Siɛ nin niɛn mun, an nian amun awlo’n i lika

‘Sran ng’ɔ niɛnmɛn i fuɛ’m be lika’n ɔ ti tɛ, ɔ timan Ɲanmiɛn sufuɛ.’—1 TIMOTE 5:8.

1, 2. (a) ?Kɛ e wun kɛ awlobo’m be ba asɔnun aɲia’m be bo likawlɛ’n, ngue ti yɛ i sɔ’n wla fanngan ɔn? (b) ?Ninnge mennin wie mun yɛ be tanndan awlobo’m be ɲrun mɔ sanngɛ be ba aɲia’m be bo dɔ su ɔ?

KA NAAN asɔnun aɲia’n w’a bo i bo’n, sɛ amun nian asɔnun’n nun’n, amún wún kɛ ba kanngan mɔ be wlawlali be wun yɛiin be ti be si nin be nin’m be wun lɛ. ?Kɛ e wun wafa nga awlobo sɔ’m be klo Zoova ɔ nin be wiengu’n, i sɔ’n yoman e ɲɛnmɛn? Sanngɛ klolɛ sɔ’n ti’n, wafa nga be mian be ɲin naan titi b’a ju aɲia’m be bo lɔ dɔ su’n, e tɛmɛn i lifuɛ’n i angunndan bu.

² Wie liɛ bɔbɔ’n, siɛ nin niɛn’m be di junman lele, kpɔkun nnɔsua nga be le aɲia’n, junman’n yo dan be su ekun. Aliɛ tɔnlɛ’n, ɔ nin titi awlo’n nun junman’m be dilɛ’n be o lɛ, kpɔkun ɔ fata kɛ ba’m be wie be suklu lɔ junman’m be di. Nanwlɛ, siɛ nin niɛn mun yɛ be sua trɔ’n i dan kpa ɔ. Ɔ fata kɛ be nian, sɛ awlofuɛ’m be kwlaa be wun ti yɛiin, naan be dili like, naan be ngba b’a wie yo dɔ su o. Sanngɛ, lika nga ba’m be o lɛ’n, blɛ mɔ siɛ nin niɛn’m be kunndɛ kɛ bé yó ninnge mun ndɛndɛ’n, i nun yɛ sa’m be kwla ju ɔ. I wie yɛle kɛ, ba kpɛnngbɛn’n m’ɔ́ kán ngowa’n kwla ti i tralɛ’n nun. Ba kasiɛn’n kusu kwla utu i aliɛ’n. Yɛ wie liɛ’n, ba’m be kwla di utre. (Nyanndra Mun 22:15) ?I kwlaa sɔ’n i bo’n gua sɛ? I bo’n m’ɔ́ gúa’n yɛle kɛ, kannzɛ siɛ nin niɛn’m be siesie be wun kpa sɛ’n, sanngɛ nán nga be siesieli’n i su yɛ sa’m be yo titi ɔ. Sanngɛ, awlobo sɔ’m be mian be ɲin be dun mmua ju Ɲanmiɛn Sielɛ Blɛ Sua’n nun lɔ titi ka naan b’a bo aɲia’m be bo. Kɛ le mɔcuɛ nin afuɛ’m bé sín nn ba’m bé ɲín, sanngɛ be yaciman Zoova sulɛ’n, nanwlɛ, i sɔ’n wla fanngan dan kpa!

 3. ?Ngue ti yɛ e si kɛ awlobo’m be ti Zoova i cinnjin ɔn?

³ Siɛ nin niɛn mun, ɔ ju cɛn wie’n, junman’n yo kekle amun su, kpɔkun ɔ tin amun su, sanngɛ maan amun wla gua ase. Afin Zoova bu amun ɲin mianlɛ’n i like dan kpa. Zoova yɛ ɔ kpɛli awlobo tranlɛ’n i ba ɔ. Ɔ maan, i Ndɛ’n se kɛ “i dunman’n” wo osuosu’n kwlaa be su. Yɛle kɛ, awlobo’n kwlaa be ti Zoova liɛ. (Efɛzfuɛ Mun 3:14, 15) Ɔ maan siɛ nin niɛn mun, kɛ an mian amun ɲin an sua amun awlo’n nun trɔ’n kɛ ng’ɔ nin i fata’n sa’n, Ɲanmiɛn m’ɔ sie nglo nin asiɛ’n, ɔ ɲan ɲrun. (1 Korɛntfuɛ Mun 10:31) ?Nán junman dan yɛle i sɔ’n? Junman sɔ mɔ Zoova fa mannin siɛ nin niɛn mun’n, ɔ ti kpa kɛ e fa e ɲin sie su. Like suanlɛ nga nun’n, é wá flɛ́ junman sɔ’n kɛ awlobo’n i lika nianlɛ. Like nsan mɔ be nun’n, Ɲanmiɛn kunndɛ kɛ siɛ nin niɛn’m be nian be fuɛ’m be lika’n, amun e fa e ɲin sie be su e nian.

