Maan e jran “akunndan nga sran’m be bu’n,” i ɲrun kekle

‘E liɛ’n, akunndan nga sran’m be bu’n, nɛ́n i wie yɛ Ɲanmiɛn maan e bu ɔ, sanngɛ Ɲanmiɛn fɛ i wawɛ’n mannin e.’—1 KOR. 2:12.

1, 2. (a) ?Laa Angle’m be lɔ’n, ngue ti yɛ kɛ sran’m bé kɔ́ asiɛ’n i bo lɔ bunnde yilɛ’n, be fa anunman srika mun ɔn? (b) ?Sa tɛ benin yɛ ɔ fata kɛ Klistfuɛ’m be jran be ɲrun kekle ɔ?

AFUƐ nga be flɛ i 1911 nun’n, Angle mɛn’n i siefuɛ’m be kpɛli mmla kun. Be kpɛli naan be nga be di junman asiɛ’n bo lɔ mɔ be yi bunnde’n, b’a wuman. Mmla sɔ’n yɛle kɛ lika kwlaa nga sran’m be wlu asiɛ’n bo be yi bunnde lɛ’n, ɔ fata kɛ be fa anunman srika nɲɔn be wlu lɔ. ?Sanngɛ ngue ti ɔ? Yɛle kɛ i liɛ’n, sɛ sin wlu lika sɔ nun’n, be nga be kɔ sran’m be delɛ’n, be kwla fa anunman sɔ’m be di junman asiɛ’n i bo lɔ. Afin, blɔfuɛ’n flɛ aunmuan tɛ kun kɛ monoxide de carbone. Nán kɛ ɔ bɔn naan se kɛ bé síe i nzɔliɛ kɛ ɔ o lika sa nun ɔn. Sɛ ɔ o aunmuan nun naan sran lo wunmiɛn’n, ɔ kwla wu. Srika’m be liɛ’n, sɛ are tɛ sɔ’n o aunmuan’n nun naan ɔ fita be kaan sa’n, kpɛkun b’a ka lɛ b’a wu. Ɔ maan, sɛ are sɔ’n o aunmuan’n nun asiɛ’n bo lɔ’n, kɛ ɔ́ fíta srika mun mɔ bé wú’n, ɔ kle kɛ sa su ba. Sɛ w’a yoman sɔ’n, be nga be kɔ sran’m be delɛ’n, be siman sɔ. Ɔ maan, are tɛ sɔ’n kwla kun be.

² E kwla se kɛ Klistfuɛ’m be kusu be ti kɛ be nga be yi bunnde asiɛ’n i bo lɔ’n sa. ?Ngue ti ɔ? I nun mɔ Zezi seli i sɔnnzɔnfuɛ’m be kɛ be bo jasin fɛ’n mɛn wunmuan’n nun’n, ɔ si kɛ lika nga bé kó bó jasin fɛ’n, ɔ́ yó kekle mán be. Afin, Satan yɛ ɔ sie mɛn’n niɔn. Yɛ Zezi si kusu kɛ mɛn’n nunfuɛ’m be akunndan’n timan kpa. (Mat. 10:16; 1 Zan 5:19) I sɔ’n ti yɛ kokolɛ mɔ Zezi koko i sɔnnzɔnfuɛ mun ti’n, kɔnguɛ kasiɛn ka naan b’a kun i’n, ɔ srɛli i Si’n mannin be. Ɔ seli kɛ: “N srɛman wɔ kɛ a yi be mɛn’n nun, sanngɛ ń srɛ́ wɔ kɛ Klunwifuɛ’n ti a nian be su.”—Zan 17:15.

3, 4. ?Ndɛ benin yɛ Zezi kan kleli i sɔnnzɔnfuɛ mun ɔn? ?Yɛ ngue ti yɛ ɔ nin i fata kɛ ndɛ sɔ’n lo e wie ɔ?

