-
?Wafa sɛ yɛ be bo jasin fɛ’n mɛn wunmuan’n nun-ɔn?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 21
?Wafa sɛ yɛ be bo jasin fɛ’n mɛn wunmuan’n nun-ɔn?
Ɔ cɛ kan’n, Zoova wá yó maan e su sa’n kwlaa ɔ́ wíe. Ɔ ti jasin fɛ kun m’ɔ fata kɛ sran kwlaa ti-ɔ. Zezi seli i sɔnnzɔnfuɛ’m be kɛ be bo jasin fɛ sɔ’n kle sran kwlaa. (Matie 28:19, 20) ?Wafa sɛ yɛ Zoova i Lalofuɛ’m be kle kɛ be fa ndɛ sɔ’n su-ɔ?
1. ?Wafa sɛ yɛ ndɛ ng’ɔ o Matie 24:14 nun’n kpɛn su andɛ-ɔ?
Zezi seli kɛ: “Bé wá bó Ɲanmiɛn Sielɛ’n i jasin fɛ nga asiɛ wunmuan’n su.” (Matie 24:14) Zoova i Lalofuɛ’m be tu be klun be di junman cinnjin sɔ’n. Be bo jasin fɛ’n mɛn wunmuan’n nun aniɛn 1.000 tra su nun. Ɔ fata kɛ be mian be ɲin kpa naan b’a kwla di junman sɔ’n mɛn wunmuan’n nun. Asa ekun’n, Zoova i fanngan nun ti yɛ e kwla di junman sɔ’n niɔn.
2. ?Ngue yɛ e yo naan y’a kwla bo jasin fɛ’n y’a kle sran mun-ɔn?
Lika kwlaa nga e to sran’m be lɛ’n e bo jasin fɛ’n e kle be. Kɛ Klisifuɛ klikli’m be sa’n, e kusu e bo jasin fɛ’n “awlo’m be nun.” (Sa Nga Be Yoli’n 5:42) I sɔ mɔ e yo’n ti’n afuɛ kwlaa’n, e bo jasin fɛ’n e kle sran miliɔn kpanngban. Kɛ mɔ nán blɛ kwlaa nun yɛ sran’m be o awlo’n ti’n, e bo jasin fɛ’n nzra nun wie. Blɛ kwlaa nga e ɲɛn i wun atin’n e kan like nga Zoova wá yó’n i ndɛ e kle e wiengu mun.
3. ?Wan yɛ ɔ fata kɛ ɔ bo jasin fɛ’n niɔn?
Ɔ fata kɛ Klisifuɛ kpa’m be kwlaa be bo jasin fɛ’n. Junman sɔ’n i dilɛ’n ti e cinnjin kpa. E tinuntinun e mian e ɲin e bo jasin fɛ’n, afin e si kɛ i sɔ’n kwla uka sran mun naan b’a ɲan nguan. (Kanngan 1 Timote 4:16 nun.) Junman sɔ’n i dilɛ’n nun’n be tanninman e kalɛ, afin Biblu’n se kɛ: “N fɛ i sɔ yolɛ’n n cɛli amun, amun kusu nán amun de like fi.” (Matie 10:7, 8) Nán sran ngba yɛ ɔ sɔ jasin nga e bo’n nun-ɔn. Ɔ nin i sɔ’n ngba’n, e mian e ɲin e bo jasin fɛ’n titi. Afin ɔ o Zoova i sulɛ’n nun wie. Yɛ i sɔ’n yo maan i klun jɔ.
SI NDƐ’N NUN KPA EKUN
É wá fá e ɲin é síe i wafa nga Zoova i Lalofuɛ’m be mian be ɲin be bo jasin fɛ’n mɛn wunmuan’n nun’n, ɔ nin wafa nga Zoova suan be bo i sɔ yolɛ’n nun’n be su.
Mɛn wunmuan’n nun jasin fɛ bolɛ’n: (A) Kosta Rika, (B) Etazinin, (C) Benɛn, (D) Tailandi, (E) Yapu, (F) Suɛdi
4. E mian e ɲin kpa naan y’a bo jasin fɛ’n y’a kle sran kwlaa
Zoova i Lalofuɛ’m be mian be ɲin naan b’a bo jasin fɛ’n b’a kle sran mun lika kwlaa. An bo VIDEO’N, i sin’n an koko kosan yɛ’n i su yalɛ.
?Kɛ a wun kɛ Zoova i Lalofuɛ’m be mian be ɲin be bo jasin fɛ’n, i sɔ’n yo wɔ sɛ?
An kanngan Matie 22:39 nin Rɔmunfuɛ Mun 10:13-15 nun, i sin’n an koko kosan yɛ’m be su yalɛ:
?Wafa sɛ yɛ jasin fɛ nga e bo’n, ɔ kle kɛ e klo e wiengu mun-ɔn?
