Zezi tɛli Zuifu’m be kpɛnngbɛn kun m’ɔ ti aɲanbeunfuɛ’n i su

Zezi sinnin Pere mɛn’n nun ɔli Zerizalɛmun. Atin’n su’n, gbanflɛn kun wanndili ko toli i. Ɔ ti aɲanbeunfuɛ, yɛ ɔ ti “Zuifu’m be kpɛnngbɛn’m be nun kun.” Atrɛkpa’n, ɔ ti Ɲanmiɛn sulɛ sua kun su kpɛn kun, annzɛ ɔ ti Zuifu’m be Jɔlɛ difuɛ dandan’m be nun sran kun. Gbanflɛn sɔ’n kotoli Zezi bo, kpɛkun ɔ usɛli i kɛ: “?Like klefuɛ kpa, ngue yɛ ɔ fata kɛ n yo naan m’an ɲan nguan m’ɔ leman awieliɛ’n niɔn?”​—Liki 8:41; 18:18; 24:20.

Zezi usɛli i kɛ: “?Ngue ti yɛ a se kɛ n ti kpa-ɔ? Sran fi timan kpa, saan Ɲanmiɛn kunngba cɛ.” Titi’n, kɛ Zuifu’m be like klefuɛ’m be waan bé mánmán sran kun’n, be se kɛ ɔ ti “kpa.” I sɔ’n ti yɛ gbanflɛn’n seli Zezi sɔ-ɔ. Kannzɛ bɔbɔ Zezi si like kle kpa’n, ɔ seli gbanflɛn’n kɛ Ɲanmiɛn ngunmin yɛ ɔ ti ‘kpa-ɔ.’

Zezi seli i kɛ: “Sanngɛ kusu sɛ a klo kɛ á ɲán nguan’n, fa Ɲanmiɛn i mmla’m be su titi.” Yɛ gbanflɛn’n usɛli i kɛ: “?Ɲanmiɛn i mmla onin mun?” Zezi boli Mmla blu nga Ɲanmiɛn mannin Izraɛlifuɛ mun’n, be nun nnun su kleli i. Mmla sɔ’m be kan sran kunlɛ nin be yi bo bla kunndɛlɛ annzɛ be wun bo bian kunndɛlɛ’n be ndɛ. Asa ekun’n, be kan awie wualɛ nin sran suɛn tɔnlɛ, ɔ nin be si nin be nin be sran bulɛ’n be ndɛ wie. I sin’n, ɔ boli mmla cinnjin kpa kun su kleli i ekun. Ɔ seli i kɛ: “Klo ɔ wiengu kɛ a fa klo ɔ bɔbɔ wun’n sa.”​—Matie 19:17-19.

Gbanflɛn’n seli Zezi kɛ: “Kɛ ɔ fɛ i min kaan nun lele’n, n nian mmla sɔ’m be kwlaa be su n nanti. ?Ngue ekun yɛ ɔ ka-ɔ?” (Matie 19:20) Atrɛkpa’n, gbanflɛn’n seli i wun kɛ like kpa wie o lɛ m’ɔ nin-a yoman-ɔn. Atrɛkpa’n, ɔ bu i kɛ ɔ fata kɛ ɔ yo sa dan kun naan w’a kwla ɲan nguan m’ɔ leman awieliɛ’n. Zezi “kloli [gbanflɛn sɔ’n] i sa.” Afin ɔ wunnin kɛ ndɛ sɔ’n ti i cinnjin sakpa. (Marki 10:21) Sanngɛ like kun tanndan gbanflɛn sɔ’n i ɲrun.

Yɛle kɛ ɔ klo i sa nun ninnge’m be dan. I sɔ’n ti’n, Zezi seli i kɛ: “Like kun o lɛ’n, a nin-a yoman. Ko yo ɔ sa nun ninnge’m be atɛ naan fɛ i sika’n man yalɛfuɛ mun, yɛ á ɲán like kpa ɲanmiɛn su lɔ. Kpɛkun bla naan su min su.” Gbanflɛn sɔ’n kwla fɛ i sika cɛcɛ yalɛfuɛ mun, afin be liɛ’n be leman wie naan se kɛ bé yí bé mɛ́n i. Kpɛkun i sin’n, ɔ fata kɛ ɔ su Zezi su. Sanngɛ gbanflɛn’n jasoli naan w’a ɔ. Kɛ ɔ́ kɔ́’n, i ɲrun’n ti mlanwa. Nanwlɛ, ɔ yoli Zezi i annvɔ dan. Klolɛ mɔ gbanflɛn sɔ’n klo i “ninnge kpanngban” mun ti’n, w’a wunmɛn i wlɛ kɛ aɲrunɲan like kpa kun yɛ Zezi fa sieli i ɲrun lɛ-ɔ. (Marki 10:21, 22) I sɔ’n ti’n, Zezi seli kɛ: “Ɲanmiɛn i Famiɛn diwlɛ’n i nun wlulɛ’n wá yó kekle mán sikafuɛ mun-o!”​—Liki 18:24.

