Bua fa kun, bua tafuɛ kun

“Amun bɔ an suli n su’n, amun kusu án wá trán bia blu-nin-nnyɔn su, amún dí Izraɛl nvle blu-nin-nnyɔn’m be jɔlɛ.”—MAT. 19:28.

 1. ?Wafa sɛ yɛ Zoova nin Abraamu i afinliɛ nunfuɛ’m be trannin ɔn? ?Yɛ ngue ti yɛ i sɔ’n kleman kɛ ɔ kpɔcili nvle nga mun ɔn?

ZOOVA kloli Abraamu. I ti’n w’a kpɔciman Abraamu i osu’n nunfuɛ mun, ɔ kloli be wie. Izraɛli nvle m’ɔ ti Abraamu i afinliɛ nunfuɛ mun’n, Zoova fa yoli i nvle lele afuɛ 1.500 tra su. Ɔ kpali be kɛ be “yo i liɛ klonglo.” (An kanngan Mmla’n 7:6 nun.) ?I sɔ’n kle kɛ nn Zoova buman nvle nga’m be like fi? Cɛcɛ. Afin, i blɛ sɔ’n nun’n, be nga be timan Izraɛlifuɛ mɔ be waan bé sú Zoova’n, be mɛn be atin naan be fɛ be wun mantan Ɲanmiɛn i nvle klonglo sɔ’n. Sran sɔ mɔ be kaci Ɲanmiɛn i sufuɛ’n, ɔ ti kɛ be wuli be nvle sɔ’n nun sa. Ɔ fata kɛ be yo be kɛ Izraɛlifuɛ’m be bɔbɔ be sa. (Sau. 19:33, 34) Ɔ fata kɛ sran sɔ’m be kusu be nanti Zoova i mmla’m be kwlaa be su.—Sau. 24:22.

 2. ?Abonuan ndɛ benin yɛ Zezi kannin ɔn? ?Yɛ ndɛ sɔ’n su kosan benin yɛ e kwla fa usa e wun ɔn?

² Sanngɛ, Zezi kannin abonuan ndɛ nga kleli i blɛ su Zuifu mun. I waan: “Bé wá dé Nyanmiɛn famiɛn dilɛ’n amun sa nun, bé fá mán nvle uflɛ bɔ bé wá yó sa kpa mɛ́n i’n.” (Mat. 21:43) ?Wan mun yɛ bé yó nvle uflɛ sɔ’n i nunfuɛ mun ɔn? ?Yɛ wafa sɛ yɛ ninnge’m be kacilɛ sɔ’n kan e andɛ ɔ?

Nvle uflɛ’n

3, 4. (a) ?Wafa sɛ yɛ akoto Piɛli kannin nvle uflɛ’n i su ndɛ ɔ? (b) ?Wan mun yɛ be ti nvle sɔ’n i nunfuɛ ɔ?

³ Akoto Piɛli kannin nvle uflɛ sɔ’n i ndɛ weiin kpa. Ɔ klɛli ndɛ ng’ɔ o yɛ’n ko mɛnnin i niaan Klistfuɛ mun. I waan: “An ti sran bɔ Nyanmiɛn fali amun, an ti Famiɛn Nyanmiɛn’n i nyrun jranfuɛ mun, an ti Nyanmiɛn i nvle’n nun sran mun, yɛ an ti i liɛ mlɔnmlɔn. Ɔ fali amun kɛ an yi i b’ɔ flɛli amun kɛ an jao aosin nun, an bla lika ng’ɔ kpaja kpa nun’n i ayɛ.” (1 Piɛ. 2:9) Kɛ nga Piɛli fa kɛnnin i lɛ sa’n, be kwlaa nga be wuli be Zuifu mɔ be sɔ Zezi nun kɛ i yɛ ɔ ti Mɛsi’n, be yoli nvle uflɛ sɔ’n i nun sran klikli mun. Ɔ maan Ɲanmiɛn nuan ndɛ nga i waan Mɛsi’n “wá jrán aenguɛ’n su sran kpanngban kpa’m be liɛ’n” ɔ kpɛnnin su blɛ wie nun. (Dan. 9:27a, NW; Mat. 10:6) I sin’n, be nga be timan Izraɛlifuɛ’n, be nun kpanngban be wa yoli nvle sɔ’n i nunfuɛ wie. Afin, Piɛli kɛnnin i kɛ: “Laa an ti-man Nyanmiɛn sran mun, sanngɛ siɛn’n, amun a kaci i sran mun.”—1 Piɛ. 2:10.