?Wafa sɛ yɛ Zoova bu be nga be bo jasin fɛ’n niɔn? —Nian ndɛ mma 15 nun.
5. E nin Ɲanmiɛn yɛ e di junman’n niɔn
Ninnge sunman be kle kɛ Zoova uka e junman sɔ’n i dilɛ’n nun. I wie yɛle kɛ Nuvɛli Zelandi lɔ’n, cɛn kun’n kɛ aniaan kun mɔ be flɛ i kɛ Pɔlu’n ɔ́ bó jasin fɛ awloawlo’m be nun’n, ɔ toli bla kun. Kusu nn cɛn kunngba sɔ’n nun’n, bla’n srɛli Zoova naan sran kun wa niɛn i osu. Pɔlu seli kɛ: “Kɛ bla’n wieli srɛ m’ɔ dɔ nsan sinnin’n, yɛ n boboli i anuan’n niɔn.”
An kanngan 1 Korɛntifuɛ Mun 3:9 nun, i sin’n an koko kosan yɛ’n i su yalɛ:
?Wafa sɛ yɛ sa ng’ɔ juli Nuvɛli Zelandi lɔ’n, ɔ kle kɛ Zoova uka e jasin fɛ bolɛ’n nun-ɔn?
An kanngan Sa Nga Be Yoli’n 1:8 nun, i sin’n an koko kosan yɛ’n i su yalɛ:
?Ngue ti yɛ e kwla se kɛ Zoova i fanngan nun ti yɛ e kwla bo jasin fɛ’n niɔn?
Nian nga wie
Aɲia nga e yo i lemɔcuɛ afiɛn’n i bo’n, be kle e wafa nga e kwla bo jasin fɛ’n. ?Sɛ w’a tran aɲia sɔ’m be nun kun bo le’n, wafa sɛ yɛ a bu like nga be kle e’n niɔn?
6. Ɲanmiɛn seli e kɛ e bo jasin fɛ’n titi
Klisifuɛ klikli’m be blɛ su’n, sran wie’m be kunndɛli kɛ bé yó naan Zezi i sɔnnzɔnfuɛ’m be yaci jasin fɛ’n i bolɛ. Klisifuɛ klikli’m be “jrannin mmla’n su” be kplili be ti naan b’a bo jasin fɛ’n titi. (Filipufuɛ Mun 1:7) I kunngba’n yɛ Zoova i Lalofuɛ’m be yo i andɛ-ɔ.a
An kanngan Sa Nga Be Yoli’n 5:27-42 nun, i sin’n an koko kosan yɛ’n i su yalɛ:
?Ngue ti yɛ e yaciman jasin fɛ’n i bolɛ-ɔ?—Nian ndɛ mma 29, 38, nin 39 nun.
SRAN KUN KWLA USA Ɔ KƐ: “?Ngue ti yɛ Zoova i Lalofuɛ’m be bo jasin fɛ’n awloawlo’m be nun-ɔn?”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Zezi seli i sɔnnzɔnfuɛ’m be kɛ be bo jasin fɛ’n be kle nvlenvle kwlaa nunfuɛ mun. Zoova ukɛ i sufuɛ mun naan b’a kwla di junman sɔ’n.
Ndɛ’n i nun flanlɛ
?Wafa sɛ yɛ be bo jasin fɛ’n mɛn wunmuan’n nun-ɔn?
?Wafa sɛ yɛ jasin fɛ nga e bo’n kle kɛ e klo e wiengu mun-ɔn?
?A bu i kɛ jasin nga e bo’n ɔ kwla man e aklunjɔɛ? ?Ngue ti yɛ a bu i sɔ-ɔ?
NDƐ WIE MUN EKUN
Wafa nga Zoova i Lalofuɛ’m be bo jasin fɛ’n klɔ dandan’m be su’n.
Wafa nga Zoova i Lalofuɛ’m be bo jasin fɛ’n kle be nga sa wie ti’n be tuli be nvle’n nun’n.
Be kan Ɲanmiɛn ndɛ’n be kle be nga sa wie ti’n be tuli be nvle’n nun’n (5:59)
Aniaan bla kun kannin aklunjɔɛ ng’ɔ di i jasin fɛ bolɛ’n nun’n i ndɛ.
Blɛ wie nun’n, kɛ e ɔli jɔlɛ difuɛ’m be ja su’n be seli kɛ e ndɛ yo fɛ. I sɔ’n ti’n, jasin fɛ bolɛ’n ɔli i ɲrun.
“Jasin bofuɛ’m be kplili be ti jɔlɛ difuɛ’m be ja su” (Fluwa Ɲanmiɛn Sielɛ’n wo lɛ’n! i nun ndɛ)
a Ɲanmiɛn yɛ ɔ se kɛ e bo jasin fɛ’n niɔn. Ɔ maan e minndɛman kɛ awa’m be man e atin ka naan y’a bo jasin fɛ’n.