³ Zezi wlɛli i sɔnnzɔnfuɛ’m be su nun kɛ sɛ be ɲin a tranman sa tɛ nga be bo sin yia be’n, be su’n, be kwla wu. I ndɛ’m be ti cinnjin kpa be man e andɛ. Afin, e su kɔ mɛn nga, i awieliɛ. Zezi seli be kɛ: ‘I sɔ’n ti, an srɛ Ɲanmiɛn naan an kwla fite sa m’ɔ́ wá bá mɛn nun’n i kwlaa i nun naan amun kwla jran m mɔ n kacili Sran’n min ɲrun.’ (Lik 21:34-36) Sanngɛ ng’ɔ yo fɛ’n, yɛle kɛ Zezi tali i sɔnnzɔnfuɛ’m be nda kɛ i Si wá fɛ́ i wawɛ’n mán be. Yɛ wawɛ sɔ’n wá kpɛ́n be wla yɛ ɔ́ úka be naan be tran minndɛ yɛ be yo yakpa titi.—Zan 14:26.

⁴ ?Yɛ e li? ?Ɲanmiɛn wawɛ kunngba sɔ’n kwla uka e wie andɛ? ?Sɛ ɔ ti sɔ’n, ajalɛ benin yɛ ɔ fata kɛ e fa naan y’a ɲan wie ɔ? ?Kɛ be kan akunndan nga sran’m be bu’n i ndɛ’n, ngue yɛle i sɔ’n? ?Yɛ wafa sɛ yɛ é síe akunndan sɔ’n i nzɔliɛ ɔ? ?Yɛ wafa sɛ yɛ e kwla jran akunndan nga sran’m be bu’n, i ɲrun kekle ɔ?—An kanngan 1 Korɛntfuɛ Mun 2:12 nun.

?Akunndan nga sran’m be bu’n yɛ ɔ sie e annzɛ Ɲanmiɛn wawɛ’n niɔn?

5, 6. ?Ngue yɛ Ɲanmiɛn wawɛ’n kwla yo man e ɔ? ?Sanngɛ ngue yɛ ɔ fata kɛ e yo naan Ɲanmiɛn w’a fɛ i wawɛ’n w’a man e ɔ?

⁵ Nán Klistfuɛ klikli’m be blɛ su ngunmin yɛ Ɲanmiɛn fɛli i wawɛ’n mɛnnin i sufuɛ mun ɔn. Ɔ te fa te man be klun ufuɛ su andɛ. Ɲanmiɛn wawɛ’n kwla wla e fanngan naan y’a yo sa kpa naan y’a ɲan wunmiɛn y’a di i junman’n. (Rɔm. 12:11; Fil. 4:13) Ɲanmiɛn wawɛ’n maan e kwla yi nzuɛn klanman kpa’m be nglo. Ɔ kwla yo nzuɛn kɛ Ɲanmiɛn nin sran klolɛ, ɔ nin sran ye yolɛ ɔ nin aklunye. I sɔ nzuɛn’m be ti ‘sa nga Ɲanmiɛn wawɛ maan sran yo’n,’ i wafa wie mun. (Gal. 5:22, 23) Sanngɛ, Ɲanmiɛn Zoova su mianman sran naan w’a fɛ i wawɛ’n w’a mɛn i.

⁶ I sɔ’n ti’n, ɔ nin i fata kɛ e usa e wun kɛ: ‘?Ngue yɛ n kwla yo naan Ɲanmiɛn w’a fɛ i wawɛ’n w’a man min ɔn?’ Biblu’n kle e kɛ like nga e kwla yo’n, ɔ sɔnnin. Ajalɛ kun o lɛ ɔ timan kekle, sanngɛ ɔ ti cinnjin kpa. Yɛle kɛ maan e srɛ Ɲanmiɛn naan ɔ fɛ i wawɛ’n man e. (An kanngan Lik 11:13 nun.) Ajalɛ kun ng’ɔ o lɛ ekun’n, yɛle kɛ e suan Ɲanmiɛn Ndɛ mɔ Ɲanmiɛn wawɛ’n ti yɛ be klɛli’n, yɛ e nanti i nun mmla’m be su. (2 Tim. 3:16) Nán kɛ sran kun kanngan Biblu’n nun sa’n ti yɛ Ɲanmiɛn fɛ́ i wawɛ’n mɛ́n i ɔ. Sanngɛ sɛ Klistfuɛ kun tu i klun suan Ɲanmiɛn Ndɛ’n, ɔ kwla wun akunndan nin wafa nga sran’m be fa yo ninnge mun Biblu’n nun’n, be wlɛ kpa. Ɔ ti cinnjin wie kɛ Klistfuɛ sɔ’n wun i wlɛ kɛ Zoova sieli Zezi kɛ i janunfuɛ sa, naan i kunngba i ja su yɛ ɔ sin naan w’a fɛ i wawɛ’n w’a man e ɔ. (Kol. 2:6) I sɔ’n ti’n, maan e nian Zezi i ajalɛ’n su yɛ e nanti ndɛ ng’ɔ kannin’n su. (1 Piɛ. 2:21) Ɔ maan, kɛ é mían e ɲin é yó kɛ Zezi sa’n, nn Ɲanmiɛn kusu fɛ́ i wawɛ’n mán e.

