LIKE SUANLƐ 51
Maan ndɛ nga á kán’n ɔ manman Zoova
Wafa nga Zoova yili e’n ti’n e kwla ijɔ. I sɔ liɛ’n ɔ ti like kun m’ɔ fa cɛli e-ɔ. ?Wafa nga e kan ndɛ’n ɔ ti Zoova i cinnjin? Ɛɛn, ɔ ti i cinnjin. (Kanngan Zaki 1:26 nun.) ?Ɔ maan é yó sɛ naan ndɛ nga é kán’n w’a manman Zoova?
1. ?É yó sɛ naan ndɛ nga é kán’n w’a manman Zoova?
Biblu’n se kɛ: “Maan amun fɔnvɔ amun wiengu titi, yɛ an wla amun wiengu fanngan titi.” (1 Tesalonikifuɛ Mun 5:11) ?A si sran kun m’ɔ fata kɛ be wlɛ i fanngan-ɔn? ?Á yó sɛ naan w’a kwla wun i wun fɛ? Yo maan ɔ wun i wlɛ kɛ i ndɛ lo wɔ. Wienun-ɔn, a kwla kan like nga ti yɛ a klo i sa’n i ndɛ kle i. ?A si Biblu’n nun ndɛ mma kun mɔ a kwla fa wla sran kun mɔ a si i’n i fanngan-ɔn? Biblu’n nun ndɛ mma nga e kwla fa wla sran fanngan’n be sɔnnin. Asa’n, nán ɔ wla fi su kɛ ndɛ nga a kan’n ɔ ti cinnjin, sanngɛ kusu wafa nga a kan ndɛ’n ɔ ti cinnjin kpa wie. I sɔ’n ti’n, mian ɔ ɲin naan w’a kan ndɛ amanniɛn su titi.—Ɲanndra Mun 15:1.
2. ?Ndɛ wafa benin mun yɛ ɔ fataman kɛ be fin e nuan fite-ɔ?
Biblu’n se kɛ: “Nán ndɛ tɛ fi sa fin amun nuan fite.” (Kanngan Efɛzifuɛ Mun 4:29 nun.) I sɔ’n kle kɛ ɔ fataman kɛ e ɲinfu e kan ndɛ tɛtɛ, annzɛ e kan ndɛ wie m’ɔ kwla yo e wiengu’m be ya’n. Ɔ fataman kɛ e kan e wiengu’m be wun ndɛ tɛtɛ, annzɛ e tɔn be suɛn.—Kanngan Ɲanndra Mun 16:28 nun.
3. ?Ngue yɛ ɔ kwla uka e naan y’a kan ndɛ ng’ɔ kwla yo e wiengu’m be ye-ɔ?
Blɛ sunman’n, ndɛ ng’ɔ o e awlɛn’n nun’n yɛ ɔ fin e nuan fite-ɔ. (Liki 6:45) I sɔ’n ti’n, maan e mian e ɲin naan e akunndan’n tran ninnge kwlaa nga be ti su’n, nin ninnge kwlaa nga be ti sanwun’n, nin ninnge kwlaa nga be nin klolɛ fata’n, ɔ nin ninnge kwlaa nga be nin manmanlɛ fata’n be su titi. (Filipufuɛ Mun 4:8) Kɛ ɔ ko yo naan i sɔ liɛ’n w’a kwla yo ye’n, ɔ fata kɛ e fa like kpa e yiyi e ɲin su, yɛ e tra janvuɛ kpa. (Ɲanndra Mun 13:20) Asa kusu’n, ɔ fata kɛ e bu ndɛ sin ka naan y’a kan. Bu wafa nga ndɛ nga á kán’n ɔ́ yó ɔ wiengu mun’n i akunndan ka naan w’a kan. Biblu’n se kɛ: “Ndɛ nga be bumɛn i sin naan b’a kan’n, ɔ ti kɛ kue yɛ be su fa wɔwɔ sran sa, sanngɛ ngwlɛlɛfuɛ’m be nuan nun ndɛ’n yo sran juejue.”—Ɲanndra Mun 12:18.
SI NDƐ’N NUN KPA EKUN
É wá wún wafa nga e kwla kan ndɛ ng’ɔ jɔ Zoova klun’n, m’ɔ wla e wiengu’m be fanngan’n.
4. Bu ndɛ sin ka naan w’a kan
Ɔ ju wie’n, e kan ndɛ wie kpɛkun i sin’n ɔ yo e nsisɔ. (Zaki 3:2) An kanngan Galasifuɛ Mun 5:22, 23 nun, i sin’n an koko kosan yɛ’m be su yalɛ:
?Nzuɛn benin yɛ a kwla srɛ Zoova kɛ ɔ uka ɔ naan a yi i nglo naan w’a kanman ndɛ tɛtɛ-ɔ? ?Wafa sɛ yɛ nzuɛn sɔ’n kwla uka wɔ-ɔ?
