Zezi jrannin seke kun jenvie’n su

Junman dan mɔ Zezi dili’n ti’n, w’a fɛ. I sɔ’n ti’n, kɛ aliɛ jɔli’n, ɔ seli i sɔnnzɔnfuɛ’m be kɛ: “Maan e kpɛ nzue’n e wɔ i bue kun lɔ.” Kɛ bé kɔ́ lika sɔ’n nun’n, be kaci be sin be si Kapɛɛnaɔmun klɔ’n.​—Marki 4:35.

Zerazafuɛ’m be mɛn’n wo Galile Jenvie’n i wia afiliɛ lɔ. Ɔ o Dekapɔlu mɛn’n nun wie. Dekapɔlu mɛn’n nun klɔ’m be ti Glɛki’m be klɔ cinnjin kpa. Sanngɛ Zuifu kpanngban be tran be su wie.

Kɛ Zezi jáso Kapɛɛnaɔmun lɛ kɔ́’n, sran’m be sili nun. Ɔ maan be kusu be fali alie wie’m be suli i su. (Marki 4:36) Lika nga be su kɔ’n nunman mmua ngboko. Galile Jenvie’n i tɛnndɛn’n nun ti kilo ko ju ablaɔn-nin-kun (21), yɛ i tɛtrɛ nun’n traman kilo blu-nin-nɲɔn (12). Sanngɛ i bo’n ti kploun kpa.

Fɔ nunman Zezi nun, sanngɛ ɔ fɛli afin ɔ dili junman dan cɛn sɔ’n nun. I sɔ’n ti’n, kɛ ɔ nin i sɔnnzɔnfuɛ’m be fuli alie’n nun’n, ɔ ɔli alie’n i sin lɔ. Kpɛkun ɔ fali sunmun kun fa suɛnnin i ti naan w’a la w’a lafi.

I akoto’m be nun wie’m be si alie kan kpa. Sanngɛ cɛn sɔ’n nun’n, nzue’n i kpɛlɛ’n w’a yoman pɔpɔ be sa nun. Afin oka’m be bo sin yia Galile Jenvie’n, yɛ cɛn wie’n, aunmuan ng’ɔ fita nzue’n su’n, ɔ lo. Asa ekun’n ɔ ju wie’n, aunmuan ng’ɔ fin oka’m be su lɔ fita nzue’n su’n, ɔ jɔ. I sɔ’n ti’n, kɛ ɔ nin nzue’n i su aunmuan liɛ m’ɔ lo’n be yia nun’n, i sɔ’n kpɛ seke ba nzue’n su. Sa sɔ’n yɛ ɔ juli cɛn sɔ’n nun-ɔn. Ɔ maan nzue’n boli alie’n kekle kpa, kpɛkun ɔ “bo guali be alie’n nun. I sɔ’n ti’n, alie’n su yi. Siɛn’n, be ɲin w’a blo.” (Liki 8:23) Kɛ ɔ́ yó sɔ’n, nn Zezi su lafi kpa pɔɔ!

Like kwlaa nga be nga be su kan alie’n be kwla yo naan alie’n w’a mlɔnman’n, be miannin be ɲin be yoli. Afin be kan alie titi. Sanngɛ sa ng’ɔ o be su lɛ’n ti i liɛ ngunmin. Kɛ mɔ be buli i kɛ be su fiteman nun’n ti’n, be tinngeli Zezi naan b’a se i kɛ: “E Min, de e, e su wu!” (Matie 8:25) Nanwlɛ, srɛ kunnin be dan! Be bu i kɛ nn be su w’a mlɔn.

Kɛ Zezi tinngeli’n, ɔ seli i akoto’m be kɛ: “?Ngue ti yɛ srɛ kun amun sɔ-ɔ? ?Ɔ yo sɛ ti yɛ amun lafiman Ɲanmiɛn su kpa sɔ-ɔ?” (Matie 8:26) I sin’n, ɔ seli aunmuan’n nin jenvie’n be kɛ: “Yaci bolɛ! Jran diin!” (Marki 4:39) Yɛ aunmuan’n yacili fitalɛ-ɔ. Kpɛkun jenvie’n kusu yacili bolɛ. (Marki nin Liki be liɛ’n, be seli kɛ ka naan Zezi w’a se i sɔnnzɔnfuɛ’m be kɛ be lafiman Ɲanmiɛn su’n, ɔ dun mmua yoli maan seke’n yacili kpɛlɛ.)

Sa sɔ’n boli Zezi i sɔnnzɔnfuɛ’m be nuan dan! Afin be ja nun lɛ’n, nzue m’ɔ mɛnnin i wun su’n, ɔ tɔli bliin. I sɔ’n ti’n, srɛ kunnin be dan kpa. Ɔ maan be usali be wiengu kɛ: “?Sran onin yɛle bian nga? Aunmuan’n nin jenvie’n bɔbɔ be fa ndɛ ng’ɔ kan’n su.” (Marki 4:41–5:1) Atrɛkpa’n, alie onga’m be kwla sali be sin be ko sili ce’n su.

Sa sɔ’n kle kɛ Ɲanmiɛn Wa’n le tinmin naan ɔ kwla jran ninnge kɛ nzue m’ɔ su bo annzɛ aunmuan m’ɔ fita dan’n sa. I sɔ’n ti’n, e wla gua ase dan! Kɛ Zezi wá síe asiɛ’n, sran’m be klun su titiman be kaan sa kun. Afin ninnge kɛ aunmuan annzɛ nzue sa mɔ be saci like’n, be su saciman like kun!