An nian be lika

 4. ?Wafa sɛ yɛ Zoova siesieli ba’m be lika nianlɛ nun’n, like ng’ɔ ju be’n niɔn?

⁴ Akoto Pɔlu seli kɛ: ‘Sran ng’ɔ niɛnmɛn i fuɛ’m be lika’n ɔ ti tɛ, nga m’ɔ ti tɛ’n tra su’n yɛle sran ng’ɔ niɛnmɛn i bɔbɔ i awlo’n i lika’n, ɔ timan Ɲanmiɛn sufuɛ, i tɛ liɛ’n tra sran ng’ɔ lafiman Klist su’n.’ (1 Timote 5:8) ?Kɛ Pɔlu se kɛ ‘sran nga’n,’ wan ndɛ yɛ ɔ kan ɔn? Awlo’n i siefuɛ’n mɔ titi yɛle yasua’n, i ndɛ yɛ ɔ kan. Sanngɛ Ɲanmiɛn mannin bla’m be junman kun kɛ be di. Junman sɔ’n m’ɔ yoman be wannzo’n, yɛle kɛ maan be uka be wun mun. (Bo Bolɛ 2:18) Biblu’n nun’n, laa bla’m be uka be wun mun be nian be awlo’m be lika. (Nyanndra Mun 31:13, 14, 16) Andɛ’n, siɛ annzɛ niɛn nga be ngunmin be ta be mma mun’n, b’a sɔn kpa.a Klistfuɛ sunman mɔ be ngunmin be ta be mma mun’n, be mian be ɲin be di junman naan b’a nian be awlo’n i lika. Sanngɛ, kɛ siɛ nin niɛn’n be nɲɔn’n be o lɛ mɔ siɛ’n ɔ sie awlo’n, i lifuɛ’n yɛ ɔ ti kpa ɔ.

5, 6. (a) ?Be mɔ be mian be ɲin be nian be fuɛ’m be lika like ng’ɔ ju be’n i nun’n, sa mennin wie mun yɛ ɔ tanndan be ɲrun ɔn? (b) ?Junman’n i su angunndan bulɛ mennin yɛ ɔ uka Klistfuɛ’n naan w’a niɛn i fuɛ’m be lika titi ɔ?

⁵ ?Awlo’n i lika nianlɛ’n i wafa mennin yɛ Pɔlu kɛn i ndɛ 1 Timote 5:8 nun ɔn? Kɛ e niɛn i kpa sa’n, awlofuɛ’m be like ng’ɔ ju be’n i ndɛ trele yɛ Pɔlu kan ɔn. Andɛ mɛn nga nun’n, kɛ siɛ’n ko yo naan w’a ɲan like w’a nian i fuɛ’m be lika’n, sa sunman be kwla tɛnndɛn i ɲrun. Sa sɔ’m be kwla yo sika wun yalɛ dilɛ’n m’ɔ o mɛn wunmuan nun’n, ɔ nin junman m’ɔ kwla saci blɛ wie nun’n, ɔ nin junman difuɛ mɔ be kwla yaci be nun’n, ɔ nin ninnge’m be gua’n mɔ cɛn kwlaa ɔ yo dan kɔ i ɲrun’n. ?Sa kwlaa sɔ’m be nun’n, ngue yɛ ɔ kwla uka siɛ’n naan w’a niɛn i fuɛ’m be lika titi ɔ?

