Bua Tafuɛ Kpafuɛ’n nin bua tuin mun

Zezi te kle sran’m be like Zide mɛn’n nun lɔ. Siɛn’n, like ng’ɔ su wa fɛ i ndɛ tiefuɛ’m be ɲin sie su’n, yɛle bua nin bua tuin mun. Be si ninnge sɔ mun kpa. Sanngɛ nán bua nin bua tuin jrɛiin sa yɛ ɔ su wa kan be ndɛ-ɔ. Ɲanndra nun ndɛ-ɔ. Atrɛkpa’n, Zezi i ndɛ sɔ’n yoli maan Zuifu’m be wla kpɛnnin ndɛ kun m’ɔ Davidi kannin’n su. Ɔ seli kɛ: “N ti kɛ bua sa, Anannganman yɛ ɔ nian min su-ɔ. Like fi su mian-man min. Ɔ maan n de wunmiɛn lika bɔ ijre nɔnman o lɛ’n nun.” (Jue Mun 23:1, 2) Asa ekun’n, Davidi seli kɛ: “Maan e koto e ja bue’n su, maan e koto e utu e nyin ase Anannganman b’ɔ yili ye’n i bo. Afin i yɛ ɔ ti e Nyanmiɛn nin-ɔn. E ti kɛ i kuku nun nnɛn mun sa.” (Jue Mun 95:6, 7) Kɛ ɔ fin cɛn mɔ Zoova fali Mmla’n mannin Izraɛlifuɛ mun’n, be ti kɛ bua fa kun sa.

“Bua” sɔ’m be o ‘bua tuin’ kun nun. Afin kɛ bé wú be’n, nn be te di Moizi Mmla’n su. Mmla sɔ’n ti kɛ klangla wie sa. Ɔ o Izraɛlifuɛ mun nin nvle kun nga’m be afiɛn. Ɔ maan ɔ sasa Izraɛlifuɛ mun nvle sɔ’m be ayeliɛ tɛtɛ’m be lika. Sanngɛ Izraɛlifuɛ wie’m be kleli Ɲanmiɛn i bua fa’n i yalɛ. Zezi seli kɛ: “Nanwlɛ, ń kán klé amun kpa kɛ sran ng’ɔ́ wlú bua’m be tuin’n nun-ɔn, ɔ sinman anuan’n nun m’ɔ fu lika uflɛ jra lɔ’n, sran sɔ’n ti awiefuɛ, yɛ ɔ ti kakajefuɛ. Sanngɛ sran ng’ɔ sin anuan’n nun’n, sran sɔ’n yɛ ɔ ti bua’m be tafuɛ’n niɔn.”​—Zan 10:1, 2.

Atrɛkpa’n, sran’m be buli i kɛ Zezi su kan be nga be tɔn be wun suɛn kɛ be ti Mesi annzɛ Klisi’n be ndɛ. Sɛ be buli i sɔ’n, ɔ ti su. Afin sran sɔ’m be ti kɛ awiefuɛ nin kakajefuɛ sa. Ɔ fataman kɛ sran fi su sran kɛ ngalɛ sa’n be su. Sanngɛ “bua’m be tafuɛ’n” yɛ ɔ fata kɛ be su i su-ɔ. Ndɛ nga Zezi kɛnnin i bua’m be tafuɛ sɔ’n su’n yɛ:

“Anuan sunianfuɛ’n tike i anuan, kpɛkun bua’m be ti i aniɛn’n. Ɔ fa be dunman flɛflɛ be, kpɛkun ɔ fa be fite. Kɛ ɔ fa be kwlaa fite’n, ɔ dun mmua be ɲrun, kpɛkun bua’m be su i su, afin be si i nɛn’n. Be su suman aofuɛ su mlɔnmlɔn. Sanngɛ bé wánndi i, afin be siman aofuɛ’m be nɛn’n.”​—Zan 10:3-5.

Laa’n, Zan Batɛmun yofuɛ’n yoli kɛ anuan sunianfuɛ sa. Zan seli kɛ Zezi yɛ ɔ ti sran ng’ɔ fata kɛ be nga be ti kɛ bua sa’n, be su i su’n niɔn. Sran sɔ’m be nun wie’m be o Galile mɛn’n nun lɔ, yɛ be nun wie’m be o Zide mɛn’n nun lɔ. Be sili Zezi i nɛn’n. ?Sɛ ɔ fa be fite’n, ninfan yɛ ɔ́ fá be kɔ́-ɔ? ?Yɛ sɛ be su i su’n, ngue yɛ bé ɲɛ́n i-ɔ? Kɔlɛ’n, ndɛ nga Zezi kɛnnin i ɲanndra nun lɛ’n ti’n, i ndɛ tiefuɛ wie’m be usali be wun ndɛ wie mun. Afin “b’a wunman ndɛ ng’ɔ su kan kle be’n i wlɛ.”​—Zan 10:6.

