?Ngue ti yɛ ɔ fata kɛ Ɲanmiɛn wawɛ’n kle e atin ɔn?

‘Wɔ yɛ a ti min Nyanmiɛn nin-ɔn. Maan ɔ Wawɛ’n dun mmua min nyrun atin b’ɔ ti kpa’n su.’​—JUE. 143:10.

 1. ?Sɛ e su kɔ lika kun mɔ e siman lɔ kpa’n, ngue yɛ ɔ fata kɛ e yo ɔ?

MAAN ɔ yo amun kɛ amun su kɔ lika kun mɔ amun siman lɔ’n sa. Amun nin sran kun mɔ amun lafi i su kpa’n mɔ w’a ɔ lɔ le’n yɛ amun kɔ ɔ. Sɛ ɔ si atin’n i kpa’n, ɔ́ klé amun. Ɔ maan, sɛ amun fa ndɛ ng’ɔ kan’n su’n, amun su mlinman.

2, 3. (a) ?Ngue yɛ Zoova fa yili ninnge kwlaa ɔ? (b) ?Ngue yɛ ɔ kle e kɛ Ɲanmiɛn wawɛ’n kwla uka e andɛ ɔ?

² E nantilɛ nun’n, ɔ fata kɛ be kle e atin’n. Ndɛ klikli nga be fa fitili Biblu’n su’n i nun’n, be kannin like kun m’ɔ kwla kle e atin’n, i ndɛ. Bo Bolɛ fluwa nun’n, be kannin like nga Zoova yoli i laa kpa’n i ndɛ kɛ: “Kɛ mɛn’n bó i bo’n, Nyanmiɛn yili nglo nin asiɛ’n.” Biblu’n kan gua su kɛ: “Nyanmiɛn i wawɛ’n wlan-wlan sin.” (Bob. 1:1, 2) I sɔ’n kle weiin kɛ Zoova fɛli i wawɛ’n m’ɔ ti wunmiɛn m’ɔ fa di junman’n, ɔ yili ninnge kwlaa. Sɛ e o nguan nun’n, ɔ fin Ɲanmiɛn i wawɛ’n.​—Zɔb 33:4.

³ Nán yilɛ ngunmin yɛ Zoova fɛli i wawɛ’n yili e ɔ. Ɔ fa kle e atin wie. Zezi m’ɔ ti Ɲanmiɛn Wa’n ɔ seli i sɔnnzɔnfuɛ’m be kɛ: “Nyanmiɛn Wawɛ’n [...] klé amun sa ng’ɔ ti nanwlɛ’n i kwlaa.” (Zan 16:13) ?Ngue yɛ be flɛ i Ɲanmiɛn wawɛ’n niɔn? ?Yɛ ngue ti yɛ ɔ fata kɛ e kunndɛ kɛ ɔ kle e atin ɔn?

?Ngue yɛ be flɛ i Ɲanmiɛn wawɛ’n niɔn?

4, 5. (a) ?Ɲanmiɛn wawɛ’n i su ato ndɛ benin yɛ be nga be waan Ɲanmiɛn ti atre nsan’n be kan ɔn? (b) ?Like nga be flɛ i Ɲanmiɛn wawɛ’n, sɛ be waan amun yiyi nun kle sran’n, amún sé sɛ?

⁴ Atrɛkpa’n, amun sieli i nzɔliɛ kɛ sran nga amun bo jasin fɛ’n kle be’n, wafa nga be bu Ɲanmiɛn wawɛ’n, ɔ nin i su ndɛ nga Biblu’n kan’n, be timan kun. I wie yɛle be nga be waan Ɲanmiɛn ti atre nsan’n be liɛ’n. Be lafi su kɛ aolia nun sran kun yɛle Ɲanmiɛn wawɛ’n naan ɔ nin e Si Ɲanmiɛn be sɛ. (1 Kor. 8:6) Sanngɛ Biblu’n kɛn i weiin kɛ i sɔ’n timan su.

