Zezi ijɔli Farizifuɛ mun

Kɛ mmla klɛfuɛ nin Farizifuɛ wie’m be se kɛ nán Ɲanmiɛn wawɛ’n i fanngan nun yɛ Zezi fuan mmusu mun’n, Ɲanmiɛn wawɛ’n i wun ndɛ tɛ yɛ be su kɛn i lɛ-ɔ. ?Ɔ maan Ɲanmiɛn sin yɛ be jrán-ɔn annzɛ Satan sin-ɔn? Zezi seli be kɛ: “Amun yo maan waka’n yo kpa naan i mma’m be kusu be yo kpa, annzɛ amun yo maan waka’n yo tɛ naan i mma’m be kusu be yo tɛ. Afin waka’n i mma’n yɛ be fa sie i nzɔliɛ-ɔ.”​​—Matie 12:33.

Sran ng’ɔ se kɛ Satan fanngan nun yɛ Zezi fuan mmusu mun’n, nn sran sɔ’n wunman sa wlɛ. Kɛ nga Zezi fa kɛnnin i oka’n su lɔ’n sa’n, sɛ waka kun i mma’m be ti kpa’n, nn waka’n bɔbɔ ti kpa. ?Kɛ Farizifuɛ’m be tɔn Zezi i suɛn’n, i sɔ’n kle sɛ? I sɔ’n kle kɛ be ti kɛ waka m’ɔ timan kpa’n sa. I sɔ’n ti’n, Zezi seli be kɛ: ?Ɔnda mma mun, amun mɔ amun ti klunwifuɛ’n, ɔ yo sɛ yɛ ndɛ kpa kwla fin amun nuan fite-ɔ? Afin ndɛ ng’ɔ o sran’n i awlɛn’n nun’n yɛ ɔ fin i nuan fite-ɔ.”​​—Matie 7:16, 17; 12:34.

Kɛ mɔ ndɛ ng’ɔ o sran’n i awlɛn’n nun’n yɛ ɔ fite i nuan’n ti’n, ndɛ sɔ’n su yɛ bé jrán bé dí i jɔlɛ-ɔ. I sɔ’n ti’n, Zezi seli kɛ: “Ń kán klé amun kɛ ndɛ ngbɛnngbɛn kwlaa mɔ sran’m be kan’n, Jɔlɛ dilɛ cɛn’n nun’n, be bɔbɔ bé kɛ́n i su ndɛ. Afin ɔ nuan ndɛ’n su yɛ Ɲanmiɛn jrán sé kɛ a ti seinfuɛ-ɔ, yɛ ɔ nuan ndɛ’n su yɛ ɔ́ jrán bú ɔ fɔ-ɔ.”​​—Matie 12:36, 37.

Zezi yoli abonuan sa kpanngban kleli sran mun. Ɔ nin i sɔ ngba’n, mmla klɛfuɛ mun nin Farizifuɛ’m be waan ɔ yo abonuan sa uflɛ ekun kle be. Be seli i kɛ: “Like klefuɛ, e kunndɛ kɛ a yo abonuan sa kun kle e.” Sɛ mmla klɛfuɛ mun nin Farizifuɛ’m be wunnin abonuan sa nga Zezi yoli be’n be ɲinma jrɛiin nun sa-o annzɛ sɛ b’a wunmɛn i-o, sanngɛ sran kpanngban be wunnin kɛ Zezi yoli abonuan sa sɔ mun sakpa. I sɔ’n ti’n, Zezi seli mmla klɛfuɛ mun nin Farizifuɛ’m be kɛ: “Ajulisufuɛ klunwifuɛ mɔ be ti kɛ sran mɔ be kunndɛ bla be yi bo annzɛ bian be wun bo sa’n, be kunndɛ titi kɛ be yo nzɔliɛ like be kle be. Sanngɛ sɛ w’a yoman Ɲanmiɛn nuan ijɔfuɛ Zonasi i nzɔliɛ like liɛ’n, be su yoman nzɔliɛ like uflɛ fi be kleman be.”​​—Matie 12:38, 39.