 7. ?Wafa sɛ yɛ akunndan nga sran’m be bu’n, ɔ kan sran’m be kwlaa be tinuntinun ɔn?

⁷ Akunndan nga sran’m be bu’n, ɔ yi Satan i nzuɛn’m be nglo. (An kanngan Efɛzfuɛ Mun 2:1-3 nun.) Wafa nga e kwla sie akunndan nga sran’m be bu’n i nzɔliɛ’n, ɔ sɔnnin. E sie i nzɔliɛ kɛ lika kwlaa nun’n, akunndan tɛ sɔ’n maan sran’m be nantiman Ɲanmiɛn mmla’m be su. Akunndan nga sran’m be bu’n ti maan sran ‘ɲin blo ninnge’m be su, sran bu akunndan gua ninnge nga be wun be’n be su, yɛ sran tu i wun.’ (1 Zan 2:16) Akunndan sɔ’n ti’n, klɔ sran i nzuɛn’n yɛ sran’m be yi i nglo ɔ. Yɛle kɛ bla nin bian kunndɛlɛ sukusuku’n, ɔ nin amuɛn sɔlɛ’n, ɔ nin be ɲin m’ɔ ci be wiengu’n, ɔ nin ya falɛ’n, ɔ nin nzan mɔ be nɔn be bo’n sa. (Gal. 5:19-21) Asa kusu’n, akunndan nga sran’m be bu’n yo maan be nga be jasoli Ɲanmiɛn wun’n, be ndɛ’n tru lika’n nun. Yɛ i sɔ ndɛ’n nin Ɲanmiɛn liɛ’n timan kun. (2 Tim. 2:14-18) Ɔ maan, sran nga akunndan nga sran’m be bu’n yɛ ɔ sie i’n, nn Satan yɛ ɔ sie i ɔ.

 8. ?Ajalɛ benin yɛ ɔ fata kɛ e kwlaa e tinuntinun e fa ɔ?

⁸ Klistfuɛ kun su seman kɛ ɔ́ trɛ́n i ngunmin naan ninnge tɛtɛ nga be o mɛn nun’n be su kɛnmɛn i wie. Sran kun bɔbɔ yɛ ɔ fata kɛ ɔ kle like ng’ɔ kunndɛ kɛ ɔ sie i’n niɔn. Ɲanmiɛn wawɛ’n yɛ, annzɛ akunndan nga sran’m be bu’n yɛ. Be nga akunndan nga sran’m be bu’n yɛ ɔ sie be dɔ nga su’n, be kwla fin i sɔ’n nun fite. Yɛ be kwla fa ajalɛ naan Ɲanmiɛn wawɛ’n w’a sie be. Sanngɛ be nga kusu Ɲanmiɛn wawɛ’n yɛ ɔ sie be’n, sɛ b’a nianman be wun’n, akunndan nga sran’m be bu’n kwla saci be. (Fil. 3:18, 19) I sɔ’n ti’n, maan e nian wafa nga e kwla jran akunndan sɔ’n i ɲrun kekle’n.

Maan e wun i nzɔliɛ’m be wlɛ

9-11. ?Nzɔliɛ benin wie mun yɛ be kle kɛ akunndan nga sran’m be bu’n su sie e ɔ?

⁹ Kɛ nga e fa kannin’n sa’n, angle’m be lɔ be nga be ko kunndɛ bunnde asiɛ’n i bo lɔ’n, be fa anunman srika naan b’a sie i nzɔliɛ sɛ are tɛ ng’ɔ o aunmuan nun’n, ɔ o lika’n nun o. Ɔ maan, sɛ be nga be o asiɛ’n i bo lɔ’n be nun kun wun kɛ srika’n w’a tɔ’n, ɔ wun i wlɛ kɛ ɔ fata kɛ ɔ fa ajalɛ ndɛndɛ naan w’a wuman wie. ?I kunngba’n, nzɔliɛ benin yɛ be kle kɛ akunndan nga sran’m be bu’n, be su sie Klistfuɛ kun ɔn?

