?E nin Ɲanmiɛn é nánti?

‘Atin nga amun Ɲanmiɛn’n kle amun’n, amun fa su nin amun wun ase kanlɛ.’—MISE 6:8.

1, 2. ?Kɛ Zoova fɛ i wun sunnzun siɛ m’ɔ yo i wa’n i taataa’n, angunndan mennin yɛ ɔ bu i e lika ɔ?

KƐ BA kaan kun súan nantilɛ’n, i si nin i nin’n be yo i taataa. Ɔ maan, ba’n tu i ja’n kunngunkunngun. I sɔ mɔ ba’n yó i lɛ’n, sran wie’m be bumɛn i like. Sanngɛ siɛ nin niɛn’n be liɛ’n, ba’n i ja kunngunkunngun m’ɔ tu’n, ɔ ti be ɲrun like dan kpa. Afin, be lafi su kɛ be wa’n ɔ́ wá nánti. Ɔ maan be wun blibli be kɛ be wa’n nanti ndɛndɛ naan i liɛ’n, bé trɛ́ i sa’n naan be nin i bé kɔ́ lika. Sanngɛ ukalɛ mɔ be uka be wa’n naan ɔ nanti’n, be si kɛ ɔ wieman i li ngunmin su. Ɔ ti be klun su kɛ ninnge uflɛ wie mun ekun be yolɛ nun’n, bé úka be wa’n naan bé klé i ajalɛ mun. I sɔ liɛ’n, ɔ ti be klun su kɛ bé yó i tititi.

² E mɔ e ti Ɲanmiɛn Zoova i mma mun’n, Zoova bu angunndan kunngba’n e lika. Kɛ ɔ́ kán Izraɛli annzɛ Efraimu ndɛ’n, ɔ seli kɛ: ‘Min bɔ n yoli Efraimu i taataa’n, n juli i. Kɛ n ko yo’n yɛ n yoli i ɔ, n kloli i klolɛ kpa, e nin i e trannin kɛ siɛ nin ba sa.’ (Oze 11:3, 4) Ndɛ sɔ nun’n, Zoova fɛ i wun sunnzun sie kpa kun m’ɔ blɛblɛblɛ ɔ kle i wa’n i nantilɛ’n. Kpɔkun kɛ ba’n tɔ bɔbɔ’n, ɔ mɛn i su. Nanwlɛ, Zoova ti siɛ’m be nun kpafuɛ’n. I wun blibli i kɛ ɔ́ klé e nantilɛ. Kpɔkun, kɛ é nánti mɔ é yó kpa kɔ́ i ɲrun’n, ɔ yo i fɛ kɛ ɔ nin e nánti tititi. Ɔ maan, kɛ nga fluwa’n i flɛlɛ’n fa kan’n sa’n, e nin Ɲanmiɛn e kwla nanti! (Mise 6:8) ?Sanngɛ kɛ be se kɛ be nin Ɲanmiɛn be nanti’n, i bo’n yɛle mennin? ?Yɛ ngue ti yɛ ɔ ti cinnjin kɛ e nin Ɲanmiɛn e nanti ɔ? ?I kpa bɔbɔ’n, e nin Ɲanmiɛn e kwla nanti sakpa? ?Yɛ sɛ sakpa naan e nin Ɲanmiɛn e kwla nanti’n niɔn, mmlusuɛ mennin yɛ é ɲɛ́n i ɔ? Amun e fa e ɲin sie kosan nnan sɔ’m be su kunngunngun e nian.

?Kɛ be se kɛ be nin Ɲanmiɛn be nanti’n, i bo’n yɛle mennin?

3, 4. (a) ?Kɛ be se kɛ be nin Ɲanmiɛn be nanti’n, ɲanndra ndɛ sɔ’n i klanman lika’n yɛle mennin? (b) ?Kɛ be se kɛ be nin Ɲanmiɛn be nanti’n, i bo’n yɛle mennin?