⁶ Ɔ fata kɛ ɔ kpɛn siɛ’n i klun titi kɛ Zoova yɛ ɔ fali trɔ’n mɛnnin i kɛ ɔ sua ɔ. Pɔlu i ndɛ’n kle kɛ, siɛ kun ng’ɔ kwla nian i fuɛ’m be lika mɔ sanngɛ i ɲinfu ɔ yoman’n, ɔ ‘timan Ɲanmiɛn sufuɛ.’ Ɔ maan, ɔ fata kɛ Klistfuɛ’n ɔ yo like kwlaa ng’ɔ kwla yo’n naan Ɲanmiɛn w’a bumɛn i kɛ ɔ ti i sɔfuɛ. Sanngɛ sa ng’ɔ ti tɛ’n yɛle kɛ, andɛ mɛn’n nunfuɛ sunman be ‘kloman sran.’ (2 Timote 3:1, 3) Ɔ maan siɛ sunman be suaman be awlo lɔ trɔ’n, be yaci be fuɛ mun yalɛ’n nun. Sran tɛfuɛ sɔ mɔ be nianman be fuɛ’m be lika’n, Klistfuɛ nga be ti siɛ’n be faman be ajalɛ’n su. Ɔ maan, junman nga be wiengu junman difuɛ sunman be bu i kɛ ɔ ti be ɲin ase gualɛ junman ti naan be diman’n, Klistfuɛ’n i liɛ’n, kɛ mɔ junman sɔ’n kwla ukɛ i naan w’a nian i fuɛ’m be lika’n ti’n, ɔ ti i ɲrun kɛ Zoova yɛ ɔ fa yrɛli i su sa. Ɔ maan ɔ di junman sɔ’n.

 7. ?Ngue ti yɛ ɔ ti kpa kɛ siɛ nin niɛn’m be nian Zezi i ajalɛ’n su ɔ?

⁷ Sɛ siɛ’m be nian ajalɛ klanman nga Zezi mannin’n su’n, i sɔ’n kwla uka be wie kpa. Zezi i su ndɛ nga Biblu’n dun mmua kannin’n, maan e wla kpɛn su titi. Biblu’n seli kɛ Zezi ti e ‘Siɛ m’ɔ o lɛ titi.’ (Ezai 9:5, 6) Kɛ mɔ Zezi ti “Adam kasiɛnfuɛ’n” ti’n, ɔ kacili ‘Adam m’ɔ ti sran klikli’n.’ Yɛle kɛ, ɔ kacili sran kwlaa nga be lafi Ɲanmiɛn su’n be si. (1 Korɛntfuɛ Mun 15:45) E si Adam i bɔbɔ like liɛ’n ng’ɔ lo i’n, yɛ ɔ kunndɛli ɔ. Zezi liɛ w’a yoman sɔ, ɔ ti siɛ kpa. Kɛ Biblu’n kɛ́n i ndɛ’n, ɔ se kɛ: ‘An nian, sa nga mɔ maan e si like nga be flɛ i sran klolɛ’n yɛle kɛ e ti Klist fɛ i wun mannin.’ (1 Zan 3:16) Nanwlɛ, Zezi i klunklo su’n, ɔ fɛli i wun mannin. Asa ekun’n, i wiengu’m be like ng’ɔ ju be’n be fa manlɛ cɛn kwlaa’n, ɔ yoli i cinnjin trali i bɔbɔ liɛ’n i kunndɛlɛ. Siɛ nin niɛn mun, sɛ amun nian be wun klɛnlɛ ajalɛ sɔ’n su’n, amun nin amun awlofuɛ’m bé ɲán suyralɛ dan.

8, 9. (a) ?Wafa sɛ yɛ siɛ nin niɛn’m be kwla fa anunman’m be mma’m be lika nianlɛ’n tu be wun fɔ nun ɔn? (b) ?Wafa sɛ yɛ siɛ nin niɛn sunman nga be ti Klistfuɛ’n, be klɛn be wun ɔn?