¹⁰ Kɛ i bo bolɛ nun e sili ndɛ nanwlɛ ng’ɔ o Ɲanmiɛn Ndɛ’n nun’n, mɔ e fali e wun mannin Ɲanmiɛn mɔ be yoli e batɛmu’n, atrɛkpa’n, e tu e klun e kanngan Biblu’n nun. Kusu e srɛ Ɲanmiɛn titi. Yɛ e kpaman asɔnun aɲia’m be bo kɔlɛ’n nun. Aɲia’m be ti kɛ ninnge mɔ be gua e awlɛn su nzue sa. I sɔ ajalɛ’m be ukali e naan y’a wla akunndan nga sran’m be bu’n, i ase blɛblɛblɛ. Yɛ be ukali e naan akunndan tɛ sɔ’n w’a sieman e kun.

¹¹ ?Sanngɛ e te mian e ɲin e te kanngan Biblu’n nun cɛn kwlaa? (Jue. 1:2) ?E klun mɔ e tu e srɛ Ɲanmiɛn titi’n, ɔ te yo e ajuin? ?E te klo asɔnun aɲia mun? ?Yɛ e te kɔ le mɔcuɛ kwlaa nun aɲia’m be bo? (Jue. 84:11) ?Annzɛ ajalɛ kpakpa sɔ’m be nun wie’m b’a fi e sa? Atrɛkpa’n, ninnge nga e yo be’n, be sɔnnin maan be fa e blɛ yɛ be fa e wunmiɛn’n, ɔ maan, ɔ ti kekle man e kɛ e su Ɲanmiɛn kɛ ɔ nin i fata’n sa. ?Sɛ ajalɛ kpa sɔ’n b’a fi e sa’n, nn nán akunndan nga sran’m be bu’n yɛ ɔ su sie e lɛ ɔ? ?Ɔ maan, ɔ nin i fataman kɛ e mian e ɲin naan e fa ajalɛ kpa sɔ mun ekun?

“Nán an koko”

12. ?Zezi seli i sɔnnzɔnfuɛ’m be kɛ be ‘sasa be wun’ ninnge benin be lika? ?Yɛ ngue ti yɛ ɔ seli sɔ ɔ?

¹² ?Ngue like ekun yɛ e kwla yo naan akunndan nga sran’m be bu’n w’a sieman e ɔ? Kɛ Zezi seli i sɔnnzɔnfuɛ’m be kɛ be ‘tran minndɛ i cɛn kwlaa’n,’ sa tɛtɛ trele wie’m be ti yɛ ɔ kannin sɔ ɔ. Ɔ seli be kɛ: ‘An sasa amun wun, nán an yo aliɛ safuɛ mun nin nzanbɔɛfuɛ mun, nán an koko ninnge’m be ti, sɛ an yo sɔ’n, ɔ cɛman naan cɛn sɔ’n w’a fu amun nun kɛ aya sa.’—Lik 21:34, 35.

13, 14. ?Aliɛ dilɛ nin nzan nɔnlɛ su’n, kosan cinnjin benin yɛ ɔ fata kɛ e fa usa e wun ɔn?

¹³ Maan e bu e wun su nianlɛ ndɛ sɔ’n i akunndan kpa. ?Aliɛ dilɛ nin nzan nɔnlɛ mɔ be ti like kpa’n yɛ Zezi tannin be ɔ? Cɛcɛ! Zezi bɔbɔ si ndɛ nga Salomɔn kannin’n. Salomɔn seli kɛ: ‘Yɛ n fa wunnin i wlɛ kɛ like ng’ɔ ti kpa man sran’n yɛle aklunjuɛ dilɛ nin mɛn dilɛ blɛ m’ɔ te o mɛn’n nun’n. Yɛ n wunnin kɛ blɛ mɔ sran kun di like m’ɔ nɔn nzan’n m’ɔ di i sa ti junman’n i nuan like’n, Ɲanmiɛn yɛ ɔ fɛ i sɔ’n mɛn i ɔ.’ (Aku. 3:12, 13) Zezi si kɛ akunndan nga sran’m be bu’n ti’n, aliɛ dilɛ nin nzan nɔnlɛ nun’n, sran’m be siman be wun su nian.

