n i waka’n. Kpɛkuun ɔ fiti i su’n nin tulie. Kɛ ɔ fin lɛ’n, sran sɔ’n sú i tititi.”—Tul. 21:5, 6.

6, 7. (a) ?Wafa sɛ yɛ kɛ sran’m be ta be wiengu nda’n, be ɲan su ye ɔ? (b) ?Yɛ e nin Zoova e tranlɛ’n nun’n, i sɔ’n kle sɛ?

⁶ Aja’n ti sran nin sran be tranlɛ mɔ i nun’n, ɔ fata kɛ be tra aenguɛ cinnjin kpa ɔ. Ɔ ti aenguɛ m’ɔ o sran kun nin sran kun be afiɛn ɔn. Nán fluwa ngbɛn sa yɛ ɔ o be afiɛn ɔn. Yasua kun nin bla kun sa mɔ be tran lika kun sa ngbɛn mɔ be jaman be wun’n, be kwlá diman fɔundi sa le. Be mma’m be kusu be kwlá diman fɔundi. Sanngɛ yasua nin bla nga be ja be wun kɛ ɔ nin i fata’n sa’n, Ɲanmiɛn Ndɛ’n ti’n kɛ ndɛ tɔ be afiɛn’n, saan bé mían be ɲin bé síesíe i klolɛ su.—Mat. 19:5, 6; 1 Kor. 13:7, 8; Ebr. 13:4.

⁷ Laa kpa’n, ka naan sran’m b’a di aata annzɛ ka naan b’a di junman’n i wun fluwa nga be yo’n, be ɲan su ye. (Mat. 20:1, 2, 8) Andɛ’n i kunngba’n niɔn. Yɛle kɛ ka naan e nin sran kun y’a di aata annzɛ ka naan y’a di junman lika wie’n, sɛ e klɛ i wun fluwa’n e ɲan su ye. ?Ɔ maan sɛ aenguɛ tralɛ’n yo maan janvuɛ tralɛ’n nin aja’n yɛ junman dilɛ’n be yo ye’n, e wun nga e fa man Zoova mlɔnmlɔn’n yɛ ɔ su yoman e ye tratraman su ɔ? Siɛn’n maan e nian wafa nga laa’n, sran’m be ɲannin be wun nga be fa mannin Ɲanmiɛn Zoova’n i su ye’n, ɔ nin wafa nga i sɔ liɛ’n w’a yoman nda talɛ sa ngbɛn’n.

Wafa nga Izraɛlifuɛ’m be wunƝanmiɛn fa manlɛ’n yoli be ye’n

 8. ?Izraɛlifuɛ’m be liɛ’n, be wun nga be fa mannin Ɲanmiɛn’n i bo’n yɛle benin?

⁸ Kɛ Izraɛlifuɛ’m be tali Zoova i nda’n, be nvle’n kwlaa yoli i liɛ. Zoova maan be yiali Sinai oka’n i wun lɛ. Kpɛkun ɔ seli be kɛ: “Sɛ amun ti ndɛ nga n kan kle amun’n i kpa’n, sɛ amun nian aenguɛ nga e nin amun e tra’n su kpa’n, amún yó min nvle b’ɔ ti min liɛ klonglo nvle kun nga’m be afiɛn.” Nvlefuɛ’m be kwlaa be tɛli su kɛ: “Like kwlaa nga Anannganman waan e yo’n, é yó.” (Tul. 19:4-8) Izraɛlifuɛ’m be liɛ’n, be wun nga be fa mannin’n, ɔ timan nda ngbɛn yɛ b’a tɛ i kɛ bé yó like kun sa ɔ. I sɔ’n i bo yɛle kɛ be ti Zoova liɛ. Yɛ Zoova yó be kɛ ‘nvle m’ɔ ti i liɛ klonglo nvle kun nga’m be afiɛn’n’ sa.

