Famiɛn’n fuli aflunmun ba kun su wluli Zerizalɛmun klɔ’n nun

Kɛ Zezi wieli like di Simɔn i awlo lɔ mɔ i aliɛ cɛnnin’n, ɔ nin i sɔnnzɔnfuɛ’m be jasoli Betanin lɛ, yɛ be toli be ti Zerizalɛmun. Be tuli ajalɛ sɔ’n Mɔnnɛn cɛn. Ɔ ti Nizan i le 9. Kɛ bé wá mántan Bɛtfaze’n, Zezi kannin ndɛ kun kleli i sɔnnzɔnfuɛ mun. Klɔ sɔ’n wo Olivie oka’n su.

Ɔ seli be kɛ: “Amun wɔ klɔ nga amun ɲin tɛ i lɛ’n su. Sɛ amun ju lɔ’n, amún wún kɛ aflunmun kun minnda lɛ, i wa’n wo i wun lɛ. Amun ɲannji be naan amun fa be blɛ min. Sɛ sran kun usa amun sa’n, amun se kɛ: ‘E Min’n i sa mian be wun.’ Kɛ ɔ ko yo sɔ’n, ɔ́ ká lɛ mán amun atin naan amun fa be blɛ min.”​—Matie 21:2, 3.

Zezi i sɔnnzɔnfuɛ’m b’a wunmɛn i wlɛ kɛ like nga Zezi seli be kɛ be yo’n, Ɲanmiɛn nuan ijɔfuɛ Zakari dun mmua kɛnnin i ndɛ laa blɛ’n nun. Sanngɛ kɛ ndɛ sɔ’n kpɛnnin su’n, be wa wunnin i wlɛ kɛ ndɛ nga Zakari boli su’n yɛ w’a kpɛn su lɛ-ɔ. Zakari kannin wafa nga sran nga Ɲanmiɛn sieli i Famiɛn’n wá wlú Zerizalɛmun klɔ’n nun’n, i ndɛ. Ɔ seli kɛ: “Ɔ ti wɛtɛfuɛ. W’a fu aflunmun bɔ w’a kpɛ cro kun su. Aflunmun sɔ’n ɔ ti aflunmun bla kun wa.”​—Zakari 9:9.

Zezi i sɔnnzɔnfuɛ’m be ɔli Bɛtfaze kɛ ng’ɔ kannin’n sa. Kɛ bé ɲánnji aflunmun bla’n nin i wa’n, be nga be jinjin lɛ’n, be nun wie’m be seli be kɛ: “?Ngue ti yɛ amun su ɲannji aflunmun ba’n niɔn?” (Marki 11:5) Be tɛli be su kɛ be Min Zezi yɛ i waan be fa be blɛ i-ɔ. Kɛ sran’m be tili i sɔ’n, b’a kanman ndɛ fi kun. Ɔ maan be fali aflunmun mun ko mannin Zezi. Zezi i sɔnnzɔnfuɛ’m be fali be tralɛ mun sɛsɛli be aflunmun’n nin i wa’n be su. Sanngɛ aflunmun bafuɛ’n su yɛ Zezi trannin-ɔn.

Zezi fuli aflunmun ba’n su ɔli Zerizalɛmun. Kɛ ɔ́ kɔ́’n, nn be nga be su i su’n bé úka su kɔ́. Be nun wie’m be sɛsɛli be tralɛ mun akpɔ’n su. Wie’m be kusu be bubuli “waka nɲa fie’m be su.” Kpɛkun be siesieli be akpɔ’n su sɛsɛsɛ. Yɛ be kpannin seli kɛ: “É srɛ́ wɔ, de i! Maan Zoova yra sran ng’ɔ bɛ i dunman nun’n i su! Maan e si Davidi i Famiɛn dilɛ m’ɔ su ba’n, ɔ yo ye!” (Marki 11:8-10) Kɛ Farizifuɛ’m be tili i sɔ’n, ɔ yoli be ya kpa. Ɔ maan be seli Zezi kɛ: “Like klefuɛ, ijɔ ɔ sɔnnzɔnfuɛ mun.” Ɔ tɛli be su kɛ: “Ń kán klé amun kɛ sɛ be muan be nuan bɔbɔ’n, yɔbuɛ’m bé kpán.”​—Liki 19:39, 40.