³ Nanwlɛ, klɔ sran’n ɔ nin Zoova be kwlá nantiman kɛ nga sran nin i wiengu be nanti be kɔ lika’n sa. Afin, Zoova ti aolia nun sran. (Ezipt Lɔ Tulɛ 33:20; Zan 4:24) Ɔ maan, kɛ Biblu’n se kɛ be nin Ɲanmiɛn be nanti’n, i sɔ kanlɛ’n ti ɲanndra. Yɛ kusu’n, i sɔ kanlɛ’n ɔ nin i fata kpa. Afin sran kwlaa nga be o asiɛ’n su’n, blɛ kwlaa nun be nin Ɲanmiɛn be kwla nanti. ?Yɛ i kwlaa yoli o, kɛ be se kɛ be nin sran kun be nanti’n, wan yɛ ɔ wunmɛn i sɔ ndɛ liɛ’n i wlɛ ɔ? Ndɛ sɔ’n kle kɛ sran nɲɔn mɔ be nanti likawlɛ’n, be klo be wiengu naan be afiɛn’n mantan kpa. ?Nɛ́n i ɔ? Sɛ e jran ndɛ’n i bo tulɛ kɛ ngalɛ sa’n su’n, ɔ́ úka e maan kɛ be se kɛ be nin Ɲanmiɛn be nanti’n, é wún i wlɛ. Ɔ maan, amun e fa sa wie mun naan e fa yiyi ndɛ sɔ’n nun kpa e nian.

⁴ Enɔki nin Nowe mɔ be suli Ɲanmiɛn kpa’n, maan e wla kpɛn be su. ?Ngue ti yɛ Biblu’n se kɛ be nin Ɲanmiɛn be nantili klanman ɔn? (Bo Bolɛ 5:24; 6:9-10) Kɛ Biblu’n kan “nantilɛ’n” i ndɛ’n, i bo’n i wie yɛle kɛ sran’n, ɔ fa atin kun su. Ɔ maan kɛ Biblu’n se kɛ Enɔki nin Nowe be nin Ɲanmiɛn Zoova be nantili klanman’n, i bo’n yɛle kɛ be sran nɲɔn’n be fali Zoova i atin liɛ’n su. B’a yoman kɛ be wiengu mun sa. Be lafili Zoova su. ?I sɔ’n kle kɛ sa’n kwlaa nun’n, saan Zoova kánngan be naan be bɔbɔ be kwlá faman ajalɛ wie fi? Cɛcɛ, e kwlá seman sɔ. Afin, Zoova mianmianman sran. Ɔ mannin e atin kɛ e kwla fa ajalɛ wie mun. Kpɔkun ajalɛ sɔ’m be falɛ nun’n, Zoova kunndɛ kɛ e fa “ngwlɛlɛ” e yiɛ i nuan. (2 Timote 1:7) Sanngɛ kusu’n, kɛ é fá ajalɛ mun’n, maan e kan e wun ase Zoova bo naan ɔ kle e atin kpafuɛ’n. Afin, Zoova i ngwlɛlɛ’n tra e liɛ’n lele fatifati. (Nyanndra Mun 3:5, 6; Ezai 55:8, 9) Sɛ e yo sɔ’n, é klé kɛ ajalɛ kwlaa nga e tu be’n, e nin Zoova yɛ e tu ɔ.

 5. ?Ngue ti yɛ Zezi fa be “sa kpɔlɛ kun” m’ɔ ti sunnzunliɛ’n, ɔ fa kan sran’n i “afuɛ” m’ɔ di’n i ndɛ ɔ?

⁵ Wie liɛ’n, Biblu’n fa ajalɛ tulɛ’n, annzɛ nantilɛ’n fa kan sran’m be nguan ɲanman’n i ndɛ. Kɛ ɔ kan sɔ’n, wie liɛ be wun ndɛ’n i wlɛ trele. Wie liɛ kusu’n, ɔ ti ɲanndra. I wie yɛle kɛ Biblu’n nun’n, Zezi seli kɛ: ‘?Amun nun onin yɛ i kokolɛ nun ɔ kwla guɛ i afuɛ’n su bɔ kan ɔn [annzɛ i sa kpɔlɛ kun ɔn]?’ (Matie 6:27) ?Ngue ti yɛ Zezi fa be “sa kpɔlɛ kun” m’ɔ ti sunnzunliɛ’n, ɔ fa kan sran’n i “afuɛ” m’ɔ di’n i ndɛ ɔ?a Nanwlɛ, i sɔ mɔ Zezi kannin’n ɔ ti ɲanndra. Ɔ fa nguan e ɲanman’n sunnzun ajalɛ tulɛ. Ɔ maan Zezi su se kɛ kannzɛ e koko sɛ’n, i sɔ’n su ukaman e nguan ɲanman’n su bɔbɔ kpe kan. ?Kɛ mɔ Zezi kannin sɔ’n ti’n, ɔ fata kɛ e se kɛ e nin Ɲanmiɛn e nantilɛ sɔ nun’n, e kwlá yoman like fi? Cɛcɛ, nɛ́n i sɔ yɛ Zezi kunndɛ kɛ e bu i ndɛ’n niɔn! Wafa ng’ɔ kunndɛ kɛ e bu i ndɛ’n, ɔ man kosan kun su. Kosan sɔ’n yɛle kɛ: ?Ngue ti yɛ ɔ fata kɛ e nin Ɲanmiɛn e nanti ɔ?

