Zoova kacimɛn i ndɛ ng’ɔ kan’n

Jue Mun be nun ndɛ cinnjin mun—fluwa i bue klikli

?SƐ Biblu’n nun fluwa kun o lɛ mɔ i nun ndɛ’m be ti Ɲanmiɛn i manmanlɛ jue ndɛ ngunmin’n, wafa sɛ yɛ bé flɛ́ fluwa sɔ’n niɔn? Dunman ng’ɔ nin fluwa sɔ’n fata’n yɛle Jue Mun. Biblu’n nun fluwa’m be nun tɛnndɛn kpafuɛ’n, yɛle Jue Mun. Jue nga be kan Ɲanmiɛn i wafa mɔ be yo ɲɛnmɛn’n, ɔ nin ninnge ng’ɔ fɛli i kwlalɛ’n yoli be’n be ndɛ’n, yɛ be o fluwa sɔ’n nun ɔn. Asa ekun’n, Jue Mun kan e ɲrun lɔ sa’m be ndɛ wie. Jue sunman be nun ndɛ’m be yi wafa nga be klɛfuɛ’m be wun fa yo be ɲrɛnnɛn blɛ nun’n, i nglo. Sa nga be kan be ndɛ Jue Mun nun’n, kɛ be boli be bo lele mɔ bé fá wíe’n, ɔ kwla dili afuɛ akpi kun. Sa sɔ’m be fɛ i Moizi blɛ su lele fa ju blɛ mɔ Zuifu’m be fin lomuɛn Babilɔni lɔ be bali be nvle nun’n i nun. Be nga be klɛli Jue Mun’n, yɛle Moizi, nin Famiɛn Davidi, yɛ sran uflɛ wie mun ekun. Sran sunman be waan Ɲanmiɛn ɲrun jranfuɛ Ɛsdrasi yɛ ɔ siesieli Jue Mun kɛ nga e le i andɛ sa’n niɔn.

Jue Mun be fluwa’n i bue dandan’m be ti nnun. Nán andɛ sa yɛ be yoli i sɔ ɔ. Kɛ be bubuli nun kɛ nga sa: (1) Jue Mun 1-​41; (2) Jue Mun 42-​72; (3) Jue Mun 73-​89; (4) Jue Mun 90-​106; kpɔkun (5) Jue Mun 107-​150. Bue klikli’n i nun ndɛ mun yɛ é wá fá e ɲin síe su ndɛ nga nun ɔn. Famiɛn Davidi yɛ ɔ klɛli bue sɔ’n nun jue’m be nun sunman ɔn. Sanngɛ nɛ́n i yɛ ɔ klɛli be nun nsan ɔn. E siman be nga be klɛli Jue Mun 1, nin 10, ɔ nin 33.

‘MIN ƝANMIƐN, A TI KƐ YƆBUƐ SA’

(Jue Mun 1:1–24:10)

Jue klikli nun’n, be seli kɛ sran nga i like liɛ ng’ɔ klo i’n yɛle Ɲanmiɛn i mmla’n, i liɛ su ti ye. I sin’n, jue’n i nɲɔn su’n kan Ɲanmiɛn i Sielɛ Blɛ’n i ndɛ.a Jue Mun i bue nɲɔn nun’n, be diman Ɲanmiɛn i srɛlɛ’m be yalɛ. Jue Mun 3–5, 7, 12, 13 nin 17 be nun’n, jue tofuɛ’n srɛ Ɲanmiɛn kɛ ɔ de i i kpɔfuɛ’m be sa nun. Jue Mun 8 kan Zoova i dan m’ɔ ti’n i ndɛ. Kpɔkun ɔ fɛ i sɔ liɛ’n sunnzun klɔ sran’n i kaan m’ɔ ti’n.

Davidi waan Zoova ti i nvle’n nunfuɛ’m be sasafuɛ. Ɔ toli jue seli kɛ: ‘Min Ɲanmiɛn, a ti kɛ yɔbuɛ sa, ɔ nun yɛ n ɲan fiawlɛ ɔ!’ (Jue Mun 18:3) Jue Mun 19 manman Zoova afin ɔ ti Like Yifuɛ nin Mmla Kpɛfuɛ. Jue Mun 20 kɛn i ndɛ kɛ ɔ ti sran’m be Defuɛ. Kpɔkun Jue Mun 21 waan Zoova ti i Famiɛn ng’ɔ sieli i’n, i Defuɛ. Jue Mun 23 se kɛ Zoova ti Bua Sunianfuɛ Dan. Kpɔkun Jue Mun 24 se kɛ ɔ ti Famiɛn m’ɔ le ɲrun dan kpa ɔ.