An kanngan 1 Korɛntifuɛ Mun 15:33 nun, i sin’n an koko kosan yɛ’n i su yalɛ:
?Wafa sɛ yɛ ɔ janvuɛ mun, ɔ nin ninnge nga a fa yiyi ɔ ɲin su’n, be kwla yo maan a kan ndɛ tɛtɛ-ɔ?
?Ngue yɛ ɔ kwla yo maan a kan ndɛ tɛtɛ-ɔ?
An kanngan Akunndanfuɛ’n 3: 1, 7 nun, i sin’n an koko kosan yɛ’n i su yalɛ:
?Ngue ti yɛ wie liɛ’n, ɔ fata kɛ e muan e nuan, annzɛ e minndɛ blɛ uflɛ ka naan y’a kan ndɛ wie-ɔ?
5. Kan ɔ wiengu’m be wun ndɛ kpa
?É yó sɛ naan y’a kanman e wiengu’m be ndɛ tɛ, annzɛ y’a loman be ngasi? An bo VIDEO’N, i sin’n an koko kosan yɛ’m be su yalɛ.
?Video’n nun’n, ngue ti yɛ aniaan bian’n kunndɛli kɛ ɔ́ káci wafa ng’ɔ kɛn i wiengu’m be wun ndɛ’n niɔn?
?Ngue yɛ ɔ yoli naan w’a kwla kaci-ɔ?
An kanngan Akunndanfuɛ’n 7:16 nun, i sin’n an koko kosan yɛ’n i su yalɛ:
?Sɛ a wun kɛ a su wa kan wie i wun ndɛ tɛ’n, ngue yɛ ɔ fata kɛ ɔ wla kpɛn su-ɔ?
An kanngan Akunndanfuɛ’n 7:21, 22 nun, i sin’n an koko kosan yɛ’n i su yalɛ:
?Sɛ sran wie kan ɔ wun ndɛ tɛ’n, wafa sɛ yɛ Biblu’n nun ndɛ mma nga’m be kwla uka wɔ naan w’a fa ajalɛ kpa-ɔ?
6. Kan ndɛ amanniɛn su kle ɔ awlofuɛ mun
Zoova kunndɛ kɛ e kan ndɛ amanniɛn su e kle e awlofuɛ mun. An bo VIDEO’N, i sin’n an koko kosan yɛ’n i su yalɛ.
?Ngue yɛ ɔ kwla uka wɔ naan w’a kan ndɛ amanniɛn su w’a kle ɔ awlofuɛ mun-ɔn?
An kanngan Efɛzifuɛ Mun 4:31, 32 nun, i sin’n an koko kosan yɛ’n i su yalɛ:
?Wafa sɛ yɛ e kwla kan ndɛ e kle e awlofuɛ mun naan b’a wun be wun fɛ-ɔ?
Zoova kannin wafa ng’ɔ klo i Wa Zezi’n i ndɛ. An kanngan Matie 17:5 nun, i sin’n an koko kosan yɛ’n i su yalɛ:
?Wafa sɛ yɛ a kwla nian Zoova i ajalɛ’n su ɔ awlo lɔ-ɔ?
Yo ɔ wiengu’m be mo.
SRAN WIE’M BE WAAN: “Nga n wun i’n yɛ n kan-ɔn. Sɛ ɔ yo sran fɛ-o, sɛ ɔ yoman sran fɛ-o, min ndɛ nunman nun.”
?A bu i sɛ? ?Ngue ti-ɔ?
NDƐ’N I KPƆLƐ BOLƐ
Ndɛ nga e kan’n ɔ kwla yo e wiengu’m be ye, annzɛ ɔ kwla yo be tɛ. Ɔ fata kɛ e bu ndɛ’n, nin blɛ’n, ɔ nin wafa nga é kán ndɛ’n be akunndan kpa ka naan y’a kan.
Ndɛ’n i nun flanlɛ
?É yó sɛ naan ndɛ nga é kán’n w’a wla e wiengu’m be fanngan?
?Ndɛ wafa benin yɛ a kunndɛman kɛ ɔ fin ɔ nuan fite-ɔ?
?Ngue yɛ ɔ kwla uka e naan y’a kan ndɛ amanniɛn su titi, naan kusu ndɛ nga é kán’n w’a wla e wiengu’m be fanngan-ɔn?
NDƐ WIE MUN EKUN
?Ngue yɛ ɔ kwla uka e naan y’a kan ndɛ ng’ɔ wla e wiengu fanngan-ɔn?
Like ng’ɔ kwla uka e naan y’a kanman ndɛ tɛtɛ’n.
“Like nga ti yɛ aɔwi tɛtɛ dilɛ’n timan kpa’n” (jw.org su ndɛ)
Like ng’ɔ kwla uka e naan y’a kanman sran wun ndɛ tɛtɛ’n.
Wafa nga Zoova ukali bian kun naan w’a yaci ndɛ tɛtɛ kanlɛ’n.
“N ma buli min mɛn dilɛ wafa’n i akunndan kpa” (Sasafuɛ Tranwlɛ’n nun ndɛ)