• ?Mɛn’n i awieliɛ blɛ nga nun’n wan yɛ ɔ ti “famiɛn ng’ɔ o nglo lɔ’n” niɔn?
    Sasafuɛ Tranwlɛ’n (Like suanlɛ liɛ)—2020 | Mɛ

    •  8. ?Blɛ kasiɛn nga nun’n, wan yɛ ɔ ti famiɛn ng’ɔ o ngua lɔ’n niɔn?

      8 Alɛ Dan Klikli nun’n, Angle nin Etazinin be bo yoli kun yɛ be kunnin alɛ’n niɔn. Kɛ be yoli sɔ’n, be wa ɲannin kwlalɛ kpa mɛn wunmuan’n nun. Kɛ nga Daniɛli fa kannin’n sa’n, famiɛn sɔ’n i sonja’m be sɔnnin kpa, yɛ be le wunmiɛn dan. (Dan. 11:25) Ɔ maan blɛ kasiɛn nga nun’n, Angle nin Etazinin yɛ be ti famiɛn ng’ɔ o ngua lɔ’n niɔn.d ?Sanngɛ wan yɛ ɔ yoli famiɛn ng’ɔ o nglo lɔ’n niɔn?

      ?WAN YƐLE FAMIƐN NG’Ɔ O NGLO LƆ’N?

       9. (1) ?Blɛ benin nun yɛ famiɛn ng’ɔ o nglo lɔ’n wa yili i wun nglo-ɔ? (2) ?Wafa sɛ yɛ ndɛ ng’ɔ o Daniɛl 11:25 nun’n kpɛnnin su-ɔ?

      9 Kɛ Sali Risɛli nin i wiengu’m be boli Biblu’n nun like suanlɛ bo afuɛ 1871 nun’n, famiɛn ng’ɔ o nglo lɔ’n wa yili i wun nglo. Afuɛ sɔ’n nun’n, nvle nga be kan Aleman’n be nun kpanngban be bo wa yoli kun. Ɔ maan be wa kacili nvle kun m’ɔ le kwlalɛ kpa’n. Yɛ be flɛli nvle sɔ’n kɛ Alemaɲin. Kɛ ɔ yoli sɔ’n, be wa fali be sa sieli i Sran ble mɛn’n, ɔ nin Oseanin mɛn’n be nun nvle wie’m be su. Yɛ be yoli like kwlaa nga be kwla yo naan be kwlalɛ’n w’a tra Angle’m be liɛ’n. (An kanngan Daniɛl 11:25 nun ndɛ ng’ɔ o ja ngua lɔ’n nun.)e Asa ekun’n, Alemaɲin lɔ sonja’m be wa sɔnnin kpa. Ɔ ka kan naan b’a to Angle lɔ sonja liɛ mun. Ɔ maan Alɛ Dan Klikli nun’n, sonja sɔ mun yɛ be ko kunnin alɛ’n niɔn.

      10. ?Wafa sɛ yɛ ndɛ ng’ɔ o Daniɛl 11:25b, 26 nun’n kpɛnnin su-ɔ?

      10 Daniɛli kannin sa nga bé wá jú Alemaɲin nin i sonja’m be su’n, i ndɛ. Ɔ seli kɛ famiɛn ng’ɔ o nglo lɔ’n ɔ “su ɲanman jranwlɛ.” ?Ngue ti-ɔ? ‘Afin bé cící i wun ndɛ, yɛ be nga be nin i wla asa talie kunngba’n nun’n, bé yí i ase.’ (Dan. 11:25b, 26a) Daniɛli blɛ su’n, be nga be ‘di aliɛ nga famiɛn’n di’n mɔ be nɔn nzan ng’ɔ nɔn’n wie’n’ be nun wie’m be ‘di junman be mɛn i.’ (Dan. 1:5) ?Sanngɛ wan mun yɛ Daniɛli kan be ndɛ-ɔ? Alemaɲin lɔ sran dandan nga be yoli maan be famiɛn’n jasoli lɛ’n, be ndɛ yɛ Daniɛli kan-ɔn. Sran dandan sɔ’m be nun wie yɛle sonja’m be su kpɛnngbɛn mun nin alɛ dilɛ nun afɔtuɛ manfuɛ mun.f Sanngɛ nán famiɛn sɔ’n i tɔlɛ’n i ndɛ ngunmin yɛ Daniɛli kannin-ɔn. Kɛ ɔ nin famiɛn ng’ɔ o ngua lɔ’n bé wá kún alɛ’n, wafa nga i bo gúa’n, ɔ kɛnnin i ndɛ wie. Asa ekun’n, kɛ ɔ́ kán famiɛn ng’ɔ o nglo lɔ’n i ndɛ’n ɔ seli kɛ: “Bé kwlɛ́ i sonja mun, be nga bé wú’n, be su diman be yalɛ.” (Dan. 11:26b) Kɛ nga Daniɛli fa kannin sa’n, Alɛ Dan Klikli nun’n, Alemaɲin sonja mun nin sran kpanngban kpa be wuli. Alɛ fanunfanun nga be kunnin be laa nun’n, b’a kunman sran kɛ Alɛ Dan Klikli’n nun’n sa.