⁸ Klolɛ su ndɛ nga Zezi kɛnnin i Ɲanmiɛn i nvle nunfuɛ’m be lika’n, siɛ nin niɛn’m be kwla fa tu be wun fɔ nun. Zezi seli kɛ: ‘Blɛ sunman n klo kɛ ń flɛ́ amun kɛ akɔ ta kun flɛ i mma mun m’ɔ utu be su’n sa.’ (Matie 23:37) Wafa nga akɔ ta’n flɛ i mma mun kpɔkun ɔ utu be su sasa be’n, ɔ yo ɲɛnmɛn. Wafa nga akɔ ta’n sɛsɛ i mma mun sɔ’n, Zezi fa kɛn i bɔbɔ i ndɛ. Nanwlɛ, wafa nga sran fi seman anunman ta’n kɛ ɔ niɛn i mma’m be lika mɔ sanngɛ ɔ tu i klun nian be lika’n, siɛ nin niɛn’m be kwla nian su. Wafa nga anunman’m be ta be mma mun’n, ɔ yo ɲɛnmɛn. Yɛle kɛ, be tu be ko kunndɛ aliɛ be blɛ be mma mun, kpɔkun be yo i sɔ’n i kpɛ sunman cɛn kunngba’n nun. Kannzɛ bɔbɔ be fɛ sɛ’n, sanngɛ be fa aliɛ’n be wla be mma mɔ be nin a tinman’n be nuan nun. Kɛ bé yó sɔ’n nn be mma’m bé kúnndɛ kɛ be man be aliɛ ekun. Nnɛn sunman nga Zoova boli be’n, be mma’m be talɛ nun’n ‘ngwlɛlɛ nga be si i’n ti dan.’—Nyanndra Mun 30:24.

⁹ I sɔ kunngba’n, wafa nga asiɛ wunmuan’n su siɛ nin niɛn nga be ti Klistfuɛ’n be klɛn be wun’n, ɔ yo ɲɛnmɛn. Siɛ nin niɛn mun, amun klo kɛ maan amun bɔbɔ amun fɛ naan an mma’m be ka lɛ. Asa ekun’n, amun fuɛ’m be lika nianlɛ’n ti’n, klolɛ su amun klɛn amun wun cɛn kwlaa. Kɛ ɔ ko yo naan amun a kwla ta amun fuɛ mun’n ti’n, amun nun sunman be jaso nglɛmun ndɛ kpa’n be di junman kekle mun lele be fɛ. Amun mian amun ɲin be kunndɛ tralɛ kpa, ɔ nin lawlɛ kpa, ɔ nin suklu kpa be man amun mma mun. Amun yo i sɔ ninnge mun cɛn kwlaa, ɔ nin afuɛ kwlaa, amun yaciman be yolɛ. Nanwlɛ, amun wun klɛnlɛ’n nin amun awlɛn tralɛ sɔ’n, ɔ jɔ Zoova klun dan! (Ebre Mun 13:16) Kannzɛ amun yo i kwlaa sɔ’n, sanngɛ amun wla kpɛn su kɛ amun fuɛ’m be lika nianlɛ’n i wafa cinnjin kpa kun o lɛ.

An nian be lika Ɲanmiɛn ninnge’m be nun

10, 11. ?Like ng’ɔ ti cinnjin kpa kɛ sran’m be ɲɛn i’n yɛle mennin? ?Yɛ siɛ nin niɛn nga be ti Klistfuɛ’n, ngue yɛ ɔ fata kɛ be dun mmua yo naan b’a nian be mma’m be lika i sɔ’n nun ɔn?

¹⁰ Ba’m be lika nianlɛ nun’n, like ng’ɔ ti cinnjin kpa tra like ng’ɔ ju be’n, yɛle be lika nianlɛ Ɲanmiɛn ninnge’m be nun’n. Zezi seli kɛ: ‘Nán aliɛ kunngba yɛ ɔ man sran nguan ɔn, sanngɛ ndɛ kwlaa ng’ɔ fin Ɲanmiɛn nuan fite’n, i yɛ ɔ man sran nguan ɔn.’ (Matie 4:4; 5:3) ?Siɛ nin niɛn mun, ngue yɛ amun kwla yo naan amun a nian amun fuɛ’m be lika Ɲanmiɛn ninnge’m be nun ɔn?

