LIKE SUANLƐ 15
?Wan yɛle Zezi?
Laa sran nga be dunman fuli kpa’n be nun kun yɛle Zezi. Sanngɛ sran kpanngban be simɛn i kpa, i dunman’n i ngunmin yɛ be si i-ɔ. Yɛ i su ndɛ nga sran’m be kan’n, ɔ ti fanunfanun. ?Zezi i su ndɛ benin yɛ Biblu’n kan-ɔn?
1. ?Wan yɛle Zezi?
Zezi ti aolia nun sran, yɛ ɔ tran ɲanmiɛn su lɔ. I yɛ Ɲanmiɛn dun mmua yili i naan w’a yi ninnge onga mun-ɔn. Ɔ ti “ninnge kwlaa nga Ɲanmiɛn yili be’n be nun klikli’n.” (Kolɔsufuɛ Mun 1:15) Biblu’n se kɛ Zezi ti Ɲanmiɛn i ‘Wa kunngba cɛ,’ afin i ngunmin yɛ Ɲanmiɛn w’a sinman sran uflɛ lika naan w’a yi i-ɔ. (Zan 3:16) Zezi nin i Si Zoova be dili junman likawlɛ. Ɔ ukali Zoova naan b’a yi ninnge onga mun. (Kanngan Ɲanndra Mun 8:30 nun.) Zezi nin Zoova be afiɛn mantan kpa. Ɔ ijɔ Ɲanmiɛn nuan. I sɔ’n ti’n, Biblu’n flɛ i kɛ “Ndɛ’n.”—Zan 1:14.
2. ?Ngue ti yɛ Zezi bali asiɛ’n su-ɔ?
Zoova fɛli i wawɛ’n yoli abonuan sa kun naan b’a wu Zezi. Yɛle kɛ ɔ yoli maan Zezi kacili ba nɔnman, bla kun m’ɔ nin-a siman bian le’n i klun lɔ. I sɔ m’ɔ yoli’n, i ti yɛ be kwla wuli Zezi kɛ klɔ sran sa-ɔ. Sa sɔ’n juli i afuɛ kɔe 2.000 yɛ. (Kanngan Liki 1:34, 35 nun.) Zezi yɛ ɔ ti Mesi annzɛ Klisi mɔ be seli kɛ ɔ́ bá’n niɔn. Ɔ bali asiɛ’n su wa naan ɔ́ dé klɔ sran mun.a Mesi i su ndɛ kwlaa nga be kɛnnin i Biblu’n nun’n, ɔ kpɛnnin su Zezi i lika. I sɔ’n ukali sran mun naan b’a wun i wlɛ kɛ i yɛ ɔ ti ‘Klisi’n niɔn, naan ɔ ti Ɲanmiɛn m’ɔ lafiman’n i Wa.’—Matie 16:16.
3. ?Nin yɛ Zezi wo dɔ nga su-ɔ?
Kɛ Zezi wieli i junman’n i di asiɛ’n su wa m’ɔ wuli’n, Ɲanmiɛn cɛnnin i, yɛ ɔ sɛli i sin ɲanmiɛn su lɔ. Kɛ ɔ juli lɔ’n, “Ɲanmiɛn mɛnnin i kɔmin su trali laa’n.” (Filipufuɛ Mun 2:9) Siɛn’n, ɔ le kwlalɛ dan kpa. Saan Zoova i ngunmin cɛ yɛ i tinmin’n trɛ i liɛ’n niɔn.
SI NDƐ’N NUN KPA EKUN
Maan e fa e ɲin e sie i Zezi i su ndɛ’n su kpa ekun naan e wun like nga ti yɛ ɔ ti cinnjin kɛ a si i’n.
4.Zezi timan Ɲanmiɛn Kpli
Biblu’n se kɛ kannzɛ bɔbɔ Zezi le tinmin ɲanmiɛn su lɔ’n, sanngɛ ɔ lo i wun mɛn i Si Ɲanmiɛn Zoova. ?Ngue ti yɛ e se sɔ-ɔ? An bo VIDEO’N, naan amun wun Zezi nin Ɲanmiɛn Kpli be su ndɛ’n nga Biblu’n kan’n. Amún wá wún kɛ Ɲanmiɛn Kpli nin Zezi be timan kun.
Biblu’n nun ndɛ mma nga mun be uka e naan y’a si Zoova nin Zezi be su ndɛ kpa ekun. An kanngan be nun. I sin’n, an koko kosan’m be su yalɛ.
An kanngan Liki 1:30-32 nun.
?Zoova nin Zezi be su ndɛ benin yɛ anzi’n kannin-ɔn?
An kanngan Matie 3:16, 17 nun.
?Kɛ be yoli Zezi i batɛmun’n, ndɛ benin yɛ sran kun kɛnnin i ɲanmiɛn su lɔ-ɔ?
?Kɛ a niɛn i sa’n, wan yɛ ɔ kannin ndɛ sɔ’n niɔn?
