?Amun kwla si Ɲanmiɛn sakpasakpa?

Sɛ sran lɔun kun se amun kɛ amun bo i dunman naan amun a kan ndɛ b’a kle i’n, i sɔ’n kle kɛ ɔ bu amun sran. Be nga be le sa su’n, blɛ sunman nun’n, kɛ sran kán ndɛ klé be’n, ɔ boman be dunman. Ɔ se kɛ “Plezidan” annzɛ “Nannan” annzɛ kusu “Min.” Ɔ maan, sɛ sran kun m’ɔ le sasu’n, ɔ se amun kɛ: “Nian, fa min dunman’n flɛ min’n,” nn amun cenjele like dan kun yɛ ɔ o lɛ ɔ.

BIBLU’N m’ɔ ti Ɲanmiɛn Kpli i Ndɛ’n i nun’n, ɔ se e kɛ: “N ti Anannganman [Zoova], min dunman’n yɛ o lɛ ɔ.” (Ezai 42:8)a Zoova i tɔnndɔnlɛ dunman’m be sɔnnin. I wie yɛle “Yifuɛ” ɔ nin “Ɲanmiɛn mɔ like fin nunmɛn i sin” ɔ nin “Ɲanmiɛn Kpli.” Kannzɛ bɔbɔ ɔ ti sɔ’n, sanngɛ Zoova mɛn i sufuɛ’m be cenjele like kun. Yɛle kɛ i waan sɛ i sufuɛ’m bé kán ndɛ bé klé i’n, maan be bo i dunman.

I wie yɛle Ɲanmiɛn nuan ijɔfuɛ Moizi liɛ’n. Cɛn kun ɔ srɛli Ɲanmiɛn kɛ: “Min Min [Zoova], ń srɛ́ wɔ kpa ti ɔ.” (Ezipt Lɔ Tulɛ 4:10) I nun mɔ Famiɛn Salomɔn yí Ɲanmiɛn i sua’n i nglo Zerizalɛmu lɔ fá mɛ́n i’n, ɔ boli i srɛlɛ’n i bo kɛ: “Anannganman [Zoova].” (1 Famiɛn Mun 8:22, 23) Kusu kɛ Ɲanmiɛn i nuan ijɔfuɛ Ezai srɛli i mannin nvlefuɛ mun’n, ɔ seli kɛ: “Wɔ Anannganman [Zoova] yɛ a ti e si nin-ɔn.” (Ezai 63:16) Nanwlɛ e Si m’ɔ ɲanmiɛn su lɔ’n klo kɛ e fɛ i dunman’n e flɛ i.

Sakpa sɛ e fa Zoova i dunman’n e flɛ i’n, ɔ ti cinnjin kpa. Sanngɛ kɛ be se kɛ be si Ɲanmiɛn sakpasakpa’n, i bo’n ti kploun. Be nga be klo Zoova mɔ be fa be wla’n be guɛ i su’n, ɔ ta be nda kɛ: “Ń fɛ́ i ń fía, ń sɛ́sɛ́ i afin ɔ si min [min dunman’n, NW].” (Jue Mun 91:14) Nanwlɛ kɛ be se kɛ be si Ɲanmiɛn i dunman’n, i bo’n ti kploun sakpa. Afin i sɔ’n ti cinnjin naan Ɲanmiɛn w’a sasa e. ?Ɔ maan, ngue yɛ ɔ fata kɛ e yo naan y’a si Zoova sakpasakpa ɔ?

[Ja ngua lɛ ndɛ’n]