⁴ ?Wan mun yɛ Piɛli su kan ndɛ kle be ɔ? I fluwa’n i bo bolɛ’n nun’n, ɔ seli kɛ: “[Ɲanmiɛn] wuli ye ekun, ɔ maan e wla o like bɔ e si weiin kpa kɛ ɔ o lɔ’n su Jésus-Krist i cɛnlɛ’n ti. Ɔ wuli ye sɔ naan e nyan like kpa ng’ɔ sieli i nyanmiɛn su lɔ’n. Like sɔ’n kwlá saci-man, ɔ yo-man fiɛn, yɛ ɔ mlin-man.” (1 Piɛ. 1:3, 4) Nvle uflɛ sɔ’n i nunfuɛ mun yɛle Klistfuɛ nga be kpali be sieli be ngunmin mɔ be wla osu kɛ bé kɔ́ ɲanmiɛn su’n. Be yɛ be ti “Izraɛlfuɛ nga be ti [Ɲanmiɛn] i liɛ sakpa’n” niɔn. (Gal. 6:16) Aolia nun’n, akoto Zan wunnin kɛ “Izraɛlfuɛ nga be ti [Ɲanmiɛn] i liɛ sakpa’n,” be ti sran 144.000. “Be kpɔli be ti sran’m be nun kɛ be yo Nyanmiɛn nin Bua Gbanflɛn’n be sran’m be nun klikli,” naan be yo “Nyanmiɛn [...] nyrun jranfuɛ.” Kpɛkun be yɛ “be nin Krist [...] bé dí famiɛn afuɛ akpi nin-ɔn.”—Ngl. 5:10; 7:4; 14:1, 4; 20:6; Zak 1:18.

?Sran uflɛ’m be o nvle sɔ’n nun wie?

 5. (a) ?Wan mun yɛ be flɛ be kɛ “Izraɛlfuɛ nga be ti [Ɲanmiɛn] i liɛ sakpa’n” niɔn? (b) ?Ngue ti yɛ kɛ be kan “Izraɛl” ndɛ’n, ɔ fataman kɛ e bu Izraɛli nvle ngunmin i akunndan ɔn?

⁵ Nanwlɛ, kɛ Galasifuɛ Mun 6:16 kan “Izraɛlfuɛ nga be ti [Ɲanmiɛn] i liɛ sakpa’n” be ndɛ’n, be nga be kpali be sieli be ngunmin’n be kunngba be ndɛ yɛ ɔ kan ɔn. ?Sanngɛ ɔ ju wie’n, Zoova fa Izraɛli nvle’n fa yo kɛ nzɔliɛ like sa annzɛ ɔ fa kan akunndan nun ndɛ fa kle kɛ sran uflɛ’m be o nun wie? E kwla wun kosan sɔ’n i su tɛlɛ ndɛ yɛ mɔ Zezi kan kleli i akoto nga b’a kpɔcimɛn i le’n, i nun. Ɔ seli kɛ: ‘Kɛ n Si sieli n famiɛn’n, n kusu ń síe amun famiɛn naan tabli nga ń dí su min mɛn’n nun lɔ’n, án dí su wie, yɛ ń síe amun bia su maan bé fá Izraɛl nvle blu-nin-nnyɔn mun bá amun ja su.’ (Lik 22:28-30) Klist i Afuɛ Akpi Famiɛn Dilɛ Blɛ nun mɔ ‘bé wá bó mɛn’n i uflɛ ekun’n,’ yɛle kɛ, kɛ like kwlaa wá káci uflɛ ekun’n, yɛ i sɔ liɛ’n kpɛ́n su ɔ.—An kanngan Matie 19:28 nun.

6, 7. ?Matie 19:28 nin Lik 22:30 nun’n, kɛ be kan ‘Izraɛl nvle blu-nin-nnyɔn’n’ ndɛ’n, wan’m be ndɛ yɛ be kan ɔn?

