Zezi mɛnnin i akoto mun afɔtuɛ cinnjin kpa wie mun ekun

Zezi seli i sɔnnzɔnfuɛ’m be kɛ ɔ fata kɛ be yo be wun kɛ ba kanngan mun sa. Yɛle kɛ ɔ fata kɛ be kan be wun ase. Yɛ nán maan be kunndɛ kɛ bé ɲán ɲrun be wiengu’m be afiɛn. Sɛ i sɔnnzɔnfuɛ’m be ‘sɔ ba kanngan sɔ’m be nun i dunman nun’n, nn b’a sɔ Zezi i nun wie.’​—Matie 18:5.

Zezi i akoto’m be sili akplowa kɛ bé sí be nun sran ng’ɔ ti sran dan’n. Ɔ maan kɛ Zezi seli be sɔ’n, atrɛkpa be buli i kɛ ɔ su ijɔ be. I sin’n, akoto Zan kannin sa kun i ndɛ kleli Zezi. Sa sɔ’n juli i osu nin-a cɛman. Ɔ seli kɛ: “E wunnin sran kun, ɔ su fa ɔ dunman’n fuan mmusu mun. E waan nán maan ɔ yo sɔ kun, afin ɔ suman ɔ su kɛ e sa.”​—Liki 9:49.

Atrɛkpa’n, Zan bu i kɛ akoto’m be ngunmin yɛ be le atin be yo sran’m be juejue annzɛ be fuan mmusu mun-ɔn. ?Yɛ ngue ti yɛ kɛ Zuifu bian sɔ’n fuan mmusu mun’n, be kɔ sakpa-ɔ? Asa ekun’n, kɔlɛ Zan bu i kɛ ɔ fataman kɛ bian sɔ’n yi atrɛ mlɔnmlɔn. Afin ɔ suman Zezi su, kpɛkun ɔ nin akoto’m be sanman nun.

Ndɛ nga Zezi kannin’n kwla bo Zan nuan. Afin Zezi seli kɛ: “Nán amun se kɛ amún tɛ́nndɛn i ɲrun. Afin sɛ sran kun yo abonuan sa min dunman nun’n, i kunngba’n su kaman lɛ kanman min wun ndɛ tɛ. Afin sran ng’ɔ tanndanman e ɲrun’n, ɔ wo e sin. Klisi liɛ mɔ amun ti’n ti’n, sɛ sran kun man amun nzue klowa kun’n, nanwlɛ ń kán klé amun kɛ bé wá yó i mo sakpa.”​—Marki 9:39-41.

Blɛ sɔ’n nun’n, ɔ timan cinnjin kɛ sran kun su Zezi su lika kwlaa naan b’a se kɛ ɔ o Zezi sin. Afin kɛ ɔ́ yó sɔ’n, nn be nin-a takaman Klisifuɛ’m be asɔnun’n. Ɔ maan kannzɛ bian sɔ’n suman Zezi su ɔ kɔman lika nga Zezi kɔ’n wie’n, i sɔ’n kleman kɛ ɔ nunman Zezi sin annzɛ ɔ su kpɛ asɔnun uflɛ ba. Like nga bian sɔ’n yoli’n kle weiin kɛ ɔ lafi Zezi su. I sin’n, ndɛ nga Zezi kannin’n kle kɛ sran sɔ’n ɲɛ́n i akatua’n sakpa.

Kusu sɛ Zezi i akoto’m be tanndan bian’n i ɲrun annzɛ be yo naan ɔ yaci Ɲanmiɛn i sulɛ’n, i sɔ’n ti tɛ kpa. I sɔ’n ti’n, Zezi seli kɛ: “Sran ng’ɔ yo naan ba kanngan nga be lafi min su yɛ’n be nun kun w’a lafiman min su kun’n, ɔ flunman kɛ be fa yɔbuɛ dan mɔ be fa tin like mɔ aflunmun kun kpɛ i wun’n, be minndɛ i kɔmin naan be to i be yi jenvie’n nun.” (Marki 9:42) I sin’n, Zezi seli i sɔnnzɔnfuɛ’m be kɛ sɛ be sa annzɛ be ja annzɛ be ɲinma’n kwla yo naan be yaci Ɲanmiɛn i su lafilɛ’n, maan be kpɛ be wunnɛn’n i lika sɔ’n be yi i blo mmua. Afin sɛ be wunnɛn’n i lika sɔ’n tu lɛ naan be wlu Ɲanmiɛn Famiɛn diwlɛ’n nun’n, ɔ flunman tra kɛ be wunnɛn’n i lika sɔ’n o lɛ naan b’a to be b’a yi be Zeɛnin nun (yɛle kɛ Inɔmun kongo’n nun). Zezi i akoto’m be si lika sɔ’n kpa. Afin ɔ o Zerizalɛmun i wun lɛ, yɛ lɔ yɛ be wɔ wla nun-ɔn. Ɔ maan i akoto’m be wunnin i wlɛ kɛ lika sɔ’n ti sran nunnunlɛ’n i nzɔliɛ.