-
-
Batɛmun yolɛ’n ti kpa dan!A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 23
Batɛmun yolɛ’n ti kpa dan!
Sɛ sran kun waan ɔ́ káci Klisifuɛ’n ɔ fata kɛ be yo i batɛmun. (Kanngan Matie 28:19, 20 nun.) ?Wafa sɛ yɛ ɔ fata kɛ be yo sran kun i batɛmun-ɔn? ?Yɛ ngue yɛ ɔ fata kɛ sran kun yo naan b’a kwla yo i batɛmun-ɔn?
1. ?Wafa sɛ yɛ ɔ fata kɛ be yo sran kun i batɛmun-ɔn?
Kɛ be se kɛ “batɛmun’n,” ɔ fin Glɛki nun ndɛ kun mɔ i bo’n yɛle “nzue nun mlɔnlɛ’n.” Kɛ bé yó Zezi i batɛmun’n be fɛli i mlɔnnin Zurdɛn nzue ba’n nun, kpɛkun i sin’n “ɔ fin nzue’n nun fiteli.” (Marki 1:9, 10) I wafa kunngba’n, Klisifuɛ kpa’m be kusu’n kɛ bé yó be batɛmun’n be fa be mlɔn nzue nun.
2. ?Kɛ be yo sran kun i batɛmun’n ngue yɛ i sɔ’n kle-ɔ?
Kɛ be ko yo sran kun i batɛmun’n, i sɔ’n kle kɛ w’a fɛ i wun w’a man Zoova. ?Wafa sɛ yɛ sran kun fɛ i wun man Ɲanmiɛn-ɔn? Kwlaa naan b’a yo sran kun i batɛmun’n, ɔ srɛ Zoova se i kɛ ɔ kunndɛ kɛ ɔ́ sú i titi. Ɔ ta Zoova i nda kɛ ɔ́ sú i kunngba cɛ, naan i klun sa yolɛ’n ɔ́ yó i cinnjin trá like kwlaa. Ɔ fa ajalɛ kɛ ɔ́ ‘ klɛ́n i wun naan ɔ́ sú Zezi su titi.’ Yɛle kɛ ɔ́ nían like ng’ɔ kleli’n nin i ajalɛ’n su. (Matie 16:24) Kɛ m’ɔ fɛli i wun mannin Ɲanmiɛn mɔ be yoli i batɛmun’n ti’n, ɔ nin Zoova be afiɛn mantan kpa. Yɛ ɔ nin be nga be su Zoova’n be afiɛn mantan kpa wie.
3. ?Ngue yɛ ɔ fata kɛ sran kun yo naan b’a kwla yo i batɛmun-ɔn?
Kɛ ɔ ko yo naan b’a kwla yo ɔ batɛmun’n ɔ ti cinnjin kɛ a suan Zoova i su like naan a lafi i su kpa. (Kanngan Ebre Mun 11:6 nun.) Sɛ a suan Zoova i su like naan a lafi i su’n, á kló i kpa ekun trá laa’n. I sɔ’n yó maan á kúnndɛ kpa kɛ á kɛ́n i ndɛ klé ɔ wiengu mun. Yɛ á nánti i mmla’m be su. (2 Timote 4:2; 1 Zan 5:3) Kɛ sran kun ‘i nzuɛn’n manman Zoova mɔ Zoova i klun jɔ i wun kpa’n,’ ɔ kwla se kɛ ɔ́ fɛ́ i wun mán Ɲanmiɛn naan be yo i batɛmun.—Kolɔsufuɛ Mun 1:9, 10.a
SI NDƐ’N NUN KPA EKUN
É wá kán wafa nga be yoli Zezi i batɛmun’n i ndɛ. Kpɛkun é kán like ng’ɔ fata kɛ sran kun yo naan b’a kwla yo i batɛmun’n i ndɛ wie.
4. Wafa nga be yoli Zezi i batɛmun’n
An kanngan Matie 3:13-17 nun. Ɔ kan wafa nga be yoli Zezi i batɛmun’n i ndɛ. I sin’n an koko kosan yɛ’m be su yalɛ:
?Kɛ bé yó Zezi i batɛmun’n nn ɔ te yo ba nɔnman?
?Wafa sɛ yɛ be yoli Zezi i batɛmun-ɔn? ?Be guɛli i ti’n su nzue sa ngbɛn?