¹⁴ ?Wafa sɛ yɛ e kwla si kɛ akunndan nga sran’m be bu ti’n, e nianman e wunsu aliɛ dilɛ nin nzan nɔnlɛ nun ɔn? Ɔ fata kɛ e usa e wun kɛ: ‘?Kɛ n kanngan Biblu’n nin Biblu’n i akua’m be nun mɔ be man aliɛ safuɛ’n i su afɔtuɛ’n, n yo sɛ? ?N ti sran mɔ n bu i kɛ i sɔ afɔtuɛ’m be timan cinnjin ɔn? ?Annzɛ n bu i kɛ afɔtuɛ sɔ’m be ti sa blɔlɛ? ?Annzɛ kusu kɛ be man e afɔtuɛ sɔ’n, n kan guɛ i like uflɛ su?a ?Sɛ n nɔn nzan’n, kɛ Biblu’n waan nán e nɔn nzan ngboko’n, n bu i sɛ? ?Yɛ afɔtuɛ ng’ɔ man e kɛ e yaci “nzanbɔɛ’n” nin? ?N bu afɔtuɛ sɔ’m be kɛ be timan cinnjin naan sa wie’m be ti’n, n su nantiman be su? ?Sɛ nzan nga n nɔn’n, sran uflɛ wie’m be kɛn i ndɛ’n, n fa ya n tɛtɛ? ?N wla sran uflɛ’m be fanngan kɛ nán be fa Biblu’n nun afɔtuɛ’m be su?’ Sran ng’ɔ yo i sɔ’n, ɔ kle weiin kɛ akunndan nga sran’m be bu’n, ɔ sie i.—An nian Rɔmfuɛ Mun 13:11-14 nun.

Nán maan ngokɔɛ’n tin e su

15. ?Klɔ sran nzuɛn benin ti yɛ Zezi seli kɛ e nian e wun su ɔ?

¹⁵ Ajalɛ uflɛ nga e kwla fa naan akunndan nga sran’m be bu’n w’a sieman e wie’n, yɛle kɛ e nian e wun su naan ngokɔɛ’n w’a tinman e su. Zezi si kɛ fɔ’n m’ɔ o klɔ sran nun ti’n, ninnge nga be mian e sa’n be ti’n, e kwla koko. Klolɛ su ɔ seli i sɔnnzɔnfuɛ’m be kɛ: “Nán an koko.” (Mat. 6:25) Ɔ fata kɛ Klistfuɛ’n yo naan Ɲanmiɛn klun jɔ i wun. Ɔ fata kɛ ɔ nian Ɲanmiɛn junman nga be mɛnnin i’n, i nun di i kpa. Ɔ fata kusu kɛ ɔ niɛn i awlobofuɛ’m be lika. I sɔ ninnge mun’n, sɛ e fa e ɲin sie be su’n, ɔ timan tɛ. (1 Kor. 7:32-34) ?Sanngɛ ndɛ nga Zezi kɛnnin i lɛ’n, ngwlɛlɛ benin yɛ e kwla fɛ i nun ɔn?

16. ?Wafa sɛ yɛ akunndan nga sran’m be bu’n w’a kan sran sunman ɔn?

¹⁶ Akunndan nga sran’m be bu’n yɛle akunndan nga be bu fa gua ninnge nga be wun be’n be su’n, ɔ nin be wun tulɛ’n. I sɔ’n yɛ w’a kaci sran sunman be nzuɛn ɔn. Ɔ maan, be koko ninnge ngbɛnngbɛn’m be ti. Mɛn’n nunfuɛ’m be waan bé klé e kɛ sɛ sran kun le sika’n nn w’a ɲɛn i ti. Asa kusu’n be waan bé klé e kɛ, kɛ be se kɛ sran kun yoli kpa’n, nn ɔ ti aɲanbeunfuɛ dan. Ɔ maan sran nga Ɲanmiɛn ninnge mun yɛ be ti i cinnjin’n, nn w’a sokpa. Be nga be tɔ i sɔ akunndan tɛ nun’n, be kaci sika’n i kanga. Ɔ maan, ngokɔɛ’n wieman be su le. Afin, kɛ lika’n cɛ́n m’ɔ́ sán’n, be liɛ’n be waan bé ɲán be wun ekun. Ninnge uflɛuflɛ mun ɔ nin ninnge dandan mun yɛ be kunndɛ kɛ bé ɲán be ɔ. (Nya. 18:11) I sɔ akunndan tɛ bulɛ’n maan ngokɔɛ’n tɔ sran su. Yɛ sran m’ɔ bu akunndan sɔ’n ɔ yoman kpa Ɲanmiɛn sulɛ nun.—An kanngan Matie 13:18, 22 nun.