 9. ?Kɛ Izraɛlifuɛ’m be yoli Ɲanmiɛn liɛ’n, wafa sɛ yɛ be ɲannin su ye ɔ?

⁹ Kɛ Izraɛlifuɛ’m be yoli Zoova liɛ’n, be ɲannin su ye. Ɔ yoli aenguɛ sɔ’n i nuan su sa. Yɛle kɛ ɔ niannin be lika kɛ siɛ kpa kun fa niɛn i wa’n i lika’n sa. Ɲanmiɛn seli Izraɛlifuɛ’m be kɛ: “?Bla ta kun wla fi i wa’n su? ?Ɔ si-mɛn i bɔbɔ i klun ba’n i aunnvuɛ? Kannzɛ i wla fi i wa’n su bɔbɔ’n, sanngɛ min liɛ’n, min wla su fi-man amun le.” (Eza. 49:15) Zoova fali Mmla’n kleli be atin yɛ i nuan ijɔfuɛ’m be wlali be fanngan. Kpɛkun anzi’m be sasali be. Jue tofuɛ’n klɛli i kɛ: “Ɔ kɛn i nuan su ndɛ mun kle Zakɔb. Ɔ fɛ i mmla fanunfanun’n man Izraɛlfuɛ mun. W’a yo-man nvle uflɛ fi sɔ.” (Jue. 147:19, 20; An kanngan Jue Mun 34:8, 20; 48:15 nun.) Wafa nga Zoova fa niannin nvle ng’ɔ ti i liɛ’n i lika laa’n, yɛ ɔ́ fá nían be nga be fa be wun be mɛn i andɛ’n be lika wie ɔ.

Like nga ti yɛ ɔ fata kɛ e fa e wun e man Ɲanmiɛn’n

10, 11. ?Be wuli e Ɲanmiɛn i awlobo’n nun? An yiyi nun.

¹⁰ Kɛ sran wie’m bé bú be wun Ɲanmiɛn fa manlɛ’n nin be batɛmu yolɛ’n i akunndan’n, be kwla usa be wun kɛ: ‘?Ngue ti yɛ sɛ m’an faman min wun m’an manman Ɲanmiɛn’n, n kwlá sumɛn i ɔ?’ Wafa nga dɔ nga su Ɲanmiɛn i ɲrun’n e ti’n, kɛ e fa e ɲin e sie su’n, e wun sa nga ti yɛ ɔ fata kɛ e yo sɔ’n i weiin. Nán e wla fi su kɛ sa tɛ mɔ Adam yoli’n ti’n, ɔ ti kɛ b’a wuman e Ɲanmiɛn i awlo’n nun sa. (Rɔm. 3:23; 5:12) E wun nga e fa man Ɲanmiɛn’n, ɔ ti cinnjin kpa naan w’a kplin su kɛ e ti i awlobo’n nunfuɛ. Maan e nian sa nga ti yɛ ɔ ti sɔ’n.

¹¹ E nun wie fi e si kwlá manman e anannganman nguan kɛ nga Ɲanmiɛn kunndɛli kɛ ɔ́ fá mán e’n sa. (1 Tim. 6:19) B’a wuman e kɛ Ɲanmiɛn i wa sa. Afin kɛ klɔ sran klikli’m be yoli sa tɛ’n, klɔ sran’m be kwlaa be nin be Si m’ɔ klo be’n m’ɔ ti be Yifuɛ’n be afiɛn tili nun. (An nian Mmla’n 32:5.) Kɛ ɔ fɛ i lɛ’n, klɔ sran kwlaa nga be o mɛn’n nun’n, b’a tranman Zoova i awlobo’n nunfuɛ’m be nun kun. Be nin i be afiɛn tili nun.

12. (a) ?Wafa sɛ yɛ klɔ sran mɔ fɔ o be nun’n, be kwla kaci Ɲanmiɛn i awlobo’n nunfuɛ ɔ? (b) ?Ajalɛ benin yɛ ɔ fata kɛ e fa ka naan b’a yo e batɛmu ɔ?

