Maan e ka Zoova i kongo m’ɔ fa sasa e’n nun

“Anannganman’n nin nvle sɔ mun bé kó kún. Kɛ alɛ tɔ titi-ɔ ɔ fa yo’n, i su yɛ ɔ́ nían yó-ɔ.”​—ZKR. 14:3.

?AMUN KWLA YIYI NUN?

?Ngue yɛ ɔ ti “Olivie Oka’n” i nun m’ɔ kpacili’n i nzɔliɛ ɔ?

?Ngue yɛ ɔ ti “kongo’n” i nzɔliɛ ɔ? ?Ngue yɛ ɔ fata kɛ e yo naan y’a ka i nun titi ɔ?

?Ngue yɛle “nzue nyinma” m’ɔ tɛ, ɔ sonji’n? ?Yɛ wan mun yɛ i nɔnlɛ’n yo be ye ɔ?

1, 2. ?Alɛ kpakpa benin yɛ ɔ ka kaan sa’n, ɔ́ tɔ́ ɔ? ?Alɛ sɔ nun’n, ngue yɛ e su yoman?

AFUƐ nga be flɛ i 1938 Ɔktɔblu i le 30 su’n, Amlɛnkɛn’m be mɛn’n nun lɔ sran akpiakpi kpanngban be o lɛ bé tíe anɔ yilɛ kun aladio nun. Anɔ yilɛ sɔ nun’n, sran wie’m be yo aladio nun ijɔfuɛ. Be seli kɛ ninnge wie’m be fin ɲanmiɛn su lɔ lika kun mɔ be flɛ i Marsi i su naan b’a jra asiɛ’n su wa, b’a fa alɛ b’a yi i asiɛ’n su. Kɛ sran’m be tili i sɔ’n, be nun kaka be buli i nanwlɛ. Sanngɛ nn be dun mmua kan kleli be kɛ anɔ yɛ be su yi ɔ. Srɛ kunnin be dan. Wie’m be sasali be wun naan ninnge nga be buli i kɛ be jrali asiɛ’n su wa sakpa’n, b’a yoman be like.

² Ɔ ka kaan sa’n, alɛ kpakpa kun wá tɔ́. Sanngɛ sran’m be bumɛn i ndɛ. Alɛ sɔ’n yɛle nga Ɲanmiɛn nin sran tɛ’m bé wá kún’n. Be flɛ i Armagedɔn alɛ. Nán ngua dilɛ ndɛ ɔ. Afin Ɲanmiɛn bɔbɔ yɛ ɔ kɛnnin i sɔ ndɛ liɛ’n kleli e Biblu’n m’ɔ ti i nuan Ndɛ’n, i nun ɔn. (Ngl. 16:14-16) E su kunman alɛ sɔ’n wie. Sanngɛ Zoova fɛ́ i tinmin’n, ɔ́ yó abonuan sa fá dé e.

 3. ?Ɲanmiɛn nuan ijɔfuɛ’m be ndɛ benin yɛ é wá fá e ɲin síe su ɔ? ?Ngue ti yɛ ndɛ sɔ’n ti cinnjin man e andɛ ɔ?