⁵ ?Ɔ maan ngue yɛ be flɛ i Ɲanmiɛn wawɛ’n niɔn? Ebre nun ndɛ mma nga Bo Bolɛ 1:2 nun’n, be kacili i Wawle nun kɛ “wawɛ” i bo’n kun ekun yɛle “aunmuan.” Kannzɛ e ɲinma kwlá wunman aunmuan’n, sanngɛ e wun ninnge ng’ɔ yo be’n. I kunngba’n yɛle Ɲanmiɛn wawɛ’n. E ɲinma kwlá wunmɛn i, kusu ɔ timan aolia nun sran, yɛ ɔ timan like mɔ e kwla biti i ɔ. Sanngɛ ɔ yo ninnge mun. Ɔ ti wunmiɛn m’ɔ fin Ɲanmiɛn, yɛ ɔ fa man sran mun annzɛ ɔ fa siesie ninnge mun naan i klun sa’n kpɛn su. ?Sɛ be se e kɛ wunmiɛn sɔ’n fin Ɲanmiɛn mɔ like fi nunmɛn i sin’n, ɔ́ bó e nuan? Ɔ si’ɛ!​—An kanngan Rɔmfuɛ Mun 1:20 nun.

 6. ?Ngue yɛ Davidi srɛli Zoova kɛ ɔ yo mɛn i ɔ?

⁶ ?E kwla lafi su kɛ Zoova fɛ́ i wawɛ’n klé e atin titi? Ɔ tali Davidi i nda kɛ: “Ń wá klé wɔ like, yɛ ń wá klé wɔ atin ng’ɔ ti bɔ a fa su’n.” (Jue. 32:8) ?Davidi kusu kplinnin su? Ɛɛn, ɔ kplinnin su. Afin ɔ srɛli Zoova kɛ: “Kle min ɔ klun sa’n i yolɛ’n. Wɔ yɛ a ti min Nyanmiɛn nin-ɔn.” (Jue. 143:10) Kɛ Davidi sa’n, ɔ fata kɛ e kunndɛ kɛ Ɲanmiɛn wawɛ’n kle e atin. Maan e kan like nnan nga ti yɛ ɔ fata kɛ e yo sɔ’n, be ndɛ.

E klɔ sran mun’n e ngunmin e kwlá wunman atin ng’ɔ ti kpa’n

7, 8. (a) ?Ngue ti yɛ e ngunmin e kwlá wunman atin ng’ɔ ti kpa’n niɔn? (b) An fa sunnzun ase kun kle like nga ti yɛ ɔ fata kɛ Ɲanmiɛn kle e atin mɛn tɛ nga nun’n.

⁷ Like klikli nga ti yɛ ɔ fata kɛ e kunndɛ kɛ Ɲanmiɛn wawɛ’n kle e atin’n, yɛle kɛ e klɔ sran mun’n, e ngunmin e kwlá wunman atin ng’ɔ ti kpa’n. Zoova w’a yiman e sɔ, naan se kɛ dɔ nga su mɔ fɔ o e nun’n yɛ é kwlɛ́ i sɔ yó ɔ. Ɲanmiɛn nuan ijɔfuɛ Zeremi klɛli i kɛ: “Ee min Min, n si kɛ sran’n i nguan’n nunmɛn i sa nun. Sran i ngunmin kwlá wunman atin ng’ɔ ti kpa’n.” (Zer. 10:23, The Bible in Basic English) ?Ngue ti yɛ ɔ ti sɔ ɔ? Ɲanmiɛn sinnin Zeremi lika yiyili nun. Ɔ seli kɛ: “Klɔ sran’n i klun akunndan’n ti tɛ tra like kwlaa, be yo akunndan sɔ’n i sa fi-ɔ ɔ yo-man ye. ?Wan cɛ yɛ ɔ kwla si-ɔ?”​—Zer. 17:9; Mat. 15:19.

⁸ ?Sɛ sran kun kɔ wlanwlanlɛ bo ble kun m’ɔ siman lɔ’n i nun’n, naan w’a seman sran ng’ɔ si lɔ kpa’n kɛ ɔ ko sunmɛn i’n, nn w’a diman sinnzin yɛ ɔ o lɛ? Afin kɛ m’ɔ siman like ng’ɔ ko yo naan sa wie w’a ɲɛnmɛn i bo sɔ’n nun lɔ’n ti’n, ɔ kwla fɛ i nguan sie i wie nuan. I kunngba’n, sran nga ɔ yaciman Ɲanmiɛn nun naan ɔ kle i atin ng’ɔ ti kpa’n, naan ɔ bu i kɛ mɛn tɛ nga nun ɔ su mlinman’n, ɔ su fɛ i nguan’n sie i wie nuan. Sɛ e kunndɛ kɛ é kpɛ́ mɛn tɛ nga’n, kɛ Davidi sa’n, ɔ fata kɛ e srɛ Zoova kɛ ɔ uka e. Ɔ seli kɛ: “Anannganman, kle min wɔ atin’n, kle min kan n sin’n.” (Jue. 25:4; 23:3) ?Wafa sɛ yɛ Ɲanmiɛn kwla kle e atin ɔn?

