E mɔ e ti “wlan-wlanfuɛ asiɛ’n” su’n, e su Ɲanmiɛn likawlɛ
“Sran nga be fin lika wie’n be yɛ bé wá tútú amun kacɛ’m bé mán amun-ɔn. Yɛ be yɛ bé wá tá amun vinyi mun bé mán amun-ɔn. Sanngɛ amun liɛ’n, bé flɛ́ amun kɛ Anannganman i Nyrun Jranfuɛ mun.”—EZA. 61:5, 6.
?WAFA SƐ YƐ AMÚN TƐ́ KOSAN NGA’M BE SU Ɔ?
?Wafa sɛ yɛ sran wie’m be bu be nga be ti nvle uflɛ nunfuɛ mun ɔn? ?Sanngɛ ngue ndɛ yɛ Biblu’n kan ɔn?
?Ngue ti yɛ be su yiayia mɛnmɛnfuɛ mun ɔn?
?Ngue yɛ ɔ kle kɛ Zoova i Lalofuɛ’m be afiɛn’n, ɔ leman kɛ sran kun ti aofuɛ ɔ?
1. ?Wafa sɛ yɛ sran wie’m be bu aofuɛ mun ɔn? ?Yɛ ngue yɛ sran sɔ’m be wunmɛn i wlɛ ɔ?
KƐ E fa e wunnin i like suanlɛ nga ɔ sinnin lɛ nun’n sa’n, sran wie’m be fa be nga be ti aofuɛ’n, be aofuɛ mɔ be ti’n, be fa se be nun. I sɔ’n kle kɛ be bu be wun kpa tra aofuɛ mun. Sanngɛ, like nga be wunmɛn i wlɛ’n, yɛle kɛ kannzɛ bɔbɔ klɔ sran’m be wafa’n timan kun’n, sanngɛ be kwlaa be ti kun. I sɔ yɛ fluwa kun kannin ɔn. Ɔ seli kɛ: “Kɛ Biblu’n fa kan’n sa’n, i sran ble o, i blɔfuɛ o, be kwlaa be ti niaan.”
2, 3. ?Ngue yɛ ɔ kle kɛ Zoova kpaman sran nun ɔn?
2 Aofuɛ o nvle kwlaa nun. I wie yɛle Izraɛli nvle’n i liɛ’n. Sɛ i li bɔbɔ Ɲanmiɛn Zoova fali nvle sɔ’n yoli i liɛ klonglo’n, sanngɛ mmla nga ɔ mannin Izraɛlifuɛ mun’n se be kɛ be bu be nga be timan Izraɛlifuɛ’m be sran naan nán be kpa sran’m be nun. I sɔ kusu yɛ ɔ kunndɛ kɛ andɛ Klistfuɛ’m be yo ɔ. Akoto Piɛli wunnin i sɔ’n i wlɛ. I ti’n, ɔ seli kɛ: “Nanwlɛ, m’an wun i wlɛ kɛ Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.”—Yol. 10:34, 35.
3 Tranlɛ mɔ aofuɛ’m be trannin Izraɛlifuɛ’m be afiɛn’n, be ɲannin su ye. I lɛ’n kle kɛ Zoova sɔ sran’m be kwlaa be nun. I sɔ yɛ akoto Pɔlu kannin ɔn. Ɔ seli kɛ: “?Nyanmiɛn’n ti Zuif’m be ngunmin be liɛ? ?Ɔ ti-man be nga be ti-man Zuif’m be liɛ wie? Ɔ ti be liɛ wie.”—Rɔm. 3:29; Zoɛ. 3:5.
4. ?Ngue yɛ ɔ kle kɛ ɔ fata kɛ “Izraɛlfuɛ nga be ti [Ɲanmiɛn] liɛ sakpa’n” be bo yo kun ɔn?