¹² Sanngɛ ɔ nin i sɔ ngba’n, e tinuntinun e kwla srɛ Ɲanmiɛn kɛ ɔ sɔ e nun naan i sufuɛ nga i klun jɔ be wun mɔ be ti i awlobofuɛ’n, e kaci be nun kun.a ?Sa tɛ yofuɛ kɛ e sa’n, wafa sɛ yɛ i sɔ’n kwla yo ye ɔ? Akoto Pɔlu klɛli i kɛ: ‘Laa bɔ e ti Nyanmiɛn i kpɔfuɛ’n ɔ fɛ i Wa’n siesieli ye afiɛn.’ (Rɔm. 5:10) E batɛmu yolɛ’n nun’n, e srɛ Ɲanmiɛn kɛ maan e akunndan’n nun yo sanwun naan w’a kwla sɔ e nun klanman. (1 Piɛ. 3:21) Sanngɛ ka naan b’a yo e batɛmu’n, ɔ le ajalɛ wie m’ɔ fata kɛ e fa be ɔ. Ɔ fata kɛ e si Ɲanmiɛn naan e sɔnnzɔn i su lafilɛ. Kpɛkun e kaci e nzuɛn’n naan e sa e sin Ɲanmiɛn wun. (Zan 17:3; Yol. 3:19; Ebr. 11:6) Kusu like kun ekun o lɛ m’ɔ fata kɛ e yo naan Ɲanmiɛn w’a sɔ e nun i awlobo’n nun ɔn. ?Like sɔ’n yɛle benin?

13. ?Ngue ti yɛ ɔ fata kɛ sran kun ta nda kɛ ɔ́ fɛ́ i wun mán Ɲanmiɛn naan w’a kwla yo i sufuɛ mɔ be ti i awlobo’n nunfuɛ’n, be nun kun ɔn?

¹³ Sran kun m’ɔ nin Ɲanmiɛn be afiɛn ti tiwa’n, ka naan w’a kaci Ɲanmiɛn i sufuɛ mɔ i klun jɔ be wun mɔ be ti i awlobo’n nunfuɛ’n be nun kun’n, ɔ fata kɛ ɔ dun mmua ta Zoova i nda cinnjin kpa kun. Sɛ e waan é wún sa nga ti yɛ ɔ fata kɛ ɔ yo sɔ’n i wlɛ’n, maan e fa siɛ kpa kun i sunnzun ase e nian. Ɔ klo aika ba kun yɛ i waan ɔ́ fɛ́ i yó i awlobo’n nunfuɛ. Sran kwlaa si kɛ siɛ sɔ’n ti sran kpa. Sanngɛ, ka naan w’a fa ba’n w’a yo i wa’n, ɔ kunndɛ kɛ ba’n tɛ i nda. Ɔ maan bian’n se kɛ: “Ka naan m’an fa wɔ m’an kaci min wa’n, ɔ fata kɛ n wun i wlɛ kɛ á kló min yɛ ɔ ɲin yí min kɛ ɔ si sa.” Saan sɛ ba’n kplin su naan ɔ ta nda’n yɛ bian’n fɛ́ i yó i awlobo’n nunfuɛ ɔ. ?I sɔ’n timan su? I kunngba’n, saan be nga be klunklo su be ta Zoova i nda kɛ bé fá be wun bé mɛ́n i’n, yɛ ɔ kplin be su kɛ be yo i awlobo’n nunfuɛ ɔ. Biblu’n se kɛ: “An fa amun wun mɛn i kɛ sraka bɔ be jrɛ i’n sa, b’ɔ ti i liɛ mlɔnmlɔn bɔ i klun jɔ su.”—Rɔm. 12:1.

Ɔ ti Ɲanmiɛn i klolɛ nin i su lafilɛ like

14. ?Wafa sɛ yɛ e wun nga e fa man Ɲanmiɛn’n ɔ kle kɛ e klo i ɔ?