?Ngue ti yɛ ɔ fata kɛ e nin Ɲanmiɛn e nanti ɔ?

6, 7. ?Ngue yɛ sran’m be kwlaa be sa miɛn i wun ɔn? ?Yɛ ngue ti yɛ Zoova wun lɔ yɛ ɔ fata kɛ e kpɛ e ɲin naan y’a ɲɛn i sɔ like’n niɔn?

⁶ Sa kun nga ti yɛ ɔ ti cinnjin kɛ e nin Ɲanmiɛn Zoova e nanti’n, Zeremi 10:23 yiyi nun. I waan: ‘Anannganman, n si kɛ sran’n i nguan’n nunmɛn i sa nun. Ajalɛ ng’ɔ tu’n, ɔ finmɛn i.’ Nanwlɛ, klɔ sran mɔ e ti’n, e kwlá tuman e bɔbɔ e tiaun ajalɛ kpa kun sa. Ɔ fata kɛ be uka e tititi. Yɛ sran ng’ɔ kwla uka e kpa’n, yɛle Ɲanmiɛn. I lɛ nun’n, be nga be buman Ɲanmiɛn i ndɛ mɔ be tu be bɔbɔ be ajalɛ’n, be tɔ sa tɛ’n nun kɛ nga Adam nin Ɛvu be tɔli nun’n sa. Be sran nɲɔn sɔ’n, be sili be wue kɛ be le atin be sie be bɔbɔ be wun naan sa ng’ɔ ti kpa’n, ɔ nin ng’ɔ ti tɛ’n, be si i. (Bo Bolɛ 3:1-6) Sanngɛ nn nanwlɛ, i sɔ ajalɛ liɛ’n i falɛ’n ɔ ‘nunman e sa nun’ mlɔnmlɔn.

⁷ ?Wan yɛ ajalɛ’m be falɛ nun’n, ɔ nin a kunndɛman ukalɛ le ɔ? Cɛn kwlaa e fa ajalɛ kanngan nin ajalɛ dandan mun. Ajalɛ sɔ mɔ e fa be’n, e kwla ɲan wie’m be su mmlusuɛ annzɛ afɛ, e ɲrun lɔ. Yɛ wie liɛ bɔbɔ’n, be kan e awlɛn su sran mun. Ɔ maan kɛ ɔ ko yo naan y’a fa ajalɛ kpa’n ti’n, sran kpɛnngbɛn kun m’ɔ si ngwlɛlɛ kpa tra e’n, ɔ yo i fɛ kɛ ɔ́ úka e klolɛ su! ?Nán e cenjele nun ɔn? Sanngɛ sa ng’ɔ ti tɛ’n yɛle kɛ andɛ’n, sran sunman be usaman ngwlɛlɛ afɛ naan b’a fa ajalɛ mun. Be lafi be bɔbɔ be wun su. Ndɛ nanwlɛ ng’ɔ o Nyanndra Mun 28:26 nun’n, be bumɛn i ndɛ. I waan: ‘Sran nga mɔ i bɔbɔ klun like liɛ nga i waan ɔ́ yó’n, i kunngba yɛ ɔ si i’n, i sɔ sran liɛ’n, ɔ ti sinnglinfuɛ. Sran nga kusu m’ɔ nanti angunndan su’n, i sɔ sran liɛ’n, i ɲrun atin’n ti weiin.’ Nanwlɛ, Zoova kunndɛman kɛ e klun angunndan m’ɔ ti tɛ tra like kwla’n, e lafi su naan e tɔ sa tɛ nun. (Zeremi 17:9) Sanngɛ, ɔ kunndɛ kɛ e fa ngwlɛlɛ e nanti naan i m’ɔ ti e like Klefuɛ’n nin e ɲrun atin Bofuɛ’n, e lafi i su. Sɛ e yo sɔ’n, e wun jɔ e fɔun, srɛ su kunman e. Kpɔkun e agualiɛ’n gúa e kpa.

