Minin blu’n be su ndɛ’n

Kɛ Zezi nin i sɔnnzɔnfuɛ’m bé kɔ́ Zerizalɛmun’n, be jrannin Zase i awlo lɛ kan. Atrɛkpa’n, be te o lɛ. Zezi i sɔnnzɔnfuɛ’m be buli i kɛ Ɲanmiɛn su wa tɛkɛ i “Famiɛn diwlɛ’n” naan Zezi su wa di famiɛn. (Liki 19:11) Sanngɛ kɛ nga b’a wunmɛn i wlɛ kɛ ɔ fata kɛ Zezi wu’n sa’n, b’a wunman Ɲanmiɛn i Famiɛn dilɛ’n i su ndɛ’n i wlɛ wie. I sɔ’n ti’n, Zezi kannin ndɛ kun ɲanndra nun kleli be naan be wun i wlɛ kɛ Ɲanmiɛn su tɛkɛmɛn i Ɲanmiɛn i Famiɛn diwlɛ’n blɛ sɔ’n nun.

Ɔ seli kɛ: “Bian kun m’ɔ ti wlengbifuɛ’n su kɔ mɛn kun m’ɔ o mmuammua kpa’n i nun naan be ko sie i famiɛn.” (Liki 19:12) Bian sɔ’n wá cɛ́ lɔ kpa. ‘Bian m’ɔ ti wlengbifuɛ’n,’ yɛle Zezi. Ɔ su kɔ “mɛn kun m’ɔ o mmuammua kpa’n i nun,” yɛle kɛ ɔ́ wá kɔ́ ɲanmiɛn su, kpɛkun i Si wá síe i famiɛn.

Ka naan “wlengbifuɛ’n” w’a ɔ’n, ɔ flɛli i junman difuɛ blu’n. Kpɛkun ɔ mannin be tinuntinun minin naan w’a se be kɛ: “Amun fa di aata lele fa ju min balɛ.” (Liki 19:13) Minin’n ti sika dan kpa. Afin kɛ sran kun di fie su junman anglo lele nsan’n, minin kun yɛ be fa tuɛ i kalɛ-ɔ.

Atrɛkpa’n, Zezi i sɔnnzɔnfuɛ’m be wunnin i wlɛ kɛ be ti kɛ junman difuɛ blu nga Zezi kannin be ndɛ’n sa. Afin cɛn kun’n, ɔ fali be sunnzunnin fie su ninnge kpɛfuɛ. (Matie 9:35-38) W’a seman kɛ maan be kpɛkpɛ fie su ninnge jrɛiin sa be fa blɛ i. Sanngɛ ɔ su se be kɛ maan be uka sran mun naan be kaci i sɔnnzɔnfuɛ wie. Sran sɔ’m bé dí famiɛn Ɲanmiɛn famiɛn diwlɛ’n nun. Zezi i sɔnnzɔnfuɛ’m bé fá be blɛ’n nin be wunmiɛn’n, ɔ nin be sa nun ninnge’n kwlaa bé kúnndɛ sran sɔ mun.

?Ngue yɛ Zezi kunndɛ kɛ ɔ́ fá be ɲin síe su ekun-ɔn? Ɔ seli kɛ: “[Wlengbifuɛ] sɔ’n i nvle nunfuɛ’m be kpɔ i. Ɔ maan be sunmannin sran naan be ko se kɛ: ‘E kunndɛman kɛ bian nga yo e su famiɛn.’” (Liki 19:14) Zezi i sɔnnzɔnfuɛ’m be si kɛ Zuifu’m be kloman Zezi i sa. Be wie’m be kunndɛ kɛ bé kún i bɔbɔ. Kɛ Zezi wá wú m’ɔ́ kɔ́ ɲanmiɛn su’n, Zuifu’m bé wá yí i nglo kɛ be kpɔ i kpa. Yɛle kɛ bé klé i sɔnnzɔnfuɛ’m be ɲrɛnnɛn. Ɔ maan i kpɔfuɛ sɔ’m bé klé weiin kɛ be kunndɛman kɛ Zezi sie be.​—Zan 19:15, 16; Sa Nga Be Yoli’n 4:13-18; 5:40.

