FLUWA’N I NUN KANNGANFUƐ’M BE KOSAN MUN

Zezi seli Sadisefuɛ mun kɛ be nga Ɲanmiɛn cɛ́n be’n, “be su ja-man bla nin bian.” (Lik 20:34-36) ?Be nga Ɲanmiɛn cɛ́n be mɔ bé trán asiɛ’n su’n, be ndɛ yɛ Zezi su kan ɔn?

▪ Kosan sɔ’n ti cinnjin kpa. I li, angbeti mun yɛ ɔ ti be cinnjin kpa ɔ. Afin, be nun wie’m be lafi su kpa kɛ be nin be wun’n, annzɛ be yi’n, bé wá trán awlobo ekun asiɛ’n m’ɔ́ wá káci mɛn klanman’n i su. Angbeti kun seli kɛ: “Min nin min yi’n, y’a sunnzunman cɛn kun sa le kɛ e su tranman awlobo kun. E lafili su cinnjin kpa kɛ é sú Ɲanmiɛn likawlɛ anannganman. N te bu i sɔ akunndan’n, m’an kaciman.” ?I lɛ’n niɔn, be nga Ɲanmiɛn cɛ́n be mɔ bé trán asiɛ’n su’n, bé kwlá já bla nin bian? E kwlá dimɛn i nanwlɛ trele.

I afuɛ wie yɛ’n, e kɛnnin i e fluwa’m be nun kɛ be nga Ɲanmiɛn wá cɛ́n be mɔ bé trán asiɛ’n su’n, be ndɛ yɛ Zezi kannin ɔn. Naan i sɔfuɛ’m be su jaman bla nin bian.a (Mat. 22:29, 30; Mar. 12:24, 25; Lik 20:34-36) Sanngɛ atrɛkpa’n, be nga bé cɛ́n mɔ bé kɔ́ ɲanmiɛn su’n be ndɛ yɛ Zezi kannin ɔn. Maan e yiyi ndɛ sɔ mɔ Zezi kannin’n i nun kan e nian.

?Wan mun yɛ Zezi kannin ndɛ sɔ’n kleli be ɔ? (An kanngan Lik 20:27-33 nun.) Sadisefuɛ mun yɛ ɔ kan kleli be ɔ. Kɛ mɔ Sadisefuɛ’m be waan sɛ sran wu ɔ, ɔ cɛnman’n ti’n, be nun wie’m be kunndɛli kɛ bé kplá Zezi bé nían. Ɔ maan, be kannin sran kun i angbeti mɔ i niaan’m be jɛli i be tinuntinun’n i ndɛ kleli Zezi.b Zezi seli be kɛ: “Ajulisufuɛ nga’m be ja bla nin bian, sanngɛ be nga be bu be kɛ be nin cɛnlɛ nin mɛn uflɛ ng’ɔ́ bá lɔ’n i nun tranlɛ fata’n, be su ja-man bla nin bian. Yɛ be su wu-man kun, yɛlɛ kɛ bé káci kɛ anz’m be sa, cɛnlɛ bɔ Nyanmiɛn cɛn be’n ti, bé yó i mma mun.”​—Lik 20:34-36.

?Ngue ti yɛ e fluwa’m be nun’n, e seli kɛ be nga Ɲanmiɛn cɛ́n be mɔ bé wá trán asiɛ’n su’n, be ndɛ yɛ Zezi kannin ɔn? Like nɲɔn ti yɛ e seli sɔ-ɔ. I klikli’n yɛle kɛ, be nga bé wá cɛ́n mɔ bé trán asiɛ’n su’n, be akunndan yɛ Sadisefuɛ’m be buli naan b’a usa Zezi i kosan ɔn. Zezi kusu e buli i kɛ atrɛkpa’n, akunndan nga sran sɔ’m be buli’n i su yɛ ɔ niannin tɛli be su ɔ. I nɲɔn su’n yɛle kɛ, kɛ Zezi tɛ́ be su’n, ɔ kannin Abraamu nin Izaaki ɔ nin Zakɔbu be ndɛ. Kɛ Ɲanmiɛn i sran kpa sɔ’m bé wá cɛ́n’n, asiɛ’n su yɛ bé trán ɔn.​—Lik 20:37, 38.