⁶ Klist i Afuɛ Akpi Famiɛn Dilɛ Blɛ’n nun’n, sran 144.000 bé dí famiɛn ɲanmiɛn su lɔ, bé yó Ɲanmiɛn ɲrun jranfuɛ nin jɔlɛ difuɛ. (Ngl. 20:4) ?Wan mun yɛ bé dí be jɔlɛ ɔ? ?Yɛ wan mun yɛ bé síe be ɔ? Matie 19:28 nin Lik 22:30 nun’n, be waan ‘bé dí Izraɛl nvle blu-nin-nnyɔn’m be jɔlɛ.’ ?Wan mun yɛle “Izraɛl nvle blu-nin-nnyɔn” mɔ be kan be ndɛ wa’n? Be yɛle be kwlaa nga be lafi su kɛ bé trán asiɛ’n su wa’n. Sran sɔ mun’n, be lafi Zezi i tɛ ng’ɔ yili’n su. Sanngɛ be liɛ’n be nunman be nga bé yó Ɲanmiɛn ɲrun jranfuɛ’n be nun wie. (Izraɛli nvle blu nin nɲɔn nga be kan be ndɛ’n, Levi akpasua liɛ’n nunman nun wie.) Be nga be kan be ndɛ kɛ be ti Izraɛli nvle 12 yɛle be nga kɛ sran 144.000 bé dí be Ɲanmiɛn ɲrun jranfuɛ junman’n, bé ɲán su ye Ɲanmiɛn ninnge’m be nun’n. Be nga be diman Ɲanmiɛn ɲrun jranfuɛ junman’n wie’n, be ti Ɲanmiɛn i nvle wie. Yɛ Ɲanmiɛn klo be kpɛkun ɔ sɔ be nun. I ti’n, ɔ nin i fata kɛ be fa be sunnzun be nga laa be ti i nvle’n nunfuɛ’n.

⁷ Kɛ akoto Zan wunnin sran 144.000 mɔ be ti Ɲanmiɛn liɛ’n mɔ be wieli be kwlaa be nzɔliɛ sie naan ɲrɛnnɛn dan’n w’a ju’n, i sin’n, ɔ wunnin “sran kpanngban kpa,” mɔ sran fi kwlá kaman be’n. Be “fin mɛnmɛn’n kwlaa” nun. (Ngl. 7:9) Sran sɔ mun’n, bé fín ɲrɛnnɛn dan’n nun bé fíte. Yɛ bé trán Klist i Afuɛ Akpi Famiɛn Dilɛ Blɛ’n i bo. Blɛ sɔ’n nun’n, sran miliar kpanngban nga bé wá cɛ́n be’n, bé úka be su. (Zan 5:28, 29; Ngl. 20:13) Be wunmuan sɔ’n, sɛ é kwlá sé’n, be yɛ be ti ‘Izraɛl nvle blu-nin-nnyɔn’n,’ be nunfuɛ ɔ. Be yɛ Zezi nin sran 144.000 mɔ be nin i bé dí famiɛn’n, bé wá dí be jɔlɛ’n niɔn.—Yol. 17:31; 24:15; Ngl. 20:12.

 8. ?Wafa sɛ yɛ ninnge nga be yo be Ɲanmiɛn i Kpatalɛ Cɛn dilɛ nun’n, be ti sran 144.000 ɔ nin mɛn’n nunfuɛ onga’m be afiɛn m’ɔ sɛ’n, i nzɔliɛ ɔ?

