?Suklu dan dilɛ’n annzɛ sika kaka ɲanlɛ’n kwla yo maan e liɛ yo ye?

Sran sunman be bu i kɛ be nga be di suklu dan’n nin be nga be le sika’n be liɛ yo ye. Be waan sɛ sran kun di suklu lele ju inivɛsite’n, ɔ́ sí junman kaka dí, ɔ nin i awlobofuɛ’m bé dí aklunjɔɛ, yɛ ɔ nin sran kwlaa trán fɛfɛ. Asa ekun’n, ɔ́ ɲán junman kun mɔ be ɲan nun sika kpa-ɔ. Wie mun ekun be waan sɛ sran kun ɲan sika kaka’n, ɔ́ dí aklunjɔɛ.

Maan e fa e ɲin e sie i ndɛ kun mɔ Sinua bian kun kannin’n su. Be flɛ i kɛ Zangu Cɛnin. Ɔ seli kɛ: “N buli i kɛ sɛ n di suklu lele n ju inivɛsite naan n ɲan diplɔmun dan kun’n, ń ɲán junman kun mɔ ń ɲán nun sika kaka’n. I liɛ’n, n su diman yalɛ kun yɛ ń dí aklunjɔɛ.”

Suklu ba kaka be bu i kɛ sɛ be di suklu inivɛsite dandan’m be nun’n yɛ be liɛ yó ye-ɔ. I sɔ’n ti’n, wie liɛ’n be ko di suklu nvle uflɛ nun. Sanngɛ koronaviri’n ti’n, i sɔ liɛ’n kannin ase kan. Afin blɛ sɔ’n nun’n, be manman sran’m be atin kɛ be tu ajalɛ be wɔ nvle wie’m be nun. Afuɛ 2012 nun’n, anuannzɛ kun seli kɛ: “Suklu ba nga be ko di suklu nvle uflɛ nun’n, sɛ be fa be nun 10, be nun 5 be fin Azi mɛn’n nun.”

Siɛ nin niɛn sunman be di junman kekle kpa naan be mma’m b’a kwla ɔ inivɛsite nvle uflɛ nun. Be flɛ bian kun kɛ Kisiangi. Ɔ fin Taiwanin. Ɔ seli kɛ: “Min si nin min nin be wuli e nnan. Be leman sika kaka. Ɔ nin i sɔ ngba’n, be yoli maan e sran nnan’n e ko dili suklu Etazinin lɔ.” Kisiangi i si nin i nin be boli kalɛ dan kpa naan be mma’m b’a kwla di suklu nvle uflɛ nun. I sɔ yɛ siɛ nin niɛn sunman be yo-ɔ.

I yo, suklu dilɛ’n ti kpa. Sanngɛ nán cɛn ngba yɛ be nga be di suklu’n, be ɲan like nga be kunndɛ’n niɔn. Suklu ba sunman be wlali be wun ase kpa be dili suklu inivɛsite dandan’m be nun afuɛ kpanngban. Kpɛkun be fali kalɛ dan kpa naan b’a kwla tannin be suklu kalɛ’n. Sanngɛ i agualiɛ su’n, b’a ɲanman junman nga be kunndɛ kɛ bé dí’n. I kpa bɔbɔ’n, Sɛngapuu lɔ zronali kun nun’n, bla kun m’ɔ suan Rasɛli Mui’n seli kɛ: “Kɛ be nga be kɔ inivɛsite’n be ko ɲan be diplɔmun’n, be nun sunman be ɲanman junman.” Asa’n, be flɛ fluwa sifuɛ dan kun kɛ Jianjie. Ɔ tran Taiwanin. Ɔ seli kɛ: “Suklu ba kpanngban be ɲanman be diplɔmun’n i su junman. I sɔ’n ti’n, junman kwlaa nga be sa tɔ su’n yɛ be di-ɔ.”

Be nga be ɲan be klunklo junman bɔbɔ’n, be fɛ wie. I wie yɛle yasua kun m’ɔ suan Niranin’n i liɛ’n. Ɔ fin Tailandi. Kɛ ɔ wieli suklu i di Angle lɔ’n, ɔ sɛli i sin Tailandi. Ɔ ɲannin junman kpa dili sanngɛ ɔ seli kɛ: “Kannzɛ bɔbɔ n ɲan sika kaka’n, sanngɛ n di junman kekle kpa yɛ n ɲanman min ti kaan sa. I kpa bɔbɔ’n kɛ ɔ́ kɔ́ i ɲrun’n, be tuli min nin min wiengu junman difuɛ wie mun junman’n nun. N ma wunnin i wlɛ kɛ kannzɛ bɔbɔ sran kun di junman’n, junman sɔ’n kwla fi i sa blɛ kwlaa nun.”

Be nga be le sika bɔbɔ’n be wun be ɲrun wie. I wie yɛle kɛ ndɛ o be nun wie’m be awlobo’n nun. Wie’m be liɛ’n, tukpacɛ’n kle be yalɛ kpa. Wie mun ekun be liɛ’n, be sika’n ti’n kɛ be la kɔnguɛ’n be lafiman kpa. Be flɛ Zapɔn lɔ bian kun kɛ Kasutosi. Ɔ seli kɛ: “N le sika kaka. Sanngɛ n diman aklunjɔɛ. Afin sran wie’m be fa be ɲin be ci min, yɛ wie’m be yo min tɛ.” Be flɛ Viɛtinamun lɔ bla kun kɛ Lamun. Ɔ seli kɛ: “Sran kpanngban be kun be wun be kunndɛ sika. Afin be bu i kɛ sɛ be ɲan sika kaka’n, bé dí aklunjɔɛ. Sanngɛ kɛ be ko ɲɛn i’n, like nga be sunnzunnin’n i asabesin yɛ ɔ ju be su-ɔ. Yɛle kɛ be koko tra laa’n. Wie mun bɔbɔ be tɔ su tukpacɛ annzɛ be wla bo be wun.”

Kɛ Flanklɛn sa’n, sran sunman be wa wunnin i wlɛ kɛ ninnge wie’m be ti cinnjin tra suklu dan dilɛ’n nin sika kaka ɲanlɛ’n. I sɔ’n ti’n, b’a kunndɛman ninnge sɔ mun kun. Yɛ be fuali kpa kɛ bé yó sran’m be ye naan bé yó sran kpa. ?Sanngɛ i sɔ’n kwla uka be naan be liɛ w’a yo ye sakpa? Ndɛ akpasua ng’ɔ́ bá lɛ’n nun’n, é wá wún kosan sɔ’n i su tɛlɛ.