Ɲanmiɛn Ndɛ’n i su kosan’m be su tɛlɛ:

2:1, 2​—?Ngue like yɛ nvlenvlefuɛ’m ‘be cici i sran’m be wun ngbɛn’n’ niɔn? Like nga nvlenvlefuɛ’m ‘be cici i sran’m be wun ngbɛn’n,’ yɛle kɛ be kunndɛ kɛ be famiɛn dilɛ’n ka lɛ titi. I sɔ’n ti ngbɛn afin be su kwlɛmɛn i sɔ’n yo. ?Nvlenvlefuɛ nga b’a jaso’n, mɔ be bo w’a yo kun ‘Zoova nin i sran ng’ɔ sieli i famiɛn’n be wun’n,’ be kwla lafi su kɛ like nga be waan bé yó’n, ɔ́ kpɛ́n su?

2:7​—?Ngue yɛle ‘Zoova i ndɛ m’ɔ fin i nuan fiteli’n’? Ndɛ sɔ’n yɛle aenguɛ nga Zoova nin Zezi Klist m’ɔ ti i Wa kunngba cɛ’n be trali. Yɛle kɛ Zoova sieli i famiɛn.​—Lik 22:28, 29.

2:​12​—?Wafa sɛ yɛ famiɛn’m be kwla ‘koto ba’n i bo’ ɔ? Ebre aniɛn’n nun ndɛ mma nga be kaci i kɛ “koto i bo” Jue Mun 2:12 nun’n, i bo’n yɛle “sran nun tɔlɛ.” I nun mɔ bé kpɛ́ jue sɔ’n, sran nun tɔlɛ’n ti aenguɛ tralɛ like. Kɛ bé sɔ́ aofuɛ’m be nun’n, be tɔ be nun wie. Sran nun tɔlɛ’n kwla kle ekun kɛ be nin sran’n be nanti nanwlɛ su titi. Ɔ maan Jue Mun nɲɔn su’n i ndɛ sɔ nun’n, Ɲanmiɛn su yia nvlenvle’m be kɛ be tɔ i Wa’n m’ɔ sieli i Famiɛn’n i nun, annzɛ be sɔ i nun.

3:i su fitilɛ’n​—?Ngue ti yɛ jue wie’m be le su fitilɛ ɔ? Jue’n i su fitilɛ’n kle e jue’n i klɛfuɛ’n. Annzɛ kusu ɔ kan sa ng’ɔ o jue’n i klɛfuɛ’n su blɛ m’ɔ́ klɛ́ jue sɔ’n. E wun i sɔ’n Jue Mun 3 nun. Asa ekun’n, jue’n i su fitilɛ’n kwla kle like nga ti yɛ be kpɛli jue sɔ’n. (Jue Mun 4 nin 5) Kpɔkun ɔ kle like nga kɛ bé tó jue’n, ɔ nin i fata kɛ be bo’n. (Jue Mun 6)

11:3​—?Sran’m be nzuɛn kpakpa mennin mun yɛ be sacili ɔ? Nzuɛn kpakpa sɔ mun yɛle ninnge nga sran’m be lafi be su’n. Yɛle kɛ mmla nga be kpɛli be’n, nin be ninnge siesielɛ, ɔ nin sa nuan su yolɛ’n i su mmla nga be kpɛli be’n. Kɛ ninnge sɔ’m be ko sanngan’n, mɛn’n kusu sanngan wie, ɔ maan sran’m be yoman sa i nuan su kun. Kɛ sa’m be ko yo sɔ’n ɔ fata kɛ “sran kpa’n” fɛ i wla’n kwlaa gua Ɲanmiɛn su.​—Jue Mun 11:​4-7.

21:4​—?Ngue yɛle ‘famiɛn kle m’ɔ ti sika ɔkwlɛ’n’? Sɛ famiɛn kle kpakpa yɛ be kɛn i ndɛ o, annzɛ kusu sɛ famiɛn kle sɔ’n ti Davidi i kpɔfuɛ’m be kwlalɛ ng’ɔ kwlali be’n i nzɔliɛ o, b’a yiyiman nun. Sanngɛ Ɲanmiɛn nuan ijɔfuɛ’m be ndɛ kun ɔn. Famiɛn kle nga afuɛ 1914 nun’n, Zoova fa mannin Zezi’n, ndɛ sɔ’n fa e ɲin sie su. Ɔ kle kɛ Zezi w’a yo famiɛn. Yɛ kɛ mɔ famiɛn kle sɔ’n ti sika ɔkwlɛ’n, ɔ kle ekun kɛ Zezi i famiɛn dilɛ’n leman wunsu.

