Kɛ Zezi kannin ndɛ sɔ’n, gladi difuɛ kun m’ɔ jin lɛ’n, ɔ kpacili Zezi i ɲrun. Kpɛkun ɔ seli kɛ: “?Kɛ a tɛ Ɲanmiɛn ɲrun jranfuɛ’m be su kpɛn’n i su sa?” Sanngɛ Zezi si kɛ w’a yoman sa tɛ. Ɔ maan ɔ tɛli i su kɛ: “Sɛ ndɛ nga n kannin’n timan su’n, kan kle min. ?Sanngɛ kusu sɛ ndɛ nga n kannin’n ti su’n, ngue ti yɛ a fin min like-ɔ?” (Zan 18:22, 23) I sin’n, Anin fali Zezi ko mannin Kaifu m’ɔ ti i sia’n.

Zuifu’m be Jɔlɛ difuɛ dandan’m be kwlaa be ti yiali Kaifu i awlo lɔ. Sran sɔ mun yɛle Ɲanmiɛn ɲrun jranfuɛ dan’n nin nvle su kpɛn mun, ɔ nin mmla klɛfuɛ mun. Nanwlɛ, ɔ fataman kɛ be di Zezi i jɔlɛ kɔnguɛ sɔ’n nun, afin ɔ ti Delɛ cɛn. Sanngɛ b’a niɛnmɛn i sɔ’n. Afin be kunndɛli kpa kɛ bé gúa sa tɛ nga be su yo’n i bo.

Jɔlɛ difuɛ dandan sɔ’m be kwlaa be kpɔ Zezi. Yɛle kɛ kɛ Lazaa wuli mɔ Zezi cɛnnin i’n, be nuan sɛli su kɛ bé kún Zezi. (Zan 11:47-53) Kusu koko nun wa’n, Ɲanmiɛn ɲrun jranfuɛ’m be su kpɛn mun nin nvle su kpɛn’m be cicili kɛ bé trá Zezi naan bé kún i. (Matie 26:3, 4) Ɔ maan ka naan b’a di Zezi i jɔlɛ bɔbɔ’n, be nuan w’a dun mmua sɛ su kɛ bé kún i.

Zɛtsemane fie’n nun lɔ’n, kɛ be trali Zezi’n, srɛ kunnin i akoto mun. Ɔ maan be yacili i lɛ be wanndili. Sanngɛ be nun nɲɔn be wa sali be sin. Be yɛle Piɛli nin “Zezi i sɔnnzɔnfuɛ’m be nun kun ekun.” Akoto Zan-ɔn. (Zan 18:15; 19:35; 21:24) Atrɛkpa’n, kɛ bé fá Zezi kɔ́ Anin i awlo lɔ’n, yɛ Piɛli nin Zan be ko toli be atin’n nun-ɔn. Kɛ Anin seli kɛ be fa Zezi wɔ Kaifu m’ɔ ti Ɲanmiɛn ɲrun jranfuɛ dan’n i awlo lɔ’n, be suli be su. Sanngɛ b’a mantanman be lɔ. Afin srɛ kun be. Be seli be wun kɛ sran’m be kwla kun be. Sanngɛ kusu be Min’n i ndɛ lo be.