LIKE SUANLƐ 29

?Kɛ e wu’n nin yɛ e kɔ-ɔ?

Nga be yili i fluwa su'n

?Ɔ sran w’a wu le? Blɛ kekle sɔ’n nun’n, a kwla usa ɔ wun kɛ: ?Kɛ sran kun wu’n nin yɛ ɔ kɔ-ɔ? ?É kwlá wún be nga be wuli mun ekun? Like suanlɛ nga ɔ nin i sin liɛ’n nun’n, é wá wún wafa nga Biblu’n tɛ kosan sɔ’m be su’n.

1. ?Kɛ e wu’n nin yɛ e kɔ-ɔ?

Zezi fali wie’n sunnzunnin lafilɛ. Kɛ sran kun su lafi kpa’n sa kwlaa nga be ju’n ɔ wunman nun. ?Ngue ti yɛ e kwla se kɛ wie’n ti kɛ lafilɛ sa-ɔ? Yɛle kɛ, kɛ sran kun ko wu’n sɛ be yo i like yaya’n ɔ wunman nun. Asa ekun’n i ɲin su yomɛn i koun. Biblu’n se kɛ “be nga b’a wu’n be liɛ’n be siman like fi mlɔnmlɔn.”—Kanngan Akunndanfuɛ’n 9:5 nun.

2. ?Kɛ e si wie’n i su ndɛ nanwlɛ’n i su ye benin yɛ e ɲɛn i-ɔ?

Sran kpanngban be sro wie’n. Wie mun bɔbɔ be sro be nga be wuli’n. Sanngɛ wie’n i su ndɛ nga Biblu’n kan’n ɔ yo maan e wla gua ase. Zezi seli kɛ: “Ndɛ nanwlɛ’n ti’n amún ɲán amun ti.” (Zan 8:32) Ɲanmiɛn sulɛ wafa wie’m be waan kɛ sran kun wu’n, like kun wo i nun m’ɔ wuman wie-ɔ. Sanngɛ Biblu’n kanman sɔ. Kɛ sran kun ko wu’n ɔ wunman ɲrɛnnɛn lika wie. Asa ekun’n, kɛ mɔ be nga be wuli’n be siman like fi’n ti’n, be kwlá yoman e like fi. Ɔ maan ɔ fataman kɛ e yo ninnge wie mun naan be nga be wuli’n be klun jɔ e wun. Yɛ ɔ nunman nun kɛ e srɛ Ɲanmiɛn e man be.

Sran wie’m be waan be nin be nga be wuli’n be kwla koko yalɛ. Sanngɛ i sɔ liɛ’n kwlá yoman ye. Afin kɛ nga e fa e wunnin i sa’n, be nga be wuli’n “be siman like fi mlɔnmlɔn.” Sran wie’m be kwla bu i kɛ be nin be nga be wuli’n yɛ be su koko yalɛ-ɔ. Kusu nn be nin mmusu mun-ɔn. Ɔ maan kɛ e si wie’n i su ndɛ nanwlɛ’n i sɔ’n sasa e mmusu’m be lika. Zoova se e kɛ ɔ fataman kɛ e kunndɛ kɛ e nin be nga be wuli’n é kókó yalɛ. Afin ɔ si kɛ sɛ e yo sɔ’n e nin mmusu mun é sán nun. Yɛ bé klé e yalɛ.—Kanngan Mmla’n 18:10-12 nun.

SI NDƐ’N NUN KPA EKUN

Maan e nian be nga be wuli’n be su ndɛ nga Biblu’n kan’n. É wá wún kɛ Ɲanmiɛn kleman be yalɛ lika kun.

Bian kun i yi w’a wu. Be su yo i sɛ. Ɔ nin i mma’m be titi ban kun su. I janvuɛ mun nin i osufuɛ’m be bɛli i bo suanlɛ.

3. Wie’n i su ndɛ nga Biblu’n kan’n

Mɛn wunmuan nun’n, wie’n i su ndɛ nga sran’m be kan’n ɔ ti fanunfanun. Sanngɛ ndɛ sɔ’m be ngba be kwlá yoman nanwlɛ.

?Amun lika liɛ nun lɔ’n, be nga be wuli’n be su ndɛ benin yɛ sran’m be tɛ i kan-ɔn?

Sɛ a kunndɛ kɛ á sí ndɛ nga Biblu’n kan’n an bo VIDEO’N.

VIDEO: ?Be nga be wuli’n be o nin?—I bue kan (1:19)

Foto mun: Foto nga’m be fin video nga be flɛ i kɛ ‘?Be nga be wuli’n be o nin?—I bue kan’ nun. 1. Sran kun m’ɔ w’a wu’n ɔ la dɔɔtrɔ bɛ kun su. 2. Bian kun su lafi sran nɲɔn be afiɛn alie kun nun.