22:​2, 3​—?Ngue ti yɛ Davidi kwla buli i kɛ Zoova w’a kaci i sin w’a si i ɔ? Davidi i kpɔfuɛ’m be kleli i ɲrɛnnɛn dan. Ɔ maan ‘yakpa mɔ i waan ɔ ti’n, w’a kaci kɛ nguɛn m’ɔ klo’n sa.’ (Jue Mun 22:15) Atrɛkpa’n, ɔ yoli i kɛ Zoova w’a kaci i sin w’a si i sa. Kɛ be boboli Zezi waka’n su’n, ɔ yoli i sɔ wie. (Matie 27:46) Davidi i ndɛ’m be kle angunndan nga, kɛ sa ko tɔ klɔ sran’m be su mɔ be wunmɛn i ɲrun be wunmɛn i sin’n, be bu’n. Sanngɛ Davidi i Ɲanmiɛn srɛlɛ ng’ɔ o Jue Mun 22:17-​22 nun’n, ɔ kle kɛ ɔ lafili Ɲanmiɛn su titi.

Afɔtuɛ ng’ɔ man e’n:

1:1. Ɔ fataman kɛ e nin be nga be kloman Zoova’n e san nun.​—1 Korɛntfuɛ Mun 15:33.

1:2. Ɔ fata kɛ e fa e ɲin sie i Ɲanmiɛn i ninnge’m be yolɛ’n su cɛn kwlaa.​—Matie 4:4.

4:5. Sɛ e fa ya’n, ɔ flunman kɛ e muan e nuan. Ɔ timɛn i ti’n, ɔ cɛman naan y’a kan ndɛ wie naan i sin’n, w’a yo e nsisɔ.​—Efɛzfuɛ Mun 4:26.

4:6. Sɛ e klo kɛ é ‘yí sraka ng’ɔ fata’n,’ maan e klun angunndan’n yo kpa, yɛ e nian Zoova i mmla’m be su e nanti.

6:6. Like nga ti yɛ ɔ fata kɛ e ka nguan nun’n, yɛle Zoova i manmanlɛ.​—Jue Mun 115:17.

9:​13. Zoova sie be nga be gua mmoja ase’n be nzɔliɛ yɛ ɔ tu be fɔ. Sanngɛ i wla kpɛn ‘be nga be kun be’n be kpanlɛ’n’ su.

15:​2, 3; 24:​3-5. Ɔ fata kɛ Ɲanmiɛn i sufuɛ kpa’m be di nanwlɛ. Nán maan be ta nda ngbɛnngbɛn yɛ nán maan be tɔn be wiengu suɛn.

15:4. Sɛ w’a yoman kɛ y’a ta nda wie, mɔ i sin’n, e wun i kɛ nda sɔ’n nin Biblu’n nun ndɛ’m be kɔman likawlɛ’n, ɔ fata kɛ, kannzɛ bɔbɔ e sa ti mianwa sɛ’n, e mian e ɲin yo nda nga e tali’n i su like.

15:5. Kɛ mɔ e ti Zoova i sufuɛ’n ti’n, ɔ fataman kɛ e fa sika’n e yo like ng’ɔ nin i fataman’n.

17:14, 15. Ninnge nga be ti “klunwifuɛ mun” [annzɛ mɛn nga nunfuɛ’m] be cinnjin’n, yɛle aɲanbeun ninnge’m be kunndɛlɛ’n, nin be awlobofuɛ’m be lika nianlɛ’n, ɔ nin aja ninnge nga bé yáci i be mma’m be sa nun’n. Davidi liɛ’n, kɛ ɔ ko yo naan w’a kwla ‘nian Zoova’n,’ yɛle kɛ, kɛ ɔ ko yo naan Zoova i klun w’a jɔ i wun’n ti’n, i like liɛ ng’ɔ ti i cinnjin’n, yɛle Ɲanmiɛn i ɲrun dunman kpa ɲanlɛ’n. Sɛ é kwlá sé’n, Zoova i kasiɛ ng’ɔ bo be’n, ɔ nin i sran awlɛn su nzue gualɛ’n ti’n, Davidi “tinnge.” Yɛ kɛ ‘ɔ wun Zoova’n, i klun jɔ lele tra su.’ Yɛle kɛ, kɛ ɔ si kɛ Zoova nin i be o nun’n, i klun jɔ. Ɔ maan ɔ fata kɛ e awlɛn’n tran Ɲanmiɛn i ninnge’m be su kɛ Davidi liɛ’n sa.