¹¹ I lɛ nun’n, Biblu’n nun ndɛ mma ng’ɔ kɛn i sɔ yolɛ’n i ndɛ kpa’n yɛle Mmla’n 6:5-7. Amun tike amun Biblu’n su naan amun kanngan ndɛ mma sɔ’m be nun be nian. Amún wún kɛ, be dun mmua seli siɛ nin niɛn’m be kɛ maan be bɔbɔ be nin Ɲanmiɛn be afiɛn mantan kpa, yɛ be klo Zoova ɔ nin i mmla mun. Nanwlɛ, siɛ nin niɛn mun, ɔ fata kɛ amun suan Biblu’n nun like kpa, kpɔkun amun kanngan nun titi naan amun bu i su angunndan. I liɛ’n, amún wún i wlɛ kpa, kpɔkun amún kló Zoova ɔ nin i atin nin i mmla mun. Asa ekun’n, Biblu’n nun ndɛ m’ɔ ti nanwlɛ’n ɔ́ kán amun awlɛn’n, amún dí su aklunjuɛ, kpɔkun amún ɲin yí Zoova yɛ amún kló i. Amún ɲán like kpakpa kpanngban bé fá klé amun mma mun.—Lik 6:45.

12. ?Kɛ siɛ nin niɛn’m bé fá Biblu’n nun ndɛ’n m’ɔ ti nanwlɛ’n bé klé be mma mun’n, wafa sɛ yɛ be kwla nian Zezi i ajalɛ’n su ɔ?

¹² Mmla’n 6:7 nun’n, Zoova i afɔtuɛ ng’ɔ se kɛ ‘amun kan’n,’ siɛ nin niɛn nga b’a tin Ɲanmiɛn ninnge’m be nun’n be fa su be mma’m be lika nianlɛ’n nun blɛ kwlaa nun. Ndɛ mma nga be se kɛ ‘amun kan’n,’ i bo’n yɛle kɛ be kan ndɛ’n be kle sran’n, be flan nun. Zoova si kɛ sran kwlaa be like klelɛ nun’n, be klo kɛ be flan nun. I li sɛ ɔ ti bakanngan mun’n yɛ i sɔ yolɛ’n nin i fata ɔ. Zezi bɔbɔ i jasin fɛ’n bolɛ nun’n, ɔ flannin ndɛ’m be nun. I wie yɛle kɛ, kɛ ɔ́ klé i sɔnnzɔnfuɛ’m be kɛ nán be yo wun tufuɛ nin akplowa sifuɛ naan be yo wun ase kanfuɛ’n, ɔ fali ajalɛ fanunfanun flannin afɔtuɛ sɔ’n nun. Wie liɛ’n, ɔ fali sunnzun ase, annzɛ ɲanndra mun, annzɛ kusu ɔ yo sa’n fa kleli be. (Matie 18:1-4; 20:25-27; Zan 13:12-15) Sa ng’ɔ yo ɲɛnmɛn ekun’n, yɛle kɛ Zezi w’a kpuman i sɔnnzɔnfuɛ’m be wunmiɛn le. I sɔ kunngba’n, ɔ fata kɛ siɛ nin niɛn’m be fa Zoova i mmla mɔ be ti nanwlɛ’n be kle be mma’m be like blɛblɛblɛ, kpɔkun be flan nun naan be mma’m b’a wun be wlɛ naan b’a fa su.

13, 14. ?Blɛ mennin wie mun yɛ siɛ nin niɛn’m be kwla fa be kan Biblu’n nun ndɛ m’ɔ ti nanwlɛ’n, be kle be mma mun ɔn? ?Yɛ fluwa mennin yɛ ɔ kwla uka be i sɔ yolɛ’n nun ɔn?

¹³ Blɛ mɔ be kwla kle like sɔ’n i kpa’n, yɛle awlobo’n i Biblu’n nun like suanlɛ blɛ’n nun. Like kun nga ti yɛ awlobo’n yo kpa Ɲanmiɛn ninnge’m be nun titi’n, yɛle awlo lɔ Biblu’n nun like suanlɛ titi aklunjuɛ nun, ɔ nin be wun fanngan wlalɛ’n. Asiɛ wunmuan su siɛ nin niɛn nga be ti Klistfuɛ’n, be fa like suanlɛ sɔ’n yo be awlɛn su like. Kɛ bé yó sɔ’n, ndɛ ng’ɔ mian ba’m be sa’n i su yɛ be nian naan fluwa nga Zoova i anuannzɛ’n yili be’n, b’a fa b’a uka be ɔ. I lɛ nun’n, fluwa Écoute le grand Enseignant, ɔ nin Les Jeunes s’interrogent — Réponses pratiques, be ti fluwa kpa.b Sanngɛ, nán awlobo’n i like suanlɛ blɛ’n i nun ngunmin yɛ be kle ba’m be like ɔ.