Ndɛ nga Zezi kannin’n boli i sɔnnzɔnfuɛ’m be nuan. Ndɛ ng’ɔ kan guali su’n boli be nuan wie. Afin ɔ seli kɛ: “Nanwlɛ, ɲɔnngɔnmɛn kun i dɔluwa buɛ nun sinlɛ’n ti pɔpɔ tra kɛ aɲanbeunfuɛ kun wlu Ɲanmiɛn i Famiɛn diwlɛ’n nun’n.” I sɔ’n ti’n, i sɔnnzɔnfuɛ’m be usali kɛ: “?Wan yɛ ɔ́ kwlá fíte nun-ɔn?” ?Kɛ sran ti ɲanlɛ’n ti kekle sa? Zezi niannin be siin naan w’a tɛ be su kɛ: “Ninnge nga klɔ sran’m be kwlá yoman’n, Ɲanmiɛn liɛ’n ɔ kwla yo.”​—Liki 18:25-27.

Piɛli seli kɛ i bɔbɔ nin Zezi i sɔnnzɔnfuɛ onga’m be liɛ’n, b’a yoman kɛ gbanflɛn aɲanbeunfuɛ’n sa. Ɔ seli Zezi kɛ: “Nian! Y’a yaci like kwlaa y’a su ɔ su. ?Ɔ maan ngue yɛ é ɲɛ́n i-ɔ?” Zezi seli kɛ i sɔnnzɔnfuɛ’m bé ɲán ajalɛ kpa mɔ be fali’n, i su like kpa. Ɔ seli kɛ: “Kɛ bé wá bó ninnge’m be uflɛ’n, mɔ Sran wa’n wá trɛ́n i famiɛn bia m’ɔ le ɲrun’n su’n, amun mɔ an suli min su’n, amún wá trán famiɛn bia blu-nin-nɲɔn (12) mɔ be le ɲrun’n be su, amún dí Izraɛli akpasua blu-nin-nɲɔn (12) mun be jɔlɛ.”​—Matie 19:27, 28.

Blɛ nga Ɲanmiɛn wá bó ninnge’m be uflɛ’n, mɔ mɛn’n wá yó klanman kɛ laa Edɛnin fie’n sa’n, i ndɛ yɛ Zezi su kan-ɔn. Ɲanmiɛn yó maan Piɛli nin Zezi i sɔnnzɔnfuɛ onga’m be nin Zezi bé síe Mɛn klanman sɔ’n i nunfuɛ mun. Ɲanmiɛn yó sɔ fá yó be mo. Mo nga bé yó be sɔ’n, ɔ́ trá be ɲin nga be miannin’n leleele!

Nán be ɲrun lɔ ngunmin yɛ Zezi i sɔnnzɔnfuɛ’m bé ɲán ye-ɔ. Zezi seli kɛ: “Sran kwlaa nga Ɲanmiɛn i Famiɛn diwlɛ’n ti’n, ɔ yacili i awlo, annzɛ i yi, annzɛ i niaan, annzɛ i si nin i nin, annzɛ i wa’n, ɔ́ ɲɛ́n i kwlaa sɔ’n kpanngban kpa ekun blɛ nga e o nun yɛ’n nun. Kpɛkun mɛn ng’ɔ́ bá lɔ’n nun’n, ɔ́ ɲán nguan m’ɔ leman awieliɛ’n.”​—Liki 18:29, 30.

Nanwlɛ, lika kwlaa nga Zezi i sɔnnzɔnfuɛ’m be kɔ’n, be nin be wiengu Zoova sufuɛ’m be kwla tra janvuɛ kpa. Asa ekun’n, be nin be be afiɛn kwla mantan kpa tra be osufuɛ mun bɔbɔ. Sanngɛ ye dan sɔ’n su wa sin gbanflɛn aɲanbeunfuɛ sɔ’n i sin. Asa kusu’n, ɔ su kwlá wluman Ɲanmiɛn i Famiɛn diwlɛ’n nun wie.

Zezi seli ekun kɛ: “Sanngɛ be nga be dun mmua’n, be nun kpanngban bé wá ká siɛn, yɛ be nga be ka siɛn’n, bé dún mmua.” (Matie 19:30) ?Ndɛ sɔ’n i bo’n yɛle benin?

Gbanflɛn aɲanbeunfuɛ’n ti Zuifu’m be sran dan kun. I sɔ’n ti’n, ɔ o ‘be nga be dun mmua’n’ be nun wie. Kɛ m’ɔ nanti Ɲanmiɛn i mmla’m be su’n ti’n, ɔ kwla ɲan ye Ɲanmiɛn i sa nun. Sanngɛ i ninnge ng’ɔ le be’n be ti i cinnjin tra like kwlaa. Nvlefuɛ’m be liɛ’n, be bu like nga Zezi kle’n i nanwlɛ. Asa ekun’n, be lafi su kɛ like nga Zezi kle’n kwla man sran nguan. Kɛ ɔ fɛ i bo bolɛ’n nun lele be blɛ liɛ’n nun’n, be yɛ be ti ‘be nga be ka siɛn’n’ niɔn. Be kwla lafi su kɛ be nin Zezi bé trán famiɛn bia’m be su ɲanmiɛn su lɔ. Kpɛkun bé síe be nga bé trán Mɛn klanman’n nun asiɛ’n su’n.