³ E ɲrun lɔ sa’m be su ndɛ nga e kɛnngɛn i Zakari ndɛ tre 14 nun’n, ɔ kan Armagedɔn alɛ’n i ndɛ kpɛ sunman. Kannzɛ bɔbɔ be klɛli ndɛ sɔ’n w’a di afuɛ kɔe 2.500, sanngɛ ɔ ti cinnjin kpa man e andɛ. (Rɔm. 15:4) Kɛ Klist boli i famiɛn dilɛ bo afuɛ nga be flɛ i 1914 nun’n, sa ng’ɔ ɲannin Ɲanmiɛn i sran mun’n, Zakari i ndɛ sɔ’n kɛn i ndɛ. Asa ekun’n, ɔ kan sa dandan nga ɔ ka kaan sa’n bé jú’n, be ndɛ wie. Kpɛkun ɔ kan “kongo kun” nin “nzue nyinma” kun m’ɔ tɛ, ɔ sonji’n, be ndɛ. (Zkr. 14:4, 8) Like suanlɛ nga nun’n, é wá wún like nga kongo sɔ’n ti i nzɔliɛ’n, ɔ nin wafa nga Zoova i sufuɛ’m be kwla fia nun’n be wlɛ. Asa ekun’n, like ng’ɔ ti nzue m’ɔ sonji’n i nzɔliɛ’n, é wá kɛ́n i ndɛ wie. Kpɛkun é wá wún wafa nga nzue sɔ’n, ɔ kwla yo e ye’n. É wún kɛ ɔ fata kɛ e nɔn nzue sɔ’n. Sanngɛ kusu e bɔbɔ ba’n, e konvi sɔ́ i nɔnlɛ. Amun e nian.​—2 Piɛ. 1:19, 20.

ZOOVA I “CƐN’N” W’A BO I BO

 4. (a) ?Blɛ benin nun yɛ ‘Anannganman i cɛn’n’ boli i bo ɔ? (b) ?Afuɛ kpanngban lele naan afuɛ 1914 w’a ju’n, ndɛ benin yɛ Klistfuɛ nga be kpali be sieli be ngunmin’n be kan sinnin ɔn? ?Wafa sɛ yɛ politiki nin Ɲanmiɛn sulɛ wafa’m be su kpɛn’m be sɔli nun ɔn?

⁴ Zakari fluwa’n i ndɛ tre 14 bo i bo kɛ: “Anannganman i ya cɛn’n w’a mantan koko.” (An kanngan Zakari 14:1, 2 nun.) ?Cɛn benin yɛle sɔ’n? Cɛn sɔ’n i kunngba’n yɛ be flɛ i “E Min’n i cɛn’n” niɔn. Kɛ Zezi yoli Ɲanmiɛn Sielɛ’n i su Famiɛn’n afuɛ nga be flɛ i 1914 nun’n ɲanmiɛn su lɔ’n, yɛ cɛn sɔ’n boli i bo ɔ. (Ngl. 1:10; 11:15) Afuɛ kpanngban kpa ka naan blɛ sɔ’n w’a ju’n, Klistfuɛ nga be kpali be sieli be ngunmin’n be kan sinnin kɛ afuɛ’n sɔ nun’n, “be bɔ be ti-man Zuif’n [...] be blɛ liɛ’n” i nuan jú. Naan kɛ ɔ́ wá fɛ́ i lɛ’n, wafa nga lika’n wá sánngan asiɛ’n su’n, i wunsu nian juman le. (Lik 21:24) ?Be mɔ be timan Zuifu’n yɛle kɛ be nga be kpɔ Ɲanmiɛn i sran mun’n, be sɔli jasin sɔ’n i nun klanman? Cɛcɛ. I tɛ bɔbɔ’n, politiki nin Ɲanmiɛn sulɛ wafa’m be su kpɛn’m be yoli Klistfuɛ kpa sɔ’m be fiaan, kpɛkun be kleli be ɲrɛnnɛn. Sanngɛ Ɲanmiɛn m’ɔ kwla sa kwlaa yo’n, i yɛ be yoli i sɔ ɔ. Afin Klistfuɛ nga be kpali be sieli be ngunmin’n, be ti Ɲanmiɛn Sielɛ’n i janunfuɛ.​—Ebr. 12:22, 28.

5, 6. (a) ?Ngue yɛ be nga be kpɔ Ɲanmiɛn i sran mun’n, be yoli ɔ? (b) ?Wan mun yɛ be flɛ be kɛ ‘be nga mun’n’ niɔn?