4 Kɛ ɔ wa juli i ɲrun’n, Izraɛli nvle’n w’a yoman Ɲanmiɛn i liɛ kun. Ɔ maan, kɛ mɔ ɔ nin be nga be kpali be sieli be ngunmin’n be wa trali aenguɛ’n ti’n, be yɛ be wa yoli i liɛ siɛn’n niɔn. Be yɛ be flɛ be “Izraɛlfuɛ nga be ti [Ɲanmiɛn] liɛ sakpa’n” niɔn. (Gal. 6:16) Pɔlu kannin be nga be ti akpasua sɔ’n i nunfuɛ’m be ndɛ seli kɛ: “Ɔ lɛ-man kɛ wie ti Grɛk yɛ wie ti Zuif, ɔ lɛ-man kɛ be wlali wie klɛn yɛ b’a wla-man wie klɛn, ɔ lɛ-man kɛ wie’m be nyin nian ti-man yɛ wie ti sinnglinfuɛ, yɛ ɔ lɛ-man kɛ wie ti kanga yɛ wie ti diewa, sanngɛ Krist ti be like kwlaa, yɛ ɔ tran be kwlaa be anwlɛn’n nun.” (Kol. 3:11) Ɔ maan, ndɛ sɔ’n kle kɛ ɔ fata kɛ “Izraɛlfuɛ nga be ti [Ɲanmiɛn] liɛ sakpa’n” be bo yo kun.
5, 6. (a) ?Kɛ e kanngan Ezai 61:5, 6 nun’n, kosan benin yɛ e kwla fa usa e wun ɔn? (b) ?Wan mun yɛle “Anannganman i Nyrun Jranfuɛ mun”? ?Yɛ wan mun yɛle ‘sran nga be fin lika wie’n’ mɔ Ezai kannin be ndɛ’n? (c) ?Yɛ junman benin yɛ sran akpasua nɲɔn sɔ’m be sa o nun ɔn?
5 ?Yɛ ndɛ nga Ezai klɛli i fluwa’n i ndɛ tre 61 nun’n nin? ?Ndɛ sɔ’n m’ɔ ti andɛ Klistfuɛ’m be kwlaa be liɛ’n, ɔ kleman kɛ asɔnun’n nun’n, Klistfuɛ wie’m be ti kpa tra wie mun? Afin i ndɛ mma 6 kan sran wie’m mɔ bé yó ‘Anannganman i Nyrun Jranfuɛ mun’n,’ be ndɛ. I ndɛ mma 5 kusu kan “sran nga be fin lika wie’n” mɔ be ti aofuɛ’n be ndɛ. Ɔ se kɛ bé dí junman mán “Anannganman i Nyrun Jranfuɛ” sɔ mun. Ɔ maan, e kwla usa e wun kɛ: ‘?Ndɛ sɔ’n i bo’n yɛle benin?’
6 Yɛle kɛ be nga be flɛ be kɛ ‘Anannganman i Nyrun Jranfuɛ mun’n’ be yɛle be nga Ɲanmiɛn kpali be sieli be ngunmin’n. Be yɛ ‘be cɛn klikli’n’ niɔn. “Bé yó Nyanmiɛn nin Krist be nyrun jranfuɛ, be nin Krist yɛ bé dí famiɛn afuɛ akpi nin-ɔn.” (Ngl. 20:6) Sanngɛ, Klistfuɛ nanwlɛfuɛ kpanngban wie’m be liɛ’n, bé trán asiɛ’n su wa. Be yɛ be flɛ be “sran nga be fin lika wie’n” mɔ e kwla se ekun kɛ be ti aofuɛ’n niɔn. Be nin be nga bé kɔ́ ɲanmiɛn su’n, yɛle kɛ “Anannganman i Nyrun Jranfuɛ mun” be di junman likawlɛ. Nanwlɛ, be tu be klun be suan sran sɔ’m be bo junman’n i dilɛ nun. Sɛ é kwlá sé’n, ‘be tutu kacɛ mun,’ yɛ ‘be ta vinyi mun be man’ be. Yɛle kɛ be bo jasin fɛ’n be kle sran mun. I sin’n, be kle be like. Yɛ be kle be Zoova i anuannzɛ’n i sin atin. Sanngɛ junman’n kaman be ngunmin be sa nun. Be nga bé kɔ́ Ɲanmiɛn su’n be sa o junman sɔ’n nun wie. Be nin be kunndɛ be nga Ɲanmiɛn i sulɛ’n ti be cinnjin’n be sin atin, kpɛkun be kle be like, yɛ be uka be naan b’a fa su.—Zan 10:16.
E TI “WLAN-WLANFUƐ ASIƐ’N SU” KƐ ABRAAMU SA
7. ?Ngue ti yɛ andɛ Klistfuɛ’m be ti kɛ Abraamu nin laa Ɲanmiɛn i sufuɛ nanwlɛfuɛ mun sa ɔ?