 9. ?Kɛ nga e fa wun i desɛn ng’ɔ o fluwa’n i bue 19 su sa’n, wafa sɛ yɛ Ɲanmiɛn wawɛ’n kwla kle e atin ng’ɔ ti kpa’n niɔn?

⁹ Sɛ e ti wun ase kanfuɛ naan e fa like kwlaa nga e waan é yó’n e wlɛ i Zoova sa nun’n, ɔ́ fɛ́ i wawɛ’n mán e. Yɛ wawɛ sɔ’n klé e atin ng’ɔ ti kpa’n. ?Wafa sɛ yɛ Ɲanmiɛn i wawɛ’n úka e ɔ? Zezi seli i sɔnnzɔnfuɛ’m be kɛ Ɲanmiɛn fɛ́ i wunmiɛn’n súan be bo. Ɔ seli kɛ Ɲanmiɛn fɛ́ i wawɛ’n ‘klé be sa’n kwlaa, yɛ i yɛ ɔ́ kpɛ́n be wla ndɛ nga ɔ kan kleli be’n i kwlaa su ɔ.’ (Zan 14:26) Ninnge nga Klist fa kleli sran mun’n, ɔ o Ɲanmiɛn Ndɛ’n nun wie. Ɔ maan sɛ e suan nun like titi naan e srɛ su Ɲanmiɛn’n, Ɲanmiɛn wawɛ’n úka e maan é wún Zoova bɔbɔ i akunndan’n i wlɛ kpa. I liɛ’n, é kwlá yó i klun sa. (1 Kor. 2:10) Asa ekun’n, sɛ sa wie fu e nun’n, Ɲanmiɛn wawɛ’n klé e like ng’ɔ fata kɛ yo’n. Yɛle kɛ Biblu’n nun ndɛ nga e suannin be’n, ɔ́ yó maan e wla kpɛ́n be su naan y’a wun ajalɛ nga e ko fa’n.

Ɲanmiɛn wawɛ’n kleli Zezi i atin

10, 11. ?Ngue yɛ Zezi kunndɛli kɛ Ɲanmiɛn wawɛ’n yo mɛn i ɔ? ?Wafa sɛ yɛ Ɲanmiɛn wawɛ’n ukɛli i ɔ?

¹⁰ Like’n nga ti yɛ ɔ fata kɛ e kunndɛ kɛ Ɲanmiɛn wawɛ’n kle e atin’n i nɲɔn su’n, yɛle kɛ Ɲanmiɛn fɛli i wawɛ’n kleli i bɔbɔ Wa’n i atin. Kwlaa naan Ɲanmiɛn i Wa kunngba cɛ’n w’a ba asiɛ’n su’n, ɔ si i bɔbɔ i su ndɛ yɛ’n m’ɔ o Ɲanmiɛn ndɛ’n nun’n. Be klɛli i kɛ: “Anannganman i wawɛ’n wo i su. Wawɛ sɔ’n ɔ ti ngwlɛlɛ wawɛ, nin sa kpa’n yɛ sa tɛ’m be silɛ wawɛ, nin sa siesielɛ wawɛ, nin wawɛ b’ɔ kwla yo sa ng’ɔ siesie kɛ ɔ́ yó’n, ɔ ti wawɛ bɔ maan be si Anannganman, bɔ maan be nyin yí i.” (Eza. 11:2) Asiɛ’n su tranlɛ’n su yoman pɔpɔ manman Zezi. Ɔ maan e kwla wun i kɛ ɔ kunndɛli kpa kɛ Ɲanmiɛn fɛ i wawɛ’n ukɛ i.