⁵ Zakari kannin like nga nvlenvle’m bé wá yó’n i ndɛ. Ɔ seli kɛ: “Bé fá klɔ’n.” “Klɔ’n” mɔ yɛle Zerizalɛmu’n, ɔ ti Ɲanmiɛn Sielɛ’n i nzɔliɛ. Be nga be kpali be sieli be ngunmin’n be onga mɔ be o asiɛ’n su wa’n, be ti klɔ sɔ’n i “su lɔ ba.” (Fil. 3:20) Alɛ dan klikli’n nun’n, sran’m be ‘fali’ klɔ’n. Yɛle kɛ be trali be nga be dun Zoova i anuannzɛ’n i ɲrun mmua’n, be wlali be bisua Amlɛnkɛn’m be lɔ klɔ nga be flɛ i Atlanta i su. Ɲanmiɛn i sran’m be kpɔfuɛ sɔ’m be yoli wlɛ, yɛ be buli Klistfuɛ nga be kpali be sieli be ngunmin’n be lufle. Be waan nán be wun be fluwa wie mun kun, kpɛkun be kunndɛli kɛ bé jrán jasin fɛ bolɛ junman’n. I sɔ mɔ be yoli’n, ɔ ti kɛ b’a fa klɔ’n i su “sua’m be nun ninnge kpakpa mun” sa.

⁶ Sran sɔ mɔ be le kwlalɛ kpa’n, be ɲin cili Ɲanmiɛn i sran mun, be kleli be ɲrɛnnɛn, yɛ be tɔnnin be suɛn. Ɔ nin i sɔ ngba’n, b’a kwlá nunnunman Ɲanmiɛn i sulɛ kpafuɛ’n. Afin be nga be kpali be sieli be ngunmin’n b’a yaciman Ɲanmiɛn sulɛ le. Kɛ nga Zakari fa kannin sa’n, be yɛ be flɛ be kɛ ‘be nga mun’n,’ niɔn. Be yɛ b’a kplinman su kɛ be fa be wɔ, mɔ be ‘kali klɔ’n su lɛ’n’ niɔn.

 7. ?Ajalɛ kpa benin yɛ Klistfuɛ nga be kpali be sieli i ngunmin’n, be kleli e ɔ?

⁷ ?Lele nin i kɛ alɛ dan klikli’n wie’n, nn ndɛ mɔ Zakari kannin’n i kwlaa w’a kpɛn su? Cɛcɛ. Ɲrɛnnɛn mɔ Zakari waan bé klé Ɲanmiɛn i sufuɛ mun’n w’a wieman. (Ngl. 12:17) Sa ng’ɔ juli alɛ dan nɲɔn su’n nun’n, ɔ yi i sɔ liɛ’n i nglo. Wafa nga Klistfuɛ nga be kpali be sieli be ngunmin’n be trali be anwlɛn blɛ sɔ nun’n, ɔ wla e fanngan andɛ, naan sa kwlaa nun’n, y’a tra e anwlɛn. Sa sɔ’m be nun wie yɛle srilɛ nga e Ɲanmiɛn sulafilɛ ti’n, e awlo lɔ’n, e junman su lɔ’n yɛ e suklu lɔ’n, sran be kwla sri e’n. (1 Piɛ. 1:6, 7) Kan kwlaa nga Ɲanmiɛn i sufuɛ kpa’m be tran lɛ’n, b’a fua kpa kɛ bé ‘bo yó kun kpa’ naan be su ‘lo-man be wun man-man be kpɔfuɛ mun.’ (Fil. 1:27, 28) ?Sanngɛ nin yɛ Zoova i sufuɛ’m be ɲan fiawlɛ mɛn nga i nunfuɛ’m be kpɔ be yɛ’n i nun ɔn?​—Zan 15:17-19.

ZOOVA KPƐ “KONGO KUN”

 8. (a) ?Biblu’n nun’n, wie liɛ ngue yɛ be fa oka’n be sunnzun i ɔ? (b) ?Like benin yɛ “Olivie Oka b’ɔ o Zerizalɛm wun” lɛ’n ti i nzɔliɛ ɔ?