17. ?Kɛ ɔ ko yo naan ngokɔɛ’n w’a tinman e su’n, ngue yɛ ɔ fata kɛ e yo ɔ?

¹⁷ Sɛ e nanti Zezi i afɔtuɛ nga su’n, ngokɔɛ’n su tinman e su. Ɔ seli kɛ: ‘An dun mmua fa amun wun man Ɲanmiɛn maan ɔ sie amun, yɛ an yo i klun sa’n.’ Sanngɛ Zezi kan guali su kɛ sɛ e yo sɔ’n, Ɲanmiɛn fá ninnge kwlaa nga be mian e sa’n úka su mán e. (Mat. 6:33) ?Wafa sɛ yɛ e kwla kle kɛ e lafi ndɛ sɔ’n su ɔ? Maan e yo Ɲanmiɛn klun sa’n. Yɛle kɛ sika’n i su ndɛ nga Ɲanmiɛn mmla’n kan, maan e nanti su. I wie yɛle kɛ nán e kpɛ gblɛ naan y’a tuaman e lapo’n. Annzɛ kusu sɛ e di e junman kan wie’n, nán ato bɔɔ kaan sa tran nun. Sɛ e usali afɛ wie ɔ, kɛ e se kɛ ‘ɛɛn’n,’ maan ‘ɔ ka su.’ Yɛle kɛ blɛ ng’ɔ fata kɛ e yi sran’n i sika’n e mɛn i’n, maan e yi mɛn i. (Mat. 5:37; Jue. 37:21) Sran ng’ɔ yo i sɔ nanwlɛ ninnge mun’n, ɔ ti su kɛ ɔ su yoman aɲanbeunfuɛ, sanngɛ Ɲanmiɛn klun jɔ́ i wun. I sɔ’n kusu maan sran’n i klun titimɛn i yɛ ngokɔɛ’n su tinmɛn i su.

18. ?Ajalɛ kpa benin yɛ Zezi kleli e ɔ? ?Wafa sɛ yɛ sɛ e nian su’n, é ɲán su mmlusuɛ ɔ?

¹⁸ Kɛ be se kɛ e fa e wun man Ɲanmiɛn maan ɔ sie e’n, yɛle kɛ maan ninnge wie’m be yo e cinnjin kpa e mɛn dilɛ’n nun. Maan e nian Zezi i ajalɛ’n su. Blɛ wie nun’n, ɔ wlali tralɛ kpa. (Zan 19:23) Ɔ dili aliɛ yɛ ɔ nɔnnin nzan. I klun jɔli i sɔ’n su. Ɔ nin i janvuɛ’m be boli nzɛmunlɛ. (Mat. 11:18, 19) Zezi liɛ’n, ninnge ngalɛ’m be ti yɛ nguan nun tranlɛ’n yo fɛ ɔ. Sanngɛ i nguan’n bɔbɔ ba’n finman ninnge sɔ mun. Zezi seli kɛ i aliɛ’n yɛle Zoova klun sa yolɛ. (Zan 4:34-36) Kɛ e nian Zezi i ajalɛ’n su’n, nanwlɛ, e mɛn dilɛ’n yo fɛ! E uka be nga ɲrɛnnɛn’n tin be su naan b’a si fɔnvɔlɛ ndɛ ng’ɔ o Biblu’n nun’n, ɔ maan e di aklunjuɛ. E niaan Klistfuɛ’m be klo e yɛ be suan e bo. Yɛ e yo maan Zoova klun jɔ. Sɛ ninnge sɔ mun yɛ be dun mmua e mɛn dilɛ’n nun’n, aɲanbeun kunndɛlɛ’n nin fɛ dilɛ ngboko’n be su yoman e cinnjin sɔ. Sanngɛ é fá ninnge sɔ mun é sú Ɲanmiɛn annzɛ é fá úka e wun naan y’a su Zoova. Ɔ maan, sɛ e tu e klun e yo ninnge mun naan Ɲanmiɛn sie e’n, akunndan nga sran’m be bu’n, ɔ su sieman e mlɔnmlɔn.