19:​2-7. Sɛ ninnge nga Ɲanmiɛn yili be’n, mɔ be kwlá ijɔman’n be yo maan e wun Ɲanmiɛn i ɲrun m’ɔ le i’n, ɔ fata kɛ e mɔ e kwla bu angunndan, mɔ e kwla ijɔ, mɔ e kwla su Ɲanmiɛn’n, e yo i sɔ kpɛ blu.​—Sa Nglo Yilɛ 4:​11.

19:​8-​12. Ninnge nga Zoova se kɛ e yo be’n be ti kpa dan man e.

19:13, 14. Ɔ fataman kɛ e yo sa nga be timan kpa’n, yɛ ɔ fataman kɛ e di tutre.

19:15. Nán like nga e yo’n i ngunmin yɛ ɔ fata kɛ e fa e ɲin sie su ɔ. Sanngɛ ɔ fata kɛ e fa e ɲin sie i ndɛ nga e kan be’n, ɔ nin angunndan nga e bu’n, be su wie.

‘KƐ MƆ M’AN YOMAN SA’N, I TI A SUANNIN MIN BO’

(Jue Mun 25:1–41:14)

Nanwlɛ, Jue Mun 25 nin 26 be nun’n, Davidi yi i nglo weiin kɛ ɔ kunndɛ kɛ i ɲin yí Ɲanmiɛn tititi! Ɔ seli kɛ: ‘Min liɛ’n, n nantili seiin, m’an fɔnman.’ (Jue Mun 26:11) Kɛ ɔ́ srɛ́ Ɲanmiɛn kɛ ɔ yaci i sa tɛ mun cɛ i’n, ɔ seli kɛ: ‘Kɛ n muan min nuan mɔ n kanman sa nga n yoli’n, kpɔkun min wunmiɛn’n ɔ kpɛ su. Yɛ kɛ aliɛ’n ko cɛn sa’n, n kplin lele lika’n jɔ.’ (Jue Mun 32:3) Be nga be klo Zoova’n, Davidi guali be awlɛn su nzue. Ɔ seli kɛ: ‘Zoova i ɲin o i sufuɛ nanwlɛfuɛ’m be su, i su o yalɛ nga be koko kle i’n su.’​—Jue Mun 34:16.

Afɔtuɛ nga be o Jue Mun 37 nun’n be yoli cinnjin mannin Izraɛlifuɛ mun. Asa ekun’n, e nga e o mɛn tɛ nga i “bue nuan’n,” afɔtuɛ sɔ’m be ti cinnjin man e wie. (2 Timote 3:​1-5) Jue Mun 40:8, 9 nun’n, be kannin Zezi i ndɛ kɛ: ‘N bɔbɔ n ba. Min wun ndɛ nga be kannin’n, ɔ o mmla fluwa’n nun. Min Ɲanmiɛn, min waan ń yó ɔ klun sa. Ɔ mmla’n ɔ o min klun.’ Kɛ Davidi nin Bat-Seba be yoli sa tɛ’n, i sin afuɛ nga be bali’n be yoli kekle kpa mannin Davidi. Blɛ sɔ’m be nun’n, ɔ srɛli Zoova kɛ ɔ ukɛ i. I Ɲanmiɛn srɛlɛ sɔ mun yɛ be o jue i bue klikli’n i nun jue kasiɛn’n nun ɔn. Ɔ toli jue seli kɛ: ‘Min liɛ’n, kɛ mɔ m’an yoman sa’n, i ti a suannin min bo.’​—Jue Mun 41:13.