 8. ?Sa tɛ’n nin fɔ’n m’ɔ o sran’m be nun’n ti’n, be agualiɛ’n yɛle mennin? ?Sanngɛ ngue yɛ Zoova kunndɛ kɛ e ɲɛn i ɔ?

⁸ Sa kun ekun nga ti yɛ ɔ ti cinnjin kɛ e nin Ɲanmiɛn e nanti’n, ɔ kan wafa nga e kunndɛ kɛ e nguan ɲanman’n yo tɛnndɛn ju’n. I lɛ nun’n, Biblu’n kan ndɛ nanwlɛ kun. Ndɛ sɔ’n yɛle kɛ sran mɔ fɔ’n o be nun’n, be kwlaa be kɔ lika kunngba’n nun. Kɛ Akunndanfuɛ’n 12:5 kán ɲrɛnnɛn nga oke’m be wun i’n i ndɛ’n, ɔ boli lika sɔ’n su. I waan: ‘Sran kwlaa su kɔ i tranwlɛ m’ɔ ti anannganman’n i nun lɔ. Yɛ ngwlɛ yifuɛ’m be wlanwlan atin’n nun be sin.’ ?Sran’n ‘i tranwlɛ m’ɔ ti anannganman’n’ yɛle mennin? Yɛle wie’n m’ɔ fa sran kwlaa m’ɔ fɔ’n o be nun’n. (Rɔmfuɛ Mun 6:23) Sanngɛ nɛ́n i sɔ agualiɛ’n yɛ Zoova kunndɛ kɛ ɔ gua man e ɔ. Nanwlɛ, Zoova kunndɛman kɛ be wu e naan e wun afɛ nin ɲrɛnnɛn lele naan e wu. (Zɔb 14:1) Like ng’ɔ kunndɛ’n yɛle kɛ e nin i e nanti naan i liɛ’n, y’a kwla ɲan anannganman nguan’n. ?Nán nguan sɔ’n yɛ e kwlaa e kunndɛ kɛ é ɲɛ́n i ɔ? I sɔ’n ti’n, ɔ ti cinnjin kpa kɛ e nin e Si Ɲanmiɛn e nanti.

?Wafa sɛ yɛ e nin Ɲanmiɛn e kwla nanti ɔ?

 9. ?Ngue ti yɛ blɛ wie nun’n, Zoova fiali i nvle nunfuɛ’m be ɲrun ɔn? ?Sanngɛ Ezai 30:20 nun’n, fɔnvɔlɛ ndɛ mennin yɛ Zoova kannin ɔn?

⁹ Kosan cinnjin kpa kun ekun o lɛ’n, ɔ fata kɛ e fa e ɲin sie su. Kosan sɔ’n yɛle kɛ: ?Wafa sɛ yɛ e nin Ɲanmiɛn e kwla nanti ɔ? I lifuɛ’n, Ezai 30:20, 21 tɛ su man e. I waan: ‘Sran ng’ɔ kle amun like’n su fiaman kun, sanngɛ sran sɔ’n m’ɔ kle amun like’n, amun ɲinma tɛ́ i. Sɛ fama su annzɛ bɛ su yɛ ɔ fata kɛ amun wɔ’n, amún wá tí aniɛn kun m’ɔ́ kpán sú amun su’n. Ɔ́ sé kɛ: “Atin’n yɛ ɔ o yɛ, amun fa su.”’ Nanwlɛ, fɔnvɔlɛ ndɛ kpa yɛle ndɛ sɔ’n. Ndɛ mma 20 nun’n, Zoova kpɛn i nvle nunfuɛ’m be wla kɛ blɛ mɔ be yoli ɲin kekle mɔ b’a kaciman’n, ɔ fiali be ɲrun. (Ezai 1:15; 59:2) Sanngɛ siɛn’n, be nga b’a yacimɛn i sulɛ kpa’n, ɔ su fiaman be ɲrun kun. Be ɲinma wá tɛ́ i. Nanwlɛ, suklu klefuɛ m’ɔ jin i suklu ba’m be ɲrun kpɔkun ɔ yiyi like nun kle be’n, i sɔ yɛ Zoova wá yó ɔ.

