Farizifuɛ’m be usali aɲinsifuɛ mɔ Zezi tikeli i ɲinma’n i ndɛ

Zezi tikeli bian mɔ laa ɔ ti aɲinsifuɛ’n i ɲinma. Sanngɛ Farizifuɛ’m b’a faman i sɔ liɛ’n su. Ɔ maan be flɛli bian’n i si nin i nin naan bé úsa be sa. Be kusu be si kɛ sɛ b’a nianman be wun kpa’n, Farizifuɛ’m bé ‘fúan be Ɲanmiɛn sulɛ sua’n nun.’ (Zan 9:22) Sɛ be fuan be kusu’n, ɔ su yoman kpa manman be mlɔnmlɔn. Yɛle kɛ be wiengu Zuifu’m be su faman be wun mantanman be kun. Kpɛkun sika ndɛ mían be sa.

Farizifuɛ’m be usali bian’n i si nin i nin be ndɛ nɲɔn. Be usali be kɛ: “?Amun wa mɔ amun waan kɛ amún wú i’n ɔ ti aɲinsifuɛ’n, yɛle bian nga? ?Ɔ yo sɛ ti yɛ siɛn’n ɔ wun ase-ɔ?” Bian’n i si nin i nin be tɛli su kɛ: “E si kɛ e wa’n niɔn. E wuli i aɲinsifuɛ. Sanngɛ kɛ ɔ́ yó m’ɔ́ wún ase yɛ’n, e siman nun ndɛ.” Sɛ i li bɔbɔ ba’n yiyili ndɛ’n nun kleli i si nin i nin’n, sanngɛ kɛ bé tɛ́ Farizifuɛ’m be su’n, be sasali be ti. Be seli kɛ: “Amun usɛ i. Nán bakan yɛle i. Maan ɔ kɛn i bɔbɔ i ti ndɛ.”​—Zan 9:19-21.

Farizifuɛ’m be flɛli bian mɔ laa’n ɔ ti aɲinsifuɛ’n ekun, kpɛkun be wlɛnwlɛnnin i. Be yoli kɛ be si Zezi i su ndɛ wie m’ɔ timan kpa’n sa. Be seli i kɛ: “Yi Ɲanmiɛn i ayɛ, yɛ di nanwlɛ. E si kɛ bian sɔ’n ti sa tɛ yofuɛ.” Sanngɛ bian’n w’a faman be ndɛ sɔ’n su. Ɔ maan ɔ tɛli be su kɛ: “Sɛ ɔ ti sa tɛ yofuɛ’n, n siman nun ndɛ. Min liɛ nga n si i’n, yɛle kɛ laa n ti aɲinsifuɛ, sanngɛ siɛn’n n wun ase.”​—Zan 9:24, 25

Sanngɛ Farizifuɛ’m b’a kaman ngalɛ’n su. Be seli i kɛ: “?Ngue yɛ ɔ yoli wɔ-ɔ? ?Ɔ yoli ɔ sɛ yɛ ɔ ɲinma’n tikeli-ɔ?” Bian’n tɛli be su yakpa su. Ɔ seli kɛ: “M’an dun mmua m’an kan kle amun. Sanngɛ amun a faman su. ?Ngue ti yɛ amun kunndɛ kɛ amún tí i ekun? ?Amun kunndɛ kɛ amún káci i sɔnnzɔnfuɛ wie ti-ɔ?” Kɛ ɔ kannin sɔ’n, Farizifuɛ’m be fali ya dan kpa. Be seli kɛ: “Wɔ yɛ a ti bian sɔ’n i sɔnnzɔnfuɛ-ɔ. E liɛ’n, e ti Moizi i sɔnnzɔnfuɛ. E si kɛ Ɲanmiɛn kannin ndɛ kleli Moizi. Sanngɛ bian nga liɛ’n, e simɛn i finwlɛ.”​—Zan 9:26-29.

Bian mɔ laa’n ɔ ti aɲinsifuɛ’n seli be kɛ: “Ng’ɔ ti abonuan bɔbɔ’n yɛ ɔ o lɛ-ɔ. Amun simɛn i finwlɛ. Kusu nn ɔ tikeli min ɲinma’n.” I sin’n, ɔ kannin sran nga Ɲanmiɛn klun jɔ i wun’n, ɔ nin sran nga Ɲanmiɛn klun jɔmɛn i wun’n be ndɛ weinwein. Ɔ seli be kɛ: “E si kɛ Ɲanmiɛn siemɛn i su sa tɛ yofuɛ’m be nuan bo, sanngɛ sran kwlaa ng’ɔ sro i’n, m’ɔ yo i klun sa’n, ɔ sie i su sran sɔ’n i nuan bo. Kɛ ɔ fɛ i laa lele andɛ’n, e nin-a timɛn i le kɛ sran kun sa w’a tike sran kun mɔ be wuli i aɲinsifuɛ’n i ɲinma le.” Kpɛkun ɔ guɛli i ndɛ’n i bo seli kɛ: “Sɛ nán Ɲanmiɛn yɛ ɔ sunmannin bian nga’n, nn ɔ kwlá yoman like fi.”​—Zan 9:30-33.

Bian’n i ndɛ’n ti weiin. Ɔ maan Farizifuɛ’m be kwlá siman su akplowa kun. I sɔ’n ti’n, be kpɛli i nzowa. Be seli i kɛ: “?Wɔ mɔ sa tɛ’n nun yɛ be wuli wɔ’n, wɔ yɛ a su kle e like-ɔ?” I sin’n, be kɛnnin i bo.​—Zan 9:34.

Zezi tili sa ng’ɔ juli’n i nun ndɛ. Kɛ ɔ wunnin bian’n, ɔ usɛli i kɛ: “?A lafi Sran wa’n su?” Bian’n tɛli i su kɛ: “?Baba, wan yɛle sran sɔ’n? Kle min maan n lafi i su wie.” Zezi yili i wun nglo kleli i seli i kɛ: “A wunnin i. Sran bɔbɔ nga ɔ nin wɔ be su ijɔ yɛ’n niɔn.”​—Zan 9:35-37.

Bian’n seli Zezi kɛ: “Min Min, n lafi i su.” I sin’n, ɔ kotoli i bo kleli i kɛ ɔ bu i sran naan ɔ lafi i su dan. Kpɛkun Zezi seli kɛ: “N bali mɛn nga nun naan ninnge nga n yo be’n be ti’n, be nga be wunman ase’n be wun ase, naan kusu be nga be wun ase’n be kaci aɲinsifuɛ.”​—Zan 9:38, 39.

Kɛ ɔ́ yó sɔ’n, nn Farizifuɛ wie’m be o lɛ. Be si kɛ be timan aɲinsifuɛ. Sanngɛ be buli i kɛ Zezi su kan be ndɛ, naan ɔ su se kɛ be kleman sran’m be atin. Ɔ maan be usali kɛ: “?E kusu e ti aɲinsifuɛ wie?” Zezi tɛli be su kɛ: “Sɛ ɔ ti kɛ amun ti aɲinsifuɛ’n, nn amun timan sa tɛ yofuɛ. Sanngɛ amun se kɛ, ‘E wun ase.’ Ɔ maan amun sa tɛ’n ká amun wun.” (Zan 9:40, 41) Sɛ ɔ ti kɛ Farizifuɛ’m be timan like klefuɛ Izraɛli lɔ sa yɛ be yili Mesi’n i blo’n, nn i sɔ’n su boman sran nuan. Sanngɛ be si Mmla’n. Ɔ maan Mesi’n i blo mɔ be yili’n, sa tɛ dan yɛ be yoli-ɔ.