Ɲanmiɛn Ndɛ’n i su kosan’m be su tɛlɛ:

26:6​—?Wafa sɛ yɛ sɛ é kwlá sé’n, e bo sin yia Zoova i suwlɛ’n kɛ Davidi liɛ’n sa ɔ? Zoova i suwlɛ’n ti like kun nzɔliɛ. Yɛle kɛ Zezi Klist i wun ng’ɔ fa kpɔli sran’m be ti’n, Zoova sɔli nun kɛ ɔ ko yo naan sran’m b’a ɲan be ti’n ti. (Ebre Mun 8:5; 10:​5-10) Sɛ e lafi tɛ yilɛ sɔ’n su’n, ɔ ti kɛ e su bo sin yia Zoova i suwlɛ’n sa.

29:​3-9​—?Kɛ be fa Zoova i nɛn’n fa sunnzun ɲanmiɛn m’ɔ kpla’n m’ɔ yo sro’n, ngue yɛ be su kɛn i ndɛ ɔ? Be su kan Zoova i kwlalɛ m’ɔ leman wunsu’n i ndɛ.

31:24​—?Wafa sɛ yɛ Zoova man tutrefuɛ’m be tutre’n i nuan akatua lele kpe nun ɔn? Akatua nga Jue Mun be kɛn i ndɛ wa’n, yɛle fɔ tulɛ’n. Sɛ sran kpa’n yo sa tɛ nga w’a sunnzunman kɛ ɔ́ yó’n, Zoova tu i fɔ. Kɛ mɔ tutrefuɛ’n ɔ yaciman sa tɛtɛ’m be yolɛ naan w’a yo sa kpa’n ti’n, Zoova tu i fɔ lele kpe nun, yɛle kɛ ɔ tu i fɔ kekle kpa.​—Nyanndra Mun 11:31; 1 Piɛr 4:​18.

33:6​—?Ndɛ mma nga nun’n, kɛ be se kɛ Zoova i ‘nuan m’ɔ ukeli i sa’n,’ i bo’n yɛle mennin? Ɲanmiɛn i wunmiɛn annzɛ i wawɛ ng’ɔ fa yili ɲanmiɛn nga e ɲin tɛ i’n, i ndɛ yɛ be kan ɔn. (Bo Bolɛ 1:​1, 2) Ndɛ sɔ’n ti su, afin kɛ ndɛ’n ko fin Ɲanmiɛn i nuan ko fite’n, ɔ ti kɛ i wawɛ’n yɛ ɔ sunmɛn i kɛ ɔ ko yo ninnge wie mun sa.

35:19​—?Kɛ Davidi srɛ Ɲanmiɛn kɛ nán maan be nga be kpɔ i’n be kpɛ i kannglɛ’n, i bo’n yɛle mennin? Sɛ Davidi i kpɔfuɛ’m be sa tɛ nga be cicili be Davidi i wun’n be kpɛn su’n, ɔ́ yó be fɛ dan. Ɔ́ yó kɛ be su kpɛ i kannglɛ sa. Davidi srɛ Ɲanmiɛn kɛ nán i sɔ’n yo ye.

Afɔtuɛ ng’ɔ man e’n:

26:4. Ngwlɛlɛ atin’n yɛle kɛ nán e nin gblɛfuɛ mun e san nun. Ɔ kwla yo be nga be nin e koko yalɛ Ɛntɛnɛti nun’n, annzɛ e suklu lɔfuɛ mun nin e junman diwlɛ lɔfuɛ mun mɔ sa tɛ yolɛ ti’n, be yo be wun kɛ be ti e janvuɛ sa’n. Asa ekun’n, ɔ kwla yo be nga be saci Ɲanmiɛn wun’n mɔ be yo kɛ be di nanwlɛ sa’n, ɔ nin be nga be fia be yo sa tɛ’n.

26:​7, 12; 35:18; 40:10. Ɔ fata kɛ e manman Zoova nzra nun Klistfuɛ’m be aɲia’m be bo.

26:8; 27:4. ?Klistfuɛ’m be aɲia’m be bo kɔlɛ’n yo e fɛ?

26:11. Davidi fuali kpa kɛ ɔ́ nánti sein titi. Blɛ kunngba nun’n, ɔ srɛli Ɲanmiɛn kɛ ɔ yaci i sa tɛ mun cɛ i. I sɔ’n kle kɛ kannzɛ fɔ’n o e nun’n, sanngɛ e kwla nanti sein titi.

29:10. Kɛ be se kɛ Zoova yɛ ɔ mannin “anannganman su nzue dan’n” i atin kɛ ɔ tɔ’n, ɔ kle kɛ like kwlaa nga Zoova kunndɛ kɛ ɔ́ yó’n, ɔ kwla yo.