Be nga bé cɛ́n mɔ bé kɔ́ ɲanmiɛn su’n be ndɛ yɛ atrɛkpa’n, Zezi kannin ɔn. ?Ngue ti yɛ e kwla se sɔ ɔ? Maan e nian ndɛ nga Zezi kan kleli Sadisefuɛ mun’n i nun kpɔlɛ nɲɔn.

Zezi seli kɛ: “Be nga be bu be kɛ be nin cɛnlɛ [...] fata’n.” Be nga Ɲanmiɛn kpali be sieli be ngunmin’n, Ɲanmiɛn bu be kɛ be nin “famiɛn dilɛ’n wie fata.” (2 Tɛs. 1:5, 11) Tɛ mɔ Klist fɛli i wun yili’n ti’n, Ɲanmiɛn bu be sran kpa. Yɛ ɔ buman be fɔ kun. (Rɔm. 5:1, 18; 8:1) I sɔfuɛ mun “be liɛ su ti ye, be ti Nyanmiɛn liɛ sakpa.” Yɛ be nin ɲanmiɛn su lɔ tranlɛ fata. (Ngl. 20:5, 6) Sanngɛ, kɛ Ɲanmiɛn wá cɛ́n be nga bé trán asiɛ’n su wa’n, ɔ́ cɛ́n “sran tɛ mun” wie. (Yol. 24:15) Ɔ maan, be kwlá seman kɛ sran tɛ sɔ mun “be nin cɛnlɛ [...] fata.”

Zezi seli kɛ: “Be su wu-man kun.” Biblu wie’m be nun’n, be klɛli i kɛ “wie’n su kwlaman be kun” annzɛ “wie’n su ɲanman kwlalɛ be su kun.” Kɛ be nga Ɲanmiɛn kpali be sieli be ngunmin’n be wu’n, be kɔ ɲanmiɛn su. Kpɛkun, be kaci sran mɔ be wuman ɔn. (1 Kor. 15:53, 54) Ɔ maan, wie’n su ɲanman kwlalɛ be su kun.c

I kwlaa sɔ’n kle kɛ atrɛkpa’n, be nga bé cɛ́n mɔ bé kɔ́ ɲanmiɛn su’n, be yɛ Zezi kannin be ndɛ kɛ be su jaman bla nin bian’n niɔn. Sɛ ɔ ti sɔ sakpa’n, é sé kɛ e wunnin be su ndɛ nsan. (1) Be su jaman bla nin bian. (2) Be su wuman kun. (3) Be káci kɛ anzi mun sa. Ndɛ’n i wlɛ wunlɛ sɔ’n, ɔ kpɛ kosan wie’m be ba.

I klikli’n yɛle kɛ: ‘?Sɛ be nga bé cɛ́n mɔ bé trán asiɛ’n su wa’n be akunndan yɛ Sadisefuɛ’m be buli’n, ngue ti yɛ be nga bé cɛ́n mɔ bé kɔ́ ɲanmiɛn su’n be ndɛ yɛ Zezi kannin ɔn?’ Like nga sran’m be bu i akunndan’n, nán cɛn ngba yɛ Zezi nian su fa tɛ be su ɔ. I wie yɛle kɛ cɛn kun’n, sran wie’m be seli Zezi kɛ ɔ yi atrɛ kle be. Zezi seli be kɛ: “Sɛ an saci Nyanmiɛn i sua nga’n, i le nsan su’n ń kplɛ́n i ekun.” Zezi si kɛ Zuifu’m bé bú i kɛ Ɲanmiɛn i sua mɔ be kplannin’n i ndɛ yɛ ɔ su kan ɔn. Sanngɛ, “i wunnɛn b’ɔ fa sunnzun Nyanmiɛn i sua’n” i ndɛ yɛ ɔ kan ɔn. (Zan 2:18-21) Sadisefuɛ’m be kusu atrɛkpa’n, Zezi w’a tɛman be su trele, afin be ti gblɛfuɛ. Be waan sɛ sran wu-ɔ ɔ su cɛnman, yɛ be lafiman su kɛ anzi’m be o lɛ. (Nya. 23:9; Mat. 7:6; Yol. 23:8) Atrɛkpa’n, Zezi kannin ndɛ’n mannin i sɔnnzɔnfuɛ mun. Afin be liɛ’n, be ti nanwlɛfuɛ, yɛ cɛn wie lele’n bé kó trán ɲanmiɛn su lɔ.