7 Kɛ nga e fa wunnin i like suanlɛ ng’ɔ sinnin’n lɔ’n nun’n sa’n, e ti aofuɛ nin wlanwlanfuɛ Satan i mɛn tɛ nga nun. Laa Ɲanmiɛn i sufuɛ nanwlɛfuɛ’m be kusu be yoli “aofuɛ nin wlan-wlanfuɛ asiɛ’n su.” Be nun kun yɛle Abraamu. (Ebr. 11:13) Abraamu yoli Ɲanmiɛn i janvuɛ wie. I sɔ’n ti’n, maan e yo be nga bé kɔ́ ɲanmiɛn su lɔ’n annzɛ be nga bé trán asiɛ’n su wa’n be nunfuɛ o, e kusu e kwla yo Zoova i janvuɛ kɛ Abraamu sa. Zaki kannin Zoova nin Abraamu be janvuɛ tralɛ’n i ndɛ. Ɔ seli kɛ: “‘Abraam lafili Nyanmiɛn su, ɔ maan i su b’ɔ lafili’n ti, ɔ buli i sran kpa.’ Yɛ Nyanmiɛn flɛli i i janvuɛ.”—Zak 2:23.
8. ?Nda benin yɛ Zoova tali Abraamu ɔn? ?Yɛ, ngue yɛ ɔ lafili su ɔ?
8 Ɲanmiɛn tali Abraamu i nda. Ɔ seli i kɛ ɔ́ sín i anunman’m be nun ɔ́ yó asiɛ’n sufuɛ’m be kwlaa be ye. (An kanngan Bo Bolɛ 22:15-18 nun.) Sanngɛ blɛ nga mɔ nda sɔ’n, ɔ́ kpɛ́n su’n Ɲanmiɛn w’a boman su w’a kleman Abraamu. Ɔ nin i sɔ ngba’n, Abraamu lafili su kpa kɛ nda sɔ’n i nuan yía. Ɔ maan sɛ é kwlá sé’n, i nguan cɛn wunmuan’n nun’n, ɔ nin i awlobofuɛ’m be wlanwlannin likalika’m be nun. I ti b’a ɲanman be tiaun awlo. Ɔ nin i sɔ ngba’n, w’a kpɔciman Zoova le. Ɔ nin i be nantili kpa titi.
9, 10. (a) ?Wafa sɛ yɛ e kwla nian Abraamu i ajalɛ’n su ɔ? (b) ?Kɛ é sé yɛ’n, junman benin yɛ Zoova w’a fa wla e sa nun kɛ e di ɔ?
9 Abraamu si kɛ Zoova yía nda nga m’ɔ tali’n i nuan. Sanngɛ sɛ ɔ́ mínndɛ afuɛ kun annzɛ afuɛ kpanngban naan nda nga Zoova tali’n w’a kpɛn su’n, i liɛ’n ɔ siman. Ɔ nin i sɔ ngba’n, blɛ kwlaa ng’ɔ minndɛli’n nun’n, ɔ kloli Zoova titi, yɛ w’a yacimɛn i sulɛ. Yɛ i akunndan’n trannin ndɛ nga Zoova kannin’n i su. Ɔ maan w’a kunndɛman i bɔbɔ tiaun tranwlɛ nvle kun nun. (Ebr. 11:14, 15) Nanwlɛ, wafa nga Abraamu dili i mɛn’n, ɔ kle e ajalɛ. Yɛle kɛ nán maan e bo wɛ e se kɛ é fá e ti é wlɛ́ i aɲanbeun ninnge mun ɔ nin dunman kunndɛlɛ’n nin junman dan dilɛ’n be nun. Afin, mɛn ng’ɔ o yɛ’n su cɛman kun. ?Ɔ maan mɛn nga nun ninnge kunndɛlɛ ekun tre? I ti yɛ like nga i kpa tra mɛn nga’n yɛ e ɲin o su’n niɔn. I sɔ’n ti’n, maan e tra e awlɛn e minndɛ like nga Zoova waan ɔ́ fá mán e’n.—An kanngan Rɔmfuɛ Mun 8:25 nun.
10 Kɛ é sé yɛ’n, Zoova su yiayia nvlenvle’m be nun sran mun naan Abraamu i osu’n ti’n, w’a kwla yo be ye. Be ng’ɔ kpali be sieli be ngunmin’n mɔ be ti “i Nyrun Jranfuɛ mun” ɔ nin “sran nga be fin lika wie’n” mɔ be yɛle bua’m be wie mun’n, be su bo su kle sran’m be kɛ Zoova su yiayia sran mun naan w’a yo be ye. Be yo i sɔ aniɛnaniɛn 600 tra su be nun.