10. ?Wafa sɛ yɛ sɛ é kwlá sé’n, e ‘ti e like klefuɛ Dan’n, i aniɛn m’ɔ kpan su e su’n’ niɔn?

¹⁰ Ndɛ mma 21 nun’n, sunnzun ase klanman kpa kun o nun. Sunnzun ase sɔ’n yɛle kɛ, Zoova kɛn i bɔbɔ i ndɛ kɛ ɔ nanti ɔ su i nvle’n su. Kpɔkun atin ng’ɔ ti kpa’n, ɔ kle be naan be fa su. Biblu’n nun sa sifuɛ wie’m be waan sunnzun ase sɔ’n, ɔ kle wafa nga wie liɛ’n, bua sunianfuɛ’n nanti su i bua’m be su’n. Kpɔkun kɛ ɔ́ sú be su sɔ’n, ɔ kankan be sie i atin kpa’n su. ?Wafa sɛ yɛ ndɛ sɔ’n kan e ɔ? Nanwlɛ, be klɛli Ɲanmiɛn Ndɛ’n w’a cɛ kpa. Sanngɛ, ɔ sinman. Ɔ ti e liɛ wie. Ɔ maan kɛ e kanngan nun e kunndɛ atin kpa’n, ɔ ti kɛ sran kun jin e sin sa. Yɛ atin ng’ɔ ti kpa’n, ɔ kle e naan e fa su. Nanwlɛ, ajalɛ nga cɛn kwlaa e fa be’n, Biblu’n nun afɔtuɛ’m be kwla uka e. Asa ekun’n, be kwla uka e maan e jaja ninnge nga e fa be sie e ɲrun kɛ é yó be mun. (Jue Mun 119:105) Kɛ e mian e ɲin e kunndɛ afɔtuɛ sɔ mun mɔ e fa be su’n, Zoova kle e atin’n. Afin e nin i yɛ e nanti ɔ.

11. ?Kɛ nga Zeremi 6:16 fa kan’n sa’n, ngue yɛ Zoova seli i nvle’n kɛ ɔ yo ɔ? ?Yɛ be tɛli su sɛ?

¹¹ ?E lo e wun, ɔ maan Ɲanmiɛn Ndɛ’n kle e atin sakpa? Ɔ ti kpa kɛ cɛn kunngun’n, e fa kosan sɔ’n e usa e wun. Kpɔkun, sɛ e waan é wún i wlɛ kɛ e yo sɔ sakpa’n, Biblu’n nun ndɛ mma kun nga kwla uka e kpa. I waan: ‘Anannganman’n wan yoo: “An jran atin’m be su nian. Ajalɛ nga amun a fɛ i lɛ’n, an jran kan naan amun nian. An usa be mɔ be fali laa atin mun’n. An kunndɛ atin kpa’n an fa su naan amun a di alaje.”’ (Zeremi 6:16) Ndɛ mma sɔ’n fa e ɲin kpɛn sran kun mɔ su kɔ lika’n, i su. Kɛ ɔ ju anngɔnda kun su’n, ɔ jran kan, ɔ usa sran kɛ be kle i atin kpafuɛ’n. Zoova i sulɛ nun’n, i sɔ kunngba’n yɛ ɔ fata kɛ Izraɛlifuɛ ɲin keklefuɛ’m be yo ɔ. Ɔ fata kɛ be jran kan naan be usa be mɔ be “fali laa atin mun’n.” Atin m’ɔ ti “atin kpa’n,” yɛle nga be nannan mɔ be su Zoova kpa’n be nantili nun’n. Sanngɛ nvle wunmuan’n, ɔ fali atin uflɛ su. Sa ng’ɔ ti tɛ kpa ekun’n yɛle kɛ, like mɔ klolɛ su Zoova seli kɛ be yo’n, Izraɛli w’a kplinman su. Zeremi 6:16 kunngba’n i atabo’n waan: ‘Sanngɛ be waan: “Cɛcɛ, e kplinman su.”’ E blɛ liɛ nun’n, Ɲanmiɛn i sufuɛ’m be fali Ɲanmiɛn i afɔtuɛ’n su. B’a yoman kɛ laa Izraɛlifuɛ mun sa.

