?Ngue ti yɛ e yo kpɛnngbɛn mɔ e wu-ɔ?

ƝANMIƐN w’a boman e kɛ e wu. I sɔ’n ti yɛ kɛ ɔ boli Adan nin Ɛvu’n fɔ nunman be nun’n niɔn. Ɔ maan sɛ ɔ ti kɛ b’a yoman sa tɛ sa’n, nn dɔ nga su’n be te o nguan nun. I sɔ’n i ɲin fite ndɛ nga Zoova kɛnnin i sa kpa nin sa tɛ’n be silɛ waka m’ɔ o Edɛnin fie’n nun lɔ’n, i nun.

Ɲanmiɛn seli Adan kɛ: “Sa kpa’n nin sa tɛ’n be silɛ waka’n i mma liɛ’n, nán di i li. Sɛ a di’n, saan wulɛ cɛ yɛ á wú-ɔ.” (Bo Bolɛ 2:17) Sɛ ɔ ti kɛ Zoova boli Adan nin Ɛvu be kɛ be wu sa’n, nn w’a kanman ndɛ sɔ’n w’a kleman be. Ɔ maan Adan si kɛ sɛ ɔ nanti ndɛ nga Zoova kannin’n su’n, ɔ su wuman.

ƝANMIƐN W’A BOMAN SRAN’M BE KƐ BE WU.

Waka nga be o Edɛnin fie nun’n be diman be yalɛ. Ɔ maan sɛ Adan nin Ɛvu b’a diman sa kpa nin sa tɛ’n be silɛ waka’n i su mma’n, awe su kunman be. (Bo Bolɛ 2:9) Sɛ ɔ ti kɛ Adan nin Ɛvu b’a diman waka mma sɔ’n, nn bé klé kɛ be ɲin yi Ɲanmiɛn m’ɔ yili be’n. Asa ekun’n, bé klé kɛ Ɲanmiɛn le atin kle be like ng’ɔ fata kɛ be yo’n.

?NGUE TI YƐ ADAN NIN ƐVU BE WULI-Ɔ?

Sɛ e waan é sí like nga ti yɛ Adan nin Ɛvu be wuli’n, ɔ fata kɛ e fa e ɲin e sie i yalɛ mɔ Satan nin Ɛvu be kokoli’n su. Satan sinnin wuo kun lika kpɛli Ɛvu i gblɛ. Biblu’n se kɛ: “Laa, wuo’n i gblɛ liɛ’n tra bo’n nun nnɛn nga Anannganman Nyanmiɛn yili be’n be kwlaa. Le kun ɔ wa usali bla’n kɛ: ‘?Naan Nyanmiɛn seli amun sakpa kɛ: Nán amun di fie’n su waka’m be mma’n wie fi?’”—Bo Bolɛ 3:1.

Ɛvu tɛli i su kɛ: “E di fie’n su waka’m be mma mun o! Sanngɛ waka ng’ɔ jin fie’n i afiɛn’n, i su mma liɛ’n yɛ Nyanmiɛn’n seli e kɛ nán e di-ɔ. I kpa’n bɔ ɔ seli e kɛ nán e kɛn i. Sɛ ɔ yo sɔ-ɔ, é wú.” Yɛ wuo’n seli bla’n kɛ: “Amun su wuman. Nyanmiɛn bɔbɔ si kɛ cɛn nga amun di’n, amun ɲin tí. Amún yó kɛ i bɔbɔ sa, amún sí sa kpa’n nin sa tɛ’n.” I lɛ nun’n, Satan su se kɛ Zoova ti gblɛfuɛ naan ɔ fa like kpa fia Adan nin Ɛvu be wun.—Bo Bolɛ 3:2-5.

Ɛvu fali ndɛ nga Satan kannin’n su. Ɔ maan ɔ fɛli i ɲin sieli i waka’n su yɛ ɔ wunnin kɛ i mma’m be yo ɲɛnmɛn naan bé wá yó fɛ. I sin’n, ɔ tili wie dili. Biblu’n se kɛ: “Yɛ ɔ́ fá wie mɛn i wun m’ɔ o i wun lɛ nin-ɔn, yɛ i kusu ɔ́ dí wie-ɔ.”—Bo Bolɛ 3:6.

Ɲanmiɛn seli Adan kɛ: “Sɛ a di’n, saan wulɛ cɛ yɛ á wú-ɔ.”—BO BOLƐ 2:17.

Kɛ Adan nin Ɛvu be yoli ɲin kekle Ɲanmiɛn su’n, i sɔ’n w’a yoman Ɲanmiɛn i fɛ mlɔnmlɔn. I sɔ’n ti’n, Zoova seli Adan kɛ: “Nvufle tú wɔ kpa naan w’a ɲan ɔ nuan nun aliɛ w’a di. Ɔ́ yó sɔ lele naan w’a fa sa ɔ sin a kaci fa ekun, afin fa yɛ n fa yili wɔ-ɔ. A ti fa yɛ a wa sa ɔ sin á káci fa ekun.” (Bo Bolɛ 3:17-19) I sɔ’n ti’n “Adan dili afuɛ ya ngwlan nin afuɛ ablasan yɛ ɔ wuli-ɔ.” (Bo Bolɛ 5:5) Kɛ Adan wuli’n w’a ɔman ɲanmiɛn su annzɛ lika uflɛ. Afin kwlaa naan Ɲanmiɛn w’a yi i’n, ɔ nunman ɲanmiɛn su lɔ annzɛ lika uflɛ. Ɔ maan kɛ ɔ wuli’n ɔ sɛli i sin kacili fa. Afin fa yɛ Ɲanmiɛn fa yili i-ɔ. Nanwlɛ ɔ ti ɲrɛnnɛn.

?NGUE TI YƐ FƆ O E NUN-ƆN?

Kɛ Adan nin Ɛvu be ɲinfu be yoli ɲin kekle Ɲanmiɛn su’n, fɔ wa trannin be nun, yɛ nguan m’ɔ leman awieliɛ’n fili be sa. Sanngɛ nán be ngunmin yɛ be wunnin sa tɛ mɔ be yoli’n i su afɛ’n niɔn. Yɛle kɛ sa tɛ’n wluli be mma nga be wuli be’n be nun wie. Rɔmunfuɛ Mun ndɛ tre 5 i mma12 se kɛ: “Sran kunngba [Adan] ti yɛ sa tɛ yolɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Yɛ wie’n tɔli sran’m be kwlaa be su, afin be kwlaa be yoli sa tɛ.”

Biblu’n se kɛ sa tɛ’n nin wie’n be ti ‘sɛ tannin m’ɔ kata sran’m be kwlaa be su’n, nin awlabɔɛ kondro m’ɔ kata nvlenvle be kwlaa be su’n.’ (Ezai 25:7) Ndɛ sɔ’n kle kɛ sran fi kwlá ɲɛnmɛn i ti sa tɛ’n nin wie’n be sa nun. Ndɛ sɔ’n ti nanwlɛ sakpa. Biblu’n se kɛ ‘Adan ti’n sran’m be kwlaa be wu.’ (1 Korɛntifuɛ Mun 15:22) I sɔ’n ti yɛ akoto Pɔlu usali kɛ: “?Wan yɛ ɔ́ dé min min wunnɛn mɔ maan ń wú’n, i sa nun-ɔn?” ?Sran kun kwla de e sakpa?—Rɔmunfuɛ Mun 7:24.