¹⁴ Nda nga e tɛ i kɛ é fá e wún mán Ɲanmiɛn’n, ɔ yi Zoova i klolɛ mɔ e tu klun e klo i’n i nglo. Ɔ kwla yo kɛ nda nga be tɛ i aja’n nun’n sa. Klistfuɛ yasua kun m’ɔ su wa ja bla’n, klolɛ m’ɔ klo bla’n ti’n, ɔ ta nda kɛ kannzɛ ɔ́ yó sɛ ɔ́ yó sɛ’n, ɔ nin i bé nánti nanwlɛ su titi. Klistfuɛ yasua sɔ’n wun i wlɛ kɛ sɛ w’a taman bla’n i nda aja’n nun’n, ɔ nin i be su kwlá tranman. I kunngba’n, sɛ y’a taman Zoova i nda kɛ é fá e wun e mɛ́n i’n, e su kwlá ɲanman i awlobo’n nunfuɛ yolɛ’n i su mmlusuɛ’n i ngba. Ɔ maan like nga ti yɛ e fa e wun e man Ɲanmiɛn’n yɛle kɛ kannzɛ e ti fɔnfuɛ’n, sanngɛ e klo kɛ é káci i liɛ. Kpɛkun e tali nda kɛ kannzɛ ɔ́ yó sɛ ɔ́ yó sɛ’n, é nin i é nánti titi.—Mat. 22:37.

15. ?Wafa sɛ yɛ e wun Ɲanmiɛn fa manlɛ’n ti i su lafilɛ like ɔ?

¹⁵ Kɛ e fa e wun e man Ɲanmiɛn’n e yi i nglo kɛ e lafi i su. ?Ngue ti yɛ ɔ ti sɔ ɔ? Zoova i su mɔ e lafi’n ti’n, e wun i wlɛ kɛ sɛ e fa e wun e mɛntɛn i’n, ɔ ti kpa man e. (Jue. 73:28) E si kɛ “ajulisufuɛ tɛtɛ bɔ b’a saci’n” be afiɛn mɔ e o’n ti’n, nán blɛ ngba yɛ e nin Ɲanmiɛn e nantilɛ’n yó pɔpɔ ɔ. Sanngɛ nda nga Ɲanmiɛn tɛli i kɛ ɔ́ súan e ɲin nga e mian’n i bo’n, e lafi su. (Fil. 2:15; 2 Kor. 4:7) E si kɛ fɔ o e nun. Sanngɛ e lafi su kɛ sɛ e fɔn’n Zoova sí e aunnvuɛ. (An kanngan Jue Mun 103:13, 14; Rɔmfuɛ Mun 7:21-25 nun.) E lafi su kɛ nda nga e tɛli i kɛ é nánti seiin’n, Zoova rá su.—Zɔb 27:5.

E wun Ɲanmiɛn fa manlɛ’n ɔ man aklunjuɛ

16, 17. ?Ngue ti yɛ e wun Zoova fa manlɛ’n man aklunjuɛ ɔ?

¹⁶ E wun nga e fa man Zoova’n ɔ man e aklunjuɛ, afin i bo’n yɛle kɛ y’a klɛn e wun y’a mɛn i. Zezi kannin ndɛ nanwlɛ cinnjin kun. Ɔ seli kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.” (Yol. 20:35) Kɛ be cɛ sran like’n i su aklunjuɛ nga be di’n, Zezi wunnin i sɔ liɛ’n i nun m’ɔ́ dí i junman asiɛ’n su wa’n. Kɛ ɔ ko yo naan w’a uka sran mun naan b’a wun nguan’n i atin’n, sɛ ɔ fata kɛ nán ɔ lo wunmiɛn, nán ɔ di aliɛ yɛ nán ɔ kunndɛ wafa nga i wun kwla yo i fɛ’n, ɔ yoli i sɔ liɛ’n. (Zan 4:34) Ɔ yoli Zezi i fɛ kpa kɛ ɔ yo naan i Si klun jɔ. Zezi seli kɛ: “N yo i klun sa cɛn kwlaa.”—Zan 8:29; Nya. 27:11.