⁸ Zakari i ndɛ nun’n, e wunnin kɛ “klɔ’n,” yɛle kɛ Zerizalɛmu’n, ɔ ti Ɲanmiɛn Sielɛ’n i nzɔliɛ. ?Ɔ maan like benin yɛ “Olivie Oka b’ɔ o Zerizalɛm wun” lɛ’n, ɔ ti i nzɔliɛ ɔ? ?Wafa sɛ yɛ ɔ́ “kpáci i afiɛn” m’ɔ́ káci oka nɲɔn ɔn? (An kanngan Zakari 14:3-4 nun.) Biblu’n Traduction du monde nouveau kɛn i Zakari 14:5 nun kɛ: “Kpɛkuun amún wánndi bé kɔ́ min oka’m be afiɛn kongo’n nun lɔ.” ?Ngue ti yɛ Zoova flɛ oka nɲɔn sɔ mun’n, ‘min oka’ ɔ? Biblu’n nun’n, wie liɛ’n be fa awa annzɛ famiɛn diwlɛ be sunnzun oka. Asa kusu’n, be kan kɛ Ɲanmiɛn i oka’n sasa sran, kpɛkun ɔ mɛn i alaje. (Jue. 72:3; Eza. 25:6, 7) Ɔ maan olivie oka m’ɔ o Zerizalɛm wun lɛ’n, ɔ ti sielɛ mɔ Zoova sie like kwlaa’n i nzɔliɛ.

 9. ?Kɛ Zakari i ndɛ’n se kɛ olivie oka’n ‘kpaci i afiɛn’n,’ i bo yɛle sɛ?

⁹ Zakari i ndɛ’n se kɛ olivie oka’n ‘kpaci i afiɛn.’ ?I bo yɛle sɛ? Yɛle kɛ Zoova bɔbɔ m’ɔ ti Famiɛn’n, ɔ kpɛ famiɛn diwlɛ uflɛ kun ba naan ɔ́ dí junman ngunmin kun. Famiɛn diwlɛ sɔ’n m’ɔ ti Ɲanmiɛn bɔbɔ liɛ wie’n, ɔ fa wlali Zezi Klist sa nun. I ti yɛ kɛ “Olivie Oka’n” i nun kpaci m’ɔ kaci oka nɲɔn’n, Zoova flɛ oka nɲɔn sɔ’n, ‘min oka’n’ niɔn.

10. ?“Kongo” ng’ɔ o oka nɲɔn’m be afiɛn’n ti like benin nzɔliɛ?

¹⁰ Blɛ mɔ oka sɔ m’ɔ ti nzɔliɛ like’n i nun kpaci mɔ i bue kun kɔ nglo lɔ lika’n nun yɛ i bue uflɛ kɔ ngua lɔ lika’n nun’n, Zoova i ja’m be jinnjin oka bue nɲɔn’m be su. Kɛ oka’n i nun kpaci sɔ’n “kongo kun” fite Zoova i ja’m be fiɛn. Kongo sɔ’n ti sasalɛ nga Zoova sasa be nga be nin i nanti klanman’n i nzɔliɛ. Sran kun kwla ko fia kongo kun m’ɔ o oka nɲɔn be afiɛn’n nun. I wafa kunngba’n, Zoova sie like kwlakwla. I Wa’n kusu m’ɔ ti Mɛsi’n, ɔ ti Famiɛn. Kɛ Zoova i sufuɛ’m be lo be wun man be nɲɔn’n, ɔ ti kɛ b’a ko fia kongo kun nun sa, ɔ maan Zoova sasa be. Zoova su kplinman su le kɛ be nunnun i sulɛ kpafuɛ’n i osu. ?Blɛ benin nun yɛ olivie oka’n i nun kpacili ɔ? Kɛ Mɛsi i Sielɛ’n takali ɲanmiɛn su lɔ afuɛ nga be flɛ i 1914 nun’n, yɛ i nun kpacili ɔ. Ɲanmiɛn Ndɛ’n kunngba’n se kɛ: “Kpɛkuun amún wánndi bé kó fía oka bue nɲɔn sɔ’m be afiɛn kongo’n nun.” (Zkr. 14:5, NW) ?Blɛ benin nun yɛ Ɲanmiɛn i sufuɛ kpa’m be boli kongo’n nun lɔ fialɛ bo ɔ?