E KPAMAN SRAN NUN
11. ?Ngue yɛ Salomɔn i srɛlɛ’n kle ɔ?
11 Afuɛ nga be flɛ i 1026 nun kwlaa naan b’a wu Klist’n, Salomɔn yili Ɲanmiɛn i sua’n i nglo. I ndɛ ng’ɔ kɛnnin i i srɛlɛ’n nun’n kle kɛ nvlenvle kwlaa nunfuɛ’m bé bá Zoova manmanlɛ. Ɔ srɛli Zoova kɛ: “Kɛ bé bó wɔ dunman b’ɔ yo nyɛnmɛn, bɔ bé kán ɔ sa nga a yo be mun’n, sran nga be ti-man ɔ nvle’n nunfuɛ’m bɔbɔ’n, bé tí wɔ ngan. I sɔ sran’n wie ɔ́ bá, ɔ dunman b’ɔ́ fú’n nin tinmin bɔ a lɛ i’n ti. Sɛ ɔ ba ɔ sua nga nun kɛ ɔ wa srɛ wɔ’n, kannzɛ ɔ fin mmua yɛ ɔ ba’n, kɛ a o ɔ tranwlɛ’n nun nyanmiɛn su lɔ’n, tɛ i su. Yɛ like kwlaa nga aofuɛ sɔ’n ɔ srɛ wɔ’n fa mɛn i. I liɛ’n, asiɛ’n su nvle-nvle’n kwlaa be nunfuɛ’m bé tí ɔ ngan, yɛ be nyin yí wɔ kɛ Izraɛlfuɛ’m be liɛ’n sa.”—1 Fam. 8:41-43.
12. ?Ngue ti yɛ Zoova i Lalofuɛ’m be ti kɛ aofuɛ sa mɛn nga nun ɔn?
12 Sɛ é kwlá sé’n, Zoova i Lalofuɛ’m be ti nvle nga be o be nun’n be nun aofuɛ. Afin, Klist mɔ Ɲanmiɛn sieli i Famiɛn bia’n su’n yɛ be suɛn i bo ɔ. Ɔ maan, be ndɛ nunman mɛn’n nun politiki ndɛ’n be nun. I sɔ’n ti’n, sran wie’m be kan be wun ndɛ tɛ.
13. (a) ?Ngue ti yɛ e kwla se kɛ aofuɛ nin ɔnvuɛ’m be ti kun ɔn? (b) ?I klikli’n nun’n, Zoova sunnzunnin kɛ klɔ sran’m be bubu be wun nun nvlenvle? Amun yiyi nun.
13 Be nga be ti aofuɛ’n, ɔ le ninnge wie mɔ ɔnvuɛ’m be fa sie be nzɔliɛ ɔ. Ɔ kwla yo aniɛn nga be kan’n, annzɛ wafa nga be ti’n, annzɛ kusu wafa nga be wlawla be wun’n. Titi’n, ninnge sɔ’m be su yɛ ɔnvuɛ’m be jran be bu aofuɛ’m be fɔ ɔ. Sanngɛ, sɛ e sie ninnge sɔ’m be bue kun’n, e wun i kɛ aofuɛ sɔ mun’n, sran yɛle be. Afin sɛ ɔ ti kɛ famiɛn kunngba yɛ ɔ sie mɛn wunmuan’n nn be su kanman aofuɛ ndɛ. Kusu i klikli nun’n, i sɔ yɛ Zoova kunndɛli ɔ. Yɛle kɛ i waan i kunngba yɛ ɔ́ síe mɛn wunmuan’n naan klɔ sran’m be yo awlobo kunngba nunfuɛ. ?Mɛn nga nun’n, wan yɛ ɔ kwla yo like kunngba sɔ’n mɔ Zoova waan ɔ́ yó’n niɔn?
14, 15. ?Ngue yɛ Zoova i Lalofuɛ’m be ngunmin yɛ be yo ɔ?