30:6. Ya falɛ’n timan Zoova i nzuɛn. Sanngɛ sran klolɛ’n yɛ ɔ ti i nzuɛn cinnjin kpa’n niɔn.

32:9. Zoova kunndɛman kɛ e yo kɛ nnɛn kpanngɔ annzɛ milɛ mɔ saan bé wlá be nuan nun ɲanman nin blalɛ naan like nga be se be kɛ be yo’n, b’a yo’n sa. I liɛ’n, ɔ kunndɛ kɛ i klun sa mɔ e wun be wlɛ’n ti’n, e ɲin yi i e klunklo su.

33:17-​19. Maan klɔ sran’m be kwlalɛ’n yo dan ju sɛ, sanngɛ be kwlá deman be wiengu. Ɔ fata kɛ e fa e wla’n gua Zoova nin i Sielɛ Blɛ’n su.

34:11. Ndɛ nga yo maan be nga be dun mmua yo Ɲanmiɛn i ninnge mun ka’n, be wla gua ase.

39:​2, 3. Sɛ klunwifuɛ’m bé kúnndɛ e niaan Klistfuɛ’m be wun ndɛ naan bé yó be sa tɛ’n, ngwlɛlɛ atin’n yɛle kɛ e ‘muan e nuan’n su.’

40:​2, 3. Sɛ e lafi Zoova su’n, e sa sin su bubuman e. Sɛ é kwlá sé’n, ‘é fín buman sroesroe nun fíte, é fín nnɔtiɛ m’ɔ leman bo’n i nun fíte.’

40:​6, 13. Maan ɔ tran e angunndan nun titi kɛ suyralɛ nga e ɲan be’n, be ‘sɔnnin dan, e kwlá kaman be ngba’n.’ I liɛ’n sɛ bɔbɔ sa nga be tɔ e su’n be sɔn sɛ, maan ɔ yo ɲrɛnnɛn sa mun annzɛ fɔ m’ɔ o e nun’n nin o, sanngɛ be nun wie fi su kwlá bubuman e sa sin.

‘Zoova, ɔ asenna’n ɔ su wieman min nuan’n nun’

Nanwlɛ, jue 41 nga be o jue bue klikli nga nun’n, be wla sran fanngan dan! Kannzɛ bɔbɔ afɛ’n o e su, annzɛ kusu sa tɛ wie mɔ e yoli’n ti’n, e angunndan’n bu e fɔ’n, sanngɛ Ɲanmiɛn Ndɛ’n i bue sɔ’n kwla wla e fanngan. (Ebre Mun 4:​12) Jue sɔ’m be man e ajalɛ mɔ e kwla fa be su e mɛn dilɛ’n nun ɔn. Be kan flan nun kɛ kannzɛ bɔbɔ afɛ’n o e su’n, sanngɛ Zoova su kacimɛn i sin siman e.

Jue i bue klikli’n i nun ndɛ kasiɛn mun yɛ: ‘Zoova, wɔ mɔ a ti Izraɛli Ɲanmiɛn’n, ɔ asenna’n ɔ su wieman min nuan’n nun naan kɛ ɔ́ yó ɔ w’a yo. Maan ɔ yo sɔ!’ (Jue Mun 41:14) ?Jue i bue klikli nga y’a kɛn i nun ndɛ yɛ’n, ɔ suman e bo kɛ e la Zoova i ase naan e mɛnmɛn i?

[Ja ngua lɛ ndɛ’n]

[Ndɛ kwle, bue 30]

Sɛ ninnge nga nguan nunman be nun’n be yo maan e wun Ɲanmiɛn i ɲrun m’ɔ le i’n, ɔ fata kɛ e yo i sɔ kpɛ blu.

[Foto, bue 29]

Ɔ ti cinnjin kɛ e fa e ɲin sie i Ɲanmiɛn i ninnge’m be yolɛ’n su cɛn kwlaa.

[Foto, bue 31]

Davidi klɛli jue klikli 41 be nun sunman.

[Foto, bue 32]

?Amun si jue ng’ɔ se kɛ Zoova ti Bua Sunianfuɛ Dan’n?

[Foto cifuɛ mun, bue 29]

Nzraama mun: Courtesy United States Naval Observatory

[Foto cifuɛ mun, bue 31]

Nzraama mun, bue 30, 31 ɔ nin 32: Courtesy United States Naval Observatory