Zezi seli kɛ: “Bian kun tɔnnin aliɛ kpanngban kpa. Kpɛkun ɔ yiali sran kpanngban. [...] Ɔ sunmɛnnin i sran’n kɛ ɔ ko se be ng’ɔ yiali be’n, be kɛ: ‘Amun bla. Afin b’a wie yo.’ Sanngɛ be kwlaa be waan be su kwlá kɔman. Be nun klikli’n seli i kɛ: ‘N toli fie kun, ɔ fata kɛ n wɔ n ko nian. Yaci, n su kwlá kɔman wie.’ Uflɛ seli kɛ: ‘N toli nannin blu, n su ko nian be. Yaci, n su kwlá kɔman wie.’ Kun ekun seli kɛ: ‘N jali bla ɔ nin-a cɛman. I sɔ’n ti’n, n su kwlá kɔman wie.’”​—Liki 14:16-20.

Ndɛ sɔ’n kle kɛ Ɲanmiɛn Zoova seli Zezi kɛ ɔ yiayia sran wie mun naan be ko di famiɛn ɲanmiɛn su lɔ. Sran akpasua klikli nga be yiali be’n, yɛle Zuifu mun. Yɛ Zuifu’m be Ɲanmiɛn sulɛ wafa’m be su kpɛnngbɛn mun yɛ be dun mmua be nun-ɔn. Kɛ Zezi dí Ɲanmiɛn junman’n, be nun sunman b’a sɔmɛn i nun klanman. Sanngɛ be wa yiali sran uflɛ wie mun ekun. Be yɛ be ti sran akpasua nɲɔn su’n niɔn. Sran sɔ mun yɛle Zuifu nga sran’m be buman be wie’n, ɔ nin be nga be timan Zuifu mɔ siɛn’n be su su Ɲanmiɛn kɛ be sa wie’n. I sin’n, be wa yiali sran akpasua nsan su’n. Be yɛle be nga Zuifu’m be bu i kɛ be ti fiɛn Ɲanmiɛn ɲrun’n.​—Sa Nga Be Yoli’n 10:28-48.