14 Mɛn nga nun sran kpanngban be bu be wun kpa tra nvle uflɛ nunfuɛ mun. Sanngɛ sran wie’m be mian be ɲin be klo be. I sɔ yɛ bian kun yo ɔ. Ɔ ti televiziɔn susute kun i su kpɛn. Ɔ nin sran mɔ be si junman di kpa’n, mɔ be fin nvlenvle wafawafa nun’n yɛ be di junman ɔn. Ɔ seli kɛ: “Kɛ n nin sran sɔ mɔ be fin nvle uflɛ nun’n é dí junman’n, n seman min wun kɛ e nin be e timan nvle kunngba nunfuɛ naan i ti’n, n su buman be sran. Afin min liɛ’n, m bu i kɛ asiɛ wunmuan’n ti kɛ nvle kun sa, naan sran kwlaa nga be o su’n, be ti niaan. I sɔ’n ti’n, n seli min sa nun junman difuɛ’m be kɛ, kɛ be o be biolo’m be nun’n, ɔ nin kɛ bé íjɔ sran’m be ɲrun televiziɔn nun’n, nán maan be fa sran’m be aofuɛ’m mɔ be ti’n be fa se be nun.”
15 Mɛn wunmuan’n nun’n, Zoova i Lalofuɛ’m be ngunmin yɛ be bu akunndan nga Ɲanmiɛn bu’n wie ɔ. Yɛle kɛ Zoova i Lalofuɛ’m be kpaman sran nun. I sɔ ti’n be bubuman be wun nun. Be bumɛn i kɛ be kpa tra be niaan nga be ti nvle uflɛ nunfuɛ mun’n. Ɔ maan be klo be, yɛ be lafi be su kpa wie. I ti’n, sɛ Zoova i Lalofuɛ kun wun i kɛ wafa nga i niaan nga be fin nvle uflɛ nun’n be yo be ninnge mun’n nin i liɛ’n timan kun’n, naan be si ninnge wie’m be yo trɛ i’n, ɔ lomɛn i ngasi. Afin ɔ si kɛ be kwlaa be ti niaan. I kwlaa nga lɛ’n ti yɛ Zoova i anuannzɛ’n ɔ yo ɲɛnmɛn’n niɔn. Yɛ i sɔ’n kle ekun kɛ anuannzɛ’n sɔ’n ti i liɛ ngunmin. Anuannzɛ nga e o nun’n ti’n, e akunndan’n w’a kaci w’a yo kpa. ?Nɛ́n i ɔ?
ƝANMIƐN I MƐN’N NUN’N, SRAN FI SU YOMAN AOFUƐ
16, 17. ?Kɛ amun niɛn i sa’n, kɛ ndɛ nga be o Sa Nglo Yilɛ 16:16 nin Daniɛl 2:44 nun’n be nuan’n yía’n, mɛn’n nun tranlɛ’n yó sɛ?
16 Ɔ cɛ kaan sa’n, Zezi Klist nin i anzi’m be nin mɛn nun famiɛn diwlɛ’m bé wá srá su. Alɛ kasiɛn sɔ’n yɛ “Ebre nun be flɛ i Armagedɔn’n” niɔn. (Ngl. 16:14, 16; 19:11-16) Wafa nga alɛ sɔ’n i bó’n gúa mán mɛn nun famiɛn diwlɛ mɔ be tanndan Ɲanmiɛn i klun sa’n i yolɛ’n i ɲrun’n, Ɲanmiɛn maan i nuan ijɔfuɛ Daniɛli kɛnnin i ndɛ i afuɛ 2.500 yɛ. Ɔ klɛli i kɛ: “Famiɛn sɔ’m be blɛ su’n, Nyanmiɛn b’ɔ o nglo lɔ’n ɔ́ síe famiɛn diwlɛ kun b’ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkuun i bɔbɔ ɔ́ ká lɛ tititi.”—Dan. 2:44.
17 Kɛ mɔ dɔ nga su’n, klɔ sran’m b’a bubu be wun nun nvlenvle ti’n, nvle kwlaa nga e kɔ nun’n, e ti lɔ aofuɛ. Sanngɛ kɛ Armagedɔn alɛ’n ko wie’n, awɛ nga be jajali be nvlenvle’m be afiɛn’n, be su tranman lɛ kun. Ɔ ti su kɛ blɛ sɔ nun’n, klɔ sran’m be su yoman wafa kunngba. Sanngɛ i sɔ’n su yoman like fi. I li bɔbɔ ɔ́ klé kɛ Ɲanmiɛn yili ninnge kwlaa wafawafa naan i kwlaa ti klanman. Nanwlɛ kɛ ndɛ sɔ’n wá kpɛ́n su’n, ɔ́ wá yó ye mán e o! ?Amun wunmɛn i sɔ? I sɔ’n ti’n, dɔ nga su’n, maan e ngba e wla e wun ase e manman Ɲanmiɛn Zoova m’ɔ ti e Yifuɛ’n naan e lɛ i ase titi. Afin like nga i waan ɔ́ mán e’n, ɔ ti kpa lele kpe nun.