¹⁷ Ɔ maan Zezi fɛli i sɔnnzɔnfuɛ’m be ɲin sieli i mɛn dilɛ kun m’ɔ man aklunjuɛ’n su. I waan: “Sran nga i waan ɔ́ sú n su’n, maan ɔ klɛn i wun man min, yɛ ɔ suɛ i waka’n naan ɔ su n su.” (Mat. 16:24) Sɛ e yo sɔ’n, e nin Zoova e afiɛn mántan. ?Ɔ le sran kun sa mɔ e kwla fa e wun e wlɛ i sa nun m’ɔ kwla nian e lika klolɛ su kpa tra Ɲanmiɛn ɔn?

18. ?Ngue ti yɛ e wun nga e fa mannin Zoova’n, i nuan su sa yolɛ’n man e aklunjuɛ tra e wun nga e kwla fa man sran annzɛ like uflɛ’n niɔn?

¹⁸ Kɛ e fa e wun man Zoova mɔ e yo i sɔ’n i nuan su sa’n, yɛle kɛ e yo Zoova i klun sa’n, ɔ man e aklunjuɛ tra kɛ y’a fa e wun y’a man sran annzɛ like uflɛ’n. I wie yɛle kɛ sran kpanngban be fa be wun wlɛ i aɲanbeun ninnge kunndɛlɛ’n nun. Ɔ maan be diman aklunjuɛ. Sanngɛ be nga be fa be wun man Zoova’n be di aklunjuɛ cɛ kpa. (Mat. 6:24) Kɛ be ‘nin Nyanmiɛn yɛ be di junman’n,’ i sɔ cenjele like liɛ’n, ɔ man be aklunjuɛ. Be wun nga be fa mannin’n, nán junman kun yɛ be fa mɛnnin i ɔ, sanngɛ Ɲanmiɛn m’ɔ si ye’n yɛ be fali be wun be mɛnnin i ɔ. (1 Kor. 3:9) Sran fi kwlá siman be klun mɔ be tu’n i su ye kɛ i sa. Ɔ́ wá yó maan i sufuɛ kpa’m bé sá be sin bé káci gbanflɛn ekun. I liɛ’n, ɔ́ kwlá nían be lika tititi.—Zɔb 33:25; An kanngan Ebre Mun 6:10 nun.

19. ?Be nga be fali be wun be mannin Zoova’n, cenjele like benin yɛ be le i ɔ?

¹⁹ E wun Zoova fa manlɛ’n yo maan e nin i e afiɛn’n mantan kpa. Biblu’n waan: “An fa amun wun mantan Nyanmiɛn, yɛ i kusu fɛ́ i wun mántan amun-ɔn.” (Zak 4:8; Jue. 25:14) Like suanlɛ ng’ɔ́ bá lɛ’n nun’n, é wá wún like nga ti yɛ e kwla lafi su kpa kɛ e kwla fa ajalɛ naan e fa e wun e man Zoova’n.

[Ja ngua lɛ ndɛ’n]

?Amún tɛ́ su sɛ?

• ?Kɛ be se kɛ be fa wun be man Ɲanmiɛn’n, i bo’n yɛle benin?

• ?Kɛ e fa e wun e man Ɲanmiɛn’n, wafa sɛ yɛ e ɲan su ye ɔ?

• ?Ngue ti yɛ ɔ fata kɛ Klistfuɛ’m be fa be wun be man Zoova ɔ?

[Foto, bue 12]

E wun nga e fa mannin Ɲanmiɛn’n i nuan su sa yolɛ’n ɔ yo maan e di aklunjuɛ cɛ kpa.