⁸ Sran 144.000 ɔ nin mɛn’n nunfuɛ onga’m be afiɛn m’ɔ sɛ’n, Ɲanmiɛn i Kpatalɛ Cɛn dilɛ nun’n, be yo ninnge wie mɔ be ti , i nzɔliɛ ɔ. (Sau. 16:6-10) Cɛn sɔ’n nun’n, ɔ fata kɛ Ɲanmiɛn ɲrun jranfuɛ’m be su kpɛn’n, ɔ fa nannin tola yi ‘i bɔbɔ, ɔ nin i awlofuɛ’m’ be sa tɛ’m be ti tɛ kwlaa ka. I kunngba’n, Zezi i tɛ ng’ɔ yili’n, ɔ dun mmua kan be nga bé úka Zezi bé dí Ɲanmiɛn ɲrun jranfuɛ junman. Sanngɛ Zezi yɛ ɔ ti Ɲanmiɛn ɲrun jranfuɛ’m be su kpɛn’n niɔn. Asa ekun’n, be nin Zezi yɛ bé dí famiɛn ɲanmiɛn su lɔ ɔ. Ɲanmiɛn i Kpatalɛ Cɛn dilɛ nun kusu’n, Izraɛlifuɛ onga’m be sa tɛ’n ti’n, be fa boli nɲɔn be yi be ti tɛ. Kɛ mɔ wa’n, be nga bé dí Ɲanmiɛn ɲrun jranfuɛ junman’n be yɛle sran 144.000 mun ti’n, Izraɛlifuɛ onga mun yɛle be kwlaa nga be lafi su kɛ bé trán asiɛ’n su wa’n. Kɛ be kan sɔ’n, ɔ kle kɛ kɛ be kan ‘Izraɛl nvle blu-nin-nnyɔn’n’ i ndɛ’n, nán be nga be kpali be sieli be ngunmin mɔ be nin Zezi m’ɔ ti Ɲanmiɛn ɲrun jranfuɛ’m be su kpɛn’n bé dí junman’n, be kunngba yɛ be ndɛ yɛ be kan ɔn. Sanngɛ sran kwlaa nga be lafi e ti kpɔlɛ tɛ mɔ Zezi yili’n su’n, be o nun wie.a

 9. ?Ɲanmiɛn i sua mɔ Ɲanmiɛn nuan ijɔfuɛ Ezekiɛli wunnin i aolia nun’n i nun’n, wan yɛle Ɲanmiɛn ɲrun jranfuɛ mun? ?Yɛ wan yɛle Izraɛlifuɛ nga be timan Ɲanmiɛn ɲrun jranfuɛ mun’n?

⁹ Maan e nian sunnzun ase uflɛ. Ɲanmiɛn nuan ijɔfuɛ Ezekiɛli wunnin Zoova i sua’n i aolia nun. (Eze., ndɛ tre 40-48) Aolia nun’n, Ɲanmiɛn i ɲrun jranfuɛ’m be su di junman Ɲanmiɛn i sua’n nun. Be kle sran’m be like yɛ Zoova man be afɔtuɛ. Kpɛkun sin be ja nun ɔ tinngɛ nvlefuɛ’m be ninnge yolɛ’n. (Eze. 44:23-31) Aolia nun like kunngba sɔ’n nun’n, Izraɛlifuɛ nga be fin Izraɛli nvle’n i akpasuaakpasua’m be su’n, be ba kɛ bé sú Ɲanmiɛn naan bé yí tɛ bé mɛ́n i. (Eze. 45:16, 17) Asa ekun’n, Ɲanmiɛn ɲrun jranfuɛ mun yɛle be nga be kpali be sieli be ngunmin’n. Yɛ Izraɛlifuɛ nga be timan Ɲanmiɛn ɲrun jranfuɛ’n, be yɛle be nga be lafi su kɛ bé trán asiɛ’n su wa tititi’n. Aolia nun sa sɔ’n tin su kpa kɛ, sran akpasua nɲɔn sɔ’m be di junman likawlɛ klanman. Naan be nga be ti Ɲanmiɛn ɲrun jranfuɛ mun’n, be yɛ be fa Ɲanmiɛn sulɛ kpa’n i nun ta’n niɔn.

10, 11. (a) ?Zezi i ndɛ benin m’ɔ kpɛnnin su’n yɛ ɔ yoli maan e lafili Ɲanmiɛn su kpa ekun ɔn? (b) ?Kosan benin yɛ bua’m be wie’m be ti’n, e kwla usa be ɔ?

¹⁰ Zezi kannin “bua’m be wie” mun nin “bua akpasua kaan” mɔ be yɛle Zezi i sufuɛ nga be kpali be sieli be ngunmin’n, mɔ be nunman “tuin” kunngba’n nun’n be ndɛ. (Zan 10:16; Lik 12:32) Ɔ seli kɛ: “Saan ń fá be sɔfuɛ mun bá, bé tí min nɛn, be akpasua’n yó kun yɛ be tafuɛ’n yó kunngba.” Kɛ e wunnin kɛ ndɛ sɔ’n kpɛnnin su’n, nanwlɛ, ɔ yoli maan e lafili Ɲanmiɛn su kpa ekun! Be fali sran akpasua nɲɔn’m be kan boli nun. Yɛle kɛ be fali be nga be kpali be sieli be ngunmin mɔ be ti akpasua kaan’n, ɔ nin sran kpanngban kpa mɔ be ti bua’m be wie’m be nunfuɛ’n, be kan boli nun. (An kanngan Zakari 8:23 nun.) Kannzɛ bɔbɔ bua’m be wie mun be kwlá wluman Ɲanmiɛn i sua mɔ nán sran yɛ ɔ kplannin’n i sua ba’n i klun lɔ be sumɛn i’n, sanngɛ be kwla ka sua sɔ’n i awlo’n i klun be su i.

