Ngwlɛlɛ ndɛ mɔ be kwla uka awlobofuɛ mun naan b’a tran fɛfɛ’n
E Yifuɛ’n yɛ ɔ kpɛli aja’n i ba-ɔ. Yɛ ba’m be ti aja like kun m’ɔ fa mannin yasua kun i nin i yi-ɔ. Ɔ kunndɛ kɛ be nga be o awlobo nun’n be di aklunjɔɛ. I sɔ’n ti’n ɔ man be afɔtuɛ wie mun. Afɔtuɛ sɔ’m be o lalafuɛ fluwa kun nun. Maan e fa e ɲin e sie i afɔtuɛ sɔ’m be nun wie’m be su.
Yasua mun, amun klo amun yi mun
“Ɔ fata kɛ yasua’m be klo be yi mun kɛ be fa klo be bɔbɔ be wun’n sa. Yasua ng’ɔ klo i yi’n, ɔ klo i bɔbɔ i wun. Afin sran fi kpɔmɛn i bɔbɔ i wun. Sanngɛ ɔ tɛ i wun, kpɛkun ɔ niɛn i wunnɛn’n i lika kpa.”—EFƐZIFUƐ MUN 5:28, 29.
Yasua’n yɛ ɔ ti awlobo kpɛn’n niɔn. (Efɛzifuɛ Mun 5:23) Sanngɛ ɔ fataman kɛ ɔ sie i awlobofuɛ mun wunmiɛn su yɛ nán maan ɔ mianmian be. Ɔ fata kɛ ɔ bu i yi’n i sran yɛ ɔ niɛn i lika kpa. I wie yɛle kɛ ɔ fata kɛ ɔ miɛn i ɲin yo ninnge nga be jɔ i yi’n i klun’n. Yɛ nán maan ɔ se kɛ saan fii i ndɛ liɛ ng’ɔ kan’n i su yɛ ɔ ka-ɔ. (Filipufuɛ Mun 2:4) Asa ekun’n, maan ɔ kɛn i klun ndɛ kle i yi’n yɛ kɛ i yi’n kan ndɛ’n maan ɔ sie i su kpa i nuan bo. Kpɛkun nán ɔ fɛ i yi’n ‘i wun ya’ ble yɛ nán ɔ bo i. Kusu nán ɔ kpɛ i nzowa annzɛ ɔ yo i finfin.—Kolɔsufuɛ Mun 3:19.
Bla mun, amun ɲin yi amun wun mun
“Maan bla’m be ɲin yi be wun’m be kpa.”—EFƐZIFUƐ MUN 5:33.
Kɛ bla kun i ɲin yi i wun m’ɔ suɛn i bo’n, awlo’n nun jɔ fɔun. Sɛ yasua’n fɔn’n, ɔ fataman kɛ ɔ guɛ i ɲin ase. Sanngɛ maan ɔ bu i sran yɛ ɔ suɛn i bo titi. (1 Piɛli 3:4) Sɛ i waan ɔ́ bó sa wie su klé i’n, maan ɔ minndɛ blɛ nga i wun’n ɲɛn i ti’n naan w’a kan. Yɛ maan ɔ kan ndɛ’n aɲinyiɛ su.—Akunndanfuɛ’n 3:7.
Ɔ fataman kɛ yasua’n kunndɛ bla i yi bo annzɛ bla’n kunndɛ bian i wun bo
“Ɔ fata kɛ yasua’n [...] fɛ i wun mɛntɛn i yi naan be nnyɔn’n be kaci sran wunmuan.”—BO BOLƐ 2:24.
Kɛ yasua kun nin bla kun be ja’n, be kaci sran wunmuan. Ɔ maan ɔ fata kɛ be sran nɲɔn’n be mian be ɲin kpa naan be afiɛn mantan titi. I lɛ nun’n, maan be koko yalɛ yɛ be yo ninnge wie mun man be wiengu naan be klo be wun tankaan kpa. Asa ekun’n, nán be kunndɛ bla annzɛ bian be wiengu bo. Afin i sɔ’n ti klunwi ayeliɛ. I sɔ’n saci awlo yɛ ɔ yo maan be lafiman be wiengu su kun.—Ebre Mun 13:4.
Siɛ nin niɛn mun, amun kle amun mma’m be like
“Atin b’ɔ ti klanman bɔ bakan’n ko fa su’n, kle i i bakan nun. I liɛ’n, kɛ ɔ́ fá yó kpɛnngbɛn’n, ɔ su yaci ko faman uflɛ.”—NYANNDRA MUN 22:6.
Ɲanmiɛn kunndɛ kɛ siɛ nin niɛn’m be kle be mma’m be like. I sɔ yolɛ nun’n, ɔ fata kɛ be bɔbɔ be kle ba’m be ajalɛ kpa yɛ be kle be ngwlɛlɛ. (Mmla’n 6:6, 7) Sɛ ba’m be yo sa wie’n, ɔ fataman kɛ be tu be fɔ tratra su. Kɛ ba’m bé kán ndɛ klé be’n, ‘maan be ti i kpa. Nán maan be kpli be kan ndɛ yɛ nán be fa ya ndɛndɛ.’ (Zaki 1:19) Kɛ bé tú ba’m be fɔ’n, maan be yo i klolɛ su. Nán maan be yo i ya su.
Ba mun, amun ɲin yi amun si nin amun nin mun
“Ba mun, maan amun ɲin yi amun si mun nin amun nin mun. [...] ‘Bu ɔ si nin ɔ nin be sran.’”—EFƐZIFUƐ MUN 6:1, 2.
Ɔ fata kɛ ba’m be ɲin yi be si nin be nin mun. Kɛ ba’m be ɲin yi be si nin be nin mun’n, awlo’n nun tranlɛ yo fɛ yɛ be bo yo kun. Ba nga b’a yo kaklaka kusu’n, ɔ fata kɛ be nian be si nin be nin’m be lika. I wie yɛle kɛ be uka be naan be di awlo’n nun junman mun yɛ be man be sika be fa suan be bo.—1 Timote 5:3, 4.