12, 13. (a) ?Wafa sɛ yɛ Klist i sɔnnzɔnfuɛ m’ɔ kpali be sieli be ngunmin’n be fali Zeremi 6:16 i nun afɔtuɛ’n su ɔ? (b) ?Sɛ e waan é nían naan atin nga andɛ e fa’n ɔ ti kpa’n, ngue yɛ ɔ fata kɛ e yo ɔ?

¹² Kɛ afuɛ ya kpɔlɛ 19 ɔ́ kɔ́ i bue nuan’n, Klist i sɔnnzɔnfuɛ ng’ɔ kpali be sieli be ngunmin’n, be fali Zeremi 6:16 yoli be liɛ. Klolɛ su ndɛ nga Zoova se kɛ be usa be mɔ be fali “laa atin mun’n,” be fali i sɔ afɔtuɛ’n su. Asa ekun’n, “ndɛ nanwlɛ” nga Zezi Klist kannin’n mɔ i sɔnnzɔnfuɛ klikli’m be jrannin su fa kannin ndɛ’n, be fali su wie. B’a yoman kɛ be nga be tɔn be wun suɛn kɛ be ti Klistfuɛ mɔ be jaso Ɲanmiɛn wun’n, be sa. (2 Timote 1:13) Andɛ’n, Zezi i sɔnnzɔnfuɛ sɔ m’ɔ kpali be sieli be ngunmin’n, be uka be wun. Kpɔkun, be uka be janvuɛ mɔ be ti ‘bua’m be wie mun’n,’ naan be kwlaa be fa nguan atin’n m’ɔ man aklunjuɛ’n i su titi. Atin sɔ’n, be mɔ be tɔn be wun suɛn kɛ be ti Klistfuɛ’n, b’a faman su.—Zan 10:16.

¹³ Ɲanmiɛn ninnge’m be nun’n, kɛ mɔ sran kpa nanwlɛfuɛ m’ɔ si ngwlɛlɛ’n, ɔ man aliɛ blɛ ng’ɔ ti i nuan su’n i su’n ti’n, sran akpinngbin be wun ‘laa atin mun.’ Ɔ maan, be nin Ɲanmiɛn be nanti. (Matie 24:45-47) ?Sran akpinngbin sɔ’n, e o be nun wie? ?Sɛ e o be nun wie’n, ngue yɛ e kwla yo naan y’a to y’a fuanman atin’n niɔn? Like nga e kwla yo’n yɛle kɛ cɛn kunngun’n, maan e tran e bu atin nga e mɛn dilɛ’n nun e fa’n, i su angunndan e nian. Sanngɛ, sɛ nanwlɛ’n nun e kanngan Biblu’n ɔ nin i akua’m be nun’n, naan e kɔ asɔnun aɲia’m be bo’n, yɛ e nin Ɲanmiɛn é nánti kpa ɔ. Asa ekun’n, kɛ be man e afɔtuɛ mɔ e fa su’n, e kle kɛ e nin Ɲanmiɛn e nanti naan e fa ‘laa atin mun.’

Maan e nanti kɛ e ‘wun Ɲanmiɛn mɔ be wunmɛn i’n sa’

14. ?Sɛ Zoova ti e ɲrun sran jrɛiin’n, wafa sɛ yɛ be wun i sɔ liɛ’n ajalɛ nga e fa be’n nun ɔn?