¹¹ Ɔ ju wie’n, Zoova fa laa Izraɛlifuɛ nga be timɛn i ɲrun jranfuɛ mun’n sunnzun be nga be ti bua’m be wie mun’n. ?I sɔ’n ti’n, ɔ fata kɛ E Wla Kpɛnlɛ Cɛn’n i bo’n, be nga be wla o su kɛ bé trán asiɛ’n su wa’n be di nzɔliɛ ninnge’m be wie? Kosan sɔ’n yɛ e su wa tɛ su siɛn’n niɔn.

Aenguɛ uflɛ’n

12. ?Ninnge’m be siesielɛ uflɛ benin yɛ Zoova dun mmua boli su ɔ?

¹² Zoova dun mmua boli su kɛ ɔ́ wá síesíe ninnge’m be uflɛ mɛ́n i nvlefuɛ mun. Ɔ seli kɛ: “Aenguɛ nga cɛn wie e nin Izraɛl nvle’n é trá yɛ: Ń fá min mmla’n ń wlá be akunndan’n nun. Sɛ é kwlá sé’n, ń fá klɛ́ be anwlɛn’n nun. Ń yó be Nyanmiɛn, be kusu bé yó min sran.” (Zer. 31:31-33) Aenguɛ uflɛ sɔ’n ti’n, nda nga Zoova tali Abraamu’n, i su kpɛnlɛ’n yó dan yɛ ɔ́ yó mlɔnmlɔnmlɔn.—An kanngan Bo Bolɛ 22:18 nun.

13, 14. (a) ?Wan mun yɛ be o aenguɛ uflɛ’n i nun wie ɔ? (b) ?Wan mun yɛ be di i su mmlusuɛ’n niɔn? ?Yɛ wafa sɛ yɛ be ‘nian aenguɛ’n i mmla’n su’ wie ɔ?

¹³ Kɔnguɛ kasiɛn ka naan b’a kun Zezi’n, ɔ boli aenguɛ sɔ’n su. I waan: “Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amún trá’n, i nzɔliɛ, amun ti yɛ be su wa guɛ i ase-ɔ.” (Lik 22:20; 1 Kor. 11:25) ?Klistfuɛ’m be kwlaa be o aenguɛ sɔ’n nun? Cɛcɛ. Wie mun kɛ akoto mɔ be nɔnnin klowa sɔ’n nun nzan kɔnguɛ sɔ’n sa’n, be o aenguɛ uflɛ sɔ’n nun wie.b Zezi nin be trali aenguɛ uflɛ naan i famiɛn dilɛ blɛ’n nun’n, be nin i di famiɛn. (Lik 22:28-30) Ɔ maan be nin Zezi yɛ bé síe ɔ.—Lik 22:15, 16.

¹⁴ ?Yɛ be nga bé trán Ɲanmiɛn Sielɛ’n i bo asiɛ’n su wa’n nin? Aenguɛ sɔ’n, be yɛ bé ɲɛ́n i su mmlusuɛ’n niɔn. (Gal. 3:8, 9) Kannzɛ be nunman aenguɛ’n nun wie’n, sanngɛ be ‘nian aenguɛ’n i mmla’n su’ wie. I sɔ ndɛ yɛ Ɲanmiɛn nuan ijɔfuɛ Ezai dun mmua kannin ɔn. I waan: ‘Aofuɛ nga be fa be wun mantan min’n, bɔ be bu min sran’n, bɔ be klo min’n, bɔ be fa be wun man kɛ bé yó min sufuɛ’n, bɔ be sie min wunmiɛn delɛ cɛn’n i ngunmin’n, bɔ be nian aenguɛ nga min nin min nvle’n nunfuɛ mun e trali’n i mmla’n su kpa’n, ń fá be ḿ bá m bɔbɔ min oka’n su wa, bé sú min min srɛwa sua’n nun, yɛ ń yó maan be klun jɔ́.’ Kpɛkun Zoova seli kɛ: “Afin bé flɛ́ min sua’n kɛ Nvle-nvlefuɛ’m be Kwlaa be Nyanmiɛn Srɛlɛ Sua.”—Eza. 56:6, 7.