¹¹ Ndɛ nga Zoova kannin’n kpɛnnin su. Kɛ be yoli Zezi i batɛmu cɛ’n, sa ng’ɔ juli’n, Lik i fluwa’n kɛn i ndɛ. Ɔ se kɛ: “Kɛ Jésus fin Zurdɛn’n nun lɔ ɔ́ bá bɔ Nyanmiɛn Wawɛ’n sieli i’n, Wawɛ sɔ’n fɛ ɔli aawlɛ flɛnnɛn nun lɔ.” (Lik 4:1) Lɔ’n, ɔ kpɛli srɛ nun, ɔ srɛli Ɲanmiɛn yɛ ɔ buli Ɲanmiɛn ndɛ’n su akunndan. Ɔ kwla yo kɛ blɛ sɔ nun’n, Zoova mannin i Wa’n i afɔtuɛ wie mun yɛ ɔ yiyili sa nga ɔ́ ɲɛ́n i’n i nun weinwein kleli i sa. Ɲanmiɛn wawɛ’n sieli Zezi i akunndan’n nin i awlɛn’n. Ɔ mɛnnin i ngwlɛlɛ yɛ ɔ ukɛli i naan w’a fa ajalɛ. I sɔ’n ti’n, sa kwlaa nun’n Zezi sili like ng’ɔ fata kɛ ɔ yo’n. Yɛ like nga i Si kunndɛli kɛ ɔ yo’n yɛ ɔ yoli ɔ.

12. ?Ngue ti yɛ ɔ ti cinnjin kɛ e srɛ Ɲanmiɛn naan ɔ fɛ i wawɛ’n kle e atin ɔn?

¹² Zezi wunnin kɛ i nantilɛ nun’n, Ɲanmiɛn i wawɛ’n ukɛli i kpa. I sɔ’n ti’n, ɔ wlali i sɔnnzɔnfuɛ’m be fanngan kpa kɛ be srɛ Ɲanmiɛn naan ɔ fɛ i wawɛ’n man be, naan be kplin su kɛ wawɛ sɔ’n sie be. (An kanngan Lik 11:9-13 nun.) ?Ngue ti yɛ i sɔ yolɛ’n ti cinnjin man e wie ɔ? Yɛle kɛ Ɲanmiɛn wawɛ’n kwla kaci e akunndan’n naan e nin Klist e akunndan’n w’a yo kun. (Rɔm. 12:2; 1 Kor. 2:16) Sɛ Ɲanmiɛn wawɛ’n sie e’n, é bú akunndan kunngba nga Klist bu’n wie yɛ é yó kɛ i sa.​—1 Piɛ. 2:21.

Akunndan nga mɛn nunfuɛ’m be bu’n kwla mlin e

13. ?Ngue yɛ be fa akunndan nga mɛn nunfuɛ’m be bu’n, be sunnzun i ɔ? ?Ngue yɛ ɔ su sran’m be bo kɛ be yo ɔ?

¹³ Like nga ti yɛ ɔ fata kɛ e kunndɛ kɛ Ɲanmiɛn wawɛ’n kle e atin’n, i nsan su’n, yɛle kɛ sɛ Ɲanmiɛn wawɛ’n w’a sieman e’n, akunndan nga mɛn nunfuɛ’m be bu’n ɔ́ mlín e. Akunndan sɔ’n yɛ ɔ sie sran sunman andɛ ɔ. Akunndan sɔ’n ti kɛ wunmiɛn kun sa. Ɔ wlawla sran mun maan like nga Ɲanmiɛn wawɛ’n kle e kɛ nán e yo’n, yɛ be yo ɔ. Akunndan nga mɛn nunfuɛ’m be bu’n, ɔ ukaman sran mun naan be akunndan’n nin Klist liɛ’n w’a yo kun. Sanngɛ ɔ yo maan be akunndan’n ɔ nin be ninnge yolɛ wafa’n, ɔ nin Satan m’ɔ sie mɛn’n i liɛ’n be yo kun. (An kanngan Efɛzfuɛ Mun 2:1-3 ɔ nin Tit 3:3 nun.) Sran nga ɔ bu mɛn nunfuɛ’m be akunndan’n wie’n, mɔ klɔ sran nzuɛn’n su yɛ ɔ fa’n, i bo’n gúa tɛ mɛ́n i. Ɔ su tranman be nga Ɲanmiɛn síe be’n, be nun wie.​—Gal. 5:19-21.

14, 15. ?Ngue yɛ é yó naan y’a kwla jran mɛn nunfuɛ’m be akunndan’n i ɲrun kekle ɔ?