Kɛ be yoli Zezi i batɛmun’n yɛ ɔ boli junman nga Ɲanmiɛn fa wlɛli i sa nun’n i dilɛ bo asiɛ’n su wa-ɔ. An kanngan Liki 3:21-23, nin Zan 6:38 nun, i sin’n an koko kosan yɛ’n i su yalɛ:
?Kɛ be yoli Zezi i batɛmun’n, junman benin yɛ i dilɛ’n yoli i cinnjin trali like kwlaa-ɔ?
5. Be kwla yo ɔ batɛmun wie
I bo bolɛ nun’n, be wun Ɲanmiɛn fa manlɛ’n ɔ nin batɛmun yolɛ’n ɔ kwla kun sran wie’m be srɛ. Sanngɛ kɛ ɔ́ kɔ́ i ɲrun’n ajalɛ cinnjin sɔ’n i falɛ’n su kunman ɔ srɛ. Nian like ng’ɔ ukali sran wie mun naan b’a kwla fɛ i sɔ ajalɛ’n. An bo VIDEO’N.
An kanngan Zan 17:3, nin Zaki 1:5 nun, i sin’n amun koko kosan yɛ’n i su yalɛ:
?Ngue yɛ ɔ kwla uka sran kun naan b’a kwla yo i batɛmun-ɔn?
Kɛ be se kɛ sran kun fɛ i wun man Zoova’n yɛle kɛ ɔ srɛ i se i kɛ ɔ́ sú i titi.
Kɛ be ko yo sran kun i batɛmun’n i sɔ’n kle weiin kɛ w’a fɛ i wun w’a man Ɲanmiɛn.
6. Kɛ be ko yo sran kun i batɛmun’n ɔ kaci Zoova i Lalofuɛ
Kɛ be yo e batɛmun’n e nin Zoova i Lalofuɛ nga be o mɛn wunmuan’n nun’n e kaci kɛ awlobo kunngba nunfuɛ sa. Kannzɛ e ti sran fanunfanun naan e nunman lika kunngba’n nun’n, sanngɛ like nga e lafi su’n nin mmla nga e nanti su’n be ti kun. An kanngan Jue Mun 25:14 nin 1 Piɛli 2:17 nun, i sin’n amun koko kosan yɛ’m be su yalɛ:
?Kɛ be ko yo sran kun i batɛmun’n ɔ nin Zoova be afiɛn ti sɛ? ?Yɛ ɔ nin be nga be su Zoova’n be afiɛn ti sɛ wie?
SRAN WIE’M BE WAAN: “N nin-a juman batɛmun yolɛ.”
?Ɔ yo ɔ sɔ wie? ?A bu i kɛ ɔ ti cinnjin kɛ a mian ɔ ɲin naan b’a kwla yo ɔ batɛmun?
NDƐ’N I KPƆLƐ BOLƐ
Zezi seli kɛ ɔ fata kɛ be yo Klisifuɛ’m be batɛmun. Kɛ ɔ ko yo naan b’a kwla yo sran kun i batɛmun’n ɔ fata kɛ ɔ lafi Zoova su kpa, ɔ nanti i mmla’m be su, yɛ ɔ fɛ i wun mɛn i.
Ndɛ’n i nun flanlɛ
?Wafa sɛ yɛ ɔ fata kɛ be yo sran kun i batɛmun-ɔn? ?Yɛ ngue ti yɛ batɛmun yolɛ’n ti cinnjin-ɔn?
?Kɛ be ko yo sran kun i batɛmun’n ngue yɛ i sɔ’n kle-ɔ?
?Ngue yɛ ɔ fata kɛ sran kun yo naan w’a kwla fɛ i wun w’a man Ɲanmiɛn naan b’a kwla yo i batɛmun-ɔn?
NDƐ WIE MUN EKUN
Like nga be flɛ i batɛmun yolɛ’n.
Like nga sran kun kwla yo naan b’a kwla yo i batɛmun’n.
“Sɛ a klo Zoova’n, á kúnndɛ kɛ be yo ɔ batɛmun” (Sasafuɛ Tranwlɛ’n, afuɛ 2020 Marsi)
Like ng’ɔ ukali bian kun naan b’a kwla yo i batɛmun’n.
“Be wlali min fanngan kɛ n fa min ɲin sie i like nga n suan’n su kpa” (Sasafuɛ Tranwlɛ’n nun ndɛ)
Sa nga ti yɛ batɛmun yolɛ’n ti cinnjin’n ɔ nin like nga a kwla yo naan b’a kwla yo ɔ batɛmun’n.
a Sɛ be yoli sran kun i batɛmun asɔnun uflɛ nun naan i waan ɔ́ káci Zoova i Lalofuɛ’n ɔ fata kɛ be yo i batɛmun ekun. ?Ngue ti-ɔ? Afin like nga be kleli i lɔ’n ɔ takaman Biblu’n su.—Nian Sa Nga Be Yoli’n 19:1-5 ɔ nin like suanlɛ 13 nun.
-