An kanngan Akunndanfuɛ’n 3:20 nun, i sin’n an koko kosan yɛ’m be su yalɛ:

?Kɛ nga ndɛ mma sɔ’n fa kan’n sa’n, kɛ sran kun wu’n nin yɛ ɔ kɔ-ɔ?
?Kɛ sran kun wu’n like kun wo i nun m’ɔ wuman wie-ɔ?

Biblu’n kan Zezi i janvuɛ kun m’ɔ be flɛ i kɛ Lazaa’n i wie’n i su ndɛ. An kanngan Zan 11:11-14 nun. Kɛ amún kánngan nun’n, maan amun sie ndɛ nga Zezi kɛnnin i Lazaa i wie’n su’n i nzɔliɛ. I sin’n, an koko kosan yɛ’m be su yalɛ:

?Zezi fali wie’n sunnzunnin ngue?
?Ngue yɛ ndɛ sɔ m’ɔ kannin’n ɔ kle e be nga be wuli’n be su-ɔ?
?A bu wie’n i su ndɛ nga Biblu’n kan’n i sɛ?

4. Kɛ e si wie’n i su ndɛ nanwlɛ’n ɔ yo e ye

Kɛ e si wie’n i su ndɛ nanwlɛ’n, i sɔ’n yo maan e sroman be nga be wuli’n. An kanngan Akunndanfuɛ’n 9:10 nun, i sin’n an koko kosan yɛ’n i su yalɛ:

?Be nga be wuli’n be kwla yo e like yaya?

Kɛ e lafi ndɛ nga Biblu’n kan’n su’n, e faman ato ndɛ nga sran’m be kan se kɛ ɔ fata kɛ e man be nga be wuli’n be like naan b’a kleman e yalɛ’n i su kun. An kanngan Ezai 8:19 nin Sa Nglo Yilɛ 4:11 nun, i sin’n an koko kosan yɛ’n i su yalɛ:

?Wafa sɛ yɛ Zoova bu be nga be man be nga be wuli’n be like naan be uka be’n niɔn?

Foto mun: Ninnge nga sran’m be yo man be nga be wuli’n. 1. Bian kun w’a koto, ɔ su srɛ kpɛkun ɔ su man sran kun m’ɔ wuli’n i aliɛ. 2. Sran nsan be su si able. 3. Sran wie mun ɔ nin be sa nun sran ti kongloman be su nanti bé kɔ́. Be yo i sɔ Be nga be Wuli’n be Wla Kpɛnlɛ Cɛn’n nun. — Kɛ e si wie’n i su ndɛ nanwlɛ’n e yoman ninnge nga be jɔman Zoova klun’n.

5. Kɛ e si be nga be wuli’n be su ndɛ nanwlɛ’n i sɔ’n fɔnvɔ e

Be seli sran wie’m be kɛ sa nga be yoli’n ti’n sɛ be wu’n bé klé be yalɛ. Sanngɛ kɛ e si kɛ be kleman be nga be wuli’n be yalɛ lika kun’n, i sɔ’n fɔnvɔ e. An kanngan Rɔmunfuɛ Mun 6:7 nun, i sin’n an koko kosan yɛ’n i su yalɛ:

Biblu’n se kɛ, sɛ sran kun yo sa tɛ naan ɔ wu’n, be boman sa tɛ ng’ɔ yoli i laa su be diman jɔlɛ kun. ?Ɔ maan a bu i kɛ sɛ sran kun wu naan be kle i ɲrɛnnɛn lika kun’n, i sɔ’n ti su?

Kɛ e si Zoova kpa’n, e wun i wlɛ kɛ ɔ su kplinman su kɛ be nga be wuli’n be wun be ɲrun lika kun. An kanngan Mmla’n 32:4 nin 1 Zan 4:8 nun, i sin’n an koko kosan yɛ’m be su yalɛ:

?Kɛ a niɛn sa’n, wafa nga be fa kannin Ɲanmiɛn i ndɛ wa’n, ɔ kwla kplin su kɛ be kle be nga be wuli’n be yalɛ lika kun?
?Wie’n i su ndɛ nga Biblu’n kan’n ɔ gua ɔ awlɛn su nzue? ?Ngue ti-ɔ?

SRAN WIE’M BE WAAN: “Kɛ ń má wú’n, n siman sa ng’ɔ́ wá jú min su’n. I sɔ’n ti’n srɛ kun min.”