Sa yaci cɛlɛ’n ti cinnjin kpa

Kɛ Zezi seli kɛ sɛ ndɛ tɔ sran nɲɔn be afiɛn’n, ɔ fata kɛ be nɲɔn’n be siesie’n, Piɛli tili nun wie. ?Sanngɛ kpɛ nɲɛ yɛ ɔ fata kɛ sran kun ko wun i niaan’n i wun naan be siesie-ɔ? Atrɛkpa’n, Piɛli kunndɛli kɛ ɔ́ sí i sɔ liɛ’n i nuan.

Ɔ maan Piɛli usali Zezi kɛ: “?E Min, kpɛ nɲɛ yɛ min niaan yó min sa yɛ ń yáci ń cɛ́ i-ɔ? ?Lele kpɛ nso?” Zuifu’m be Ɲanmiɛn sulɛ wafa’m be su kpɛnngbɛn wie’m be waan sɛ be yo sran kun sa’n, ɔ fata kɛ sran sɔ’n yaci cɛ lele kpɛ nsan. Ɔ maan Piɛli buli i kɛ sɛ ɔ se kɛ ‘lele kpɛ nso’n,’ nn w’a yo sa kpa dan.​—Matie 18:21.

Sanngɛ nán kɛ Zezi bu i sɔ wie-ɔ. Afin ɔ kunndɛman kɛ sran nga be yo i tɛ’n, ɔ fa ndɛ sie i klun. I sɔ’n ti’n, ɔ tɛli Piɛli su kɛ: “Maan n se wɔ, nán kpɛ nso-ɔ, sanngɛ kpɛ lele ableso-nin-nso (77).” (Matie 18:22) I sɔ’n kle kɛ ɔ fata kɛ e yaci sa tɛ nga be yo e’n e cɛ titi. I sɔ yɛ ɔ fata kɛ Piɛli kusu yo-ɔ.

Zezi kunndɛli kɛ i sɔnnzɔnfuɛ onga mun nin Piɛli be wun i wlɛ kpa kɛ ɔ fata kɛ be yaci sa cɛ. I sɔ’n ti’n, ɔ kannin kanga kun nin i min’n be ndɛ ɲanndra nun kleli be. Kanga sɔ’n, ɔ yaciman sa cɛman. Sanngɛ i min’n i liɛ’n, ɔ yaci sa cɛ. Yɛle kɛ cɛn kun’n, famiɛn’n kunndɛli kɛ i kanga’m be yi kalɛ ng’ɔ o be su’n be mɛn i. Ɔ maan be fɛli i kanga kun mɔ i kalɛ’n wo i su’n, be blɛli i. Nanwlɛ, kalɛ sɔ’n timan aɔwi. Ɔ ti talan akpiakpi blu (10.000) [talan 10.000 ti denie 60.000.000]. Kannzɛ kanga sɔ’n ɔ miɛn i ɲin sɛ’n, ɔ su kwlá wiemɛn i yi le. I sɔ’n ti’n, famiɛn’n seli kɛ be yo kanga’n nin i yi nin i mma’m be kwlaa be atɛ naan be fa tannin kalɛ’n. Kɛ kanga’n tili i sɔ’n, ɔ kotoli i min’n i bo naan w’a srɛ i kɛ: “Yaci, minndɛ min kan, ń má yí i kwlaa ń mán wɔ.”​—Matie 18:26.

Kɛ ɔ yoli sɔ’n, famiɛn’n sili i kanga’n i aunnvuɛ naan w’a yaci kalɛ dan sɔ’n w’a cɛ i. Kɛ kanga’n fin i min’n i awlo lɔ fiteli’n, ɔ wunnin i wiengu kanga kun mɔ i sika denie ya (100) wo i su’n. I liɛ su’n, ɔ trɛli i, ɔ miɛnnin i kɔmin fii. Kpɛkun ɔ seli i kɛ: “Yi min sika’n kwlaa man min.” I wiengu kanga’n kotoli i bo kpɛtɛli i. Ɔ srɛli i kɛ: “Yaci, minndɛ min kan, ń má yí i kwlaa ń mán wɔ.” (Matie 18:28, 29) Sanngɛ i mɔ i min’n yacili i kalɛ liɛ’n cɛli i’n, w’a yoman kɛ i min’n sa. Ɔ yoli maan be toli i wiengu kanga’n be yili i bisua lele saan w’a wie i su kalɛ’n kwlaa tannin. Kusu nn i wiengu kanga’n i kalɛ liɛ’n ti kaan sa.

Zezi waan kanga sɔ’n i wiengu’m be wunnin kɛ w’a siman sran aunnvuɛ. Ɔ maan be ko kannin sa kwlaa ng’ɔ juli’n kleli be min’n. Kanga’n i min’n fali ya dan kpa. Ɔ flɛli i, naan w’a se i kɛ: “Klunwifuɛ, kɛ a kpatali min’n, n yacili ɔ su kalɛ’n kwlaa n cɛli wɔ. ?Ɔ fataman kɛ ɔ kusu a si ɔ wiengu kanga’n i aunnvuɛ kɛ nga n fa sili ɔ aunnvuɛ’n sa?” Kɛ ɔ yoli sɔ’n, famiɛn’n fali kanga mɔ w’a siman aunnvuɛ’n wlali bisua sunianfuɛ’m be sa nun lele saan w’a wie i su kalɛ’n kwlaa tannin. Zezi guɛli i ndɛ’n i bo seli kɛ: “Sɛ amun tinuntinun amun yaciman sa nga amun niaan yo amun’n cɛmɛn i klun ufue su’n, min Si m’ɔ o ɲanmiɛn su lɔ’n kusu su yaciman amun wun sa liɛ’n cɛman amun.”​—Matie 18:32-35.

Nanwlɛ, sa yaci cɛlɛ’n i su afɔtuɛ nga Zezi mannin’n yo fɛ dan! Sa tɛ nga e yo’n, ɔ ti kɛ kalɛ dan wie yɛ ɔ o e su sa-ɔ. Sanngɛ Ɲanmiɛn yaci kalɛ dan sɔ’n cɛ e. Sa tɛ nga e niaan’m be yo e’n, ɔ juman nga e yo Zoova’n nun kaan sa. Ɔ nin i sɔ’n ngba’n, Zoova yaci e liɛ’n cɛ e weiin. Yɛ ɔ yo i sɔ titi. ?Yɛ e li? ?Kannzɛ e niaan kun yo e sa tɛ kpɛ sunman’n, é yó i sɛ? ?Sɛ e ndɛ yo fɛ bɔbɔ’n, é yáci é cɛ́ i? Kɛ Zezi kán Ɲanmiɛn ndɛ oka’n su lɔ’n, ɔ seli kɛ Ɲanmiɛn ‘yáci e tɛ mun cɛ́ e kɛ nga e yaci be mɔ be yo e tɛ’n be liɛ’n e cɛ be’n sa.’​—Matie 6:12.