KONGO NUN LƆ FIALƐ’N W’A BO I BO

11, 12. (a) ?Blɛ benin nun yɛ be boli kongo’n nun lɔ ko fialɛ’n i bo ɔ? (b) ?Ngue yɛ ɔ kle kɛ Zoova sɛsɛ i nvle’n niɔn?

¹¹ Zezi seli i sɔnnzɔfuɛ’m be kɛ: “Bé wá fá amun wlá nyrɛnnɛn nun, bé kún amun, yɛ nvle’n kwlaa bé kpɔ́ amun n dunman nun.” (Mat. 24:9) Mɛn’n i blɛ kasiɛn nga nun’n, kɛ ɔ fɛ i afuɛ nga be flɛ i 1914 nun’n, ɲrɛnnɛn sɔ’n w’a yo dan kpa. Alɛ dan klikli nun’n, Klistfuɛ nga be kpali be sieli be ngunmin’n, be kpɔfuɛ’m be yoli be tɛtɛ dan. Sanngɛ b’a kwlá jranman Ɲanmiɛn i sulɛ kpafuɛ’n. Afuɛ nga be flɛ i 1919 nun’n, Ɲanmiɛn i nvle’n ɲɛnnin i ti Babilɔni klɔ dan’n, mɔ yɛle Ɲanmiɛn sulɛ wafa ng’ɔ timan su’n, i sa nun. (Ngl. 11:11, 12)a Blɛ sɔ’n nun yɛ Ɲanmiɛn i sufuɛ kpa’m be boli kongo’n nun lɔ ko fialɛ’n bo ɔ.

¹² Kɛ ɔ fɛ i afuɛ nga be flɛ i 1919 nun’n, asiɛ’n i bue kwlaa su’n, Zoova sasa i sufuɛ kpa mun. Afuɛ nga be sinnin sɔ’n be nun’n, mɛn nun awa kpanngban be kunndɛli kɛ bé yó naan Zoova i Lalofuɛ’m be yaci jasin fɛ’n i bolɛ, kpɛkun be waan nán be wun be fluwa’m be kun. Be te yo i sɔ nvle wie’m be nun bɔbɔ. Maan awa sɔ’m be yo sɛ yo sɛ, be su kwlá nunnunman Ɲanmiɛn i sulɛ kpa’n le. Zoova mɔ sran fi kwlá jrɛnmɛn i ɲrun’n, ɔ́ sɛ́sɛ́ i nvlefuɛ mun titi.​—Mml. 11:2.

13. ?Ngue yɛ ɔ fata kɛ e yo naan y’a ka Zoova i kongo m’ɔ sasa e’n nun ɔn? ?Yɛ ngue ti yɛ ɔ ti cinnjin kpa kɛ dɔ nga su’n, e ka kongo’n nun ɔ?

¹³ Sɛ e mantan Zoova titi naan e ka nanwlɛ atin’n su’n, ɔ nin i Wa Zezi Klist be su yiman e ase le. Ɲanmiɛn su manman like fi atin naan ɔ ‘de e i sa nun.’ (Zan 10:28, 29) Like kwlaa ng’ɔ fata kɛ e ɲɛn i naan y’a kwla nanti sein naan Zoova m’ɔ ti like kwlaa i siefuɛ’n, ɔ nin i Wa’n m’ɔ ti Mɛsi’n, b’a sie e’n, Zoova fa man e. Ɲrɛnnɛn dan’n mɔ w’a mantan kpa yɛ’n, i nun yɛ é wá kúnndɛ kɛ be uka e kpa’n niɔn. Ɔ maan dɔ nga su’n, ɔ ti cinnjin kpa kɛ e ka Zoova i kongo m’ɔ sasa e’n nun.