Kɛ Zezi mantannin Zerizalɛmun m’ɔ wunnin klɔ’n, ɔ sunnin. Ɔ seli kɛ: “Wɔ, ɛɛn wɔ, sɛ ɔ ti kɛ andɛ’n a wunnin ninnge nga be man aunjuɛ’n be wlɛ’n[...] sanngɛ kɛ é sé yɛ’n be fali ninnge sɔ mun fiali ɔ ɲrun. [...] Ɔ kpɔfuɛ’m bé fá waka pienbie bé sísí ɔ wun, bé bó sín yía wɔ. Kpɛkun bé míanmían wɔ ɔ bue kwlaa su. Bé fá wɔ nin ɔ mma mun, bé tɛ́ amun ase. Be su yaciman yɔbuɛ fi i wiengu yɔbuɛ su. Afin sran kun bali ɔ niannianlɛ, sanngɛ w’a wunmɛn i wlɛ.” Nanwlɛ, kɛ mɔ Zerizalɛmunfuɛ’m be ɲin w’a yiman Ɲanmiɛn ti’n, be wunnin i su afɛ’n. (Liki 19:42-44) Afin kɛ nga Zezi kannin’n sa’n, be nunnunnin Zerizalɛmun klɔ’n afuɛ 70 nun.

Kɛ Zezi wlú Zerizalɛmun klɔ’n nun’n, “klɔ wunmuan’n kejeli yekee. Sran’m be usali kɛ: ‘?Wan-ɔn?’” Be nga be nin i be ba’n, be tɛli su kɛ: “Ɲanmiɛn nuan ijɔfuɛ Zezi m’ɔ fin Nazarɛti m’ɔ o Galile mɛn’n nun lɔ’n niɔn!” (Matie 21:10, 11) Be nga kɛ Zezi cɛ́n Lazaa’n be wunnin nun’n, be kannin abonuan sa sɔ’n i ndɛ kleli sran onga mun. I sɔ’n yoli Farizifuɛ’m be ya dan afin like kwlaa nga be yo’n, ɔ kpi ase. Ɔ maan Farizifuɛ’m be kɛnnin i be afiɛn lɔ kɛ: “Sran’m be kwlaa be su i su.”​—Zan 12:18, 19.

Kɛ Zezi juli Zerizalɛmun’n, ɔ ɔli Ɲanmiɛn i sua’n nun lɔ like klelɛ. Titi kɛ ɔ kɔ Zerizalɛmun’n i sɔ yɛ ɔ yo-ɔ. Asa ekun’n, Ɲanmiɛn i sua’n nun lɔ’n, ɔ yoli aɲinsifuɛ mun nin be nga be ja yo be ya’n be juejue. Ɲanmiɛn ɲrun jranfuɛ’m be su kpɛn mun nin mmla klɛfuɛ’m be wunnin abonuan sa ng’ɔ su yo be’n. Asa ekun’n, be tili kpanlɛ mɔ ba kanngan’m be kpannin Ɲanmiɛn i sua’n nun’n. Ba kanngan be kpan kɛ: “É srɛ́ wɔ, de Davidi i Wa’n!” Kɛ be wunnin i sɔ’n, ɔ yoli be ya dan. Ɔ maan be seli Zezi kɛ: “?A ti ndɛ nga ba kanngan nga’m be kan’n?” Ɔ tɛli be su kɛ: “Ɛɛn, n ti. ?Ndɛ nga be klɛli i kɛ, ‘A yoli maan ba kanngan nin ba nɔnman mun be manmannin wɔ’n,’ amun nin-a kɛnngɛnmɛn i le?”​—Matie 21:15, 16.

Zezi niannin Ɲanmiɛn i sua’n nun ninnge mun. Kpɛkun kɛ mɔ lika’n w’a ɔ mmua’n ti’n, ɔ nin i akoto’m be fite ɔli. Ka naan Nizan i le 10 w’a bo i bo’n, be sali be sin Betanin. Lɔ yɛ ɔ lali Mɔnnɛn cɛn kɔnguɛ-ɔ.