¹⁴ Kɛ nga Mmla’n 6:7 fa kan’n sa’n, siɛ nin niɛn’m be kwla fa blɛ kpanngban kpa wie mun ekun naan be nin be mma’m b’a koko Ɲanmiɛn ninnge’m be su yalɛ. Kɛ amun nin amun mma’m bé tú ajalɛ’n, kɛ amun nin be dí awlo lɔ junman mun’n, kɛ amun nin be yíyí amun ɲin su’n, amun kwla fɛ i sɔ blɛ’m be nian amun mma’m be lika Ɲanmiɛn ninnge’m be nun. Nanwlɛ, nán kɛ be waan amun kanngan Biblu’n nun ndɛ’n sa trilili ɔ. Sanngɛ amun mian amun ɲin naan amun awlo lɔ yalɛ kokolɛ’n, ɔ yo kɛ sran mɔ be su Ɲanmiɛn’n be yalɛ kokolɛ’n sa. Asa ekun’n, amun yo naan amun awlo lɔ yalɛ kokolɛ’n taka Ɲanmiɛn ninnge’m be su naan an fa wla amun wun fanngan. I wie yɛle kɛ, fluwa Réveillez-vous ! ɔ kan ninnge fanunfanun be ndɛ. Wie liɛ’n, ɔ kan nnɛn’m be ndɛ, annzɛ asiɛ’n i lika wie mun mɔ be ti klanman’n, annzɛ sran’m be mɛn dilɛ nin be ninnge’m be yolɛ fanunfanun mɔ be yo ɲɛnmɛn’n, be ndɛ. Sa sɔ’m be su yalɛ kokolɛ’n, ɔ kwla su ba’m be bo maan be kanngan fluwa mɔ sran kpa nanwlɛfuɛ m’ɔ si ngwlɛlɛ’n yi be’n, be nun.—Matie 24:45-47.

15. ?Wafa sɛ yɛ siɛ nin niɛn’m be kwla yo naan be mma’m b’a wun kɛ jasin fɛ’n bolɛ’n yo fɛ naan be ɲan su mmlusuɛ ɔ?

¹⁵ Kɛ amun nin amun mma’m be koko yalɛ ng’ɔ yo sran ye’n, i sɔ’n ti Ɲanmiɛn ninnge’m be nun like uflɛ kun ekun yolɛ. Ɲanmiɛn sulafilɛ’n mɔ be kan kle be wiengu’n, ɔ fata kɛ Klistfuɛ’m be mma kanngan’m be suɛn i kanlɛ. Kɛ amun nin ba’n bé kókó fluwa La Tour de Garde annzɛ Réveillez-vous ! be nun ndɛ fɛfɛ wie’m be su yalɛ’n, amun kwla bu wafa nga amun kwla fa bo jasin fɛ’n i angunndan. I wie yɛle kɛ, amun kwla usa amun mma’m be kɛ: “?Sɛ sran kpanngban be si Zoova i su ndɛ’n, amun bu i kɛ i sɔ’n ti like kpa? ?Wafa sɛ yɛ amun bu i kɛ e kwla yo naan i sɔ ndɛ’n w’a lo sran wie mun ɔn?” I sɔ yalɛ kokolɛ’n kwla uka ba mun naan like nga be suannin’n, b’a kwla kɛn i ndɛ kpa b’a kle be wiengu mun. Asa ekun’n, sɛ amun nin ba’m be kɔ jasin fɛ’n bolɛ’n, bé wún wafa nga be kwla fa like nga be suannin’n be bo jasin fɛ’n. Bé kwlá wún i wlɛ wie ekun kɛ jasin fɛ’n bolɛ’n yo fɛ naan ɔ ti aklunjuɛ junman, naan be ɲan su mmlusuɛ dan.—Sa Nga Be Yoli’n 20:35.

16. ?Ngue yɛ siɛ nin niɛn’m be Ɲanmiɛn srɛlɛ’n kwla kle be mma mun ɔn?