¹⁴ Like ng’ɔ ko uka e naan y’a jran mɛn nunfuɛ’m be akunndan’n i ɲrun kekle’n, Zoova fa man e. Akoto Pɔlu seli kɛ: “Maan e Min’n tin amun sran wunmuan bɔ amun nin i amu’an kaci nin i kwlalɛ b’ɔ lɛ-man wunsu’n ti. [...] Naan sɛ lika’n yo tɛ’n amu’an kwla kpli amun ti.” (Efɛ. 6:10, 13) Zoova fɛ i wawɛ’n man e wunmiɛn naan y’a kwla jran Satan i ɲin m’ɔ kplin i kɛ ɔ́ fá e síe i atin tɛ su’n i ɲrun kekle kpa. (Ngl. 12:9) Akunndan nga mɛn nunfuɛ’m be bu’n, ɔ le ta kpa. Kannzɛ ɔ yo sɛ yo sɛ’n, saan i ta sɔ’n kán e bɔɔ le. Sanngɛ e kwla jrɛn i ɲrun kekle, afin Ɲanmiɛn wawɛ’n i ta’n trɛ i liɛ’n yɛ ɔ́ súan e bo.

¹⁵ Klistfuɛ klikli’m be blɛ su’n, be nga be jaoli nanwlɛ’n i atin’n su’n, akoto Piɛli kannin be ndɛ seli kɛ: “B’a yaci atin kpafuɛ’n, b’a mlin.” (2 Piɛ. 2:15) “E liɛ’n, akunndan nga sran’m be bu’n, nɛ́n i wie yɛ Nyanmiɛn maan e bu-ɔ, sanngɛ Nyanmiɛn fɛ i Wawɛ’n mannin ye.” I sɔ’n ti’n, nanwlɛ, e si Ɲanmiɛn i ye dan! (1 Kor. 2:12) Kɛ e yaci Ɲanmiɛn i wawɛ’n i nun m’ɔ kle e atin’n, mɔ kusu e yo like kwlaa nga Zoova kle e kɛ e yo naan e nin i e afiɛn w’a sɛ kpa titi’n, e kwla jran mɛn nunfuɛ’m be akunndan’n m’ɔ fin Satan’n, i ɲrun kekle.​—Gal. 5:16.

Ɲanmiɛn wawɛ’n maan sran i nzuɛn’n yo kpa

16. ?Ngue yɛ Ɲanmiɛn wawɛ’n maan e kwla yo ɔ?

¹⁶ Like nga ti yɛ ɔ fata kɛ e kunndɛ kɛ Ɲanmiɛn wawɛ’n kle e atin’n, i nnan su’n yɛle kɛ be ng’ɔ kle be atin’n be aeliɛ’n yo kpa dan. (An kanngan Galasifuɛ Mun 5:22, 23 nun.) ?Wan yɛ ɔ kunndɛman kɛ i sran klolɛ’n nin i aklunjuɛ’n be uka su, naan ɔ si sran afiɛn siesie tra laa ɔ? ?Wan yɛ ɔ kunndɛman kɛ ɔ́ yó awlɛn trafuɛ nin ye yofuɛ nin klun ufuefuɛ ɔ́ trá laa ɔ? ?Yɛ wan yɛ ɔ kunndɛman kɛ i Ɲanmiɛn sulafilɛ’n nin i sa nuan su yolɛ’n ɔ nin i nzuɛn wɛtɛɛ’n be ɲin fite kpa tra laa, naan ɔ ɲan su ye ɔ? Kɛ e yi i sɔ nzuɛn kpakpa’m be nglo’n, e ɲan su ye yɛ be nga e nin be e tran’n ɔ nin be nga e nin be e su Ɲanmiɛn’n be ɲan su ye wie. Ɔ fata kɛ e mian e ɲin titi naan y’a kwla yo sa nga Ɲanmiɛn wawɛ’n maan sran yo’n i kpa y’a tra laa’n. Afin i sɔ ninnge’m be yolɛ’n leman awɛ.

17. ?Sɛ e waan é yí sa nga Ɲanmiɛn wawɛ’n maan sran yo’n be nun kun i nglo kpa ekun’n, ngue yɛ e kwla yo ɔ?

