Fluwa’n nun kannganfuɛ’m be kosan mun

?Ngue yɛ ɔ yo maan ‘aofuɛ’m be bo ninnge kpakpa mun’ be ba “sua’n” m’ɔ ti Ɲanmiɛn sulɛ kpa’n i nzɔliɛ’n i nun ɔn?​—Aze 2:7.

Zoova sinnin i nuan ijɔfuɛ Aze lika seli kɛ: ‘Ń kéje aofuɛ’m be nun. Be bo ninnge kpakpa’m bé sɔ́n kpanngbangban. Ń yó maan min sua’n ɲán ɲrun.’ (Aze 2:7) Be nga be timan Zoova i nvle nunfuɛ’n, be yɛ be ti aofuɛ’n niɔn. Be bo ninnge kpakpa’n, yɛle sran kpa mun. ?‘Aofuɛ mun’ be nun kejelɛ sɔ’n yɛ ɔ yo maan ‘be bo ninnge kpakpa mun’ be ba Zoova sulɛ ɔ? Cɛcɛ.

Amun e kunndɛ like ng’ɔ keje nvlefuɛ’m be nun’n, ɔ nin i sin sa’n. Biblu’n waan ‘Nvlenvlefuɛ’m be plan. Be cici sran’m be wun ngbɛn.’ (Jue Mun 2:1) Sɛ sran uflɛ kunndɛ kɛ ɔ́ síe nvlenvlefuɛ mun’n, i sɔ’n keje be kpa liɛ su. Afin be kunndɛ kɛ be sielɛ’n ka lɛ titi. I sɔ’n ti yɛ be “cici sran’m be wun” ɔn. Sanngɛ i sɔ’n ti “ngbɛn.”

Sanngɛ like kun wa kejeli be nun. Like sɔ’n yɛle Ɲanmiɛn Sielɛ Blɛ’n mɔ w’a taka mɔ Zoova i Lalofuɛ’m be kɛn i ndɛ mɛn wunmuan nun’n. Sielɛ Blɛ sɔ mɔ Zezi Klist ti i famiɛn’n, ɔ́ wá “núnnún [sran’m be] famiɛn diwlɛ kun nga mun.” (Daniɛl 2:44) Ɲanmiɛn i klunngbɔ tulɛ ndɛ sɔ mɔ e kan’n, yɛ ɔ keje nvlefuɛ mun ɔn. (Ezai 61:2) Yɛ kɛ é bó jasin fɛ’n i kpa trá su m’ɔ́ trɛ́’n, nn laa li b’a kejeman. ?Sanngɛ, nvle’m be kejelɛ mɔ Aze 2:7 kɛnnin i ndɛ’n, ɔ ti nzɔliɛ like. ?Yɛle kɛ mennin sa?

Aze 2:6 waan: ‘Anannganman m’ɔ sie mɛn wunmuan’n waan yoo: “Ɔ ka kaan ń kéje ɲanmiɛn su lɔ nin asiɛ’n, ń kéje jenvie’n nin asiɛ’n.”’ Ndɛ sɔ mɔ Aze kannin’n, akoto Pɔlu boli su. Ɔ seli kɛ: ‘Laa kɛ ɔ́ íjɔ’n, asiɛ’n kejeli, sanngɛ siɛn’n ɔ se e kɛ: “Ń wá kéje asiɛ’n ekun nin ɲanmiɛn m’ɔ la nglo lɔ plaii’n kusu.” Kɛ ɔ se kɛ ɔ́ kéje i “Ekun’n” ɔ kle weiin kɛ i yɛ ɔ́ yí like nga ɔ keje be’n be lɛ ɔ, afin i yɛ ɔ yili be ɔ, naan nga w’a kejeman be’n [mɔ yɛle Ɲanmiɛn Sielɛ Blɛ’n] bé ká lɛ.’ (Ebre Mun 12:26, 27) Ndɛ sɔ’n kle weiin kpa kɛ ɔ ka kaan sa’n, Ɲanmiɛn wá kéje asiɛ wunmuan’n, yɛle kɛ ɔ́ núnnún andɛ mɛn liɛ’n kpɔkun mɛn’n wá yó i liɛ’n su.

Ɔ maan nán nvlenvle’m be kejelɛ’n mɔ be keje be’n ti yɛ maan sran kpa’m be fa be wun mantan Zoova ɔ. Sanngɛ Ɲanmiɛn Sielɛ Blɛ mɔ w’a taka’n i ndɛ mɔ i sufuɛ’m be kan’n, i ti ɔ. Ndɛ kunngba’n yɛ ɔ yo maan nvlenvle’m be keje ɔ. Nanwlɛ, kɛ sran kpa’m be ti ‘jasin fɛ’n m’ɔ ti anannganman’n’ i ndɛ’n, be ba Zoova i sulɛ.​—Sa Nglo Yilɛ 14:6, 7.

Ɲanmiɛn Sielɛ Blɛ jasin fɛ’n mɔ e bo’n, ɔ kan Ɲanmiɛn i klunngbɔ m’ɔ́ wá tú’n i ndɛ. Sanngɛ ɔ kan sran’m be ti delɛ ndɛ wie. (Ezai 61:1, 2) Kɛ e bo jasin fɛ’n sɔ’n, ɔ keje nvle mun. Sanngɛ ndɛ kunngba’n, ɔ yo maan sɛ é kwlá sé’n, nvle’m be bo ninnge kpakpa’m bé wá mánmán Zoova.