?Wan mun yɛ ɔ fata kɛ be di nzɔliɛ ninnge mun ɔn?

15, 16. (a) ?Cenjele like benin yɛ akoto Pɔlu fa wɔli be nga be o aenguɛ uflɛ nun’n wie ɔ? (b) ?Ngue ti yɛ ɔ fataman kɛ be nga bé trán asiɛ’n su wa tititi’n, be di E Wla Kpɛnlɛ Cɛn’n i bo nzɔliɛ ninnge mun ɔn?

¹⁵ Be nga be o aenguɛ uflɛ’n nun’n, be ‘si weiin kɛ be kwla wlu Nyanmiɛn lika kpa’n nun.’ (An kanngan Ebre Mun 10:15-20 nun.) Sran sɔ mun’n, bé “nyán mɛn b’ɔ keje-man’n.” (Ebr. 12:28) I sɔ’n ti’n, be nga be nin Zezi Klist bé dí famiɛn’n mɔ bé yó Ɲanmiɛn ɲrun jranfuɛ ɲanmiɛn su lɔ’n, be ngunmin yɛ ɔ fata kɛ be nɔn “klowa’n” i nun like m’ɔ ti aenguɛ uflɛ’n, i nzɔliɛ’n niɔn. Be mɔ be di aenguɛ’n i nun ninnge mun’n, be yɛ sɛ é kwlá sé’n, be trali be ase kɛ be yo Bua Gbanflɛn’n i yi’n niɔn. (2 Kor. 11:2; Ngl. 21:2, 9) Be nga afuɛ nuan kwlaa be ba E Wla Kpɛnlɛ Cɛn’n i bo’n, be liɛ’n be diman nzɔliɛ ninnge mun wie. Be ko trɛn i bo aɲinyiɛ su.

¹⁶ Pɔlu kusu uka e naan y’a wun i wlɛ kɛ be nga bé trán asiɛ’n su wa’n, be diman E Wla Kpɛnlɛ Cɛn’n i bo nzɔliɛ ninnge’m be wie. Ɔ seli Klistfuɛ nga be kpali be sieli be ngunmin’n be kɛ: ‘Ɔ maan cɛn kwlaa nga amún dí kpaun nga bɔ amún nɔ́n klowa nga nun’n, an bo e Min’n i wie ndɛ’n su lele maan ɔ fa ju i balɛ.’ (1 Kor. 11:26) ?Blɛ benin nun yɛ e min’n ‘bá’ ɔ? Kɛ ɔ́ wá bá Klistfuɛ nga be kpali be sieli be ngunmin mɔ be ti i yi’n be nun kasiɛn ng’ɔ o asiɛ’n su wa naan be wɔ ɲanmiɛn su lɔ’n, be falɛ’n niɔn. (Zan 14:2, 3) Ɔ maan E Min’n i Aliɛ Cɛn dilɛ’n, be su kɔmɛn i bo sa tititi. “Bla’n i osufuɛ nga be kali lɛ’n,” mɔ be te o asiɛ’n su wa’n, bé dí E Min’n i Aliɛ Cɛn’n i bo ninnge’m be lele naan be kwlaa b’a wɔ ɲanmiɛn su. (Ngl. 12:17) Sɛ ɔ ti kɛ be nga bé trán asiɛ’n su wa tititi’n, be le atin be di nzɔliɛ ninnge mun’n, nn ɔ fata kɛ be di E Wla Kpɛnlɛ Cɛn’n i bo ninnge mun tititi.

“Bé káci min sran”

17, 18. ?Wafa sɛ yɛ Ɲanmiɛn nuan ndɛ ng’ɔ o Ezekiɛl 37:26, 27 nun’n, ɔ kpɛnnin su ɔ?

¹⁷ Ndɛ nga nun’n, Zoova kannin kɛ i nvlefuɛ’m be bo yó kun. I waan: “Ń sí min wue’n nun ḿ mán be aunjuɛ kpa. Yɛ aunjuɛ sɔ’n ɔ́ ká lɛ titi. Ń fá be ń síe. Ń yó maan bé trɛ́. Ń trán be afiɛn [Min sua’n trán be afiɛn], ń yó be Nyanmiɛn, yɛ bé yó min sran mun.”—Eze. 37:26, 27.