Zezi kɛnnin i ekun kɛ: “An nian amun wun, nán amun bu ba kanngan nga’m be nun kun kɛ ɔ timan sran. Afin maan n kan kle amun kɛ, be anzi mɔ be o ɲanmiɛn su lɔ’n, be ɲin ta min Si m’ɔ o ɲanmiɛn su lɔ’n i ɲrun cɛn kwlaa.” ?Wafa sɛ yɛ Zoova bu “ba kanngan” sɔ mun-ɔn? Zezi kannin ndɛ kun ɲanndra nun fa yili i nglo. Ɔ kannin bian kun m’ɔ le bua ya (100), mɔ sanngɛ i bua kun mlinnin’n, i ndɛ. I waan bian’n yacili i bua ablangwlan-nin-ngwlan (99) onga mun, ɔ ko kunndɛli bua kun ng’ɔ mlinnin’n. Kpɛkun kɛ ɔ wunnin i’n, i klun jɔli su trali ablangwlan-nin-ngwlan (99) nga be o lɛ’n.” Zezi kan guali su kɛ: “Min Si m’ɔ o ɲanmiɛn su lɔ’n, ɔ kloman kɛ ba kanngan nga’m be nun kun sa bɔbɔ mlin.”​—Matie 18:10, 14.

I sin’n, Zezi mɛnnin i akoto’m be afɔtuɛ ekun. Kɔlɛ’n, akplowa nga be sili i kɛ bé kúnndɛ sran ng’ɔ ti be kwlaa be nun sran dan’n, i ti yɛ ɔ mannin afɔtuɛ-ɔ. Ɔ seli be kɛ: “Maan amun kusu an yo kɛ njin sa. Maan amun nuan sɛ.” (Mark 9:50) Njin’n yo maan tro’n yo fɛ. I kunngba’n, sɛ sran kun yo kɛ njin sa’n, i nuan nun ndɛ’n yó fɛ. Ɔ maan ɔ nin i wiengu’m be nuan sɛ́.​—Kolɔsufuɛ Mun 4:6.

Ɔ ju wie’n, ndɛ kekle wie’m be kwla tɔ e afiɛn. Zezi kleli wafa nga e kwla siesie ndɛ sɔ mun’n. I waan: “Sɛ ɔ niaan kun yo sa tɛ’n, ko flɛ i aamiɛn naan sa ng’ɔ yoli m’ɔ timan kpa’n, tu i ɲin kle i. Sɛ ɔ tie ɔ ndɛ’n, nn w’a ɲan ɔ niaan’n.” ?Yɛ sɛ w’a tieman nin? Zezi seli kɛ: “Fa sran kun annzɛ sran nɲɔn maan be ko sunman wɔ. Afin ndɛ nga lalofuɛ nɲɔn annzɛ nsan be kan’n, be bu i nanwlɛ.” Sɛ be yo sɔ kusu naan ɔ yoman ye’n, maan be kan kle “asɔnun’n nunfuɛ mun,” yɛle kɛ be kan kle asɔnun kpɛnngbɛn mun. Be yɛ bé wá kán ndɛ sɔ’n siɛn’n niɔn. ?Yɛ sɛ sran ng’ɔ yoli sa tɛ’n waan ɔ tieman be ndɛ’n nin? Zezi waan: “Bu i kɛ ɔ ti kɛ be nga be timan Zuifu’n be sa, ɔ nin be nga be ti lapo defuɛ’n be sa.” Zuifu’m be faman be wun mantanman be nga be timan Zuifu’n nin lapo defuɛ mun kaan sa.​—Matie 18:15-17.

Ɔ fata kɛ asɔnun kpɛnngbɛn’m be jran Ɲanmiɛn Ndɛ’n su kpa. I liɛ’n, sɛ be wun kɛ sran kun yoli sa tɛ sakpa naan ɔ fata kɛ be tu i fɔ’n, fɔ nga bé tú i’n, ɔ́ yó kɛ ‘like mɔ b’a dun mmua b’a ci i ɲanmiɛn su lɔ’n’ sa. Sɛ kusu be nian naan sran’n w’a yoman sa tɛ’n, nn jɔlɛ nga bé dí’n, ɔ́ yó kɛ ‘like mɔ b’a dun mmua b’a ɲannji i ɲanmiɛn su lɔ’n’ sa. Kɛ Klisifuɛ’m be asɔnun’n wá táka’n, mmla sɔ’m bé wá úka asɔnun’n i nunfuɛ mun kpa. Zezi kannin jɔlɛ nga asɔnun kpɛnngbɛn’m bé dí’n i ndɛ seli kɛ: “Lika nga sran nɲɔn annzɛ sran nsan be yia lɛ min dunman nun’n, n wo be afiɛn.”​—Matie 18:18-20.