Zezi yiyili i ndɛ’n nun. Ɔ seli kɛ: “Nanwlɛ, ń kán klé amun kpa kɛ min yɛ n ti anuan mɔ bua’m be sin nun’n niɔn. Be kwlaa nga be bali mɔ be waan min yɛle be’n, be ti awiefuɛ nin kakajefuɛ. Yɛ bua’m b’a sieman be su be ndɛ’n i bo. Min yɛ n ti anuan’n niɔn. Sran kwlaa ng’ɔ sin min nun’n, ɔ́ ɲɛ́n i ti. Sran sɔ’n, ɔ́ wlú, ɔ́ fíte, kpɛkun ɔ́ ɲán didiwlɛ.”​—Zan 10:7-9.

Ndɛ uflɛuflɛ yɛ Zezi su kan kle be lɛ-ɔ. Be ng’ɔ su kan ndɛ kle be’n, be si kɛ nɛ́n i yɛ ɔ ti aenguɛ laa’n i nun jranfuɛ’n niɔn. Ɔ maan ɔ su se kɛ bua ng’ɔ ‘fa be fite’n,’ bé wlú bua tuin uflɛ kun nun. ?Yɛ ngue yɛ sɛ be wlu nun’n, bé ɲɛ́n i-ɔ?

Kɛ Zezi yíyí junman ng’ɔ́ wá dí’n nun ekun’n, ɔ seli kɛ: “Min liɛ’n, n bali be nguan manlɛ naan be nguan ɲanman’n yo tɛnndɛn. Min yɛ n ti bua tafuɛ kpafuɛ’n niɔn. Bua’m be ti’n, bua tafuɛ kpafuɛ’n fɛ i nguan’n man.” (Zan 10:10, 11) I osu nin-a cɛman, kɛ Zezi wlɛ́ i sɔnnzɔnfuɛ’m be fanngan’n, ɔ seli be kɛ: “Amun mɔ amun ti bua akpasua kaan’n, nán srɛ kun amun. Afin amun Si’n fali Famiɛn dilɛ’n wlali amun sa nun.” (Liki 12:32) Be nga be o “bua akpasua kaan’n” nun’n, be yɛ Zezi fá be wlú bua tuin uflɛ kun nun’n niɔn. I liɛ’n, bé kwlá ɲán ‘nguan naan be nguan ɲanman’n yo tɛnndɛn.’ Nanwlɛ, be nga be ti bua fa sɔ’n i nunfuɛ wie’n, be liɛ su ti yɛ!

Sanngɛ nɛ́n i ngba-ɔ. Zezi seli ekun kɛ: “N le bua wie mun ekun. Be nunman tuin nga nun. Ɔ fata kɛ n fa be n bla naan be ti min nɛn’n wie. Kpɛkun bé yó bua fa kun, yɛ be tafuɛ’n yó kun.” (Zan 10:16) “Bua wie mun ekun” nga be kan be ndɛ lɛ’n, be “nunman tuin nga nun.” Yɛle kɛ tuin nga be o nun lɛ’n, ɔ nin tuin nga “bua akpasua kaan’n” i nunfuɛ’m be wo nun’n, be timan kun. “Bua akpasua kaan’n” i nunfuɛ’m be liɛ’n bé dí famiɛn ɲanmiɛn su lɔ. I sɔ’n kle kɛ ɔ le bua tuin kun nin i like liɛ mɔ bé fá mɛ́n i-ɔ. I kwlaa yoli-o, tuin nɲɔn sɔ’m be nun bua’m bé ɲán junman nga Zezi wá dí’n i su ye wie. Zezi seli kɛ: “I sɔ’n ti yɛ Siɛ’n klo min sa’n niɔn. Afin n fa min nguan’n n man.”​—Zan 10:17.

Sran nga be o lɛ’n, be nun sunman be seli kɛ: “Mmusu kun kle i yalɛ. I ti w’a saci.” Sanngɛ sran wie’m be kleli kɛ Zezi i ndɛ’n ti be cinnjin kpa naan be kunndɛ kɛ bé sú Bua tafuɛ kpafuɛ’n sɔ’n su. Be seli kɛ: “Sran nga mmusu kle i yalɛ’n, ɔ kanman ndɛ kɛ nga sa. ?Mmusu kwla tike sran ɲinma?” (Zan 10:20, 21) Bian nga kɛ bé wú i’n, nn ɔ ti aɲinsifuɛ’n mɔ Zezi yoli maan ɔ wunnin ase’n, i ndɛ yɛ be su kan-ɔn.