Maan ‘Ɲanmiɛn ninnge’m be lo e’ titi

19-21. ?Wafa sɛ yɛ ‘Ɲanmiɛn ninnge’m be kwla lo e’ titi ɔ? ?Yɛ ngue ti yɛ ɔ nin i fata kɛ be lo e titi ɔ?

¹⁹ Kɛ sran kun yó like kun sa’n, nn w’a dun mmua bu i akunndan w’a sie. Kɛ e yo like wie’n, be waan sinnzin yɛ y’a di ɔ. Sanngɛ nn blɛ sunman nun’n, e klɔ sran nzuɛn tɛ’n yɛ maan e yoli sɔ ɔ. Ɔ maan, akoto Pɔlu kpɛn e wla kɛ maan e nian e nzuɛn’n su. Ɔ seli kɛ: ‘Afin be nga klɔ sran nzuɛn’n te yo be fɛ’n, klɔ sran ninnge’n yɛ ɔ lo be ɔ, sanngɛ be nga be ti Ɲanmiɛn wawɛ’n liɛ’n, i ninnge’n yɛ ɔ lo be ɔ.’—Rɔm. 8:5.

²⁰ ?É yó sɛ naan y’a yoman sɔ naan akunndan nga sran’m be bu’n w’a saciman e nzuɛn’n? Maan e sasa e klun akunndan’n. Yɛle kɛ nán e man akunndan nga sran’m be bu’n, i atin naan ɔ tra ndin e klun akunndan’n nun. I wie yɛle kɛ, kɛ é yíyí e ɲin su’n, e su yaciman e akunndan’n lɛ naan ɔ tran bla nin bian kunndɛlɛ sukusuku’n su. Annzɛ e su yacimɛn i lɛ naan ɔ tran nzaje sa yolɛ’n su. E si kɛ sran nga i klun akunndan’n ti tɛ’n, Ɲanmiɛn wawɛ’n m’ɔ ti sanwun’n, ɔ nin i be kwlá tranman. (Jue. 11:5; 2 Kor. 6:15-18) Asa ekun’n, sɛ e waan Ɲanmiɛn wawɛ’n sie e’n, ɔ fata kɛ e suan Biblu’n nun like yɛ e bu su akunndan cɛn kwlakwla. Maan e srɛ Ɲanmiɛn, e wɔ asɔnun aɲia’m be bo. Yɛ kɛ e bo jasin fɛ’n titi’n, e nin Ɲanmiɛn wawɛ’n yɛ e di junman ɔn.

²¹ Nanwlɛ, akunndan nga sran’m be bu mɔ klɔ sran nzuɛn’n yɛ be yi i nglo’n, ɔ fata kɛ e jrɛn i ɲrun kekle. Sɛ e mian e ɲin e yo sɔ’n, ɔ ti kpa dan. Afin Pɔlu seli kɛ: ‘Be nga klɔ sran ninnge’n lo be’n, bé wú, sanngɛ be nga Ɲanmiɛn wawɛ’n i ninnge’n lo be’n, bé ɲán nguan nin alaje.’—Rɔm. 8:6.

[Ja ngua lɛ ndɛ’n]

?Amun wla kwla kpɛn su?

• ?Sɛ e waan Ɲanmiɛn fɛ i wawɛ’n man e’n, ngue yɛ ɔ fata kɛ e yo ɔ?

• ?Ninnge benin wie’m be nun yɛ akunndan nga sran’m be bu’n kwla sa e ɔ?

• ?Wafa sɛ yɛ e kwla jran akunndan nga sran’m be bu’n i ɲrun kekle ɔ?

[Foto, bue 25]

Ka naan y’a wɔ junman annzɛ suklu’n, maan e srɛ Ɲanmiɛn naan ɔ fɛ i wawɛ’n man e.

[Foto mun, bue 26]

Ɔ fata kɛ e akunndan’n yo sanwun titi. Sɛ e di e junman wie’n, maan e di nanwlɛ yɛ maan e nzuɛn’n yo kpa titi.