FLUWA’N NUN KANNGANFUƐ’M BE KOSAN MUN

?Ndɛ nga Davidi kannin m’ɔ o Jue Mun 37:25 nun’n, ɔ nin ndɛ nga Zezi kannin m’ɔ o Matie 6:33 nun’n, be kle kɛ Klistfuɛ’m be sa su mianman aliɛ wun le?

▪ Davidi seli kɛ: “N nian wunman kɛ Nyanmiɛn w’a yi i sran kpa’n i ase le. N nian wunman kɛ i mma mun annzɛ i anunman’m be su srɛsrɛ aliɛ bé sín le.” Sa nga Davidi bɔbɔ wunnin be’n, i ti yɛ ɔ kannin sɔ ɔ. Ɔ wunnin kɛ Zoova niɛnnin i lika titi. (Jue. 37:25) Sanngɛ ndɛ sɔ m’ɔ kannin’n, ɔ kleman kɛ Zoova i sufuɛ’m be sa su mianman aliɛ wun le.

Davidi i sa miannin aliɛ wun blɛ sunman. I wie yɛle i nun m’ɔ wanndili Saili i ɲrun ɔ tɔli blo’n. Davidi nin i sran’m be sa miannin aliɛ wun. Ɔ maan, ɔ ko srɛli aliɛ. (1 Sam. 21:1-6) Kannzɛ Davidi yoli sɔ blɛ sɔ’n nun’n, sanngɛ w’a srɛsrɛman aliɛ w’a sinman. Afin, ɔ si kɛ Zoova níɛn i lika.

Ndɛ nga Zezi kannin m’ɔ o Matie 6:33 nun’n, ɔ kle kɛ Ɲanmiɛn nían be nga be yo i klun sa’n, be lika. Ɔ seli kɛ: “An dun mmua fa amun wun man Nyanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa [i wie yɛle kɛ aliɛ, nzue, tralɛ] úka su mán amun.” Sanngɛ, Zezi kleli kɛ i “niaan” mun be sa wá mían aliɛ wun, yalɛ mɔ bé wá klé be’n ti. (Mat. 25:35, 37, 40) I sɔ sa’n juli akoto Pɔlu su. Ɔ maan, awe nin nzuewe’n kunnin i.​—2 Kor. 11:27.

Zoova seli kɛ sran’m bé klé e ɲrɛnnɛn fanunfanun. Wie liɛ’n, ɔ yaci i sufuɛ’m be lɛ naan be sa mian like wun. Ɔ yo sɔ naan be kle kɛ Satan ti ato buafuɛ. (Zɔb 2:3-5) I wie yɛle sa ng’ɔ juli Alemaɲi lɔ Klistfuɛ’m be su, Itilɛli blɛ su’n. Be wlali aniaan sɔ’m be nun wie’m be bisua. Be wunnin be ɲrun dan kpa. B’a ɲanman aliɛ kpa b’a diman. Ninnge nga Satan fa tanndan Zoova i sufuɛ’m be ɲrun’n, i kun yɛ ɔ o lɛ. Sanngɛ, Zoova i sufuɛ sɔ’m be jrannin kekle. Zoova kusu’n, i wla w’a fiman be su. Kannzɛ Zoova yaci i sufuɛ’m be lɛ be wun ɲrɛnnɛn’n, sanngɛ ɔ yiman be nga be jran kekle’n be ase. (1 Kor. 10:13) Maan e wla kpɛn ndɛ ng’ɔ o Filipfuɛ Mun 1:29 nun’n su. I waan: “Krist sulafilɛ ngunmin yɛ Nyanmiɛn maan amun lafi-ɔ, sanngɛ ɔ maan amun wun nyrɛnnɛn i dunman nun ekun.”

Zoova tali nda kɛ ɔ́ jrɛ́n i sufuɛ’m be sin. Ezai 54:17 nun’n, ɔ seli kɛ: “Alɛ ninnge kwlaa nga be yi i kɛ bé fá kún amun’n, ɔ́ yó ngbɛn.” I sɔ’n kle kɛ Zoova su yaciman sran’m be lɛ naan be nunnun i sufuɛ mun. Sanngɛ, e tinuntinun e kwla wun ɲrɛnnɛn. Yɛ ɲrɛnnɛn wunlɛ sɔ’n ti’n, e kwla wu.