?Ka naan “wlengbifuɛ’n” mɔ be ko ‘sieli i famiɛn’n’ w’a sɛ i sin’n, ngue yɛ junman difuɛ blu’n be fali be minin’m be yoli-ɔ? Zezi waan: “Kɛ be sieli i famiɛn m’ɔ bali’n, ɔ flɛli i junman difuɛ ng’ɔ mannin be sika’n, naan ɔ́ sí sika nga be ɲɛnnin i aata dilɛ nun’n. Be nun klikli’n wunngeli i wun lɔ naan w’a se kɛ: ‘Min min, minin kun mɔ a fa mannin min’n, w’a ju minin blu.’ Ɔ seli i kɛ: ‘Nja mo, a ti junman difuɛ kpa! A kleli kɛ be kwla lafi ɔ su like kaan nun. Á wá síe klɔ blu.’ Be nun kun ekun bali wa seli i kɛ: ‘Min min, minin kun mɔ a fa mannin min’n, w’a ju minin nnun.’ Ɔ seli i kɛ: ‘Ɔ kusu á wá síe klɔ nnun.’”​—Liki 19:15-19.

Sɛ Zezi i sɔnnzɔnfuɛ’m be yo kɛ junman difuɛ blu’n be sa’n, i klun jɔ́ be wun. I sɔ’n ti’n, ɔ fata kɛ be fa be blɛ’n nin be wunmiɛn’n, ɔ nin be sa nun ninnge’n kwlaa be uka sran mun naan be su Zezi su. Sɛ be yo sɔ’n, be kwla lafi su kɛ ɔ su kaman ngbɛn, afin Zezi wá yó be mo. Zezi i sɔnnzɔnfuɛ’m be kwlaa be su sa’n timan kun, yɛ be kwlaa be wunmiɛn’n timan kun. Sanngɛ kɛ mɔ be miannin be ɲin be ukali sran mun naan be kaci Zezi i sɔnnzɔnfuɛ’n ti’n, ɔ́ yrá be su. Blɛ nga ‘bé wá síe i famiɛn’n,’ yɛ ɔ́ yó i sɔ liɛ’n niɔn.​—Matie 28:19, 20.

Zezi seli ekun kɛ: “Sanngɛ [junman difuɛ’m] be nun kun bali wa seli i kɛ: ‘Min min, ɔ minin’n yɛ ɔ o yɛ. N fa fiɛli i tannin kun nun. Nanwlɛ, n sro wɔ, afin ɔ like yolɛ yo ya. Sika nga nán wɔ yɛ a sieli i banki nun’n, a ko fa. Yɛ like nga nán wɔ yɛ a luali’n, a ko titi i su mma.’ Ɔ seli i kɛ: ‘Junman difuɛ klunwifuɛ, ndɛ ng’ɔ fin ɔ nuan fiteli lɛ’n, yɛ ń fá bú ɔ fɔ-ɔ. A si kpa kɛ min like yolɛ yo ya, yɛ sika nga nán min yɛ n fa sieli i banki nun’n, yɛ n fa-ɔ. Asa kusu a si kɛ like nga nán min yɛ n luali’n, n ko titi. ?Nɛ́n i-ɔ? ?Mɔ a si sɔ’n niɔn, ngue ti yɛ w’a faman min sika’n w’a siemɛn i banki kun nun naan sɛ n ba’n, m’an fa min sika’n ɔ nin i su nvasuɛ’n niɔn?’ Ɔ maan, ɔ seli be nga be jinjin lɛ’n be kɛ: ‘An de minin ng’ɔ o i sa nun’n, an fa man sran ng’ɔ le minin blu’n.’”​—Liki 19:20-24.

Junman difuɛ sɔ’n w’a fɛmɛn i min’n i famiɛn diwlɛ’n nun aɲanbeun like’n, w’a yoman like fi naan w’a ba nun. Ɔ maan be deli like sɔ’n i sa nun. Zezi i akoto’m be kunndɛli kpa kɛ Zezi bo famiɛn dilɛ’n i bo Ɲanmiɛn i Famiɛn diwlɛ’n nun. Ɔ maan ndɛ ng’ɔ kɛnnin i junman difuɛ kasiɛn’n su’n ti’n, be wunnin ndɛ kun wlɛ. Yɛle kɛ sɛ be tuman be klun be diman junman ng’ɔ fa mannin be’n, be su diman famiɛn’n wie.

Zezi i ndɛ’n wlali be fanngan kɛ be tu be klun kpa be di Ɲanmiɛn junman’n. Kɛ ɔ́ gúɛ i ndɛ’n i bo’n, ɔ seli kɛ: “Ń kán klé amun kɛ, sran kwlaa ng’ɔ le like’n, bé mɛ́n i wie ekun úka laa liɛ’n su. Sanngɛ sran ng’ɔ leman like’n, like kaan ng’ɔ le i bɔbɔ’n, bé dé i sa nun.” Ɔ seli ekun kɛ bé kún i kpɔfuɛ mɔ be kunndɛman kɛ ‘ɔ yo be su famiɛn’n.’ I sin’n, Zezi fɛ i lɛ ɔli Zerizalɛmun. ​—Liki 19:26-28.