CƐN NGA ƝANMIƐN NIN ‘BÉ KÓ KÚN’N’

14, 15. ?Cɛn nga Zoova nin i kpɔfuɛ’m bé kún’n, be nga be nunman i kongo’n m’ɔ sasa sran’n i nun’n, be liɛ yó sɛ?

¹⁴ Lele nin i kɛ mɛn nga fá wíe’n, Satan klé Zoova i sufuɛ’m be ɲrɛnnɛn trá su. Ɔ ka kaan sa’n, ɔ́ wá fá i alɛ kasiɛn’n wlá Ɲanmiɛn i sufuɛ’m be sin. Blɛ sɔ nun’n, Zoova nin i kpɔfuɛ mɔ be kle i sufuɛ’m be ɲrɛnnɛn’n bé kún, yɛ ɔ́ núnnún be. Kɛ ɔ ko yo sɔ’n, Zoova su manman Satan i atin kɛ ɔ jrɛn i ɲrun ekun. Cɛn sɔ’n nun’n, Zoova m’ɔ sie nglo nin asiɛ’n, ɔ́ klé kɛ ɔ ti alɛ kunfuɛ dan. Ɔ́ yí i wun nglo trá wafa nga “kɛ alɛ tɔ titi-ɔ ɔ fa yo’n.”​—Zkr. 14:3.

¹⁵ ?Cɛn nga Zoova nin i kpɔfuɛ’m bé kún’n, be nga be nunman i kongo’n m’ɔ sasa sran’n i nun’n, be liɛ yó sɛ? Zakari waan “i sɔ blɛ nun’n, lika’n su kpajaman” be su. Yɛle kɛ Ɲanmiɛn klun su jɔman be wun. Zakari kan gua su kɛ like nga Zoova fá yó i kpɔfuɛ mun’n, ɔ́ fá yó “be nnɛn kpanngɔ mun nin be aflunmun wafawafa mun, ɔ nin be nyɔnngɔnmɛn mun” wie. Yɛle kɛ be alɛ kunlɛ ninnge mun be yoman like fi. Asa ekun’n, Zoova wá ‘fá [sa kun] wlá be nun.’ Ɔ́ yó maan be nyinma’n nin be taaman’n “kplɔ́.” Sɛ tukpaciɛ kpakpa sa o, annzɛ kusu ɲanndra nun ndɛ o, e kwlá kɛnmɛn i trele sa. Sanngɛ nga e si i’n, yɛle kɛ be su kwlá yoman e abɔlɛ, yɛ be su kwlá kanman Ɲanmiɛn i wun ndɛ tɛ. (Zkr. 14:6, 7, 12, 15) “Asiɛ’n su famiɛn’m be nin be alɛfuɛ mun” bé jrán Satan sin. Sanngɛ kan kwlaa nga be o asiɛ’n su’n, Ɲanmiɛn núnnún be. (Ngl. 19:19-21) ‘Sran nga Anannganman maan bé wú cɛn sɔ’n nun’n, bé gúa lɛ sa. Bé fɛ́ i asiɛ’n i bue kun fá jú i bue uflɛ su.’​—Zer. 25:32, 33.

16. ?Kosan benin yɛ ɔ fata kɛ e fa usa e wun ɔn? ?Kɛ ɲrɛnnɛn dan’n wá jú’n, ngue yɛ ɔ́ wá fáta kɛ e yo ɔ?