¹⁷ Ɔ ju wie’n, ɔ ti kpa kɛ e usa e wun kɛ: ‘?Ndɛ ng’ɔ fin min nuan fite’n, ɔ nin ninnge nga n yo’n, be kle kɛ Ɲanmiɛn wawɛ’n sie min naan n yo sa nga Ɲanmiɛn wawɛ’n maan sran yo’n?’ (2 Kor. 13:5a; Gal. 5:25) Sɛ é nían naan ɔ fata kɛ e yi sa nga Ɲanmiɛn wawɛ’n maan sran yo’n be nun wie’m be nglo’n, maan e lo e wun kpa ekun naan Ɲanmiɛn wawɛ’n sie e. Yɛle kɛ maan e suan sa sɔ’m be su like Biblu’n ɔ nin Biblu’n i akua’m be nun. Kpɛkun wafa nga aliɛ ba kwlaa nun’n e kwla yo i sɔ sa mun’n, maan e bu i akunndan naan e mian e ɲin kpa e yo be.a Kɛ e wun ninnge kpakpa nga Ɲanmiɛn wawɛ’n yo man e bɔbɔ’n, ɔ nin nga ɔ yo man e niaan mun’n, e wun like nga ti yɛ ɔ ti cinnjin kɛ ɔ kle e atin’n.

?Amun kplin su kɛ Ɲanmiɛn wawɛ’n kle amun atin?

18. ?Kɛ Zezi kplinnin su kɛ Ɲanmiɛn wawɛ’n kle i atin’n, afɔtuɛ benin yɛ i ajalɛ’n man e ɔ?

¹⁸ Biblu’n se e kɛ i nun nga Zezi bali asiɛ’n su wa’n, Ɲanmiɛn wawɛ’n ukɛli i kpa liɛ su. Ɔ kunndɛli kpa kɛ Ɲanmiɛn wawɛ’n sie i. Ajalɛ kwlaa nga Ɲanmiɛn wawɛ’n kleli i’n, ɔ loli i wun fali su. (Mar. 1:12, 13; Lik 4:14) ?Yɛ e li? ?E kplin su kɛ Ɲanmiɛn wawɛ’n kle e atin kɛ Zezi sa?

19. ?Ngue yɛ ɔ fata kɛ e yo naan Ɲanmiɛn wawɛ’n w’a kle e atin ɔn?

¹⁹ Kɛ é sé yɛ’n, Ɲanmiɛn wawɛ’n te kle sran wie mɔ be lo be wun be mɛn i’n, be atin. ?Ngue yɛ e kwla yo naan w’a kle e atin wie ɔ? Maan e srɛ Zoova titi kɛ ɔ fɛ i wawɛ’n man e naan ɔ uka e naan e lo e wun e man wawɛ sɔ’n naan ɔ sie e. (An kanngan Efɛzfuɛ Mun 3:14-16 nun.) Maan e suan Biblu’n mɔ Ɲanmiɛn fɛli i wawɛ’n mannin sran mun yɛ be klɛli’n, i nun like. Sɛ e yo sɔ’n, é klé kɛ e kunndɛ kɛ Ɲanmiɛn wawɛ’n kle e atin. (2 Tim. 3:16, 17) Maan e fa ngwlɛlɛ ndɛ nga Biblu’n kle e’n su, naan e kle kɛ atin nga Ɲanmiɛn wawɛ’n kle e’n, e fa su. Maan e aeliɛ’n kle kɛ e lafi su kɛ mɛn tɛ nga nun’n, Zoova kwla kle e atin kpafuɛ’n.

[Ja ngua lɛ ndɛ’n]

?Amun wunnin ndɛ cinnjin mun?

• ?Wafa sɛ yɛ Ɲanmiɛn i wawɛ’n kwla uka e ɔ?

• ?Like nnan benin ti yɛ ɔ fata kɛ e kunndɛ kɛ Ɲanmiɛn fɛ i wawɛ’n kle e atin ɔn?

• ?Ngue yɛ ɔ fata kɛ e yo naan Ɲanmiɛn wawɛ’n w’a kle e atin ɔn?

[Foto, bue 17]

Ɲanmiɛn wawɛ’n mannin Zezi i ngwlɛlɛ yɛ ɔ ukɛli i naan w’a fa ajalɛ.

[Foto, bue 19]

Ɲanmiɛn wawɛ’n kle sran nga be lo be wun be mɛn i’n, be atin.