¹⁸ Nda klanman sɔ mɔ Ɲanmiɛn tali’n mɔ yɛle aenguɛ m’ɔ man Klistfuɛ’m be aunjuɛ’n, Ɲanmiɛn i nvlefuɛ’m be kwlaa be ɲɛn i su kpɛnlɛ’n i su mmlusuɛ. Ɔ ti be cenjele like. Zoova waan be kwlaa nga be nanti i ndɛ’n su’n, bé dí aunjuɛ. Sran’m bé wún kɛ be yo sa nga Ɲanmiɛn wawɛ’n maan sran yo’n. I sua m’ɔ ti Klistfuɛ’m be Ɲanmiɛn sulɛ’n kpa’n i nzɔliɛ’n, ɔ o be afiɛn. Be kacili i nvlefuɛ sakpa. Afin, be yacili amuin sɔlɛ wafa’n kwlaa yɛ be su Zoova m’ɔ ti Ɲanmiɛn Kpli’n i kunngba cɛ.

19, 20. ?Wan mun yɛ be o be nga Zoova flɛ be “min sran” mun’n, be nun ɔn? ?Ngue yɛ aenguɛ uflɛ’n ti’n ɔ yo ye ɔ?

¹⁹ Nanwlɛ kɛ e bɔbɔ e ɲinma wun kɛ sran akpasua nɲɔn sɔ’m be kan be bo nun e blɛ liɛ nga su’n, ɔ yo ɲɛnmɛn! Kannzɛ sran kpanngban kpa mɔ be te sɔn be te kɔ’n, be su kɔman ɲanmiɛn su’n, sanngɛ ɔ ti be cenjele nun kɛ be nin be nga bé kɔ́’n ɲanmiɛn su’n, be di junman likawlɛ. Be fa be wun mantannin Izraɛlifuɛ nga be ti Ɲanmiɛn liɛ sakpa’n. Kɛ be yo sɔ’n, be o be nga Zoova se kɛ be ti “min sran” mun’n, be nun wie. Ɲanmiɛn nuan ndɛ nga kpɛn su be lika. I waan: ‘I sɔ blɛ’n nun’n, sran sunman lika bé fá be wun bé mántan min, bé káci min sran. E nin amun é trán likawlɛ.’—Zkr. 2:11 2:15; Zkr. 8:21; an kanngan Ezai 65:22 nin Sa Nglo Yilɛ 21:3, 4 nun.

²⁰ Aenguɛ uflɛ’n yɛ Zoova fa yoli naan i kwlaa sɔ’n w’a yo ye ɔ. Sran miliɔn kpanngban kpa mɔ be fin mɛnmɛn nin nvlenvle fanunfanun nun’n, b’a kaci Zoova i nvle mɔ i klun jɔ i wun’n, i nunfuɛ mun. (Mis. 4:1-5) B’a ta nda kɛ bé dí aenguɛ’n i mmla’n su. Yɛle kɛ bé sɔ́ ninnge nga ɔ fa man be’n be nun. (Eza. 56:6, 7) Kɛ be yo sɔ’n, alaje o be nin Izraɛlifuɛ nga be ti Ɲanmiɛn liɛ sakpa’n, be afiɛn titi. I ti’n, maan amun kusu amun di alaje sɔ’n wie andɛ yɛ amun di wie tititi!

[Ja ngua lɛ ndɛ mun]

?Amun wla kwla kpɛn su?

• ?Wan mun yɛle “Izraɛl nvle blu-nin-nnyɔn mun” mɔ sran 144.000 bé wá díbe jɔlɛ’n?

• ?Aenguɛ uflɛ’n nun’n junman benin yɛ be nga be kpali be sieli be ngunmin’n be di ɔ? ?Yɛ wafa sɛ yɛ bua’m be wie’m be ɲan su ye ɔ?

• ?Ɔ fata kɛ Klistfuɛ’m be kwlaa be di E Wla Kpɛnlɛ Cɛn’n i bo nzɔliɛ ninnge mun?

• ?Bo kun yolɛ benin yɛ be dun mmua kɛnnin i kɛ ɔ́ kpɛ́n su e blɛ liɛ’n su ɔ?