An kanngan Zan 14:28 nun.
?Siɛ nin ba’n, wan yɛ ɔ ti kpɛnngbɛn annzɛ ɔ le kwlalɛ trɛ i wiengu-ɔ?
?Ngue ti yɛ Zezi flɛ Zoova kɛ i Si-ɔ?
An kanngan Zan 12:49 nun.
?Kɛ a niɛn i sa’n, Zezi su se kɛ ɔ nin i Si be ti kun?
5. ?Ngue yɛ ɔ kle kɛ Zezi yɛ ɔ ti Mesi’n niɔn?
Be kannin ndɛ kpanngban Biblu’n nun naan sran’m b’a kwla wun Mesi’n i wlɛ. I yɛ Ɲanmiɛn kpɛli i kɛ ɔ de sran mun-ɔn. An bo VIDEO’N. Ɔ kan ndɛ wie mɔ Biblu’n kannin mɔ be kpɛnnin su Zezi i lika’n be ndɛ.
An kanngan Biblu’n nun ndɛ mma nga’m be nun. I sin’n, an koko kosan’m be su yalɛ.
An kanngan Mise 5:2 nun. Ɔ kan lika ng’ɔ fata kɛ be wu Mesi’n i ndɛ.b
?Ndɛ sɔ’n kpɛnnin su Zezi i lika sakpa? —Matie 2:1.
An kanngan Jue Mun 34:20 nin Zakari 12:10 nun. Ndɛ mma sɔ’m be kan Mesi i wie’n i ndɛ.
?Sa sɔ’m be kpɛnnin su? —Zan 19:33-37.
?Kɛ a niɛn i sa’n, Zezi bɔbɔ yɛ ɔ yoli maan sa sɔ’m be kpɛnnin su i lika-ɔ?
?Ngue yɛ ndɛ sɔ’n kle wɔ Zezi su-ɔ?
6. Kɛ e si Zezi i su ndɛ’n e ɲan su ye
Biblu’n se kɛ ɔ ti cinnjin kɛ e si Zezi, ɔ nin junman ng’ɔ di’n. An kanngan Zan 14:6; 17:3 nun. I sin’n, an koko kosan yɛ’n i su yalɛ:
?Ngue ti yɛ ɔ ti cinnjin kɛ e si Zezi-ɔ?
Zezi dunman nun’n e kwla kaci Zoova i janvuɛ. Ɔ kleli e Zoova i su ndɛ nanwlɛ’n. Yɛ i dunman nun’n e kwla ɲan nguan m’ɔ leman awieliɛ’n.
SRAN WIE’M BE WAAN: “Zoova i Lalofuɛ’m be lafiman Zezi su.”
?Wafa sɛ yɛ á tɛ́ be su-ɔ?
NDƐ’N I KPƆLƐ BOLƐ
Zezi ti aolia nun sran. Ɔ ti Ɲanmiɛn i Wa. I yɛ ɔ ti Mesi’n niɔn.
Ndɛ’n i nun flanlɛ
?Ngue ti yɛ Biblu’n se kɛ Zezi yɛ ɔ ti “ninnge kwlaa nga Ɲanmiɛn yili be’n be nun klikli’n niɔn”?
?Ka naan Zezi w’a ba asiɛ’n su wa’n, ngue yɛ ɔ yo-ɔ?
?Ngue ti yɛ e kwla se kɛ Zezi yɛ ɔ ti Mesi’n niɔn?
NDƐ WIE MUN EKUN
Sa nga ti yɛ e si kɛ Zezi yɛ ɔ ti Mesi’n.
“?Mesi’n i su ndɛ nga Ɲanmiɛn Ndɛ’n kannin’n kle kɛ Zezi yɛ ɔ ti Mesi’n niɔn?” (jw.org su ndɛ)
Biblu’n seman kɛ wafa nga klɔ sran’m be yo naan b’a wu be mma mun’n, i sɔ yɛ Ɲanmiɛn yoli naan b’a wu Zezi-ɔ.
“?Ngue ti yɛ be flɛ Zezi kɛ Ɲanmiɛn i Wa-ɔ?” (jw.org su ndɛ)
Biblu’n seman kɛ Ɲanmiɛn ti atre nsan.
Kɛ bla kun sili Zezi i su ndɛ nga Biblu’n kan’n, ɔ ɲannin su ye.
“Zifu bla kun kannin like ng’ɔ yoli naan w’a su Zoova’n i ndɛ” (An Tinnge! nun ndɛ)
a Like suanlɛ 26 nin 27 bé wá kán sa nga ti yɛ ɔ fata kɛ be de klɔ sran mun’n, ɔ nin wafa nga Zezi yoli i sɔ’n i ndɛ.
b Nian Ndɛ Wie’m be nun Yiyilɛ 2 i nun. Ɔ kan blɛ nga i nun yɛ ɔ fata kɛ Zezi bla asiɛ’n su wa’n i ndɛ.