18. ?Ajalɛ benin yɛ Zoova i Lalofuɛ’m be fali m’ɔ kle kɛ be buman awɛ nga sran’m be jajali be nvlenvle’m be afiɛn’n, be like fi ɔ?
18 ?Ndɛ fɛ mɔ e boli su icra’n lɛ’n, e kwla lafi su kɛ ɔ́ kpɛ́n su? Ɛɛn! Afin nán laliɛ nun ndɛ ɔ. Ɔ́ yó sɔ sakpa. E kwla wun i sɔ Zoova i Lalofuɛ’m be afiɛn andɛ bɔbɔ. Yɛle kɛ kannzɛ sran kun ɔ ti sran ble o annzɛ ɔ ti blɔfuɛ o, nɛ́n i sɔ’n yɛ be nian ɔn. Asa ekun’n, ajalɛ nga be fɛli i koko nga nun’n, ɔ kle sɔ wie. Yɛle kɛ be kannin Betɛli wie mun boli nun. Ɔ maan Betɛli kunngba yɛ ɔ nian be kwlaa sɔ’m be junman’n su siɛn’n niɔn. Be yoli i sɔ afin be si kɛ i sɔ’n yó maan Ɲanmiɛn junman dilɛ’n ɔ nin Ɲanmiɛn Sielɛ’n i jasin fɛ’n bolɛ’n be siesielɛ’n, ɔ́ yó pɔpɔ. Kpɛkun junman’n kɔ́ i ɲrun ndɛndɛ kpa. (Mat. 24:14) Be ajalɛ sɔ’n kle kɛ awɛ nga sran’m be jajali be nvlenvle’m be afiɛn’n, Zoova i Lalofuɛ’m be buman be like fi. Ɔ kle wie kɛ Zoova sieli Zezi Klist i Famiɛn bia’n su naan w’a bo i famiɛn dilɛ’n i bo. Asa’n, ɔ kle ekun kɛ Zezi Klist fɛmɛn i ɲin siemɛn i wafa nga klɔ sran’m b’a bubu be wun nun nvlenvle’n su. Kpɛkun ɔ kle ekun kɛ ɔ cɛ kaan sa’n, ‘ɔ́ kwlɛ́’ i kpɔfuɛ mun, yɛle kɛ ɔ́ wíe i junman’n i di weiin.—Ngl. 6:2.
19. ?Ngue yɛ ɔ yo maan Zoova i Lalofuɛ’m be bo ti kun ɔn?
19 Zoova i Lalofuɛ’m be fin nvlenvle fanunfanun nun yɛ be kan aniɛnaniɛn wafawafa sɔ. Sanngɛ Ɲanmiɛn ndɛ’n mɔ be kwlaa be fa su’n ti’n, be bo ti kun. (An kanngan Sofoni 3:9 nun.) Zoova i Lalofuɛ nga be o mɛn wunmuan’n nun’n, be kwlaa be ti niaan. Kannzɛ bɔbɔ be tran mɛn nunfuɛ’m be afiɛn’n, sanngɛ be timan mɛn tɛ nga i nunfuɛ. Be nin be niaan’m be tran aniaan tranlɛ. Kɛ mɛn klanman nun’n, bé wá trán sɔ ɔ. Blɛ sɔ nun’n, be su kanman aofuɛ ndɛ kun. Ɔ maan ndɛ nga fluwa kun kannin mɔ e boli su like suanlɛ nga i bo bolɛ nun’n, ɔ́ kpɛ́n su. Ndɛ sɔ’n yɛle kɛ: “Kɛ Biblu’n fa kan’n sa’n, i sran ble o, i blɔfuɛ o, be kwlaa be ti niaan.”
[Ndɛ kwle, bue 31]
Kɛ awɛ nga be jajali be nvlenvle’m be afiɛn’n, be su tranman lɛ kun’n, mɔ e su kanman aofuɛ ndɛ kun’n, mɛn’n nun tranlɛ’n wá yó fɛ kekleke!
[Foto, bue 28]
?Kɛ Abraamu sa’n, amun akunndan’n te o nda nga Ɲanmiɛn tali be’n su?
[Foto, bue 30]
Zoova ɲrun’n, e kwlaa e ti kun.