¹⁶ Kɛ siɛ nin niɛn’m be nin be mma’m be srɛ Ɲanmiɛn likawlɛ’n, i sɔ’n ti ba’m be lika nianlɛ Ɲanmiɛn ninnge’m be nun wie. Zezi kleli i sɔnnzɔnfuɛ mun wafa ng’ɔ fata kɛ be srɛ’n, kpɔkun ɔ nin be srɛli Ɲanmiɛn likawlɛ blɛ sunman nun. (Lik 11:1-13) Nanwlɛ, kɛ be nin Zoova bɔbɔ i Wa’n be srɛli Ɲanmiɛn’n, amun bɔbɔ amun bu like nga be suannin’n i angunndan be nian! I sɔ kunngba’n, amun Ɲanmiɛn srɛlɛ’n kwla kle amun mma’m be like kpanngban kpa. I wie yɛle kɛ, be kwla wun i wlɛ kɛ Zoova kunndɛ kɛ nán srɛ kun e, naan e nin i e koko yalɛ, naan e kan sa kwlaa nga be o e su’n be ndɛ e kle i. Nanwlɛ, amun Ɲanmiɛn srɛlɛ’n kwla uka amun mma mun maan be wun Ɲanmiɛn ninnge’m be nun sa cinnjin kpa kun m’ɔ ti nanwlɛ’n, i wlɛ. Yɛle kɛ, be kwla fa be wun mantan be Si m’ɔ o nglo lɔ’n.—1 Piɛr 5:7.

Maan amun klo be

17, 18. (a) ?Wafa sɛ yɛ Biblu’n kle kɛ ba’m be klolɛ’n ti like cinnjin kpa ɔ? (b) ?Ba’m be klolɛ nun’n, wafa sɛ yɛ siɛ nin niɛn’m be kwla nian Zoova i ajalɛ’n su ɔ?

¹⁷ Nanwlɛ, ba kanngan’m be kunndɛ kɛ be klo be. Ɲanmiɛn Ndɛ’n kan kleli siɛ nin niɛn mun kɛ ba’m be klolɛ sɔ’n ti cinnjin’n. I wie yɛle kɛ, ɔ seli talua mun kɛ ‘be klo be mma mun.’ I sɔ’n ti sa nuan su yolɛ. (Tit 2:4) Nanwlɛ, ba’m be klolɛ’n ti like kpa. Afin ɔ kle ba’n i like nga be flɛ i sran klolɛ’n, kpɔkun ɔ ɲan su mmlusuɛ i mɛn dilɛ’n nun. Sanngɛ ba mɔ be klomɛn i’n, ɔ ti like tɛ kpa. Afin, ɔ bo ba’n i wla dan. Kpɔkun Zoova mɔ kannzɛ fɔ’n wo e nun’n, sanngɛ ɔ kle kɛ ɔ klo e kpa’n, ba’n ɔ niɛnmɛn i ajalɛ’n su.—Jue Mun 103:8-14.

¹⁸ Zoova bɔbɔ fali i mma mɔ be o asiɛ’n su wa’n be klolɛ’n i su ajalɛ. Kɛ nga 1 Zan 4:19 fa kan’n sa’n, ‘ɔ dun mmua kloli e.’ Siɛ mun, ndɛ nga ti amun liɛ. Ɔ fata kɛ amun nian Zoova i ajalɛ’n su. Yɛle kɛ, amun fa amun mma’m be klolɛ’n i su ajalɛ. Biblu’n wla siɛ’m be su nun kpa kɛ nán be yo sa ng’ɔ kun be mma’m be ya’n mɔ ‘maan be sa sin búbú be’n.’ (Kolɔsfuɛ Mun 3:21) Kɛ siɛ annzɛ niɛn kun kloman ba mun’n, annzɛ ɔ buman be like fi’n, i sɔ’n yo ba’m be ya tra like ngba. Siɛ nga be sisi be bo naan b’a yi i nglo kɛ be klo be mma mun’n, ɔ fata kɛ be wla kpɛn ajalɛ kpa nga Zoova mannin’n su. Zoova o ɲanmiɛn su lɔ, sanngɛ ɔ ijɔli seli kɛ i klun jɔ i Wa’n i wun naan ɔ klo i. (Matie 3:17; 17:5) Nanwlɛ, i sɔ’n kwla wlali Zezi fanngan dan kpa! I sɔ kunngba’n, kɛ ba’m be wun kɛ be si mun, ɔ nin be nin’m be klo be kpa sakpa naan be klun jɔ be wun’n, be wun yo be fɛ kpɔkun i sɔ’n wla be fanngan.