Zezi yiyili ndɛ ng’ɔ kan kleli be’n nun. Ɔ seli kɛ: “Wafa kunngba nga Zonasi dili cɛn ba nsan jue dan’n i klun lɔ’n, Sran wa’n kusu wá dí cɛn ba nsan asiɛ’n i bo.” Jue dan kun mɛnnin Zonasi. Kɛ ɔ dili cɛn ba nsan’n, ɔ fin jue’n i klun lɔ fiteli. Ɔ ti kɛ ɔ wuli yɛ w’a cɛn nguan sa-ɔ. Zezi kannin ndɛ sɔ’n fa kɛnnin i bɔbɔ i ndɛ. Ɔ seli kɛ ɔ́ wá wú naan i le nsan su’n ɔ́ cɛ́n. Kɛ ɔ yoli sɔ kusu-ɔ. Kannzɛ bɔbɔ Zuifu’m be Ɲanmiɛn sulɛ wafa’m be kpɛnngbɛn’m be wunnin ‘Zonasi i nzɔliɛ like’n,’ sanngɛ b’a kaciman be akunndan’n naan se kɛ bé káci be nzuɛn’n. (Matie 27:63-66; 28:12-15) ‘Ninivufuɛ’m’ be liɛ’n, kɛ Zonasi kannin Ɲanmiɛn nuan ndɛ kleli be’n, be kacili be nzuɛn’n. Ɔ maan Ninivufuɛ’m bé bú Zuifu’m be fɔ. Zezi kannin Seba famiɛn bla’n i ndɛ wie. Ɔ seli kɛ like nga bla sɔ’n yoli’n, ɔ́ bú Zuifu’m be fɔ wie. Yɛle kɛ bla sɔ’n kunndɛli kpa kɛ ɔ́ tíe Salomɔn i ngwlɛlɛ ndɛ mun. Ndɛ ng’ɔ tili’n, ɔ boli i nuan dan. Kɛ Zezi guɛ́ i ndɛ’n i bo’n, ɔ seli kɛ: “Sran kun o wa’n, i dan tra Salomɔn.”​​—Matie 12:40-42.

Zezi fɛli i blɛ su sran tɛ sɔ mun, ɔ fa be sunnzunnin sran kun mɔ mmusu kun fin i nun fite’n. (Matie 12:45) Sɛ sran sɔ’n yoman sa ng’ɔ ti kpa’n, mmusu’n kó flɛ́ mmusu nso ekun mɔ be klunwi’n trɛ i liɛ’n, naan be wa wlu sran’n nun. I kunngba’n, Ɲanmiɛn yoli Izraɛli nvle’n i nunfuɛ’m be sanwun naan b’a yo kpa. Be ti kɛ sran nga mmusu’n fin i nun fiteli’n sa. Sanngɛ nvlefuɛ’n b’a faman Ɲanmiɛn nuan ijɔfuɛ’m be ndɛ’n su. I kpa bɔbɔ’n, be tanndannin Zezi i ɲrun. Kusu nn ɔ ti weiin kɛ Ɲanmiɛn jrɛn i sin naan i wawɛ’n wo i su. Ɔ maan Izraɛli nvle’n i nunfuɛ’m be wa yoli tɛ trali laa liɛ’n bɔbɔ.

Zezi i nin nin i niaan’m be bali lɛ. Sanngɛ be kali gua su lɔ. Kɛ ɔ́ yó sɔ’n nn Zezi te ijɔ. Be nga be o i wun koko lɛ’n be seli i kɛ: “Ɔ nin nin ɔ niaan’m be jinjin gua su lɔ, be kunndɛ kɛ bé wún ɔ wun.” Sanngɛ Zezi kleli be kɛ i sɔnnzɔnfuɛ mun yɛ be ti i sran cinnjin kpa-ɔ. Ɔ tinndinnin i sa’n be wun naan w’a se kɛ: “Min nin nin min niaan mun yɛle be nga be ti Ɲanmiɛn ndɛ’n, mɔ be fa su’n.” (Liki 8:20, 21) Zezi i ndɛ sɔ’n kle kɛ ɔ klo i osufuɛ mun sɔ, sanngɛ ɔ klo i sɔnnzɔnfuɛ’m be kpa trɛ i osufuɛ mun. I wafa kunngba’n, maan e klo e niaan nga e nin be e su Zoova’n be kpa. I liɛ’n, kannzɛ sran’m be kan e wun ndɛ tɛtɛ’n, é wlá e wun fanngan.