¹⁴ Sɛ e waan e nin Zoova é nánti’n, ɔ fata kɛ e wun i kɛ sran jrɛiin sa. Ndɛ nga Zoova kan kleli laa Izraɛli’n, maan e wla kpɛn su. Izraɛlifuɛ’m be nun sran nga be suli Zoova tititi mɔ b’a kaciman’n, Zoova guali be awlɛn su nzue kɛ ɔ su fiaman be ɲrun. I sɔ kunngba’n, andɛ Zoova yi i wun kle i sufuɛ mun kɛ i yɛ ɔ ti be like klefuɛ Dan’n niɔn. ?I lɛ nun’n, e wun Zoova kɛ sran jrɛiin sa naan ɔ jin e ɲrun ɔ su kle e like? Sɛ e waan e nin Ɲanmiɛn é nánti’n, i sɔ yɛ ɔ fata kɛ e wun i ɔ. I sɔ mɔ e fa wun i’n, yɛ be flɛ i Ɲanmiɛn sulafilɛ’n niɔn. Moizi lafili Ɲanmiɛn su sɔ. Ɔ maan, ɔ ‘trɛli i awlɛn, ɔ ti kɛ w’a wun Ɲanmiɛn mɔ be wunmɛn i’n sa.’ (Ebre Mun 11:27) Nanwlɛ, sɛ Zoova ti e ɲrun sran jrɛiin’n, kɛ é yó sa mun’n, é bú i angunndan. Sɛ e yo sa tɛ’n, e su fiaman su. É sé kɛ, kɛ mɔ e nin Ɲanmiɛn yɛ e nanti’n ti’n, ɔ wun e. Ɔ maan sa mɔ e yoli’n, é bó su klé asɔnun kpɛnngbɛn mun, annzɛ e awlofuɛ mun. Afin, nda nga Famiɛn Davidi tali’n, e tali wie. Ɔ seli kɛ: ‘Ń nánti sein nin awlɛn kpa min awlofuɛ’m be ɲrun.’—Jue Mun 101:2.

15. ?Wafa sɛ yɛ e aɲia’m be uka e maan Zoova yo e ɲrun sran jrɛiin ɔn?

¹⁵ Zoova si kɛ e ti klɔ sran naan fɔ’n wo e nun. I sɔ’n ti blɛ wie nun’n, like nga e wunmɛn i’n, ɔ kwla yo kekle man e kɛ e lafi su. (Jue Mun 103:14) Sanngɛ, ɔ uka e kpa naan e yaci i sɔ angunndan’n i bulɛ. Wafa nga Zoova uka e’n i kun yɛle kɛ, ɔ fali asiɛ’n su nvlenvle’m be nunfuɛ’m be nun wie mun yoli “nvle kun naan i dunman tran be su.” (Sa Nga Be Yoli’n 15:14) Ɔ maan kɛ e yia e su i’n, e wla e wun fanngan. Kpɔkun, kɛ sa wie tɔli e nian kun su’n, wafa nga Zoova ukali i mɔ maan ɔ wunnin sa sɔ’n i trawlɛ’n, kɛ e ti’n, ɔ yo maan e Ɲanmiɛn’n yo e ɲrun sran jrɛiin kpa ekun.—1 Piɛr 5:9.

16. ?Ngue ti yɛ sɛ e suan Zezi i su ndɛ’n, i sɔ’n úka e maan e nin Ɲanmiɛn e nanti ɔ?

¹⁶ Sanngɛ wafa nga Zoova uka e’n i klikli kpafuɛ’n yɛle kɛ, ɔ fɛ i Wa Zezi kle e atin kpafuɛ’n. Zezi bɔbɔ seli kɛ: ‘Min yɛ n ti atin nin nanwlɛ nin nguan’n niɔn. Sran nga w’a sinman min nun’n, ɔ junman e Si wun lɔ.’ (Zan 14:6) Ɔ maan, sɛ e waan Zoova yo e ɲrun sran jrɛiin kpa sakpa’n, like kpafuɛ’n ng’ɔ fata kɛ e yo’n yɛle kɛ, maan e suan mɛn’n nga Zezi dili i asiɛ’n su wa’n i su like. Afin, ndɛ nga Zezi kannin be’n, ɔ nin sa ng’ɔ yoli be’n, be yi i Si’n m’ɔ o nglo lɔ’n i wafa’n ɔ nin i atin’m be nglo weiin. (Zan 14:9) Kpɔkun ka naan y’a fa ajalɛ kun’n, ɔ fata kɛ e tran e bu sa nga i angunndan. Sa sɔ’n yɛle kɛ: ?Ajalɛ mɔ e su fa’n, sɛ Zezi yɛ ɔ su fa’n, ɔ́ fɛ́ i sɛ? Sɛ e yo sɔ naan e fa wla srɛlɛ nun’n, é sé kɛ e nanti Zezi i ajalɛ liɛ’n su. (1 Piɛr 2:21) Asa ekun’n, é sé kɛ e nin Ɲanmiɛn e nanti.

?Mmlusuɛ mennin yɛ é ɲɛ́n i ɔ?