19. ?Ngue ti yɛ fɔ tulɛ’n ti like kpa’n niɔn? ?Yɛ ngue yɛ ɔ fata kɛ siɛ nin niɛn nga be ti Klistfuɛ’n be mian be ɲin be yo ɔ?

¹⁹ Nanwlɛ, klolɛ nga siɛ nin niɛn’m be klo be mma mun’n, ɔ fataman kɛ ɔ yo be nuan bui su sa ngbɛn. Klolɛ’n i nglo yilɛ klikli’n yɛle sa nga be yo’n. Kɛ siɛ nin niɛn’m be nian be mma’m be lika like ng’ɔ ju be’n i nun’n, ɔ nin Ɲanmiɛn ninnge’m be nun’n, naan be klun su yɛ be yo i sɔ sakpa’n, i sɔ’n kle kɛ be klo be mma mun. Fɔ tulɛ’n ti siɛ nin niɛn’m be mma’m be klolɛ’n i nglo yilɛ wie kpa. Afin, ‘Zoova tu be nga ɔ klo be’m be fɔ.’ (Ebre Mun 12:6) Ɔ maan nanwlɛ, siɛ nin niɛn nga be tuman be mma’m be fɔ’n, be kle kɛ be kpɔ be mma mun! (Nyanndra Mun 13:24) Sanngɛ titi’n, Zoova tu fɔ’n i nuan su sɛsɛsɛ, yɛle kɛ ‘sa ng’ɔ fata kɛ ɔ yo’n yɛ ɔ fa yo ɔ.’ (Zeremi 46:28) Fɔ tulɛ’n i nuan su yolɛ sɛsɛsɛ sɔ’n, ɔ timan siɛ nin niɛn mɔ fɔ’n o be nun’n be sa nun pɔpɔ titi. Sanngɛ siɛ nin niɛn mun, ɔ ti kpa kɛ amun mian amun ɲin be tu ba’m be fɔ’n i nuan su sɛsɛsɛ. Fɔ’n mɔ be tu i klolɛ su titi’n, ɔ uka ba’n maan ɔ di aklunjuɛ, kpɔkun ɔ yo kpa cɛn wie. (Nyanndra Mun 22:6) ?Nɛ́n i sɔ yɛ siɛ nin niɛn nga be ti Klistfuɛ’n be kunndɛ i be wa’n i lika ɔ?

20. ?Wafa sɛ yɛ siɛ nin niɛn’m be kwla uka be mma mun naan b’a ‘fa nguan’ atin’n m’ɔ ti ajalɛ kpafuɛ’n niɔn?

²⁰ Siɛ nin niɛn mun, kɛ amun di junman cinnjin nga Zoova fa mannin amun’n, yɛle kɛ, kɛ amun nian amun mma’m be lika ninnge ng’ɔ ju be’n i nun’n, ɔ nin Ɲanmiɛn ninnge’m be nun kpɔkun amun klo be’n, nanwlɛ, i su mmlusuɛ’n ti dan. Kɛ amun yo sɔ’n, amun uka amun mma mun maan be fa ajalɛ nanndoliɛ kpafuɛ’n. Yɛle kɛ be ‘fa nguan’ atin’n, kpɔkun be “tran nguan nun.” (Mmla’n 30:19) Ba nga be su Zoova mɔ be ka nguan atin’n su’n, kɛ bé ɲín’n be man be si nin be nin’m be aklunjuɛ dan. (Jue Mun 127:3-5) Nanwlɛ, aklunjuɛ sɔ’n ɔ́ ká lɛ titi! ?Sanngɛ dɔ nga su’n, wafa sɛ yɛ gbaflɛn nin talua’m be kwla manman Zoova ɔ? Like suanlɛ ng’ɔ́ bá lɔ’n, ɔ́ wá kɛ́n i ndɛ.

[Ja ngua lɛ ndɛ mun]

?Wafa sɛ yɛ amún tɛ́ kosan’m be su ɔ?

?Ngue yɛ siɛ nin niɛn’m be kwla yo naan b’a nian be mma’m be lika

• like ng’ɔ ju be’n i nun ɔn?

• Ɲanmiɛn ninnge’m be nun ɔn?

• naan b’a kle kɛ be klo be ɔ?