Abraamu nin Izaaki nin Zakɔbu mɔ be wuli’n, Ɲanmiɛn wá cɛ́n be. Kpɛkun, bé trán asiɛ’n su. Ɔ maan kosan i nɲɔn su’n yɛle kɛ: ‘?Ngue ti yɛ kɛ Zezi tɛ́ Sadisefuɛ’m be su’n, ɔ boli laa Ɲanmiɛn i sufuɛ sɔ’m be dunman ɔn?’ (An kanngan Matie 22:31, 32 nun.) Maan e sie i nzɔliɛ kɛ kwlaa naan Zezi w’a bo Ɲanmiɛn i sran kpa sɔ’m be dunman’n, ɔ usali kosan kun. Ɔ seli kɛ: “?Be nga be wuli’n be cɛnlɛ’n i wun ndɛ’n, amu’an kanngan-man?” I sɔ mɔ Zezi kannin’n, ɔ kle kɛ ɔ su wa fa sran’m be ɲin síe i ndɛ uflɛ su. Sadisefuɛ’m be waan be lafi ndɛ nga Zoova maan Moizi klɛli’n su. I sɔ’n ti’n, Zezi boli ndɛ nga Zoova kan kleli Moizi susrɛ’n nun lɔ’n i su kleli be. Ɔ yoli sɔ naan be wun i wlɛ kɛ cɛn wie lele’n, Ɲanmiɛn wá cɛ́n sran mun. Kpɛkun, be nun wie’m be tran asiɛ’n su.​—Tul. 3:1-6.

Maan e se kɛ be nga Ɲanmiɛn cɛ́n be mɔ bé kɔ́ ɲanmiɛn su’n, be ndɛ yɛ Zezi kannin ɔn. Sɛ ɔ ti sɔ sakpa’n, kosan i nsan su’n yɛle kɛ: ‘?Be nga Ɲanmiɛn cɛ́n be mɔ bé trán asiɛ’n su wa’n, bé kwlá já bla nin bian?’ Ɲanmiɛn Ndɛ’n tɛman su trelele. Sanngɛ, e kwlá jranman Zezi i ndɛ sɔ’n su e seman kɛ be nga bé cɛ́n mɔ bé trán asiɛ’n su wa’n, be su jaman bla nin bian.

Like nga e si i’n yɛle kɛ Ɲanmiɛn Ndɛ’n se weiin kɛ sɛ sran kun i wun annzɛ i yi’n ɔ wu’n, ɔ kwla ja sran uflɛ. Ɔ maan sɛ angbeti kun waan ɔ́ já bla annzɛ ɔ́ já bian uflɛ’n, nán maan ɔ bu i kɛ ɔ su yo sa tɛ. Angbeti nga i waan ɔ́ fɛ́ i sɔ ajalɛ’n ɔ ti i bɔbɔ i ndɛ. Yɛ ɔ fataman kɛ sran kun kɛn i wun ndɛ tɛ.​—Rɔm. 7:2, 3; 1 Kor. 7:39.

E siman mɛn uflɛ’n i nun lɔ tranlɛ’n i su ndɛ ngba. Ndɛ nga e wunman be wlɛ’n, nán e si be su akplowa ngbɛn. Maan e tran e minndɛ. Sɛ i blɛ ju’n, Ɲanmiɛn maan é wún be wlɛ. Like nga e si i’n m’ɔ́ yó sɔ sakpa’n yɛle kɛ, be nga be ɲin yi Ɲanmiɛn’n bé dí aklunjuɛ titi. Afin, Ɲanmiɛn wá mán be ninnge kwlaa ng’ɔ ju be’n.​—Jue. 145:16.

[Ja ngua lɛ ndɛ mun]