17. ?Sɛ e nanti Zoova i atin’n su’n, “alaje” mennin yɛ é dí ɔ?

¹⁷ Kɛ be nin Ɲanmiɛn be nanti’n, be ɲan mmlusuɛ dan. Kɛ Zoova seli laa Izraɛlifuɛ’m be kɛ be kunndɛ “atin kpa’n,” maan e wla kpɛn like ng’ɔ seli kɛ bé ɲɛ́n i’n i su. Zoova seli kɛ: ‘An fa su naan amun a di alaje.’ (Zeremi 6:16) ?Kɛ Zoova se kɛ é ‘dí alaje’n,’ i bo’n yɛle mennin? ?I sɔ’n kle kɛ aɲanbeun ninnge kwlaa i ti yía e naan é trán pɔɔ nun? Cɛcɛ, nɛ́n i sɔ. Afin like kun mɔ Zoova man’n, i kpa liɛ’n tra ninnge sɔ mun lele. Kpɔkun, mɛn’n nun sran dandan mun bɔbɔ be taman like sɔ’n i ɲan. Like sɔ mɔ be flɛ i alaje dilɛ mɔ Zoova man’n, yɛle kɛ sran’n i wun jɔ i fɔun, ɔ di aklunjuɛ, kpɔkun ɔ yo kpa Ɲanmiɛn ninnge’m be nun. I sɔ alaje mɔ e di’n, ɔ kle kɛ e fali atin kpafuɛ’n su. Sanngɛ mɛn tɛ nga nun’n, alaje sɔ’n i ɲanlɛ’n ti kekle!

18. ?Mmlusuɛ dan kpa mennin yɛ Zoova kunndɛ kɛ e ɲɛn i ɔ? ?Yɛ nda mennin yɛ ɔ fata kɛ e ta ɔ?

¹⁸ Nanwlɛ, nguan bɔbɔ ba’n mɔ e le i’n, ɔ ti suyralɛ dan kpa. Ɔ maan sɛ e ɲɛn i kaan sa’n, ɔ flunman tra kɛ y’a ɲanman wie fi mlɔnmlɔn’n. Sanngɛ, Zoova w’a kunndɛman kɛ e nguan’n, ɔ yo kpe kan. Nanwlɛ, gbaflɛn nin talua nzue m’ɔ sonji e nun kpɔkun i sin’n e yo oke e wun ɲrɛnnɛn’n, Zoova w’a kunndɛman kɛ e mɛn dilɛ’n yo kɛ ngalɛ’n sa. Like ng’ɔ kunndɛ kɛ e ɲɛn i’n, ɔ ti suyralɛ’n be nun dan kpafuɛ’n. Yɛle kɛ, i waan e nin i e nanti titi lele anannganman! I sɔ liɛ’n, Mise 4:5 kɛn i ndɛ weiin. I waan: ‘Like nga nvle kun nga’m be ko yo naan w’a jɔ be amuɛn’m be klun’n, yɛ be yo ɔ. E kusu e liɛ nga e ko yo naan ɔ ko jɔ Anannganman e Ɲanmiɛn’n i klun titi’n yɛ e yo ɔ.’ ?Nantilɛ sɔ mɔ e nin Ɲanmiɛn e nanti’n, e kunndɛ kɛ é fá yó e awlɛn su like? ?Nguan nga Zoova flɛ i ‘nguan sakpa’n,’ e kunndɛ kɛ é ɲɛ́n i sɔ nguan liɛ’n? (1 Timote 6:19) Nanwlɛ, sɛ e waan é ɲɛ́n i sɔ nguan liɛ’n sakpa’n, maan e ta nda kɛ andɛ nin ainman’n, e nin Zoova é nánti lele anannganman!

[Ja ngua lɛ ndɛ’n]

?Wafa sɛ yɛ amún tɛ́ kosan’m be su ɔ?

• ?Kɛ be se kɛ be nin Ɲanmiɛn be nanti’n, i bo’n yɛle mennin?

• ?Ngue ti yɛ ɔ fata kɛ e nin Ɲanmiɛn e nanti ɔ?

• ?Ngue yɛ ɔ́ úka e naan e nin Ɲanmiɛn y’a nanti ɔ?

• ?Mmlusuɛ mennin yɛ be nga be nin Ɲanmiɛn be nanti’n, be ɲɛn i ɔ?