¹⁶ Alɛ kwlaa fa afɛ yi i sran’m be su. Be nga alɛ’n nun bɔbɔ be kwla’n, be fɛ wie. Wie liɛ’n, awe kpɛn. Sran’m be ninnge’m be fi be sa. Annzɛ be ɲanman be ti be yoman be ninnge mun kɛ laa’n sa kun. ?Sɛ i sɔ sa ɲan e’n, ngue yɛ é yó ɔ? ?É úsu? ?E sa sin búbú e, yɛ e wla su tranman e ɲrun lɔ ninnge kpakpa nga Zoova waan ɔ́ yó mán e’n be su kun? ?É yáci Zoova sulɛ? Kɛ ɲrɛnnɛn dan’n wá jú’n, ɔ́ wá fáta kɛ e ka Zoova i kongo’n nun titi. Yɛle kɛ e fa e wun e mantan Zoova kpa naan e lafi i su kɛ ɔ́ sásá e.​—An kanngan Abakik 3:17, 18 nun.

‘NZUE NYINMA KUN TƐ́, Ɔ́ SÓNJI’

17, 18. (a) ?Ngue yɛle “nzue nyinma” m’ɔ tɛ, ɔ sonji’n? (b) ?“Jenvie ng’ɔ o wia afiliɛ” lɔ’n nin “jenvie ng’ɔ o wia atɔliɛ” lɔ’n, be ti ninnge benin’m be nzɔliɛ? (c) ?Ngue yɛ y’a fua kpa kɛ é yó ɔ?

¹⁷ “Nzue nyinma”m’ɔ tɛ, ɔ sonji’n, kɛ Armagedɔn alɛ’n ko wie’n, ɔ́ fín Klist i Famiɛn diwlɛ’n nun lɔ sónji kpuu tititi. “Nzue nyinma” sɔ m’ɔ tɛ, ɔ sonji’n, yɛle ninnge kwlaa nga Zoova yo man e naan y’a kwla ɲan anannganman nguan’n. “Jenvie ng’ɔ o wia afiliɛ lɔ” lika nun’n, yɛle jenvie ng’ɔ ti njin nzue klakla’n. Yɛ “jenvie ng’ɔ o wia atɔliɛ lɔ’n,” yɛle Mediterane jenvie’n. Be fa jenvie nɲɔn sɔ’n kan sran’m be ndɛ. Yɛle kɛ jenvie ng’ɔ ti njin nzue klakla’n, ɔ ti be kwlaa nga bé wá cɛ́n be’n, be nzɔliɛ. Yɛ Mediterane jenvie’n, ɔ ti “sran kpanngban kpa” mɔ bé fín Armagedɔn alɛ’n nun fíte’n be nzɔliɛ. Afin jenvie sɔ’n i liɛ’n, ninnge mɔ be le nguan’n, be o nun. (An kanngan Zakari 14:8, 9 nun; Ngl. 7:9-15) Kɛ be sran akpasua nɲɔn sɔ’n, bé wá nɔ́n “nzue ba bɔ i nun nzue’n man nguan’n,” fɔ’n su tranman be nun kun, yɛ bé ɲán anannganman nguan.​—Ngl. 22:1, 2.

¹⁸ Kɛ Zoova wá núnnún mɛn tɛ nga’n, ɔ́ sɛ́sɛ́ i sufuɛ mun, yɛ ɔ́ fá be kɔ́ i mɛn uflɛ mɔ i nun lɔ’n, be yoman sa tɛ’n i nun. Kannzɛ nvlenvle’n kwlaa be kpɔ e’n, sanngɛ y’a fua kpa kɛ é trán Ɲanmiɛn i Sielɛ’n bo naan é ká Zoova i kongo m’ɔ fa sasa e’n nun titi.

[Ja ngua lɛ ndɛ’n]

[Foto, bue 17]

[Foto, bue 21]

Maan e fua cinnjin kpa kɛ é ká Zoova i kongo m’ɔ fa sasa e’n nun.